اخر اخبار البعارين من استراليا

[راعي البقشه]

يذكرون ان استراليا بدت تصدّر " بعارين " للسعوديه هالايام ولعنبوا
ابليسهم هالحين مالّين من بعارينا وبلشين ٍ بهم فيروّحون لنا زود ، عمى !! ورى مايروّحون لنا كناغرعلى الاقل كانهم صاملين
ويصدّر "اتحاد تجارة الجمال " في وسط أستراليا " بعارين لدول واجد منها
الاردن والكويت والامارات والسعوديه ،

ويقول اتحاد تجاره الجمال
ان ارسال الجمال للملكه يعتبر تقدم كبير ومكسب ، وأقول لهم مهوب على كل حال هذا الاتحاد السعودي قال
ان تأهلنا لكأس العالم " يعتبر تقدم كبير ومكسب " ودجّوا دجة ٍ مافيها ملح و صار اردى لهم ،
ويقولون ان هالبعارين اللي روّحناها للسعوديه يبي يذبحون أكثرها !

وشكلهم مستغربين مررررة ومعذورين والله بلاهم ما بعد جرّبوا
" كبدة الحاشي " اذا حِطّ معها شويّ شطه والا لوّهم مجربينها والله مايروحون ولا بعير ،ويقولون بعد ان بعضها يبي يربّى وبعضها يبي يحلبونه وبعضها يبي يشاركون به في سباقات ،
ومادروا ان ثلاثة ارباع بعارينهم تبي تصدّم في هالخطوط اللي عندنا ،
و ان الربع الباقي يبي يروح لمحلات الكبده،
ويقول رئيس اتحاد البعارين حقهم انهم روّحوا لهم 100 راس ،
ويمكن ياصلن للسعويه الاسبوع الجاي ، وكودهم بس واسمينهن بوسم
استراليا عشان مايغدن ،
ويقولون بعد ان في أستراليا نصف مليون بعير محسّرات ٍ بهم وبحلين بهن ولايدرون وش يسوون بهن ،
وعزّ الله انهم دبش والا .. الأمر سهل أبد ياخذون " دورياتنا ومرورنا ويخلونهم يطبقون نفس قوانينهم عندهم "
وكلها شهر ولا 300 الف بعير مصدوم ومرتاحين منها ومرتاحين ٍ بعد من 300 الف استرالي ٍ رجاحه ،

لكم مني كل الحب والوفاء