منتديات الرس اكس بي  

العودة   منتديات الرس اكس بي > منتديات الرس اكس بي > تاريخ الرس و الأدب و الشعر

الملاحظات

تاريخ الرس و الأدب و الشعر هذا القسم توثيق لتاريخ الرس الماضي والحاضر، و أرشيف للصور القديمة، ومنتدى الأدب و الشعر

إضافة رد
 
أدوات الموضوع انواع عرض الموضوع
قديم 21-06-2009, 01:55 PM   #1
رايق العجمي
عضو بارز
 
تاريخ التسجيل: Oct 2008
المشاركات: 576
معدل تقييم المستوى: 0
رايق العجمي is on a distinguished road
Wink سالفة خطيرررة صارت لي في الاختبارت ..

هلا و غلا بالجميع ...
بمناسبة الاختبارات قلت اسدح لكم سالفة صارت لي ايام اختبارات الجامعة ...
منها ترويح عن نفسيات الطلاب و الطالبات اللي الحين هم في (خضمّ ) الاختبارات==> وش رايكم بخضمّ هذي ؟ مب تنفع ايام الاختبارات خصوصا اللي عندهم بلاغة ؟...
و منها عشان تاخذون العظة و العبرة و ما تسهرون واااايد ==> يقولون السهر يؤثر على البشرة ...
السالفة هذي سالفة الكشتة

في آخر يوم من أيام الامتحانات كان يوم اربعاء و أنا راجع من الجامعة حوالي الساعة وحدة الظهر ما أشوف الدرب ـ إلى الآن مدري شلون قطعت المسافة بين الجامعة و البيت و وصلت البيت بالسلامة ـ المهم ما مداني أدخل البيت و أحط رجلي في الصالة إلا الوالدة تقول يالله .. يالله مشينا لا تأخرنا ، الجماعة ينتظروننا عند المحطة ...

أنا مافهمت أو ما استوعبت أي شيء من اللي قالته ، حطيت يدي على راس الوالدة و (هزعته) شوي وحبيت راسها و على طول عطيتها ظهري و سيدا على غرفتي ...

فجأة و إلا ذيك التلّة اللي رجعتي لوسط الصالة ( الظاهر إن أمي المرأة الحديدية )==> يا قددددددددمه
بعدين أكتشفت إني أنا كنت زي الخرقة لو تنفخني طحت .

قالت الوالدة بغضب : أنت ما تسمع يومنك تسفهني وترقى لغرفتك ؟!
قلت : هاه .. هاه .. و الله مهوب أنا .

اندهشت و قالت : وشو اللي مهوب انت ؟؟!!!!!!! ( هذولي!!!! يعني انها مندهشه وايد )
ما خلتني أرد عليها ـ أصلاً أنا ما رديت ـ أردفت قائلة: امش امش قدامي شف العفش بالحوش حمله بالسيارة ترانا تأخرنا عليهم .( شديدة الوالدة في هالمواقف)

طلعت الحوش و إذا فيه اشياء سود وحمر و بيض ما ادري وش هن!!! زي الخيال قدامي قربت شوي شوي و تصدم رجلي حاجة منهن واطيح و اثاريه فراش مطوي ، ما قمت خميته و سحبتها نومه .


ما أدري كم مضى لي على هالحالة بس أكيد موب وايد ، قمت على طوفان ماء و انا اشاهق من الغرقة و اثاري أمي قدامي و معها سطل أزرق حق سواقنا ( مشتاق ) يغسل به السيارات الله لا يجزاه خير ،


بادرتني امي بقولها : ألم آمرك بتحميل العفش بالسيارة أيها الولد العاق ؟! ( على بالها متأثرة بالمسلسلات السورية الفصيحة)


سطل المويه صحاني شوي قلتلها : يا ميمتي و الله صارلي يومين ما نمت مواصل على شان هالامتحان ( الله لا يعيده 107فيز كتاب هذا كبره ،حشى قاموس ذا موب كتاب!! أول مرة اشوف كتاب 684 صفحة !!!، لا و من زين الطبايع بالانقليزي بعد)


قالت : معليش اذا وصلنا الشعيب حط راسك و نم .
قلت : هاه ..!!! وشو شعيبه ؟
قالت : شعيب طويق ، اخوانك و ابوك سبقونا يطقون الخيمة و أنا احتريتك عشان نروح سوى .
قلتلها : يا بعد عمري يا ميمتي جالسة لحالتس تحتريني ،ليه ما رحتي معهم و ريحتيني من هالمشوار .
قالت : امسح زقمك ، انا اللي مأخرني عنهم الجريش توه ما بعد استوى .

و أنا اقعد القّط وجهي من الفشيله ، طيب خلص الجريش ؟؟

قالت : ما تشوفه قدامك بالحافظة هذي ، يالله يا زبيدة اركبي (زبيدة هذي شغالة امي الخاصة ، ما تروح مكان إلا هي معها و لا تخليها بالبيت لحالها أو ترسلها لأحد ، من قدها هالأندونيسية مدلـله)


قلت بعصبية و صوت عالي: يالله يا زبيده شيلي الفراش والحافظة .
قالت أمي : موب حرام عليك تخلي هالضعيفة تشيل و انت زنودك ياقف عليها التيس .
قلت : و الله الضعيّف أنا موب هالفنسا اللي كنها قرعة بلاد .

المهم حملت العفش ( برغبتي و بكيفي موب غصبن عليّ ) و مشينا يوم وصلنا طويق قلت : هاه وين بنلقاهم الحين ؟


قالت أمي: مالت على أم جابتك ( تقصد نفسها خخخخخ ) هالحين تقطع عليّ قرايتي عشان تسأل هالسؤال!!! ( كانت تقرى جريدة الندوة ) اطلع الطلعة هذي و أنا اعلمك .

يوم صرنا فوق طويق قالت : اهزع يسار من ورى هالعقم ، و بعد شوي قالت : شف هالشعيب باره خله عن يسااااارك و اشمل .. اشمل لين ينحني شرق و تلقاهم بعد هالحنية بشوي و لاتزعجني و رجعت تقرى الجريدة .




مشيت على وصفها ( طيرة بر أميمتي ) يوم وصلت ملف الشعيب و إلى هذا جيب الوالد لاندكروزر و سيارات اخواني شيروكي و كامري و ددسن غمارتين حقت السواق ، و كلهن يشتغلن و الخيمة مطقوق نصفها و الرواق يلعبه الهوى والمواعين متنثرة حوالين السيارات و الخيمة و لا فيه أحد أبد !!!!!



قلت لأمي يالله وصلنا رفعت راسها يوم شافت المنظر و هي تشهق و تدمّع عيونها وين عيالي؟! وش فيهم ؟ وين أبو رايق؟!! وش صارله ؟؟
قاطعتها : انا عارف هالحركات تلقينه اخوي عبودي مسويها مخليهم يتغبون عنا عشان اذا نزلنا يقولون ( أولبرايت )

قالت : عمى في شكلك اشبك؟ انتا قاعد تتبهلل عليّه!! ايش جاب وزيرة خارجية امريكا هينا في طويق ( من الحمقة ارجعت لأصلها و قلبت حجازية ، اصل جدتها أم أمها حجازية من شرورة )

قلت : قصدي يقولون(سبرايت )

قالت : اشبك يا ابوووويه ايش جرالك؟!! الفيزيا دي مأسّيره في راسك ؟
أنا قصدي يقولون (مفاجأة بس بالنقليزي ) ضاعت الكلمة مني في هاك الموقف و إلى الحين ما اعرفها .



المهم نزلنا و نحتري السبرايت ما طلعت يا عبودي تراني عارف حركاتك اطلع ... اطلعوا ... كلكم ... ما أحد طلع ........ أنا بديت اخاف مو معقوله ابوي يطاوعهم و لو طاوعهم شلون بيسكّتون البزران كل هالمدة !!!!




قالت زبيدة : أنا فيه خوف ماما .
التفت لقيتها ماسكتن يد امي بيدها و الثانية خامتها فيها و تمشي جنبها ...
وانا امشي بين المواعين المنطّلة هنا و هناك و القى جزمة رزان بنت اخوي مقطوعة نصفين و عليها دم !!!
شافتها أمي بيدي و على طول ...


قالت: يا بعد حيي يا بنيتي و يغشى عليها وتطيح ...
الشغالة شافت أمي اغمى عليها و يغمى عليها و تطيح جنبها ، أنا ناقص!!؟

قلت : زين خلهم هنا لا يشغلوني و انا ادوّر على الباقي ـ كل هالذيابة و القرامة اللي فيني من آثار قل النوم يعني قاعد اقط خيط و خيط و إلا لو أني صاحي زين كان انسدحت جنبهم ==> بس من جهة أمي موب من جهة الشغالة.



المهم و أنا انزل الشعيب و اتتبع آثار الدم و كل شوي يزود الدم و فجأة بين الحصى اشوف يد صغيّرة مو باين منها إلانصف الكف !! يا ويل حالي !!! هذي يد رزان و اقعد اصيح و تجيني أم الركب ( و ابو الكراعين ) ما قدرت اتحرك ، ما طوّلت الحالة بعد شوي تخف الرجفة و امسّح دميعاتي قلت لنفسي يمكن ما زالت حية فيها رمق ( حلوةهذي رمق )



و أنا أمد يدي شوي شوي كني ابمسك ضب و أوخر التراب عن اليد و اسحبها على هوني و تطلع بيدي على طول و أثاريها يد باربي ( لعبة رزان ) و من القهر احطها بين سنوني و اعض عليها بقوه و انتفها ، و أنا في خضم المعركة مع يد باربي سمعت صوت أنين جاي من جهة السيارات ...
رميت بقايا اليد اللي معي و رحت اركض يم الصوت ، و ألقى ابوي تحت الشيروكي يئن و يتوجع و يقول الحق اخوانك و عيالهم.. شالوهم ... اخذوهم ... تكفى و انا ابوك يموت الولد ما نخيّ .
قلت سم طال عمرك .. ابشر بعزك، وين راحوا بس ؟
قال : من هنا و اشار جهة بطن الشعيب .



و أنا انط فوق vxr و أعشّق الدبل و أحدر الشعيب و ادعسله و امشي 140 لين وصلت شجرة كبيرة وسط الشعيب و أنا اضرب ذيك الفرامل و تنط (الإيرباق ) بوجهي و تكسر نظارتي و انعفس و بعد جهد جهيد نزلت ظهر المرتبه عشان اقدرانزل يوم فتحت الباب و إلى هاك الثلاثة اللي يحتروني عند باب السيارة ما أدري من وين انبتوا !!!...



الأول لابس ثوب زيتي و عليه سديرية بني غامق ـ الظاهر كان لونها بيج أول ـ و معه رشاش و رابط على راسه خرقة تمسيح حمرا و لا بس زبيريات منقطع اللي عند اصبعه الكبير ...



و اللي عن يمينه لابس ثوب رمادي وصخ بقوة و بالطو حق الجيش و متلطم وطالعة شواربه من فوق اللطمة و معه بازوكا و لابس زنوبة حمام ( الله يكرمكم )



و اللي عن يساره لابس بدله أرميني نظيفة أو بالأصح جديدة لونها بيج و كرافته سماوي منقطة بأحمر و قميص ابيض و معه سيجار كوبي طويل توه مولعه و حاط على عيونه نظارة كاريرا سودا .



الوسطي شكله زعيمهم التفت على أبو بدله و قال له :
الظاهر إن هذا منهم .
رفع نظارته ابو بدلة شوي عن عينه و ناظرني من تحت النظارة و قال :
أبك أنت وش انت من لحية ؟

قلت له : سكسوكة .



و يحلت الثالث البازوكا من على كتفه و يطق من الضحك ويقعد يرفس لين دمّعت عيونه ، و يرجفه ابو خرقة حمرا برجله و يفز و يلقط باروكته قصدي بازوكته و هو يقول : آسف يا معلّم . و سكت كنه ما ضحك بحياته .

عرفت إن المعلم هذا شديد و ما يلعب ، التفت المعلم لأبو بازوكة و بعدين راح ، و يتلني أبو بازوكه مع كتفي و هو يقول :
قدامي ... تحرك ...


و أنا اتغافله و التفت عليه و أصكه ذيك اللكمة الراشدية على وجهه و يطيح على قفاه و أنا ألقط البازوكة و احطها على كتفي واصيح عليهم :

وين اخواني ...؟ و ين أهلي ؟ وش سويتوا بهم ؟

و ينبطح المعلم ويرفع الرشاش بوجهي و ابو بدلة مدري وين اختفى ،

قال المعلم : منت قد الحركة هذي ، نزّل السلاح لا أخرشك بهالكلاش .

اقولك وش سويتوا باخواني و عيالهم ، ترى معي بازوكة اقوى من رشاشك .
و يقعد يضحك .

قلت : وش فيك تضحك ؟
قال : اصلك ماسكها بالقلب .

و أنا انزلها و اطالع فيها ما دريت إلا السكين على رقبتي و باليد الثانية خانقني ، و اطالع بطرف عيني و اثاريه ابو بدلة !!!

قال للمعلم : ابك أنت عيّنت هالحضيري يبا يرفع سلاحه عليك!! اعّقب يا أصفر عرقوب .

قلت انا ما واعدت احد و اخلفته عشان تقول عرقوب !!!
و يكرّون ضحك كلهم ...
انا ما ادري ليش يضحكون لكن تجاهلت ضحكهم و كملت: من يوم شفت هالبدلة و النظارة و الكشخة و أنا أقول ليته ما يذبحن إلا هو بدل هالعرابجة وأثاريك....


و يقاطعني صوت المعلم و هو يقول لأبو بازوكة : ( اللي مغمى عليه من البقس إللى صكيته به لين الحين ) قم بس قم ، و الرجال ما قام ، و يطلع المعلّم قارورة صحة من جيب السديرية و يشرب منها و يصب عليه منها و هو يفز مذعور: وينه؟ وينه !!! و يتلفت يوم شافني و ينحرني ما شي مليون يوم وصل يمّي ...قال : ليه تطقن بقس ؟


و ياخذ القارورة من المعلم و يرشق الماء الباقي على وجهي و أنا اقوم ، و أثاريني نايم بالحوش على العفش و أمي تقول :يالله يا وليدي ترانا تأخرنا عليهم .

اثاريني على خمتي للفراش يوم اتعثر به!!!

النــهــــــــــــــــــــاية
*********************
اتمنى اني رسمت البسمة على شفاهكم ...
و ادخلت الوناسة على قلوبكم ...
و اذا كنتم من الطلاب و الطالبات ، خلاص وسّعت صدرك شوي قم ذاكر و شف مستقبلك ... ترى مب نافعك رايق و حلومه ...

تقبلوا صادق الود
__________________



كل ما قفيت ناداني تعال *** و كل ما اقبلت عزّم بالرحيل

التعديل الأخير تم بواسطة رايق العجمي ; 21-06-2009 الساعة 01:57 PM
رايق العجمي غير متواجد حالياً   رد مع اقتباس
قديم 21-06-2009, 03:04 PM   #2
salfat 3shaAaq
عضو متألق
 
الصورة الرمزية salfat 3shaAaq
 
تاريخ التسجيل: Dec 2008
الدولة: حيث يوجد أوكسجين
المشاركات: 998
معدل تقييم المستوى: 0
salfat 3shaAaq is on a distinguished road
افتراضي

اقتباس:
المشاركة الأصلية كتبت بواسطة رايق العجمي مشاهدة المشاركة


قالت : عمى في شكلك اشبك؟ انتا قاعد تتبهلل عليّه!! ايش جاب وزيرة خارجية امريكا هينا في طويق ( من الحمقة ارجعت لأصلها و قلبت حجازية ، اصل جدتها أم أمها حجازية من شرورة )

قلت : قصدي يقولون(سبرايت )

قالت : اشبك يا ابوووويه ايش جرالك؟!! الفيزيا دي مأسّيره في راسك ؟

،
،
كوميديا محلية .. بحتة ..
رايق .. كاتب يملك أدواته ..
صوّر المشهد بتفصيل دقيق للكشتات .. وبلغة محلية فكاهية ..
تشعر انك قاعد تسمع سالفة حقيقية للي يحصل في البران ..
خيالك واسع يا رايق ..
و يا طولة بالك ! بالله كم أخذ منك وقت في التنسيق ؟
أنا عشان اقص هالكلمتين أخذت نص ساعة !
طبعاً الفرق في الاحترافية !
،
استمتعت هنا جداً .. شكراً رايق ..
__________________

كنتُ هناك .. في قلب زهرة ..
salfat 3shaAaq غير متواجد حالياً   رد مع اقتباس
قديم 21-06-2009, 04:10 PM   #3
ريتال
عضو متألق
 
تاريخ التسجيل: Oct 2008
الدولة: الرياض
المشاركات: 768
معدل تقييم المستوى: 0
ريتال is on a distinguished road
افتراضي

و امشي 140

!!

لا يكون الطريق مزفلت (:

أجل الحمدلله على سلامتك

هي من ناحية سالفة خطيرة فهي خطيرة بقوه

...

أسعدك المولى
__________________
عندما تدب الحياه بالأموات ترتجف الأرض
...
فكيف بقلب يعانق الحياه ويتحمل الجسد نبضه بعدما كان
ساكن !!
ريتال غير متواجد حالياً   رد مع اقتباس
قديم 21-06-2009, 07:28 PM   #4
..~ لآ يطول غيآبگ ..
عضو متألق
 
الصورة الرمزية ..~ لآ يطول غيآبگ ..
 
تاريخ التسجيل: Nov 2008
الدولة: { وَرِيدَْ رَجُـلَ ..~
المشاركات: 814
معدل تقييم المستوى: 0
..~ لآ يطول غيآبگ .. is on a distinguished road
افتراضي


رآيــق آنت بـآطروحـآتك
فعـلآ وسعت صدورنـآ

بالتوفيــق للجميع
خطير آنت كخطورهـ سآلفتـك
:)

كن بخ’ــير


__________________

أحتَاج أن أكُونَ أنَـآ كَمَـا أنَـا ..~
لَكنْ ..
لاَشَيءَ يَدفَعُني لِـ ذَلكْ ..
..~ لآ يطول غيآبگ .. غير متواجد حالياً   رد مع اقتباس
قديم 22-06-2009, 10:11 AM   #5
رايق العجمي
عضو بارز
 
تاريخ التسجيل: Oct 2008
المشاركات: 576
معدل تقييم المستوى: 0
رايق العجمي is on a distinguished road
افتراضي

اقتباس:
المشاركة الأصلية كتبت بواسطة ريتال مشاهدة المشاركة
و امشي 140 !!

لا يكون الطريق مزفلت (:

أجل الحمدلله على سلامتك

هي من ناحية سالفة خطيرة فهي خطيرة بقوه

...

أسعدك المولى
الله يسلمج رتال ، جت سليمة و لله الحمد هههههههه

يسعدج المولى على هالمرور العطر ...

تقبلي صادق الود
__________________



كل ما قفيت ناداني تعال *** و كل ما اقبلت عزّم بالرحيل
رايق العجمي غير متواجد حالياً   رد مع اقتباس
قديم 22-06-2009, 10:15 AM   #6
رايق العجمي
عضو بارز
 
تاريخ التسجيل: Oct 2008
المشاركات: 576
معدل تقييم المستوى: 0
رايق العجمي is on a distinguished road
افتراضي

اقتباس:
المشاركة الأصلية كتبت بواسطة ..~ لآ يطول غيآبگ .. مشاهدة المشاركة
رآيــق آنت بـآطروحـآتك
فعـلآ وسعت صدورنـآ

بالتوفيــق للجميع
خطير آنت كخطورهـ سآلفتـك
:)

كن بخ’ــير



صباحج رايق كروقان تعليقج ...

الله يسعدكم جميعاً يا رب ...

يسعدني ان السالفة نالت الاعجاب و ادخلت الوناسة لقلوبكم ...

لا يطول غيابك : تقبلي صادق الود
__________________



كل ما قفيت ناداني تعال *** و كل ما اقبلت عزّم بالرحيل
رايق العجمي غير متواجد حالياً   رد مع اقتباس
قديم 22-06-2009, 11:01 AM   #7
غرااام الليل
عضو خبير
 
الصورة الرمزية غرااام الليل
 
تاريخ التسجيل: Sep 2007
الدولة: في قلب من أحب
المشاركات: 4,246
معدل تقييم المستوى: 0
غرااام الليل has a spectacular aura aboutغرااام الليل has a spectacular aura about
افتراضي

اقتباس:
و أثاريني نايم بالحوش على العفش و أمي تقول :يالله يا وليدي ترانا تأخرنا عليهم .

اثاريني على خمتي للفراش يوم اتعثر به!!!



ياويل قلبي طلع المسلسل المكسيكي بالحلقه الاخيره (حلم )
لي يومين وأنا أقرأ
وداخله جو بقوووه..خصوصاً مع رزان..قطعت قلبي
بس من وين جاء الدم مادام المقطوعه يد باربي>>>حلها الحين
الا وين بناتكم مالهم طاري>>>لازالت مصدقه
/

سرد رائع باسلوب كوميدي متقن لعب الخيال فيه دور كبير
ماشاء الله عليك يارايق
لديك قدره على سرد الاحداث بشكل متسلسل ومتمكن
وإهتمامك بالتفاصيل الصغيره يجعل الموضوع أكثر مصداقيه لولا بعض الشطحات الخياليه
وسعت صدورنا الله يوسع صدرك بالعافيه
تقبل مروري









__________________
:
:
:
{..قُلْت مَابْي ..وَكَفَى
..
غرااام الليل غير متواجد حالياً   رد مع اقتباس
قديم 22-06-2009, 03:28 PM   #8
salfat 3shaAaq
عضو متألق
 
الصورة الرمزية salfat 3shaAaq
 
تاريخ التسجيل: Dec 2008
الدولة: حيث يوجد أوكسجين
المشاركات: 998
معدل تقييم المستوى: 0
salfat 3shaAaq is on a distinguished road
Angry

اقتباس:
المشاركة الأصلية كتبت بواسطة salfat 3shaAaq مشاهدة المشاركة

،
،
كوميديا محلية .. بحتة ..
رايق .. كاتب يملك أدواته ..
صوّر المشهد بتفصيل دقيق للكشتات .. وبلغة محلية فكاهية ..
تشعر انك قاعد تسمع سالفة حقيقية للي يحصل في البران ..
خيالك واسع يا رايق ..
و يا طولة بالك ! بالله كم أخذ منك وقت في التنسيق ؟
أنا عشان اقص هالكلمتين أخذت نص ساعة !
طبعاً الفرق في الاحترافية !
،
استمتعت هنا جداً .. شكراً رايق ..
/
\
رايق .. أكيد إنك ما بعد صحيت من نومة الحوش !!
الحين ردي هذا يا طوله و يا عرضه و لا شفته
__________________

كنتُ هناك .. في قلب زهرة ..
salfat 3shaAaq غير متواجد حالياً   رد مع اقتباس
قديم 22-06-2009, 03:45 PM   #9
معّرب الجدين
عضو متألق
 
الصورة الرمزية معّرب الجدين
 
تاريخ التسجيل: Dec 2008
المشاركات: 794
معدل تقييم المستوى: 0
معّرب الجدين is on a distinguished road
افتراضي


يخرب بيت ام الحلم يارايق
قبل امس قريت الموضوع ولمن وصلت عند يد رزان وقف قلبي من هول الصدمة
وما قدرت اكمل قلت الجماعة عايثن فيهم ذيب اكيد واكلن البنت الصغيره
من امس افكر اقول والله ياهو رايق على اسمة هالحين كل ذا صاير لة وبنت اخوة
غادية اوصال بسبب هالطلعة وهو وجالس يكتب بالمنتدى .


ماقول الله يرووووووووج عدوينك .

الا صدق يد باربي وتنقط دم ؟؟ انت متأكد ان السالفه حلم
.
معّرب الجدين غير متواجد حالياً   رد مع اقتباس
قديم 22-06-2009, 06:19 PM   #10
MS.FUNKA
مشرفة القسم النسائي
بٌڪرآ آحلآ =]
 
تاريخ التسجيل: Sep 2008
الدولة: ♥ ,
المشاركات: 7,163
معدل تقييم المستوى: 0
MS.FUNKA will become famous soon enoughMS.FUNKA will become famous soon enough
Talking


اوم الحلم خطير
ماتسنه حلم حسيت اني اتابع فلم ع Mbc2
بس الصارحه والله يانا رحمتك يومين مانمت عز الله جبت العيد لو قعدت يوم مانمت

الله يوسع صدرك وسعت صدري ,,
موفق اخوي
__________________
*اللهمّ زد قلبي حباً وتعلقاً وإقبالاً عليك *
MS.FUNKA غير متواجد حالياً   رد مع اقتباس
إضافة رد

الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
سواليف رايق بآخر الليل ( سالفة الفاتورة ) رايق العجمي تاريخ الرس و الأدب و الشعر 37 25-11-2011 02:01 AM
وش سالفة الحريم ياولد؟ @ عاشق الشمال @ المنتدى العام و الأخبار المتنوعة 69 08-12-2008 11:33 AM
بيان السعودية وبنوتة سورية خطيرررة صورتها علشان تشوفون الفرق MaNoOo المنتدى العام و الأخبار المتنوعة 10 02-08-2008 10:55 PM


الساعة الآن 02:30 PM


Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir