ذيب الوادي قتل ( بالجريده)!!!

[قريطاوي ...]

السلام عليكم
كيف حال الربع عساكم بخير وعافيه
يقول الشاعر بدر الخالدي في قصيدته عن الذيب :

البارحه والجوع مس الذيـب يـوم انـه يعـوي
علـى سنـام طويـق والقـمـره وراه بليتـهـا

اخايلـه واقـول واعـزي لحـالـك يالـقـوي
اللي تنقى فـي سمـان الفطـح لا مـن جيتهـا

واللي باساميـك يتقلدهـا الخـوي مـع الخـوي
والعـرب تديك التحايـا وانـت مـا حييتهـا

واسمك على النخوه يعد وكل روس(ن) تشتـوي
والوجبـه الحيـه تعشاهـا وتـتـرك ميتـهـا

الجوع لـو يدفعـك للمـوت الذحـاح المستـوي
حشمت نفسك عـن عظـام الحرجـه وخليتهـا

ودامك طليق(ن) ما قهـرك المعتـدي والمهتـوي
وخطاك مـن دون المغـازي مـا بعـد سجيتهـا

يا ذيب يا ذيب الخلا اللي ليلك يـروح سـروي
مـا بيـن مرحـان الشواويـه ليـا عسيتـهـا

يا موجل(ن) قلب حضري يا موجل(ن) قلب بدوي
ياللـي تشيّـم خـوة الرجلـيـه ان خاويتـهـا

إلخ ... صح السانك يابدر بس الذيب هالمره ماهو على سنام أطويق
في بطن وادي الرمه وأقرب ماله الجريده امتداد طريق العفين من قصر بن عقيل موقع لا أحد يتوقع
وجود الذيب بهالمكان لكن سبحان الله في يوم الإثنين الموافق 19-11-1429هـ قبل المغرب يقول أبوصالح إني كنت طالع أدور لي اطيور وأتمشى واراسل الربع بالكنود ولمح من بين الرمث توقعت إنه اجعري ولكن يوم بدى يطوي الأرض ولا ركضه ماهو ركض اجعري ولحقته يوم قربت ولا وش أشوف ذيب اصدق أكذب ولا مايمدين افكر وامعط ام خمس واجلده
ليما طاح وبعد التكميل عليه بالخرازه
فك الله المسلمين من شره وعلى قولة الشاعر:

من أول ياذيب تفرس بياديك*** واليوم جاء ذيب على الفرس عداك
وهذي بعض الصور انتبهو ياجماعة الخير وقت السيول كل شيء يجي مع الشعبان

[سامر ليل]

يا رجل ما الفائدة من قتله ؟!!
أنتم بهذه الطريقة تدمرون (( التوازن البيئي )) <<< أحلى يا الواعي ..

لا بجد دامه ما هاجمه وش يخليه يذبحه ..
يعني أقصى ما يمكن أن يحدث منه هجومه على بعض الحلال .. وهذا ضرر بسيط << لا يسمعونك أهل الحلال

[صديق الموهوب]

والله قوية ذيب مرة وحده والله كنت اتوقعها بالمناطق اللي فيها جبال مثل الجنوب والطايف.
الله يستر منها بس

[أغرب إنسان]

اشكرك اخي كاتب الموضوع
والله يستر علينا وعلى المسلمين

لكن وين الصور ؟؟ ما تطلع

[محمد بن سعود]

وين الصور؟؟؟

[سامر ليل]

غريبة الصور أمس طالعة .. وين اختفت ..

[قهوة مارس]

مافي صوووور..

[غريب الدار]

ياكاتب الموضوع حاول تحميل الصور على مركز تحميل الرس اكس بي لكي تبقى الى الأبد ولاتحذف مثل هذا الموقع الذي انت رفعت عليه صورك ..

تحياتي

[قريطاوي ...]

نعتذر يا أخوان عن عدم ظهور الصور
وذلك خلل من المركز حسبي الله ونعم الوكيل
وهذي الصور مره أخرى

[العسيب]

حرام ليه بس مااذاكم ولا اكل غنمكم

[ssss]

مشكور اخوي ويعطيك العافية

[قريطاوي ...]

نشكر الأخوان اللي علقو على الموضوع
وبالنسبه لذبحة الذيب فالمكان اللي هو فيه
يهدد البشر ماهو بس الحلال فهو بين المزارع وقريب للديره واغلب الشباب يعرفون الموقع زين
ويدركون خطر الذيب فيه وخاصه اللي يكشتون يم العفين وشعيب اصبيح .
والله يكفينا الشر .