عـودة للخلف   منتديات الرس اكس بي > منتديات الرس اكس بي > المنتدى العام والمواضيع المتنوعة
التسجيل الأسئلة الشائعة التقويم تعليم الأقسام كمقروءة


المنتدى العام والمواضيع المتنوعة الموضوعات العامة والمناقشات والحوارات الهادفة، والتي لا علاقة لها بأقسام المنتدى الأخرى.

إضافة رد
 
LinkBack أدوات الموضوع طريقة العرض
قديم(ـة) 10-10-2008, 06:49 AM   #1
عضو متواجد
 
تاريخ التسجيل: Oct 2008
البلد: بعد الدراسه في امريكا .. استقريت في الرياض .
المشاركات: 35
قوة التقييم: 0
وش بقى لي ؟ is on a distinguished road
.. يــبــه ! ..



يبه .. ابوي .. ابو ( ... ) ..

ودي اسولف معك ..



..




بعد رب العالمين .. انت سبب وجودي في حياتي هذي ..
انت من فتحت عيوني على حنان الابوه بحق وحقيق ..
تركتنا ورحلت .. خليتهم وغادرت ..



يبه ..



11 سنه .. من بعد ما غابت عينك ..
11 سنه من اخر ايامي معك .. كنت معك انا وبس ..
كنت الوحيد بينهم اللي عاشرتك بفترة مرضك ..
انفاسك .. ملامحك .. ذكرياتك .. عتابك .. عقابك .. سلامك .. كرمك
واشياء كثيره .. كلها امور عايشه فيني لهـ الوقت ..
يبه .. 11 سنه تصدق انها راحت بغمضة عين وكأني دفنتك من دقايق !
يبه .. من 11 سنه .. ودعتك .. تذكر يا يبه يدي على رقبتك قبل ياخذك ملك الموت من حياتنا !؟



يبه ..



تدري اني تعبت من بعدك ..
تصدق .. اني في لحظه اعيد شريط ذكرياتي معك قبل 11 سنه ..



يبه ..



تراي ما نسيت لحظه طيحتك اول مره ..
تذكر يوم تطلع من البيت العصر وتروح للاستراحه ..
بلغوني وانا بالشارع .. وقتها كان احساسي متضارب اشياء تجذبني واشياء تطردني !
حسيت برجفه .. هو الخوف يا يبه !
حسيت اني بفقدك .. وعمر احساسي ما خاب وتمنيت لحظتها انه يخيب !
يبه .. رحت من غير شعور للمستشفى .. كان كل شي قدامي مظلم الا نور ابوتك . !
امشي بممرات المستشفى وانا اعزي نفسي .. !
الغرفه كانت في اخر الممر .. ايه يا يبه كنت انت هناك !
دخلت لقيت اخوي قدامي .. التفت يسار لقيت متمدد على السرير ولا تتحرك !
يبه .. وشفيك تعبان وشفيك ما تتكلم .. يبه انا ولدك ( ... ) .. يبه يبه .. يبه !
يمسكني اخوي .. يقول ابوي مغمى عليه !
قلت ليش ومن السبب ! ما جاوبني ..
يبه .. تكلم ؟ قول اي شي ..
يبه انت يومها ما تدري عن اللي حولك .. من اللي سوا فيك هالشي .. من السبب ؟!
راحوا كلهم .. وجلست عندك ما نمت ابد .. انتظرتك .. انتظرت وانتظرت كثير !
يوم ورى يوم .. 21 يوم وانا معك بالمستشفى .. انام على الكرسي وانت ما صحيت !
طلبت انهم ينقلونك لمستشفى احسن ..
نقلتك يا يبه .. ورحت معك !

وجلست معك 23 يوم . .. تذكرها يا يبه ؟
هي اخر ايامك معي ..
ما نطقت ابد .. ما تكلمت ..
في اخر ايامي تحرك يدك اليمين ومسكت يدي ..
لكن انت ما فتحت عيونك .. يبه تسمعني ولا تشوفني .. صح ؟ !
كنت اعد عليك اسامي اخواني وامي وانت تقولي ايه ايه ايه .. وتوصيني عليهم .. حسيت فيك !
تدري يا يبه ..
احساس يدك ما فارقني الى الحين ..

يبه تدري انهم ما زاروك ابد ! كانوا يتصلون بس ...
كنت لحالي معك ..
تدري انك بتفارقني وانا في مرحلة تخرج من الجامعه !
لا تروح يا يبه ابي افرحك واخليك تفتخر فيني وترفع راسك .. لانك تستاهل ..

يبه وشفيك .. تعبان ؟
يبه تبيني ارفع المخده ؟ ايه تبيني ارفعها .. ابشر يا يبه ..
ارفعك شوي احط رقبتك على يدي ..
يبه وشفيك .. ليش تتنفس بسرعه ؟
يبه انت فتحت عيونك .. يبه انت تبتسم ؟ يبه انت تبتسم .. يبه انت طيب انت صحيت ؟
يبه انت تحتضر ؟ .. يبه تشهّد .. ايه ارفع اصبعك يبه .
يبه يبه يبه .. ليش وقفت انفاسك .. ليش ما تتحرك ؟ يبه يبه يبه ..
يدي ترجف .. جسمي يرجف .. يبه لا تروح !
يبه .. تكفى لا تروح ..
يبه .. نزلت راسك على المخده .. يبه انت مت ؟ انت رحت ؟
يبه .. تدري وقفت دموعي ما نزلت .. من هول الصدمه وقفت ! انت عودتني اكون قوي ..
يبه .. حبيت راسك .. وقبلت جبينك .. يبه سكرت عيونك .. وودعتك .. وجلست جنبك .
ايه جلست جنبك اشوفك .. اتذكر طفولتي معك .. اتذكر جلستك معي ومع اهلي .. بكيييييت يا يبه !
يبه .. سامحني لاني بكيت .. كنت اكلمك يا يبه بدون روح لان روحي راحت مع روحك الطاهره !
يبه .. كنت اقول ما ودك ترجع لنا ؟ ارجع لي انا طيب ..
ابيك ترتاح من المرض لكن وشلون انا ارتاح من بعدك ؟
يبه .. انت راضي عني ؟
انا جنبك يا يبه .. ادري انك ودعتني ورحت ولا راح ترجع ..




يبه ..



ابخليك شوي ابروح اكلم الدكتور علشان ابلغهم بوفاتك !
دكتور ابوي توفى .. ادعوا له بالرحمه .
دكتور عجلوا باجراءات الوفاة والدفن .. ابي ابوي يرتاح .
رحت مع الدكتور للغرفه .. حبيت راسك يا يبه وغطيتك بيدي .

شالوك وودوك لثلاجة الموتى بـ المستشفى .. رحت معك ودخلت معك .
يبه .. بروح اخلص الاجراءات وارجع لك .. ساعات وراجع يا يبه .
جت سياراة الاسعاف .. طلعوك من الثلاجه يا يبه .. حبيت راسك وشفتك وانت مبتسم .
يبه .. بيودونك للمغسله .. يبه تدري انه اليوم الجمعه قبل صلاة العصر الحين .
يبه .. حطينا جسدك بالسياره .. وانا معك جسد بدون روح .
وصلنا المغسله وانا انزل معك .. ما اقدر افارقك يا يبه .. دخلت معك .
ما قدرت اغسلك .. جسمي ما شالني يا يبه .
جلست .. انتظرهم يغسلونك ..
ناداني الشيخ قال ودك تسلم على ابوك .. قلت ايه .
الشيخ طلع لاخواني واقاربي قال من يبي يسلم على ميتكم .. ما دخل الا 2 من ربعه بس .
انتظرتهم يسلمون عليه لاني ابي اطبع قبلتي الاخيره على جبينه .
سلموا عليه وطلعوا ..
قلت للشيخ خلني لحالي .. طلع الشيخ .
حبيت راسك يا يبه .. ووعدتك وعد بيني وبينك وبين رب العالمين .
وعدتك اوفي بوصيتك .. واكون مثل ما تبي .
يبه انت تبتسم .. ايه اشوفك ..
يبه .. لازم اودعك الحين ..
يبه الله يرحمك ويغفرلك .. والله يقدرني اني اكون ولد صالح يدعوا لك .
يبه .. الله يسكنك فسيح جناته .. ويجعل قبرك روضه من رياض الجنه .
يبه .. يا رب تكون راضي عني .
اسمك وذكراك واعمالك ما راح انساها ولا راح اخلي احد ينساها ..
يبه .. اودعك .. واعذرني يا يبه بغطيك بكفنك .
يبه ما راح انسى وجهك وملامحك ..
يبه الله يرحمك .. الله يغفر لك ..
غطيت راسك ووجهك يا يبه ..
دخل الشيخ وسلم علي وعزاني ..
انا طلعت .. انتظرك بسيارة الاسعاف علشان نوديك للمسجد نصلي عليك .
يبه اذن العصر ..
يبه .. دخلنا المسجد ..
يبه دخلناك المسجد ..
يبه .. نزلنا جثمانك ..
يبه صليت ركعتين ودعيت لك .. اقام الصلاة يا يبه .
صلينا العصر يا يبه .

يبه .. الامام سلم التسليمه الاخيره .
يبه الامام يدعوا لصلاة الجنازه .. جنازتك يا يبه .
صلينا وانت قدامي ..

يبه خلصنا من الصلاة ..
شلنا جثمانك للمقبره .. مشيت بجنازتك وانا شايلك على اكتافي ..
يبه تحس فيني ؟
يبه نبي ننزلك ..
شلناك يا يبه .. وانا نزلت للقبر ..
مسكتك .. ساعدوني ونزلوك ..
حطيتك باللحد يا يبه .. ما قدرت اكمل وطلعت ..
انتظرتهم يخلصون .. وبعدها دفنتك .. 3 مرات ادفنك بالتراب .
يبه اودعك ..

عزوني فيك ..
انتظرت كل من بالمقبره يروح علشان ادعي لك وانا معك بس ..
راحوا ..
يبه انا جنبك ..
الله يرحمك ويغفرلك ..
جلست اطالع قبرك وادعي لك ..
بعدا طلعت من المقبره وتركتك .. لرب العالمين .
تركت معك اعمالك الصالحه .. وسيرتك الطاهره .

رجعت للبيت .. اعزي اهلي .. اخواني .. خواتي .. عماتي .. خالاتي ..
رحت للرجال .. اتقبل عزاهم ..


يبه .. تدري اني احتاجك اكثر من اول ومن بعدك تعبت واتعبوني معهم ..
كلهم تغيروا ..
كل شي تغيّر .. نظرتهم تغيرت .. تصرفاتهم .. قلوبهم !
تغيروا .. من بعدك يا تاج روسنا .. يا سندنا ..
رحت وخليتني اواجه الدنيا لحالي ..
فراقك ضيعنا .. يا يبه .
الموت غيبّك عنا .. وغابت السعاده من بعدك .

تدري يبه .. حتى عمي وعماتي تغيروا !
اخواني وخواتي .. كلهم .
لا يهمونك .. ما فيهم خير يا يبه .


يبه ..


امي تسلم عليك وتدعي لك كل يوم .. امي تحبك .

يبه بنتك الصغيره كبرت .. لو تشوفها بتعرفها الحين ؟ ايه هي .. هي نفسها مشتاقه لك وتبوس صورتك .
ايه كبرت وبترفع راسك باذن الله ..

يبه انا ولدك ..
انا تخرجت وكملت دراستي بالخارج .. ورفعت راسك .
يبه .. انا توظفت وتوفقت ..
اكيد انت راضي عني علشان كذا ربي وفقني .

بس تدري يبه ..
انا فقدت الاحساس بكل شي من بعدك ..
بالفرح والحزن .. ما صرت احس بشي !
يبه يمكن مشاعري واحاسيسي اندفنت معك .. انت اخذتها ؟
تدري يالغالي .. ليتني انا الميت مو انت ..
لاني مو قادر اعوض نص حنانك واهتمامك للي حولي ..

يبه ازعجتك ؟ انا اسف واعتذر .. لكن اشتقت لك .
يبه انا احبك ..
يبه انا افتخر فيك ..
يبه يشرفني انك ابوي ..

الله يرحمك ويغفرلك ويسكنك فسيح جناته والفردوس الاعلى .. والله يجمعني فيك بالجنه يا رب .

ابنك البار .. خالد .


__________________________________________________ ____



اخواني واخواتي الاعضاء ..

بالبدايه اعذروني على سرد قصتي لكن حبيت اضعها كمقدمه للموضوع ..


الموت او فراق شخص عزيز .. امر لا بد منه في حياتنا لكن ..

- هل الموت يعتبر اقوى صدمه في حياة الانسان ؟

- وكيف تتلقى هذه الصدمه ؟

- وما مدى تأثير الصدمه على حياتك ؟

- وهل عشت هذه التجربه الصعبه ؟






دمتم بخير .. ولا اراكم الله مكروه بكم وبمن تحبون .

آخر من قام بالتعديل وش بقى لي ؟; بتاريخ 10-10-2008 الساعة 07:15 AM.
وش بقى لي ؟ غير متصل   الرد باقتباس

 
قديم(ـة) 10-10-2008, 07:39 AM   #2
عضو اسطوري
 
تاريخ التسجيل: Sep 2008
البلد: في بلاد العز
المشاركات: 8,641
قوة التقييم: 0
أميرة الاحساس is on a distinguished road
- الله يرحم الوالد ويسكنه فسيح جناته
وكل انسان في هذي الحياه مصيره الموت وهذي حال الدنيا مره حزن ومره فرح والله يعين بس

هل الموت يعتبر اقوى صدمه في حياة الانسان ؟

طبعا أكيد بتكون أقوى صدمه بحياة الانسان وخاصة اذاكان الشخص قريب حيل فتكون صدمه قوووويه- وكيف تتلقى هذه الصدمه ؟

أكيد بحزن شديد بس لازم الانسان يتمالك نفسه
- وما مدى تأثير الصدمه على حياتك ؟
ما دري (بس بتكون ) قوووووووووويه حيييييل ويمكن تغير مجرى حياتي وخاصة اذا كان الشخص هذا قريب مني

- وهل عشت هذه التجربه الصعبه ؟

أكيد ما في أحد ما مر عليه حادثة وفاة قريب له كل انسان أكيد مر بهذي التجربه

تقبل مروري
__________________
تم حذف كافة تواقيع الأعضاء من قبل إدارة الرس اكس بي ونامل منكم مراجعة قوانين المنتدى قبل إعادة بناء توقيعك وشكراً
أميرة الاحساس غير متصل   الرد باقتباس
قديم(ـة) 10-10-2008, 09:26 AM   #3
عضو ذهبي
 
تاريخ التسجيل: Feb 2008
المشاركات: 2,365
قوة التقييم: 12
صمت مجروح is on a distinguished road
وش بقــــــــــــــــــــــالـــك.!؟
سجل إعجــــــابي بما كتبـــته يـــــد شخصك الكريم النـــــــــــادر وجوده هذه الأيام ..
رغم مرور كل هذه السنين بقيت على عهدك السامي ..بقيت ذكراه الطيبه لم تفارقك حتى هنـــا..فـــا للـــــــــه درك..
قصـــــــــه معبــــــــره وأسلوب مشوق ورائع..

حفظك اللــــــــــــه لمن ترك أبـــــــــــــاك وأعــــــــــــــانك على بر والـــدتك ..






يــبـــــــــــــــــــــــــــــــه..
يبه وانا بعد إحدعـش عـام حسّيـت!؟
إنّـي قـدرت اقـول شـيٍ كتمتـه...!!
أبطى قصيدي ما انكتب فيك وابطيت!؟
أجر صوتي وأرجع آجـر صمتـه..!!
ماودّي اكتب بيت واندم على بيـت!؟
ما هوب شعر الشعر كاني زهمتـه..!!
الشعر كانه ما انحنى لي.. ما جيـت!؟
ان ما عزم مرثيّتـك مـا عزمتـه..!!
انْ ما كتبته بأزرق الدمع.. وأبكيت!؟
كل الجروح المبطيه.. مـا رحمتـه..!!
يبــــه وانا من بعـدك ابـو التناهيـت!؟
مامـرّ طعـمٍ للحـزن مـا نهمتـه..!!
يبــــه: (يبه كلمه) وانا كل ما اوحيـت....
كلمة يـبـــه.. صدّيت.. والوقت لمتـه!؟
يبـــه: (يبه كلمه) وانـا كـم تمنّيـت..!!
اهدم بها وابني بهـا اللـي هدمتـه!؟
يبــه وانا لا ضقت رحت وتهجّيـت....
ركـون بيـتٍ ضـم حلـمٍ حلمتـه!؟
يومك تعلمني إلـى مـن تحاكيـت....
درس الحياه اللي كبـرت وفهمتـه..!!
هنـاك كانـت دلّتـك لا تقهويـت...
وهْناك كان يْسـاق طيـبٍ حشمتـه...
وهناك.. إيه اذكرني هنـاك خلّيـت!؟
طفلٍ مـلا بالدمـع دربٍ رسمتـه..!!
هناك جاني علمـك انّـك توفيـت...
وهناك خاويـت الشقـا واحتزمتـه!؟
واليوم قلت اليـوم يومـي ومدّيـت..
كف القصيد وطاح شعـر ونظمتـه....
لكن بعد صمت احدعش عام حسّيـت!؟
انّي عجـزت آقـول شـيٍ كتمتـه..!!!!!!!!!!!!
__________________
تم حذف كافة تواقيع الأعضاء من قبل إدارة الرس اكس بي ونامل منكم مراجعة قوانين المنتدى قبل إعادة بناء توقيعك وشكراً
صمت مجروح غير متصل   الرد باقتباس
قديم(ـة) 10-10-2008, 10:48 AM   #4
عضو ذهبي
 
صورة عاشق الكيف الرمزية
 
تاريخ التسجيل: Jul 2007
البلد: وأينما ذكر اسم الله في بلد *** عددت أرجاءه من لب أوطاني
المشاركات: 2,454
قوة التقييم: 0
عاشق الكيف is on a distinguished road
الكلمات تتبعثر في لساني
لاأدري ماذا أقول ؟
الله المستعان
عاشق الكيف غير متصل   الرد باقتباس
قديم(ـة) 10-10-2008, 10:55 AM   #5
عضو ذهبي
 
تاريخ التسجيل: Sep 2007
المشاركات: 2,322
قوة التقييم: 0
صوت الريح is on a distinguished road
الله يجعلنا مانفقد غالي وياكم
__________________
صوت الريح غير متصل   الرد باقتباس
قديم(ـة) 10-10-2008, 05:35 PM   #6
عضو متواجد
 
تاريخ التسجيل: Oct 2008
البلد: بعد الدراسه في امريكا .. استقريت في الرياض .
المشاركات: 35
قوة التقييم: 0
وش بقى لي ؟ is on a distinguished road
اميرة الاحساس .. صمت مجروح .. عاشق الكيف .. صمت الريح

شاكر لكم مروركم الكريم واضافتكم الرائعه .. وجزاكم الله خير .. ويا جعلكم ما تفقدون غالي ..
وش بقى لي ؟ غير متصل   الرد باقتباس
قديم(ـة) 10-10-2008, 07:43 PM   #7
عضو مميز
 
تاريخ التسجيل: Apr 2008
المشاركات: 283
قوة التقييم: 0
سمين باسمك is an unknown quantity at this point
والله موضوعك شيق وجزاكم الله الف خير
سمين باسمك غير متصل   الرد باقتباس
قديم(ـة) 10-10-2008, 08:05 PM   #8
عضو مبدع
 
صورة ورد الجوري الرمزية
 
تاريخ التسجيل: May 2008
المشاركات: 1,312
قوة التقييم: 0
ورد الجوري is on a distinguished road
أخي (وش بقى لي؟)/
كلماتك لامست جروح ........لازالت تئن من سنين.......غفر الله لجميع المسلمين
ولاأراك مكروه فيمن تحب .......أسلوب رائع ........من قلب صادق.
إضاءة,,,,,,,,,
ناس تمنى تملك ملايييييييين........وناس تمنى تطلع القمر...........وناس....وناس.....
وأنا أتمنى تناديني وأرد عليك :سم يبه تآمر على شي!!!!!!
__________________

خذوا كل عطوري وأعطوني عطرا له رائحة ملاءة أمّ !
ورد الجوري غير متصل   الرد باقتباس
قديم(ـة) 10-10-2008, 08:07 PM   #9
عضو بارز
 
تاريخ التسجيل: Apr 2008
المشاركات: 500
قوة التقييم: 0
الحياة مجرد حلم is on a distinguished road
جبر الله مصيبتك
اشكرك على هذا الطرح الرائع الذي ادمع عيني لان موضوع الموت موضوع مخيف جدا لي لاني ابفقد ناس عزيزين علي والذي قد فقدت بسببة احدى اخواتي
رحم الله اباك واختي واسكنهم فسيح جناته
الحياة مجرد حلم غير متصل   الرد باقتباس
قديم(ـة) 10-10-2008, 08:31 PM   #10
عضو ذهبي
 
صورة عسولهّہ الرمزية
 
تاريخ التسجيل: Jul 2008
البلد: في كِـِـِوكب العسِـِولآت مو من وراهـِ
المشاركات: 3,405
قوة التقييم: 0
عسولهّہ has a spectacular aura aboutعسولهّہ has a spectacular aura about
مشكووور اخوي مااقصرت طرح رااائع تسلم الأنامل




يعطيك العاافيه
عسولهّہ غير متصل   الرد باقتباس
إضافة رد


يتصفح الموضوع حالياً: 1 (0 من الأعضاء و 1 من الزوار)
 
أدوات الموضوع
طريقة العرض

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق
Trackbacks are متاح
Pingbacks are متاح
Refbacks are متاح



الساعة الآن +3: 04:21 AM.


Powered by vBulletin® Version 3.8.7
Copyright ©2000 - 2017, vBulletin Solutions, Inc.
SEO by vBSEO 3.6.0 ©2011, Crawlability, Inc.
هذا المنتدى يستخدم منتجات بلص

1 2 3 4 5 6 7 8 9 10 11 12 13 14 15 16 17 18 19