شايب له قصــــــــــة فيــها مثل...؟؟؟ تم حله من ( الوافي ابوصالح )

[ابو ماجد]

السلام عليكم ورحمة الله وبركاته

شايب له قصــــــــــة فيــها مثل..........حين يقدم لملــح يعــطي حصيل

والهوى ساقه على غير المــحل..........يم وضحى يافطن اخـطى الدليل

مع التحية والتقدير لكافة الزملاء

[الوافي ابوصالح]

السلام عليكم
صح لسانك اخوي ابو ماجد وش رايك (بصري الوضيحي)

[قلبي ابيض]

صح لسانك
وانا اتوقع نمر بن عدوان
وان شاءالله تصيب

[ملح الجريف]

هلا بك يابوماجد

والملح , هو ملح الجريف ...؟؟

طيب ولاهوب اللي يقولون ( حجرف ) ؟

[ابو ماجد]

اخوي الوافي

صح لسانك مليون وعاداتك ماشاء الله عليك

والمثل (زلقة حبة الشمري)

حبة الشمري كلها جت من “بصري الوضيحي” الشمري والقصة تقول:

ان بصري الوضيحي راح يحج ويتوب الى الله ..وان يتوب عن التغزل والغزل ..كونه مشهور بالغزل ..

وبعد كبر سنه نوى ان يتوب ..

طلب من ابنه لكي يحججه ... وبعد ما سعى وطاف طلب من ابنه ان يحب الحجر الاسود ..

ولكن الحجر الاسود كان مزدحم من الناس ...رجال ونساء ... والرؤوس متقاربه بعضها لبعض ..

فتزاحم معهم بصري وابنه .. وعندما وصل الى الحجر ويريد حبة الحجر ...

اعترض بينه وبين الحجر ...خد بنت جميله كانت تريد حبة الحجر ..

. وفي هذه اللحظه السريعه انبهر بصري الوضيحي من لمعان خد البنت وبدل مايحب الحجر

حب وجنة البنت ....فقالت له البنت حج حج ياشايب ...

. وحاول ولده أنه يرقع الموضوع قال هذا شايب تايه(مهذري) ..

.فخجل الوضيحي وقال يابعد حيي زلقت الحبة ابيها بالحجر وصارت فيك .


..وصار هذا مثل (ازلقت حبة الشمري)







وقال القصيدة :



التايه الي جاب بصري يقنه ... هيض جروح العود والعود قاضي



جينا نحب ونطلب الله جنه ... جنة نعيم يوم يابس الحاضي



ياليت كانت حبتي في معنه ... يوم العيون عن الخوامل غواضي



يامن يعاوني على وصف كنه ... اشقح شقاح ولاهق بالبياضي



الريح لازفرة ولاهي مصنه ... ريح النفل بمطمطمات الفياضي



نهدين للثوب الحمر شولعنه... حمر ثمرهن واقفات غضاضي



والخد ذابوح القلوب المرنه .... براق مزنٍ لاعق اللون ياضي



ياليت لو سني على وقم سنه ... بايام مابيني وبينه بغاضي



أيام جلد الذيب عندي محنه... نصبح وزرق الريش لهن إنتفاضي



ياجرح قلبي جرح وادي وطنه .... غر المزون اللي وطنه وفاضي



البيض قبلي محسنٍ عذبنه... ونمر على وضحى جرا له عراضي



والبيض كم ٍ واحد ٍ يبسنه .... يبسة شماشيل العذوق النفاضي



عزي لمن غر الثنايا كونه .... واركن على كبده كوايلٍ عراضي



الا ارتوى بستان قلبي سقنه... واخضر جنابه عقب يبست الحاضي



القلب غضات الصبايا شعنه .... بنت الشيوخ مخدمين الحياضي



شوفي بعيني والخدم يركبنه .... على زعاع يوم قوطر وناضي



فوق اشقح من زمل ابوها مضنه ... ركبة عليه اتشنطح ٍ باعتراضي



وامشجر من سوق هجر مغنه ... على خياطة نابي الارداف راضي



وين انت يامشفي على طردهنه ... انا طويت ارشاي وقفيت قاضي



انا صدرت ووردهن عقبنه .... على العدو مشرعات الحياضي



احد بوسط النار واحد بجنه .... وترى البخيت اللي له الرب راضي





ويقال ان بصري بعدمارجع قال هالبيتين
ياليتنا من حجنا سالمينا.....كان الذنوب اللي علينا خفيفات
رحنا نبي نخفف ذنوب علينا....وجينا وعليها كثرها عشر مرات

[ابو ماجد]

قلبي ابيض
ها بك وشرفني مرورك

[ابو ماجد]

ملح الجريف
مرحبا فيك
والحل طال عمرك عند مبدعنا الوافي
حل اللغز حق مشد الاسنان وقلت انك تشوف المشد بسنونه بس هالحين وش تبي تقول ههههههههههه
حياكم الله جميع

[الوافي ابوصالح]

السلام عليكم
مشكور اخوي ابو ماجد على الاطراء وانا ابعلمك بس لايدري احد اسنوني مابقى بهن شي يشد لكن اخوي ملح الجريف الله يعينه
يبي له واير سحب من حق السيارت يا لله يقدر يشدهن به

[ملح الجريف]

هههههههههه هالسنة نبي نحج انا والوافي غدي براطمنا يزلقن

,,,,

وتسلم يابوماجد على اللغز , وعلى الإضافة الأدبية الرائعة

صح لسانك مليوووووون

وماشاء الله عليك يالوافي وش هالرمعة اللي تجرخ جرخ

صح لسانك , وعاداتك التكميخ .

[قلبي مو لي]

صح لسانك ....... يا رجل