توبيخ أمير القصيم لرئيس بلدية الرس,,,,

[الخجـول]

توبيخ أمير القصيم لرئيس بلدية الرس,,,,
أفاد مصدر موثوق أنه ,,,

في أجتماع رؤساء بلديات القصيم

مع أمير القصيم قبل شهرين ,,,, تعرّض مدير بلدية الرس المهندس العميل

الى توبيخ من الأمير على تقصيره في أمور عدة وأحد هذه الأمور
1
المبنى المتهالك للبلدية في الرس
2
تكدّس الموظفين الذي لا شغل لهم الا قراءة الصحف وتبادل الزيارات في المكاتب,,
3
قضية الأراضي وتأخرها ودخول الواسطات فيها,,,

وأنا بودي أقول لمدير البدية ليش ماتسوي زيارة للمذنب وتشوف حديقة العزاب فقط على الطريق الرئيسي وميدان الأحتفالات,,
هذي المذنب خامس مدينة بالقصيم,,, والرس ثالث مدينة بالقصيم


وعلى دروب المحبة نجتمع,,وفي جنات الخلد نلتقي,

[المنســـــــــي]

هذي المذنب خامس مدينة بالقصيم,,, والرس ثالث مدينة بالقصيم..


ههههههههههه حلوووه المقارنه .

اخي الخجول هذي مشكلة اهل الرس شف عندهم وماعندنا ليش هم وحنا لا .

.انشاالله القادم احسن للرس . فهي تنافس اجمل مدن المملكة واذهب وشاهد

بنفسك فبعض المدن تقول ماانت بالسعودية علما بانها اهم من الرس .

تحياتي . ومشكووووور على الموضوع.

[العجمي2003]

نعم انه داء المقارنات..بين المدن..
ومثل ماقال أخي المنسي..دائما ما نقارن بين المدن..
على السبيل المثال لماذا "الدمام" قذرة وشوارع "قمام" مع أنها عاصمة المنطقة الشرقية..والخبر ثاني مدينة بالشرقية مدينة قمة في الروعة..

لماذا؟؟ <== سؤال يكرره أبناء الدمام دائما..وربما أبدا

اشكر لك أخي الخجول هذا الموضوع "المحلي"..
العـجمي

شكرا اخي الخجول

ولكن مثل ما قال المثل ( اذا سلمنا من عيد ما جانا احد من بعيد )


يعني لو سلمنى من الي بيديهم شي بالرس كات صارت الرس احسن محافظة

لان الميزانية الي تجيها تنافس اكبر المحافضات بس تروح بينهم ( خذ تصيبك وعطني نصيبي ـ واذا تطورت الرس وش نستفيد ـ) هذه مقولتهم المشهورة بينهم


تحياتي

[أبو مازن]

السلام عليكم ورحمة الله وبركاته



أنا أقول ماقصر أمير القصيم



فعلاً يستحق التوبيخ والإعفاء من منصبه



أولاً : ردم الآبار التي تشكل خطراً على أهالي الرس على حالها .




ثانياً والأشد : مجرى الصرف الصحي وموقعه الحالي !!!!!!!؟؟؟؟؟؟
بأحلى متنزه رساوي وهو وادي الرمة ومسوي روائح مزعجة رغم أنه وقت الأمطار يكون متنفس لأهالي الرس للراحة وتلطيف الأجواء


والطرق داخل الرس أنواع الرقيات والنزلات حاشا ما أنت بمحافظة قرية وتخب عليها بس .






بالله عليكم التوبيخ يكفي إلا والله الكنس من الرس







أخيراً





هذا رأي الشخصي وأقول عسى إن كان فيه خير يصلح وإلا الله يسهل عليه وما أحد معصوم من الخطأ أبد .







تحياتي ............................................. أبو مازن

[بـرج المملكـة]

والله ما أظن أمير القصيم يوبخ .. وهو عارف إن 90% من ميزانية الدولة للبلدية تروح لبريده و 5% لعنيزة والباقي يوزع على محافظات القصيم

[الرساوي]

المشاركة الأصلية بواسطة الخجـول

3
قضية الأراضي وتأخرها ودخول الواسطات فيها,,,

اشكرك اخوي الخجول وشئ رائع نجد اهتماماً من صاحب السمو أمير منطقة القصيم ...

ولكن أخي العزيز بالنسبة لهذه النقطه تأخر توزيع الاراضي في الرس كنت في وليمة عشاء وكان معنا أحد واحد يشتغل في الرياض بالشؤون البلديه زي كذا على مرتبه اعتقد الثالثه عشر وذكرت له عدم توزيع اراضي وتلاعب عندنا في الرس وقال ياطويل العمر هذا التأخير من الدوله لان الرس تشهد إقبالاً وتزداد توسعاً بدون ما نوزع اراضي والحكومه هي تتعمد تأخير ودعم الرس بكل شئ لان السبب الرئيسي لذلك هو قلة توفر الماء وبعد كم سنه سوف يقل منسوب الماء وينعدم من باطنها فكيف إذا ازداد سكانها ...

والصدق ضاق صدري ولا أدري هو صادق ولا لاء ..

[ابو عواهين]

يا حليلكم يا أهل الرس عواهينكم اكبر من عواهيني

ابي أقول لكم كلمة

ترى المشكلة ماهي في رئيس البلدية لأن رئيس البلدية جاء قبله عشرين رئيس مثله وأردى منه والحال ما تغيرت

نستثني منهم طيب الذكر البرادي

أما الباقي خلووووووووووووها

ومثل ما قلت المشكلة ماهي في رئيس البلدية بس المشكلة في موظفين البلدية اللي وجودهم كعدمه

والمحافظ وين دوره بالمحافظة

من اللي منكم عمره شاف المحافظ جالس يتفقد المحافظة او يشوف اذا ناقصها حاجة

المحافظ هو الحاكم الاداري في المحافظة وله السلطة العليا فيها

المفروض يكون له دور في كل شي في صالح المحافظة

وصدقوني اني ضحكت يوم قريت ان صحفيين الرس يطالبون بلوحات للرس على الطريق السريع

انا اقول الرس ما تحتاج للوحات لأنها مسجلة في كتاب جينيس للأرقام

عشان الرس هي المحافظة الوحيدة في العالم اللي تخطط اراضي عشان توزعها على المواطنين

وكل مخطط تخططه عشرين مرة قبل توزعه ( كل يوم يتهاوشون ويعدلون في المخطط ) وإذا اعتمد المخطط يوزعونه

بعد 15 سنه ويوزعونه عشر مرات عشان الهوشة لابد منها يعني مت ياحمار لين يجيك الربيع

والرس هي الوحيدة بالعالم اللي اذا جاهم مكرمة مبنى لدائرة حكومية وإلا دائرة حكومية جديدة

تهاوشوا عشان كل واحد بيحطها في المكان الفلاني ثم يطير المبنى وهم يتهاوشون

الرس هي المحافظة الوحيدة بالعالم اللي يبدأ فيها المشروع فجأة ثم يتوقف فجأة وبدون سابق انذار

والرس هي المحافظة الوحيدة اللي فيها أعيان لكن ما فيهم خير !!!

ومثال بسيط شوفوا نظام الدي سي إل ( في الإنترنت ) شغال في بريدة وعنيزة له أكثر من سنة والرس يقولون انه يبي

يمدون سلك من قرية نائية بالصومال إذا اشتغل فيها الدي سي إل عشان يشتغل بالرس


أحسن شي بالرس انك لما تسوي مخطط لك وتقول انه حراج تبيع الأراضي بمبالغ خيالية ما تخطر على بالك

وإلا وش اللي جاب الصهيل الله يرحمه من عنيزة للرس


بالختام اقول

الله يخلي لنا أبو مطلق ( الشيخ صالح المطلق الحناكي ـ عم الجميع ـ ) اللي مبيض وجيهنا قدام الخلق والا كان تشوفون علوم


والسلام عليكم ورحمة الله وبركاته

[الرساوي]

صدقت يا ابو عواهين

لكن ما نقول إلا الشكوى لله

[عـــــــــــــــزام]

بسم الله الرحمن الرحيم
اشكر الأخوان على كتاباتهم الجميلة . التي تظهر بعضا من ما يعانيه سكان محافظة الرس
وانا أقول إن أهل الرس ينطبق عليهم المثل اللي يقول : ( كلاَ يحوف النار لقريصه )
المحافظ ليس له كلمه في بلده . والبلديه نايمه . والله يستر علينا يا الرساويين

[ابو عواهين]

نسيت اقول لكم شي باط سبدي

مكان الحراج القديم ليش للحين والقراشيع موجودة فيه

ليش البلدية ما تنظفه ما تشوفون انه شي يبط السبد

وتطلع من ذيك القراشيع وتطيح في الحطب

وتطلع من الحطب وتطيح في اراضي فاضية القطعة تباع بـ 150000ريال وفوق

يمكن قراشيع الحراج رافعة أسعارها وإلا منظر الحطب

يا سبدي سبداه

[بهجه1]

في يوم الثلاثاء تشرفت بزيارة لهذ الكيان العملاق في خدمة المواطنين لشغل بسيط وقلت منها اتعرف على هذا الكيان الي هو (البلدية) وهذى هي الزيارة الأولى منذ مده طويلة


المهم رحت لوحده المساحه ونظرت ولا المكاتب مافيها احد ما غير واحد ماودي اذكر اسمه
رحت لرئيس الوحدة قلت وين افلان قال في مكتبه قلت ماهو فيه قال اصبر يجي انتظرت نصف ساعه ولا جاء

رحت للبيت ثم رجعت بعد ساعه ونصف ولم يأتى مع العلم ان المكاتب حوالي 5 ولا واحد فيها

المهم رجعت لخوي الأول وقلت وين الرجال قال ماادري ولا اضنه يجي قلت اعطنى جواله اتصلت عليه قلت وينك شغلى واقف عليك
قال هذا جاي وبعد نصف ساعه جاء .............سوالي المعامله ورحت اوقعها من موضف ثاني لما رجعت بعد ثلا ث دقايق رجعت لصاحبنا هذا ولا وجت احد

وين راح ماادري ( نطق زي العادة )مع العلم انه عارف انى ابرجع له مره ثانية لاكمال بعض الأجراآت

دقيت عليه تلفون وقال ابروح اودي المرأه _المدام _ وجايك (ناس ماتحلل لاتحرم)

وادعوا هذه عند موظف واحد وشلون لو كانت معامله كبيرة

ويش يبيصير

الاجابه عندكم


ودمتم :rolleyes: