عـودة للخلف   منتديات الرس اكس بي > منتديات الرس اكس بي > المنتدى العام والمواضيع المتنوعة
التسجيل الأسئلة الشائعة التقويم تعليم الأقسام كمقروءة


المنتدى العام والمواضيع المتنوعة الموضوعات العامة والمناقشات والحوارات الهادفة، والتي لا علاقة لها بأقسام المنتدى الأخرى.

إضافة رد
 
LinkBack أدوات الموضوع طريقة العرض
قديم(ـة) 29-04-2009, 05:15 AM   #1
عضو ذهبي
 
تاريخ التسجيل: Feb 2008
المشاركات: 2,365
قوة التقييم: 12
صمت مجروح is on a distinguished road
موضوع مهم اتمنى كل البنات يستفيدون منه واتمنى مايكون مكرر..

السلام عليكم ورحمة الله وبركاته


صبآآحكم / مسآءكم ,, ورد


موضوع أعجبني كثيــيــيـــــــر في احد المنتديات ,,

فحبيت أنقله لكم _طبعاً مع بعض التعديلات والاخـتصـارات لأنه طـويل_

وأتمنى أن يجد في قلوبكم وعقولكم طريق

ويكون له في أنفسكـم صـــدى عميــــــــق ..


7

7

7



تقول كاتبته :


أنا بنوتة عمري 23

تغيبت عن مجتمعنا السعودي 8 سنوات

ورجعت له من شهرين

بصراحة تفاجأت وانصدمت من التغيرات اللي حاصلة

في المجتمع بكل فئاته وطبقاته ..

في النوادي الرياضية..في الأسواق..

والأهم في الجامعات والمدارس..

وفي المنتديات والمدونات..

تمنيت أني ألقى المجتمع تطور للأمام..أو تقدم للأفضل

لكني للأسف لقيت النقيض !!

رجوع خطوااات للخلف .. من جميع النواحي


قد يكون كلامي فيه غلظة شوي

بس يقول لك المثل

"يا بخت من بكاني وبكى الناس علي

ولا من ضـحكـني وضـحـّك الناس علي"


تساؤلات كثيرة أرددها بيني وبين نفسي وما ألقى لها أي جواب

وأنا متأكدة أنها تتردد على كل رزين وعاقل شرواكم


هل لما زادت رفاهية الحياة يزداد تخـلـفنا؟؟

هل لما تطورالعلم وتسهلت الطرق له يزداد جهلنا؟؟


هـذا شـكـرنا لله على نعـمـه حـتى يديمها عـلينا ويزيدهـا ؟؟



ليه صرنا مجتمع سطحي؟

لا همّ ولا رؤية ولا رسالة ولا هدف في الحياة

التفكير والتركيز على المنظر والمظهر فـقـط ..!!


فيه كاريكاتير أول ما شفته زعلت

لكن ألحين حـسـيت إنه أبلغ من كتب ممكن نكتبها..

الكاريكاتير يمثل شعوب العالم

فمثـّـل الشعب السعودي

بكرتونات مزينة وإذا فتحتيها لقيتيها فااااضية

وهذا واقع البنات اليوم مظهر ومنظـر

ولو تقولين لـها 1 ×1 كم؟

تنّـحـت


لو تقولين لها وش آخر كتاب قريتيه؟

قالت هااااه ..!!!

" بغـض النظر عن الروايات التافهة اللي طايحـين فيها هالفترة" إلا من رحـم الله ..

. . . .

لو نص هوس المظاهر هذا كان على عقولنا لكنـّـا أنجح الشعوب

لأنه ببساطة كل شيء متوفر عندنا

لا ناقصنا مال ولا قدرات عقلية

. . . .

الأجانب فلوسهم رايحة على تعليم عيالهم وتثقيفهم وصحتهم

تلقين راتب الأب والأم ضئيل ومستحملين شظف العيش عشان

يرسلون ولدهم برى يدرس ويجـيب شهادة عليها القيمة


بينما عندنا يستحملون الديون والأقساط عشان

تسوي زواج كله إسراف وتبذير

وآخرتهـا الناس طالعة منتقدة !!

وإلا ديون وأقساط عشان تقول صيّـفنا برى شهر كامل


والله أعرف وحدة شـخـصـياً تقول :

السـفر بالنسبة لي عذاب

لأننا إذا سافرنا

طووول السـفر طـقاق أنا وزوجي !

أنا أحرسه لا تناظر

وهو يحرسني لا تناظرين ..

قلت : طيب خلوا سفركم لبلدان محافظة

أو لا تسافرون حطوا فلوسكـم في البيت تغيير ديكورات وأثاث

عصصصبت وقالت : خيييير سلايفي لين سولفوا أصير بينهم ما سافرت

وإلا إذا سولفوا صديقاتي إلا أنا ما سافرت وش بيقولون عني؟


!!!!!!!



لا تعليق


. . . .


أنا لما جيت بعد هذي المدة توظـفت في بنك

ولاحظت إنه إذا جت العميلة أم ساعة ألماس فخمة وشنطة قوتشي الكل يتبادر لخدمتها

وإذا جـت العميلة اللي مظهرها ما فيه بهرجة .. تستجدي الموظفات يجون يساعدونها

والمضحك في الوضع إني ألاقي العميلة البسيطة ما شاء الله حسابها شي وشويات..

وهذي أم البهرجة حسابها بالسالب (عليها قروض وسيارات تقسيط) ..

وعنوانها يا إما شقة وإلا أجار

مو انتقادي على القرض ولا على السكن

انتقادي هو إنك مكلفة نفسك بالديون والقروض عشان

شويتين نظرة إعجاب من الناس !

بس ما ألومك لكن ألوم المجتمع اللي صار سطحي ..

يحكم عليك بموديل جزمتك !

. . . .

أول تصـنيفنا للمجتمع كان


جامعية

مثقفة

عاقلة

متربية

دينة

قـليلـة أدب

بنت ما ربوها أهلها



يعني كان مقياسنا

الدين والتعليم والتربية


أما ألحين

صار تقسيمنا للمجتمع


لو كلاس

هاي كلاس

بنت ستايل

بنت قروية


فعلاً تصنيف متخلـّـف رجعي سطحي

يعني رجعنا للجاهلية

وإحنا ألحين ننادي بالعولمة والعالمية والتطور والتحـضر

الحضارة تبدأ بالعـقول

. . . .

من جد من كثر ما أنا منهارة من هالوضع والله مو عارفة وش أكتب ؟

أروح لنادي رياضي أو زواجـات و حفـلات ألاقي ملابس يستحي إبليس يلبسها

طبعاً هذا غير الاسترتشات .. شيء يجيب الغثيان ..

المشكلة نتدرب في كلاسات كلها مرايا يعني ماتستائين من منظرك!!!!!

الصدور طالعة ..

الكلام الماسخ وقلة الأدب ..

والصداقات اللي تجاوزت جميع الخطوط الحمراء عند البشر ..

وفي اعتقادي حتى البهايم تربأ بنفسها

إنها تسوي اللي نشوفه في الأماكن العامة بين البنات..

بوسات وحـركات سخيفة ..!!


المشكلة إن أول كان هذا الشيء

نكرة + قلة تربية + عند بنات متوسط + خفية عن الأعين


أما ألحين

علناً قدام الله وخلقه + بنات كباااار


تجيك أم 23 أو 24 سنة عندها على قولهم "خوية".. آآه بس

أي مجتمع بتربين ؟؟ وأي نشئ بيصـعـد على يديك؟؟



من أسبوعين اتصلت وحدة سعودية على مقدمة برنامج في احد القنوات

قالت : أنا معلمة كلمت واحد وحبيته وقال .. و .. و .. وكملت تفاصيل حماقتها ..

اللي من جد فشيلة على القنوات ينقال أنه هذي سعودية !!

قالت لها الدكتورة :

".. وش هالخداج معلمة وهذا عقلج .. أي جيل بتخرجين لنا .. وين مخج .. وين تربيتج ! "


** الخداج: هو الجنين في بطن أمه إذا تعدى الشهر الخامس

يعني تعدينا مرحلة أنهم رجعوا للمراهقة.. هم رجعوا لما دون ذلك !

. . . .

أخذت اللغة على يد أمريكية .. عاشت في أمريكا 10 سنوات من زواجها و3 سنوات في السعودية ..

لأنها متزوجة سعودي >> منحوسة

تقول أنا توقعت السعودية بتسهّـل علي تربية عيالي لكن اكتشفت العكس !!

برى لما يشوفون غلط أقول لـهـم هم كفار ينبسـطون شوي وآخرتها النار

بس إحنا مسلمين ننحرم شوي ونتركـه لله وبنتمتع فورإيفر في الجنة

تقول وكانوا مقتنعين والأمور تمام

أما هنا لما يسألوني عن أشياء غلط يشوفوها أتلعثم وما ألاقي حجة مقنعة

>> طبعا هم يعرفون كيف يحاورون عيالـهـم ما تقول له إلا كلام مقنع ومنطقي شوفي مخ عيالهم ومخ عيالنا!


نرجع لها تقول صرت أقول لهم

"There are good muslims & bad muslims"

. . . .

تلقى في أغلب المنتديات منتدى مخـصـص للمرأة

99% من مواضيعه عن المظاهر والشكل

هل عالم المرأة في قطعتين الملابس اللي تلبسها؟؟

>> لا وكل مالـها تتقلص هذي القطعتين

وين ثقافة المرأة؟

وين أساليب الحوار؟؟

وين القضايا الدينية اللي تخـص المرآة؟؟

. . . .

يا كثر ما نسمع

ماتوقعت الزواج كذا !!

انصدمت بالحياة اليومية في الزواج؟

ما قدرت أفهم زوجي.....!

عارفين ليه ? لأن منتدياتنا النسائية ثقافتها


"بسررررعة بنات وين أحسن مشغل يحف الحواجب ..عشان عندنا حفلة زواج اليوم"

وإلا

قصات شعورهم صارت غريبه وفيه منها محرمه ومحد يبالي..والا اللي تسوي نقشات مدري وين!؟
وتطلع جسمها عند هالفلبينيات اللي لو كانت امها بدالهم كان استحت تكشف عندها..


وين الـدين ؟؟

وين الحياء؟؟

مات؟؟

وإلا نخنقه عشان ما يسيطر على تصرفاتنا؟؟

وإلا اللي كان ماسك البنات شدة الأهالي؟؟ لما خفت شفنا الهوايل؟؟

أو الدين انحصر في صيام 30 يوم في السنة و5 صلوات في اليوم بس؟


كلها 8 سنوات تفاجأت وانصدمت

وما أدري متى أقدر أستوعب هذي التغيرات

اللي أتمنى تتعدل للأفضل ولا أحتاج أستوعبها


أتمنى أنها تكون نزوة وقريب تتلاشى وتصير ذكرى أليمة في الماضي ونقول كنا وكان

أتمنى يصير الخطأ شيء عيب ما نتفاخر به ونعتبره مقياس على مدى حضارتنا

. . . .

ليه صرنا نستحي من الدين ومن العادات

"أنا أتكلم عن العادات الصح مو المتخلفة"

تجي كوافيرا تقول لو ما عندك تحفظ على (الإكستينشن) أعمليها !!

صارت المسألة تحـفظ ؟

صار اللعن أمر قابل للنقاش والتحـفظ؟

صار الوصل ينصح به في المنتدى على مسمع من مايزيد عن خمس مية بنت

و ياليت وحدة ردت وقالت حرااااااااااام

من واقعنا الكوافيرات أغلبهم نصرانيات عقيدتـها المسيح ابن الله _ سبحانه عما يصـفون_

بس الشرهة علينا إحنا يا أمة لا إله إلا الله

لو ما كانت شايفة جرأتنا وتمردنا على الدين ما قالت كذا

لو أقدم لك كريم وأقول لك : لو ما عندك تحـفظ على السرطان جربيه تراه يبيض

وش ردة فعلك ؟؟؟

فيه ردة فعل غير إنك ترمينه علي .. وتنبهين قرايبك منه .. وتحذرين البنات في المنتديات

. . . .

وحفلات التخرج وحفلات النجاح والدي جيهات والزواجات

كلها معازف وأنواع التفنن موسيقى وعود وأورج

وإلى آخر الليل وإلى الثلث الأخير .. وعادي ..

ما فيه اللي يقول للغلطان تراك تماديت بالغلط

آخر الليل إذا ربي تفضل علينا ونزل لسمانا الدنيا

هل من داعي؟ هل من مستغفر؟ هل من تائب؟

عذراً يا رب إحنا مشغولين مع محمد عبده وأحلام !!!

دوروا الدنيا بكل أبعادها

هل فيه ملك ينزل لك كل ليلة ويقول لك " تبين شي؟ "

أتفه ملوك الدنيا تلقين عنده 10 سكرتارية وبينك وبينه 10 أبواب

والدخول عليه بموعد إن كان يتنزل يقابلك من الأساس



أعجبتني عبارة لداعية مصري قال :

" ربنا ينزل كل يوم ينادي حد عايز حاقة.. وإحنا مشغولين عنه.."

. . . .

تجيك الوحدة تشتكي وقريتها هنا في المملكة !

تقول ياربي أنا كنت أكلم واحد وحبيته

ولما تزوجت ما حبيت زوجي .. وتحملت قلة حبي له ..

وبعد كذا اكتشفت إنه يكلم وحده وانهارت أعصابي

طيب.. وين الغريب في الموضوع؟

ربي قالها مدوية في القرآن وصريحة

"الخبيثاتُ للخبيثين والخبيثون للخبيثات والطّيِّباتُ للطّيِّبين والطَّيِّبون للطَّيِّبات"

يعني قمة الخبث والخيانة

خنتي أهلك وربك

وتبين واحد طاهر .. نظيف .... . . . قلبه عذري .. مافي حياته إلا أنتي !

وأنتي في حياتك عشرة قبله !!!

عجب والله عـجـب !!!

. . . . . . . . . . . . . . . . . . .

لحظه مآآخلّصت




والمووسيقى اللي صارت زي السلام عليكم

أصلا صارت هي التحية والافتتاحية في المواضيع

تلاقين في المنتديات سيكشنات مخصصة للأغاني !!

وكأن الأغاني عادي مثلها مثل تبادل الأخبار وأسعار الأسهم

أفتح مواضيع في قسم المرأة مثلا

إلا مقطع الصوت تلقائيا شغال أورج

يعني بالقوة؟؟

ما دخلت سيكشن الأغاني .. بس برضو مضطرة أسمعها؟

وهذا تجاوز للحدود والحريات

والمفروض يكون أحد شروط كتابة المواضيع منع هذا الشيء

لو بأنزل طبخة في وسط موضوعي

قلتوا: خير؟ غلطانه الأخت في العنوان


وبالنسبة للبنات اللي ينزلون زفاتهم الموسيقية

أو يحـطـون عـبارات العـشـق المحـرم والتعـلـق بغـير الله

أو ينزلـون مواضـيع مخـالـفة للشـرع ..

كم وحدة مرت على الموضوع من الأعضاء وسمعـت الزفـة أو نسـخـت العـبارة وحـفـظـتها ؟

+

كم وحدة مرت على الموضوع من الزوار

+

كم وحدة بحثت في قوقل وطلع لها موضوعك

+

كم وحدة أعجبتها الزفة وحطتها في زواجها اللي بتحضره 400 مدعوة


وعداد المعاصي شـغـّااااال في ظهرك

وياطول الحساب

. . . .

زميلاتي في ثانوي لما شفتهم

من كثر ذهولي

صرت أشك في نفسي

يعني لو وحده تغيرت تزعلين ويضيق صدرك عليها

لكن لما 6 كلهم تغيروا

وش ردة فعلك إلا العجب


لااا.. وأمر الحواجب هذا أمر عجيب

ما أدري هل نزلت بعدي فتوى جديدة بجواز النتف ؟

نتف وتاتوو .. والضحكة شاقة فمها .. وكأن شيئا لم يكن

لو أقولـها الله يلعنك بتزعل

لكن رب العالمين يمسـّـيها ويصبـّـحها على لعنة

إتز أوكي عندها !

وإلا تجيك أم 14 سنة توها داخلة عالم النتف "عالم اللعن" أسفل حاجبها كله أخضر


فعلاً.. صرنا على قول المصريين

نضحك على خيبتنا

. . . .

أما حكاية العبايات هذي يعني من جد كاااااارثة

أقابل ربي في الصلاة محجبة

وأقابل الشباب في السوق بالعيون اللي فيها كيلو مكياج والغرة المنسدلة والعـباية المزركـشـة اللي مزينة جـسمـها !!!

أي تناقض هذا؟

أي ديانة هذي؟

أي أخلاق؟

عبايات وإلا فساتين؟

القضية اجتاحت حتى الأمهات !

حريم كبار والله الشعر اللي فوق أذنها بدأ يغزوه الشيب وتقول لي :

تعرفين غرز الكروشيه .. بأحطه في عبايتي ؟؟

يعني خافي الله في هالشيبات

جدة والله العظيم

وش بقيتي لبناتك المراهقات؟

إذا أنتي بتزينين عبايتك بورد كروشيه

ماألومهم لو طلعوا من غير عبايات

. . . .

عـشـت في مجتمع خـليجـي حول سنة ونص

احنا عارفين إن أهالينا محافظين أكثر منهم

وبلدنا محافظـة أكثر!

وموادنا الدينية في المدارس والجامعات أكثر


بس شوفوا حياتهم وتفكيرهم

كل بنت لـها خـطوط حمراء

هي حاطتها ومقتنعة فيها وفخورة بها

هناك المحجبة ترفع راسها بحجابها ومحد قدها


وعندنا هنا اللي عبايتها ساترة ما بقى إلا تدخل في الجدار من الحياء

تخاف يقولون عنها متخلفة !!

ياهي مسوية كابوس هذي الكلمة للبنات

تذبح أمها وأبوها بس لا أحد يهمس بكلمة متخلفة

هناك تلقين البنت تقرأ كتب عليها القيمة

مثل . . .

"ذا سيكرت - نساء من الزهرة - أسعد امرأة في العالم - سلسلة شوربة الدجاج ..."

هنا تلقين في يدها رواية للهابطين اللي خسارة أكتب اسمهم هنا !

. . . .


نقطة إضافيه

البلوتوثات والـهـوايل اللي فيها

العين تزني وزناها النظر


لو أقول لك : شوفي فيلم إباحي ..

قلتي : لا حراام !!

طيب وهذا ؟

ليس إلا اقتباس لأقذر ما في الفيلم

!!

رسايل الجوال والنكت الجريئة

والله لو أقول لوحدة : قولي الكلمة السوقية الشوارعية هذي بلسانك

قالت : مستحيل بس لما تنكتب كرسالة جوال تصير كلمة عادية

لا ومضحكة بعد ..

تسمعين الضحكات الرنانة ..

ما أدري هل القذارة صارت تضحك ؟؟

والله لو ولدك وإلا أخوك قالـها

كان صرختي : عيب عليك ترى بأحرقك بالنار عشان تتأدب

. . . .


قبل تقدمين على أي عمل:


لا تحكمين إيمانك

إذا كان إيمانك ضعيف في هذي الفترة أو يمكن لا سمح الله أنه ما فيه إيمان في هالفترة ..

إحنا عارفين عقيدتنا تقول الإيمان يزيد بالطاعات وينقص بالمعاصي!


ولا تحكمين قلبك

لأنه ممكن قلبك يكون قاسي في هالمرحلة


حكـّمي عـقلك

لأن العقل هو نفسه ما يتغير


قولي : هل لو كنت مريضة _لا سمح الله_ بأسوي هذا الشيء؟

أو إذا كان أجـلي قـريب بسـويه..؟؟

إذا كان الجواب : نعـم أقدمي

معناها إنه حلال وخير ولا تستحين منه إذا قابلتي ربك

وإذا الجواب لا

معناها تراك تجاوزتي حد مع ربك ..

وبيكسر هالشيء عينك أنك تقابلينه وأنتي مسويته ..

أي عمل

قولي : هل لو سويته بيكسر عيني مع ربي؟ لو بأقول يارب اشفني! وإلا يارب عطني!

تذكـري ان الموت يجـي فـجـأة وحـاسـبي نفـسك قـبل تحـاسـبين ..

. . . .

هـذي دعوة عملاقة أبعثها من هالمكان الراقي

حملة أتمنى نبدأها ونكون قدها ونوصلها ونسمعها الجميع

كفى .. استهتاراً

كفى .. تراجعاً

كفى .. تنازلاً


شدوا الهمة وساعدوني

أثروا الموضوع بردودكم الهادفة



يا صاحبة الدين..

أضيفي كلمة تشهد لك يوم القيامة ..

مو الدين في غرفتك تصلين وتصومين وإذا شفتي الغلط غمضتي عيونك وسكتي عنه..

هذا اسمه شيطان أخرس !



ياصاحبة العقل الرزين ..

أدلي بدلوك .. نورينا بآرائك الهادفة


ياصاحبة الثقافة..

ساهمي في تثقيفنا



هذا اللي جرأ بنات الغلط على المجاهرة ..

وهو إن صوت أهل الدين والعقل والرزانة واطي !

يخـجـلون من الحـق وأهل الباطـل ماخـجـلوا من باطـلهـم ..

وين التناصـح بيننا واللي هـو ميزة أمتنا وسر خـيريتها ..


علوا أصواتكم خلونا نسمعها ونسمّـع غيرنا

. . . .

نبي وحدة تكون شجاعة وسباقة للخير

أكتبي هنا .. أنا غيرت صورتي الشخصية أو توقيعي !

يله عشان تشـجـعـين غيرك ويحذو حذوك ..

وتأخذين أجره

. . . .

نبي وحده شخصيتها قوية تقول أنا مسحت صور شهيرات هوليود من موضوعي لأن ملابسهم عارية

. . . .

خلوا شعارنا

الرجوع عن الخطأ خير من التمادي فيه !

. . . .

حقوق الطبع غير محفوظة

أنشروا في المنتديات والمدونات والإيميلات

خلونا نرتقي بمجتمعنا

خلي لك بصمة في الحياة

. . . .

يارب هذا أقل ما يمكن أسويه

بس أتمنى أنك تعذرني به

أنا وكل من خطت حروفها هنا إنكارا للواقع المرير

محاولة بسيطة للتصحيح .. تقبلها مننا يارب

. . . .

لا تقولين المجتمع كبير ومتنوع وصعب أصلحه


المجتمع هو . . .

أنا وأختي

وأنتي واختك

وهذي العضوة واختها

وبنات خالاتنا وبنات عماتنا



هذا المجتمع !!

والإصـلاح يبدأ من الشـخـص نفـسـه

(إن الله لا يغـير مابقـوم حـتى يغـيروا ما بأنفـسـهـم )

والسلام عليكم

::::


مخرج

أصـدر المولـى بــيـانه . . . أيــن أنـتِي يـافــلانــه

إفــتحـوا ديـوانـها ولــ . . . تــنـظروا في كـل خـانه

موقــفٌ صـعـب رهـيب ... أسـأل الـله الإعانــــة

حيـــن أدنو من إلـهـي ... دون سـتـر أو بطانـــة

فيحـاكـيني جـهارا ... كيف أدّيـتِ الأمـــــــــانة

حــيــنهــا تشـعر مـثـلي . . . أنهـا حقـا جَبَـانـه

كـم قـضـيت الـعـمـر هــدراً . . . بيـن غـيٍّ ومَـجَـانــه

يـا لـقـلـب الـسـوء أرخى . . . لــلـهـوى الــعَاتِـي عَـنَانَه

فــي متـاهـات الـمـعاصي . . . يــخـسر الــقلبُ رهــانَه

مـن يـجـيـب الله عـنـي؟! . . . مــن سـيـعـطـيـنـي لــسـانـه

لـحـظـة مــن هـولـها لا . . . يـملــك الــعـقل اتــزانــه

ضــاع مفـتـاح الــنــهـى . . . واخــتَّـل مـيــزان الــرزانه

. . . .


انتهى كلامها ..



لافض فوك أختي الحبيبه ..

أسأل الله العظيم أن لايحـرمهـا الأجر ,,

وأن يثبتنا واياها على طـاعـته ويجمعنا بها في دار كرامته..

وصلى الله وسلم على نبينا محمد وعلى آله وصحبه أجمعـين ...

http://www.altlae3.com/vb/uploaded/7096_01238404749.swf


8

8

8

إهدائي لكل من قرأ الموضوع


لاتحرموني ردودكم وتعقيباتكم المميزه

ولاتنسوني من دعوآآتكم ولأي وحده تنشر الموضوع..

وفقكم البآري وسدد خطآآكم ~
__________________
تم حذف كافة تواقيع الأعضاء من قبل إدارة الرس اكس بي ونامل منكم مراجعة قوانين المنتدى قبل إعادة بناء توقيعك وشكراً
صمت مجروح غير متصل   الرد باقتباس

 
قديم(ـة) 29-04-2009, 05:29 AM   #2
عضو اسطوري
 
تاريخ التسجيل: May 2008
المشاركات: 9,525
قوة التقييم: 0
%خجل% is a jewel in the rough%خجل% is a jewel in the rough%خجل% is a jewel in the rough
اقتباس:
هل لما زادت رفاهية الحياة يزداد تخـلـفنا؟؟

هل لما تطورالعلم وتسهلت الطرق له يزداد جهلنا؟؟
للأسف هذا الواقـــع في هالزمــــان لاأقوول الجميع ولكن الاغلب :(

مقال قووووي ومؤثر..

ربي يعطيكـ العافية صمت ولا يحرمـ الكاتبة أجر ماكتبته..

وأهلا بعودتك *-^
__________________
استغفر الله العظيم لذنبي ولوالدي والمسلمين والمسلمات والمؤمنين والمؤمنات الأحياء منهم والأموات الى يوم الدين
%خجل% غير متصل   الرد باقتباس
قديم(ـة) 29-04-2009, 06:58 AM   #3
√ تمشي مـلكـهـ √
 
صورة واثقـــ الخطـــــــى ـــة الرمزية
 
تاريخ التسجيل: Mar 2006
البلد: في قلوب أحبابي
المشاركات: 2,357
قوة التقييم: 0
واثقـــ الخطـــــــى ـــة is on a distinguished road
والله صدقت الناس كل مالها وتتراجع وراء وياكثر مااشوف صاحب كلمة الحق هو الغلطان واذا شفتي الحرام بعينك وقلتي حرام صرتي معقده وبدوا يتحاشونك

قال رسول الله صلى الله عليه وسلم ((يأتي على الناس زمان القابض فيه على دينه كالقابض على الجمر))
__________________
واثقـــ الخطـــــــى ـــة غير متصل   الرد باقتباس
قديم(ـة) 29-04-2009, 09:41 AM   #4
عضو بارز
 
تاريخ التسجيل: Mar 2007
المشاركات: 549
قوة التقييم: 0
SûLtân ° Zâmâny is on a distinguished road
فعلآ هذا الواقع .. صدقتي وكفيتي ووفيتي
SûLtân ° Zâmâny غير متصل   الرد باقتباس
قديم(ـة) 29-04-2009, 10:22 AM   #5
عضو مميز
 
تاريخ التسجيل: Jun 2007
المشاركات: 246
قوة التقييم: 0
إمرأه وأكثر is on a distinguished road
Thumbs up

صدقتي والله ياأختي
نحن الان في عالم انقلبت فيه الموازين بكل المعاني للأسف الشديد
اصبح السواد بياض والبياض سواد
نسأل الله العظيم ان يتجاوز عنا ويغفر لنا ماقدمنا وماأخرنا
مشكوووووووووووووووورة اختي والله يعطيك العافية
__________________

اللهم لك الحمد حتى ترضى ولك الحمد إذا رضيت ولك الحمد بعد الرضى
إمرأه وأكثر غير متصل   الرد باقتباس
قديم(ـة) 22-06-2009, 03:19 AM   #6
عضو ذهبي
 
تاريخ التسجيل: Feb 2008
المشاركات: 2,365
قوة التقييم: 12
صمت مجروح is on a distinguished road
دنيا العجايب كفانا الله شرها..

لكل اللي مروا من هنا وردوا //ألف شكر..
__________________
تم حذف كافة تواقيع الأعضاء من قبل إدارة الرس اكس بي ونامل منكم مراجعة قوانين المنتدى قبل إعادة بناء توقيعك وشكراً
صمت مجروح غير متصل   الرد باقتباس
قديم(ـة) 22-06-2009, 11:29 AM   #7
مشرفة سابقة
 
صورة نبض المشاعر الرمزية
 
تاريخ التسجيل: Jan 2008
البلد: الرس
المشاركات: 12,440
قوة التقييم: 0
نبض المشاعر is a name known to allنبض المشاعر is a name known to allنبض المشاعر is a name known to allنبض المشاعر is a name known to allنبض المشاعر is a name known to allنبض المشاعر is a name known to all
.

.

الله يجزاها خير
والله إنها صادقة بكل كلمة قالتها وللأسف الشديد
ماشاء الله عليها مع إنها عاشت برا سنوات
بس محافظة على دينها و أخلاقها ,,,


.
__________________
أهلّي بـ الموآجع كل مآ أنسآقت من [ الأقدآر ]
و أقـول يحلّها الليْ حطهآ لـ آلقلب / مكتوبة .!
.

.
نبض المشاعر غير متصل   الرد باقتباس
قديم(ـة) 23-06-2009, 01:58 AM   #8
عضو ذهبي
 
تاريخ التسجيل: Oct 2008
البلد: بين ألوان الغروووب
المشاركات: 2,020
قوة التقييم: 0
لحظة غروووب is on a distinguished road
بصراحه هي صادقه


...............


لحظة غروووب غير متصل   الرد باقتباس
قديم(ـة) 23-06-2009, 09:18 AM   #9
عضو مبدع
 
تاريخ التسجيل: Mar 2009
البلد: k.f.u.p.m
المشاركات: 1,375
قوة التقييم: 0
*أم الفارس* is on a distinguished road
الله يصلح الاحوال
__________________
*أم الفارس* غير متصل   الرد باقتباس
قديم(ـة) 23-06-2009, 11:58 PM   #10
عضو مميز
 
تاريخ التسجيل: Aug 2008
البلد: ج
المشاركات: 154
قوة التقييم: 0
هلاوبس is on a distinguished road
لافض فوك أختي الحبيبه ..

أسأل الله العظيم أن لايحـرمهـا الأجر ,,

وأن يثبتنا واياها على طـاعـته ويجمعنا بها في دار كرامته..

وصلى الله وسلم على نبينا محمد وعلى آله وصحبه
هلاوبس غير متصل   الرد باقتباس
إضافة رد


يتصفح الموضوع حالياً: 1 (0 من الأعضاء و 1 من الزوار)
 
أدوات الموضوع
طريقة العرض

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق
Trackbacks are متاح
Pingbacks are متاح
Refbacks are متاح


مواضيع مشابهة
الموضوع الكاتب المنتدى الردود آخر مشاركة
موضوع مكرر , والحديث عن لاشيء !! كيف المنتدى العام والمواضيع المتنوعة 28 12-02-2009 10:58 PM
اتريد ان تعرف من هي اغبى البنات ؟؟؟ رحال 444 المواضيع المنقولة وأخبار الصحف والوطن 11 14-12-2008 03:11 AM
اول شئ هذا اول موضوع لى واتمنى من أعضاءالمنتدى يشركونى رايهم المتفاهم منتدى الرياضة و السوالف المتنوعة 2 07-12-2008 09:29 PM
مشوار الألف رد يحتاج موضوع مميز اتمنى التفاعل بندر ماغيره منتدى الرياضة و السوالف المتنوعة 19 18-08-2008 12:44 AM


الساعة الآن +3: 01:33 AM.


Powered by vBulletin® Version 3.8.7
Copyright ©2000 - 2017, vBulletin Solutions, Inc.
SEO by vBSEO 3.6.0 ©2011, Crawlability, Inc.
هذا المنتدى يستخدم منتجات بلص

1 2 3 4 5 6 7 8 9 10 11 12 13 14 15 16 17 18 19