شي يشب التسبد ..

[تعبت من السهر]

ما عندي رد اقوله لك

لكن تكفين فكينا من انانيتك وترا على فكره عقب مشاركتك هذي الله من وحده و وحده دعت عليك

تدرين ليش لانك ظلمتي المعلمه الله يجزاه خير حقه الترجمه وظلمتي البنات

ونصيحه مني احذفي الموضوع وتعوذي من ابليس احسنلك

[هلالية الرس]

انا اقترح على مدرسة الترجمة تحط اوراق وتكتب الي بيطورون انفسهم وطبعا كله خارجي

واوراق ثانية للي مقتنعين بانفسهم


هع هع هع هع

[pussy-cat]

والله يا انتم ما ينعرفلكم .. جتنا مدرسه سهله تقوووول ليش سهله ...

انا ماطالبت بمدرسه سهله او حتى تمنيت مدرسه سهله عشان اقول ليش جتنا مدرسه سهله !!!!!

يا اختي زعله لانك جاوبتي ...وش تبين ..تبين تطلعين من الامتحان و انتي دموعك اربع اربع ... حاسده نفسك ع النجاح ....الحمدالله و الشكر....

تبين الصراحه ايه زعلت لاني مااستفدت شي من دراستي اللي هي عباره عن نسخ ثم لصق ...

اي تطور اللي تبغينه يوم ما بقى الا سنه و تتخرجين ...

من قال اننا ماتطورنا بالسنوات الماضيه والفضل راجع لله ثم لبعض الاستاذات من بينهم الله يذكره بالخير الاستاذه سالي اللي كانت تراعي جميع المستويات (كانت تجيب 3 اسئله سؤال سهل وسؤال متوسط وسؤال صعب ) وايضا الاستاذه ماجده والاستاذه ريم اللي كانت تجيب ترجمه خارجيه (لاحظي على انها جايبه ترجمه خارجيه بس ماضركم هذاكم واصلين ثالث )مشاءالله << عشان ماتقولون عطتنا عين (:

استاذتنا مره تعامله حلو و طيبه و فوق كل شي تحترم الطالبات ....

مااختلف معك بهذي النقطه فهي عن جد استاذه راقيه

ما ودي احلف لو انه جايبه قطعه تصك الراس بصعوووبتها كان قلتي هذي ما ترحم و ارحموا من في الارض يرحمكم من في السماء و ...و .....و .... ....
احمدي ربك لا يقلب هالنعمه نقمه عليك .... و تذكري دايما ( و لئن شكرتم لأزيدنكم ) ....

اضمن لك من هالناحيه ماراح اقول هالكلام ابدا بالعكس ابطلع وانا مستانسه .. ع العموم كل واحد حر بنفسه وهذا رأيي

بالنسبه لطرق التدريس ما قصرت والله حذفت لمين قبل ..الله يوسع عليه ... و الحين يوم صارت دراستنا صح و تبغى تطووورنا و تعطينا مناهج مناسبه بما اننا طالبات جامعيات .. قلتي خلووها تحذف .. وش التناقض هذا مررره تقولين ليش سهله نبغى نتطووور و بعدين ليش تعطينا مناهج صح تطورنا و نحس اننا بجامعه خلوووها تحذف... ما يعجبك العجب ....

انتي شكلك مافهمتي علي .. من هرج البنات اعتقدت ان المنهج راح يكون فوق طاقتنا ولانقدر ندرسه بيوم واحد فلذلك طالبت بحذف بعض النقاط وللمعلوميه انا منزله الموضوع قبل الاختبار ندمت اني كتبت هالكلام لانه بصراحه دراسته خفيفه جدا واسئلة مدرسة المادة جدااااااا رائعه .. يعني تحسين جد انه اختبار تشغلين فيه مخك وتحلين مو نسخ ولصق استغفرالله ..

احمــــدي ربك و اشكريه تبين معلمه على كيفك تسوينه اله الكترونيه ...تحددين كمية المنهج و الاسئله بعد ...

انا ماطالبت بمدرسه الكترونيه انا طالبت بمدرسة عاديه .. فشغل المدرسة العاديه انه تراعي الفروق الفرديه بين الطالبات بس للاسف هذا شي ماشفناه باغلب المواد

جانا منهج جامعي قالت احذفوا و جتنا مدرسه سهله قالت خلوها صعبه ... شي ما يدخل العقل ....

اعتقد وضحت كلمي سابقا بما يخص هذي النقطه .. وبصراحه يعني وبدون زعل انتم دفعه مدلعه كل شي تبغونه يجيكم بالساهل ..


اختلاف بالرأي لايفسد للود قضيه ..

[pussy-cat]

أختي . .

إذا بتطورين نفسكـ ما يمنع . . بالعكس شيي حلو . .!

لكن المعتاد إن الواحد يعيش وضعه ووضع غيره . . . يعني إذا الله معطيك ..فكري باللي ما عطاهم ...

وإذا تبين تتطورين . . روحي أطلبيها أشيا خارجية . . . وصدقيني ما راح تتردد باعطائكـ كل ما يفيدكـ ..

بس صعب إنك تحكمين ع فرقة كاملة بأسئلة تناسبك . . . . وخاصة بالاختبار كل مقدرات الانسان تقف عاجزة . . . بحكم ظروف الاختبارات واجوائها!

: : : : : : : : :

اختي حمامة سلام ..

انا بنت خالي تدرس لغة انجليزية بكلية الرياض .. والله تضحك علينا تقول حنا من اول سنه وهم يعطوننا ترجمه خارجيه ووالله مو اي ترجمه انا شفته بعيوني القطعه صعبه جدا وهي الحين بالفرقة الثانيه وكم الكلمات اللي عندها اكثر مني .. هذا الشي مايقهر

هذا شي اساسي بقسم اللغه الانجليزيه ان الترجمه تصير خارجيه بس كليتنا مسويه لها قوانين خاصه .. واللي مو قد هالشي ليش اساسا تدخل انجليزي ؟؟ ليش تدخل وتخرب على غيرها اللي داخله من اجل التعلم .. وصعبه عليك اختي حمامة سلام انك تحكمين علينا وانتي مو من قسمنا ولاحتى بكليتنا .. بس تعالي واطلعي على مناهجنا والله تنهبلين تبي تحسبيننا بالرشاد من التحذيفات والفوضى اللي تصير عندنا بالقسم (:

اشكرك اختي على مداخلتك اللطيفه ..

[pussy-cat]

لو كنا من سنه اولى وحنا متطورين كان ماقلت شي بس يوم بقى سنه جيتي تطلبين خارجي

من قالك انه ماعمره جانا خارجي بالسنوات اللي فاتت ؟؟ الاستاذه ريم جايبه لنا قطعه خارجيه بسنه ثاني .. والا نسيتي !!!

طيب تخيلي معي مادة عربية ايا كانت اصول ثقافه عربي اخلاق المهم انه عربية وطبعا الكل يعرف العربيةوجاب لنا اسئلة خارجة مصيرك بتعصبين وتخانقين لانك ماقدرتي تجاوبين على سؤال خارجي نفس الترجمة فكري فيها

مافيه اي وجه شبه بين الاثنين !!!! يعني الترجمه ماله منهج اساسا والمفروض والواجب انه دايم يصير خارجي
اما الماده العربيه فلها منهج على اي اساس يجيب شي خارجي ؟؟؟؟

واكيد يااختي مافي احد ماوده ماينجح حتى انتي ودك تنجحين والحمدلله دام لغتك معجبتك ومقتنعه فيها يعني ماله داعي تتطور

الانسان من ولادته حتى مماته وهو يحتاج الى تطور .. يعني حتى لو لغتي معجبتني فمازلت مصره اني اطورها اكثر واكثر .. على عكس الناس اللي تبغى تمسك الشهاده ع الفاضي واذا سألتيها اي سؤال بالانجليزي ماتقدر ترد عليك .. ليش ؟؟ .. لانها ماتعرف انجليزي ..

[pussy-cat]

الله يعينك يابنات وتتخرجون...

امين .. مشكوره اختي

[pussy-cat]

ما عندي رد اقوله لك

اجل هذا اللي تحت وشو ^_^

لكن تكفين فكينا من انانيتك وترا على فكره عقب مشاركتك هذي الله من وحده و وحده دعت عليك

ههههههههه سبحان الله تسمون هالشي انانيه والله مالاناني الاانتم اللي تبغون تحذيفات واختصارات وتخطيطات .. الى متى نطاولكم ؟
اذا ترضين على نفسك انك تخرجين وانتي ماتعرفين ولاشي بالانجليزي فأنا ماارضى .. وهذي ابسط حقوقي اني اتعلم ..

تدرين ليش لانك ظلمتي المعلمه الله يجزاه خير حقه الترجمه وظلمتي البنات

ظلمتها ؟؟؟؟؟؟ الله اكبر الحين قول الحق صار ظلم ؟؟

ونصيحه مني احذفي الموضوع وتعوذي من ابليس احسنلك

كاني اشم ريحة تهديد هههههه (:

والله اختي مافيه اي سبب يخليني احذف الموضوع .. بس مشكوره على مداخلتك (:

[pussy-cat]

انا اقترح على مدرسة الترجمة تحط اوراق وتكتب الي بيطورون انفسهم وطبعا كله خارجي

واوراق ثانية للي مقتنعين بانفسهم


هع هع هع هع

اقتراح رائع .. وش رايك تقترحينه على الاستاذه ؟؟

مشكوره على مداخلتك

[الدلفين الازرق]

خواتي الطالبات تبون اقولكم شي يشب التسبد بيجيكم حرمانات بالهبل لايليت كذا وبس الطالبة الي لها واسطه او يكلمهم واحد شخصيه يشلون عنها الحرمانات زي طالبه في قسم الفنون جاها حرمان بمكالمه من شخصيه مهمه انشال عنها الحرمان مالكم الا الدعاء على الظالمين

[جنون العاطفة]

الله يعينكم على كليـــــــــــــــه الرس... الصراحه مافيها شيء حلو...
ويسلمو على الموضوع...

[هلالية الرس]

والاستاذه ريم اللي كانت تجيب ترجمه خارجيه (لاحظي على انها جايبه ترجمه خارجيه بس ماضركم هذاكم واصلين ثالث )مشاءالله << عشان ماتقولون عطتنا عين (:

لاياحبيبتي كانت جايبه لنا داخلي وخارجي

واذا تبين اذكر ك كانت جايبه لنا بالداخلي مقاطع من اكثر من قطعه
كانت عباره عن رسالة وحاطه فيها كلمات وجمل كانت معنا داخلي

وبصراحه يعني وبدون زعل انتم دفعه مدلعه كل شي تبغونه يجيكم بالساهل ..

اجل انطقي مرة ثانية بثالث عشان تصيرين مع دفعه مو بالساهل غديك بعد تطورين

[pussy-cat]

خواتي الطالبات تبون اقولكم شي يشب التسبد بيجيكم حرمانات بالهبل لايليت كذا وبس الطالبة الي لها واسطه او يكلمهم واحد شخصيه يشلون عنها الحرمانات زي طالبه في قسم الفنون جاها حرمان بمكالمه من شخصيه مهمه انشال عنها الحرمان مالكم الا الدعاء على الظالمين

حسبنا الله وعم الوكيل .. الحين كل شي يمشي بالواسطه


مشكوره اختي