LinkBack أدوات الموضوع انواع عرض الموضوع
قديم 09-03-2011, 12:19 PM   رقم المشاركة : 1
معلومات العضو
عاشق المجاهيم
مشرف سوبر
 
الصورة الرمزية عاشق المجاهيم
 
 

إحصائية العضو








Talking أنا والاكس بي ... ذكريات وتنببيشات ^_^


السلام عليكم ورحمة الله وبركاته
\
/
أمر بأوقات فراغ وفضاوه ، ودائماً أستغل جزء من هذا الوقت بتقليب صفحات الماضي
وبما فيها أسترجع أيام مضت في الرس اكس بي ، وكل فتره أرجع لنفس تلك الذكريات والمواضيع .. والآن قررت نقل شئ بسيط منه لهذا الموضوع .. (( مما يصلح للعرض طبعاً ))
*بآخر الموضوع فيه تنبيشات مصوّره

****
بفصل ثالث متوسط .. زميلي رائد " الله يذكره بالخير " سألني : وش تدخل بالنت ؟ جاوبته : أدخل الساحات .. ما كنت أعرف ذيك الأيام سوى الساحه المفتوحه والساحه الرياضيه والساحه السياسيه اللي كانوا كل الناس يتابعونه .
قالي طيب وراه ما تدخل اليوم تشات الرس وعطان الرابط حقه ... بعد المدرسه وقبل أدخل البيت رحت للملحق ودخلت التشات كان الرابط www06333.com
وذيك الأيام كان فيه لافته إعلانيه من القماش فيها الرابط .. معلقه بمحطة امتياز .. إعلان للموقع
دخلت التشات ذاك اليوم وكانت أول وآخر مره .. أذكر اخترت يوزر ( السيف ^^ ) .. اللي كانوا موجودين فيه لا يتجاوزون 10 مستخدمين :) .

في مشاركة قديمة ... يقول الأثري هزيم الرعد عن التشات :

ابقول لكم شوي معلومات من هكالذكريات وأكيد نور لو تقدر تدخل ممكن تعطينا معلومات أيضا
أولا ...كنا أنا والطموح ودالق الكشرة ونور وحزين الصوت وهادية الطباع وأمير الظلام و fbi لنا اجتماعات في تشات الرس اكس بي
ياااااااااه زماااااااااااان وكان معنا قطرية اسمها ساندي جدا البنت محترمة الله يذكرها بالخير ...ياخي فعلا شي مؤثر
دالق الكشرة من اهالي رياض الخبراء او هي الخبراء وآخر علمي به انه شرى أرض بالبكيرية وعمرها وسكن هناك
أأأأأأأأأأأيه ياادنيا ....كنا مع بعض ضحك وسواليف ومزوح وتعليق
حزين الصوت لحد تقريبا سنتين كنت اشوفه مسنجر بس هالحين ما أدري وينه ..كان معنا هنا بالرس اكس بي بس اذكر انه تبند
المعنى ...وأمير الظلام ...كانوا مشرفين ...وصار بينهم خلاف ...مثل مايكون بكل المواقع ...
أنا كنت مجرد عضو ...
عباس مشاكس جدا ...ومثقف جدا ....تعجبن مداخلاته ..ياليته موجود هالحين ... الصراحة إكة رغم ان مداخلاته مهيب كلها سيئة بس اخذوا عنه فكرة سيئة واستمرت ...
أرشيف الحب كان له ثقله بالتشات شخص مميز ومرح وحبوب
سناء الشمس كانت مشاركاتها رائعة بعد ولها تواجدها المميز بالمنتدى
الله يذكرهم بالخير جميعا
نور مازالت موجودة بنت الشمال ..وهي طبعا مسجلة قبلي بالرس اكس بي وشفت له قبل كم يوم مشاركة جديدة الله يذكرها بالخير
ايام ايام ...
وش بعد ....احس ان عندي هرج واجد ونسيته
هادية الطباع آخر ايامه كان له توقيع يودي لأبوزعبل ...مدري وش يبي ... حرروه الشباب جزاهم الله خير

انا كنت ادخل التشات عشان أعرف أكتب بسرعة .... بس طبعا تعلقنا به وصار يومي نجي لمه
بالله تذكر وحدة كانت تدخل بمعرف قصيمية ؟
كانت الصورة اللي تحط عند اسمه صورة وحدة مميلتن رقبته ...حتى اني صرت اتخيله هي فعلا رقبته مايله ههههههههههههههههههههههههههههههه
معي بالمسنجر للحين واحد من حقين التشات مهستر ذيك الأيام وكان معرفه غريب شوي الحين اعرفه بس نسيت معرفه مثل قولة قرحوص او شي من هالقبيل


انتهى كلام الأثري ... قدس الله سره ..

***
بعده مرت سنين وما دخلت موقع الرس هذا .. ماكان الإهتمام بالنت مثل الحين .. وكانت المنتديات الكبيره والبالتوك ..آخذه كل الوقت ..
حتى جاء فتره في 2004 وشفت واحد من أخواني دايم يدخل منتدى الرس ويكتب فيه ... وكان مشهور بهالمنتدى وله شعبيه ..
بديت أدخل على خفيف جداً .. بالأسبوع أو الأسبوعين مره .. وأقرأ بعض المواضيع .. كنت أشوف المواضيع اللي فيهن صور والكشتات فقط .
- يعني مثل يوم اننا صغار نقلب الجرايد وحنا نناظر الصور .. إن قرينا شئ قرينا الكاركتيرات -

يوم صار مره بعد كم شهر وكان أخوي الثاني جالس على النت وأنا أجدع وجهي بالشاشه .. إلاه فاتح على صورة مقلقل لحم ومنزل الصوره واحد يقاله - المهاجر - قالي هذا اللي منزله الحوشاني حق مصادر التعلم بمدرستكم << كنت توي متخرج من الثانوي
( على فكره كان أمين مركز مصادر التعلم بالمدرسه المهاجر .. وكنت أتاخر بعض الأيام عن المدرسه والمرشد يوقف اللي يتأخر طول الحصه الأولى ... وإذا تكرر التأخر تزداد فترة التوقيف حصص أكثر .. إذا خلص الطابور ووقفونا .. كان يجي مدرس الإحياء أحمد ممدوح ويآخذن لمصادر التعلم عند المهاجر ... ويخلين أصلح عروض بوربوينت لمواده ..
للأمانه كنت أشوف المهاجر شخص شايف نفسه ومتغطرس ^^ ، حتى كان ساكن بآخر حارتنا ودايم يخطم من قدام بيتنا ... ومن تشوفه تحس بشوفة النفس فيه ^^ ، لكن بعد ما عرفته طلع عكس ذلك وقادم الموضوع يبين ذلك .

أقولكم .. في تلك الفترة - 2004 - .. كنت أحاول أتعلم كل شئ بالكمبيوتر .. مهوب مثل الحين الله يخلف ..
سألت أخوي وشلون طريقة إدراج الصور بالمنتديات ؟ قال تعال .. جاء وفتح مجلد صور كشته لمحيوه .. وصغّر الصور عن طريق الفوتوشوب وفتح الرس اكس بي وسجل بمعرف NsH ثم راح لمركز الرفع ورفعهن ، ثم فتح قسم الرحلات البريه ونزل الموضوع وكان شرح وافي وسريع ..
هذا رابط ذاك الموضوع / صور للأمطار في ( محيوة ) قبل سنة بالضبط
حتى تلك الفتره ما كنت أهتم بمنتدى الرس .. ولا أدخله إلا قليل جداً .. وسريع سريع .

بعدها جت الأحداث الإرهابية بحي الجوازات .. ذيك الفتره كانت فترة إعتكاف على الرس اكس بي .. حتى كنت أحفظ أي صوره تنزل بالمنتدى وحتى الآن موجوده الصور عندي .. إضافة لتسجيل نشرات الأخبار من العربيه والقناة الأولى ، وصفحات الجرايد الأولى !!
بثاني يوم من الأحداث رحت لمسئول شئون الطلاب بالجامعه .. وقلت له أنا من الرس ووضعنا صعب .. وفيه حصار خخخ .. ومن هالتبهير .. قال خلاص إذا استمر الوضع لاتجي بكرى ..
يوم صار ذاك اليوم بالليل وأجلس على الكمبيوتر وأصلح عرض فديو عن الأحداث الإرهابيه بالرس .. كان ( نص ونص ) ومدخل عليه اغنيه لمحمد عبده عن الإرهاب .. نزلته بالعام بمعرف NsH وكان فيه تشجيع بصراحه .. وبنفس الوقت فيه عتب بسبب الأغاني ..
جيت بعده بكم يوم وصلحت فديو ثاني .. وكان أحسن من الأول بمراحل .. وأعجب الأعضاء
( بنزله بالمنتدى خلال الفتره القادمه .. إن شاء الله )

من ذيك الأيام أصبحت متابع جيّد لمنتديات الرس اكس بي خلال فترة - 2005 - 2006
أقرأ أغلب المواضيع ... خصوصاً الكشتات والمواضيع المصوره ، وما كنت أعرف أحد شخصياً من أعضاء المنتدى .. فقط المهاجر كمعرفة اسم فقط وأبو نوره ( وآخرين أسمع فيهم من أبو نوره )
كنت دايم برى المنتدى مع ( أبو نوره ) معرفه بالرس اكس بي ( الواهم ) ثم غيره لـ abu norh ، كان مزعجنا بالرس اكس بي .. خصوصاً بالرياضي وأبو عذاري واتحادي 18 مدري اتحادي 11 ، وهاك 3000 وغيرهم من ذاك الجيل .
كنت أتابع الرياضي بسبب أزعاجه !! ، ذيك الفترة أدخل العام وأشوفه سريع سريع ، ثم الرياضي ونفس الشئ .. ثم أمخمخ بقسم الشكاوي << كان قسم الشكاوي مفتوح وأنواع الهواش .. يستهويني ذاك القسم ^_^

في 2006 دخلت المنتدى بمعرف .. ودخول قوووي ^^ ( معرف : ابو ليان ) << لا أحد يروح ينبش فيه " مسوي له فورمات ^_^ "
أغلب المواضيع بالعام .. مواضيع استفزازيه وهواش ومماعط شوش ... كان لأبو ليان أصدقاء من صفه " معارضين " أولهم الموهوب ، وعشقي تيماوي والكاغدي !! وغيرهم ، أما الأعداء فعد وأغلط !!
كانت الردود تغلب على المواضيع ... ومره نزلت موضوع بالتربيه والتعليم عن الثانويه اللي درست فيها ولاقى الموضوع تفاعل وأحدث ردة فعل ...
طبعاً ما كان أبو ليان معروف عند أحد .. آخذ راحتي بالردود .. حتى مره تهاوشت مع عضو بالحلقه الأخيره طلع أخوي
طبعاً كان عدد من المشرفين ( ما يدانون ) أبو ليان ... مسبب قلق .. خصوصاً مشرفين آخر الليل .. ومنهم الطموح .. دايم هواش انا وإياه .
في ذيك الفتره دخل الطموح المستشفى .. طلبت رقمه من أحد الأعضاء بالخاص .. وأنا راجع من الجامعه دقيت عليه وسلمت عليه .. وقلت له معك أبو ليان .. (قبله بأيام متهاوشين بالخاص ) .. لزم إلا يعرف من أنا قلت له توكل على الله بس ^^ .
مرت الأيام وطلع من المستشفى ... وأرسل لي رساله بالخاص يشكرن على الإتصال .. وعطان ايميله وقال أبغاك بالمسن .. ثم صرنا سواليف بالمسن ... حاول يدري من انا ... وبالأخير يوم لزم قلت مايخالف بس بشرط .. تعرفن إذا جيت للبيت .. وقلت له تعال تقهو العصر وجب معك اللي تجيب من المنتدى .
يوم جاء ذاك اليوم العصر كان عندي أبو نوره .. ويجي هو ثم جاء المهاجر والشهرستاني .. وجاء الناظم .. ثم دق واحد على الطموح وقال وين البيت هذاي جاي .. وصف له الطموح يوم وصل شارعنا دق يقول انا بالشارع بس ماعرفت البيت اطلع لي براء ... طلعت أنا إلاه عبدالعزيز الدبيان .. يوم نزل قال أنت أبو ليان قلت ايه .. ويآخذ العقال بيده هههه << وده يجلدن ض1
( بذيك الفتره كان عبدالعزيز الدبيان بكرسي الإعتراف .. وكنت معطيه أسئله قوويه مرفق معها شئ من التهزئ ض1 ... ) ولا يهون المعزز عشقي تيماوي ^^
بصراحه بعد ذيك الجلسه تغير أبو ليان وصار يتحفظ كثير .. وهذي مشلكة الكشف عن العضويه .. إذا كنت تقدر تحافظ على سرية عضويتك فأحرص على هالشئ بقدر الإمكان .

بعدها بأيام كان فيه مواضيع ( النومني ) بقسم الترفيه .. وكان كل الأعضاء مجتمعين فيه الظهريه ... حطيت مشاركة خارج الموضوع موجهه ( لزياد العبدالله ) .. وفيها رابط خارجي ^^ بعد أقل من دقيقه ( تم حظر حسابك : إلى الأبد ! )
جنت جنوني !! ، ما أدري وش السالفه ولا من اللي بندن ولا شئ ^^ .
رحت دخلت المسن .. وسألت الطموح .. وقام يضيع وقت بالمحادثه يوم اذن قال امي بتفصل الجهاز بطلع اصلي برب << تصريفه شنيعه ^^
سويت ايميل جديد .. ثم أخذت ايميل سيف الرعد من أبو نوره وسويت له اضافه .. وسألته قال في موضوع عنك بمجلس الإدارة وإن السالفه كذا وكذا .. وبعد بحث وتمحيص قال ماهي مخالفه ولكن (شبه خطأ) من المشرف اللي مبندك << تراه مهوب غريب الدار
قلت طيب وخر الباند قال يصير خير وسحب علي
يوم جاء بالليل وأسوي إضافه لميقا ميقا ... هزيم الرعد ^^ .. وأقوله السالفه ..
يوم صار هاك الليله ويشال عن الباند ... وأنا أكره شئ اسمه الرس اكس بي ^^ .. " يعطونن باند وأدخل مره ثانيه ؟؟ !! "

قل دخول أبو ليان للمنتدى بشكل كبير ... ومرت الأيام ... لكن لا زلت حاقد على عدد من المشرفين ..

(( في 2006 كان فيه تصويت بالمنتدى الرياضي .. وواحد من الشباب سجل بعدة معرفات لإستغلالها بالتصويت حيث أن التفعيل كان مباشر ذاك الوقت ... ومن ضمن ذيك المعرفات اللي سجل فيهن : أبو ليان وعاشق المجاهيم وغيرها :).. )

اييييه ... أخذت كل المعرفات من الرجال ... ( طبعاً سبق أن أخذت منه أبو ليان فقط )
وأدخل بمعرف العشق الخالد ^^ .. أبثر معرف مر على المنتدى .. نشبه .. يدور بالأقسام ويدور حرش .. وراح ضحية غريبووه ظهر أحد الأيام بموضوع ( بماذا تفكر الآن ) بقسم سوالف .
كان الشهرستاني هو الأكثر شهره ذاك الوقت .. وتوقيعه خبآآآآل ... سويت حركة نجاسه وكانت النتيجه :





لم يدم التوقيع كثيراً ..

بعدها جاء ذيبان : الخفاش الأسود ^^
لا يختلف كثيراً عن العشق الخالد ... وبالطبع راح ضحية غريب الدار .. أظن بموضوع ( نبض )

مرت الأيام ذيك أيام القراده ... أبو ليان متواجد بشكل قليل جداً .. ومشاكس بإستحياء .. << ذاق الباند وإنعرف !! فصار ماهو الأولي !!

2007 .. أنظم للمنتدى كثير من أخوياي وكانوا نعم المعززين ^^ .. من ضمنهم المتكتك
كانت أيام ممتعه .. ومتعتها بالمشاكل اللي تصير ...
أكثر شئ تعود له ذاكرتي بذيك الأيام : موضوع صور من تصويري وتصويركم .. مستحيل يمر يوم ما ندخله
حتى الذهبي @@ كل ما تذكرت ذيك الأيام تذكرته .. ودنيا الوله ونونو وصدى الحرمان وجنى المحبه وكل حقين التصويت بالأدبي *_^


كنّا .. أخواني وأنا نصور بعض المناسبات والفعاليات وننزلهن بالمنتدى بمعرف NsH .
مره كان فيه زواج .. أخذت الكاميرا وصورة الزواج .. ( ماكان عندي نيه أنزل صوره .. لأنه ما سبق نزل أي زواج ذيك الأيام )
بعد الزواج - بقاعة حفلات - كذا واحد قالوا نبي الصور بسي دي .. قالوا أخو العروس اللي هو خويي .. وعم العروس .. نزلهن بالرس اكس بي .. قلت صادقين ؟؟ قالوا ايه نزلهن ماعليك .
المهم .. وأنا أزين الصور وأنزل التغطيه .. طبعاً ما كان فيه قسم أفراح ومناسبات .. نزلته بالعام ..
من بكرى جت الإتصالات .. ليش ما نزلت صورتي ؟؟ ليش منزل صوره مهوب زينه ؟؟ ، وناس تشكر على الصور .. وناس يقولون قهر ما صورنا وتميلحنا علشان ينزلن بالرس اكس بي *_^ !!

دخلت المنتدى بشوف الردود على التغطيه وما حصلت الموضوع بالقسم ... طلع منقول لقسم الأعضاء الجدد والتواصل .. وفيه رد من مشرف يقول مواضيع التواصل والأفراح مكانه قسم الأعضاء والتواصل .
قالي أخوي أنه أرسل رساله للمشرف ..
بعدها بيومين جاء عضو نزل موضوع تغطية زواج بالقسم العام ونقل للتواصل :) ، وبحكم واسطاته رجع الموضوع وموضوعي قعد :)
ما ودي اذكر التفاصيل بالضبط هنا ، ولا أي مشكله .. فقط اذكر كلام عام
المهم يوم صار بالليل بالاستراحه ... ويجي واحد من الشباب - تبع أهل العروس - ويدخل بمعرفه بالشكاوي ونكتب موضوع طوووووويل عن الموضوع ونقله والموضوع الثاني لا .. كان نقاشنا مع هزيم الرعد ... نقاش محترم .. وواقف بصفنا ... وأذكر ذكرنا بالموضوع لازم يحط قسم للأفراح والمناسبات .

رجع المشرف اللي نقل الموضوع (لمكانه الأصلي ) أذكر صرير القلم رد على الموضوع يقول : مبروك للعروسين (ومبروك يا نش رجوع الموضوع لمكانه الأصلي ) << باللون الأحمر :) ، وقال برده : وين صورتي مع اني ما أحب الترزز ^^

بعده بأسبوع دق علي واحد من العيال يقول اخوه بيعرس ويبين أصور !!
رحت وصورت وكان الاستعداد قوووي << من قبل اللي يبون صورهم تنزل :)
كان ذاك الزواج غيييير .. فيه حيويه .... كلن يبي الكاميرا ... وكثير من الحضور ينادونن يبونن أصورهم
للأمانه .. أصابني كثيراً من الغرور وشفت نفسي بذيك اللحظه ... طلعنا من الزواج وللاستراحه ونزلنا الموضوع بمعرف المتكتك ... سريع سريع ... كلن متحمس :)

بعده وقفت معرف أبو ليان للأبد ... وبآخر الصيف ... شفت نفسي فاضي وأروح للسته حقت المعرفات وأحصل ( عاشق المجاهيم )
جازلي المعرف قلت ليش ما أدخل فيه وأستهبل
المعرف مسجل فيه خوينا اللي أقولكم سجل بعدد كبير من المعرفات أيام التصويت بالرياضي 2006 ...
يوم يسجل فيه كنا تونا جايين من أم رقيبه .. والظاهر أن الرجال أو مره يسمع عن المجاهيم والمغاتير واختار هالمعرف ، على فكره دايم يقولي لو المعرف مهوب انا اللي مسجل فيه كان ما احترموك الرس اكس بي وصرت مشرف ^^

أقولكم .. دخلت بالمعرف ... أول مشاركه أذكره بسوالف متنوعه موضوع ( ناقش اللي بعدك بسؤال ) كان فيه بالموضوع شله يومياً يجتمعون يومياً أذكر منهم البارونه ( رد روز ) ^^ والباريسي وأبو نايف والأمل وبنت الشياهين مع تخطيمات من قبل مشرفين سوالف ذاك الوقت قايد الريم ودنيا الوله ونونو وهبوب
دخلت أستهبل .. مسوي نفسي جاي من البر ... كتب رد عابر ... وصارت كل الردود عليه مما أجبرني أرجع وأرد عليهم وهم يردون وانا أرد وهم يردون وأنا أرد وهم يردون وهم يردون وأنا أرد ^_^
الموضوع ذاك علق عاشق المجاهيم بالمنتدى ... صرت أقوم من النوم علطول افتح ذاك الموضوع ...
اللي يعرفون عاشق المجاهيم ذيك الأيام .. خوينا اللي سجل فيه قالي أشوفك شغال بعاشق المجاهيم ومشاركاتك ضحك .. من ضمن الردود أرد بالطبخ على مواضيع الموكا وقهوة المارس : الله يكرم النعمه ... والله إن حليب الخلفات يسوى مطاريسكم ^^
وقايد الريم كان دايم معي بالمسن ... وكان يدري ... ما أذكر .. لكن أظن إني معلمه علشان أعطي عاشق المجاهيم حصانه ضد الإشراف .

ذاك الوقت كان المشرفين أقل من الحين بكثير ... والمعروفين منهم ينعدون بالأصابع ... وللحق أقول ( الإشراف على المواضيع والمشاركات ذاك الوقت كان يدار بشكل جيد )

اسمتريت بعاشق المجاهيم .. البدايه كانت عاقل وهزلي .. ثم بعدها .. عقلت عقلت ^^ .. جاء رمضان وكنت مشارك عادي جداً .. وغير معروف ... نزل موضوع دعوة للفطور الجماعي باستراحة الملفى ... وجت رسايل من بعض المشرفين دعوه للحضور ... وقالي أخوي أن المهاجر دق عليه يلزم على الفطور ويقول علم أبو ليان !!
ما فكرت أروح .. جاء يوم الفطور قال أخوي تبي نروح قلت والله أنا ماعندي نيه ( لو ذا لا كان ايه ) << خخ تشفيره ذي

نزلت التغطيه وكان له صداء والظاهر رديت : كان ودي الحضور لكن الظروف ما سمحت أو هيك شئ .... أرسلي المهاجر رساله يقول تمنينا حضورك !!
رديت عليه رساله على جزئين ( عدد الأحرف ما يكفن برساله وحده !!) الرسايل لاتزال محفوظه عندي... كان معظم الرساله سب وشرشحه بمشرف كنت متأكد أنه بيحضر للفطور << كنت قاسي ياعاشق !!
ووضحت بالرساله من أكون ..

راد علي هو بالسياسه طبعاً *_^ .. أبد أنت شد حيلك ^^ وماعليك منهم والمشرفين غلطانين وبيعتذرون لك .. ، بعده أرسلي عبدالعزيز الدبيان .. يقول أعتذر نيابه عنهم وانسى اللي راح وحنا عيال اليوم ^^

بعد رمضان رحنا مع الجامعه رحله علميه استكشافيه .... صورته ونزلت تقرير بالسفر والرحلات وثبته ابو عيون وجان ترفيع مهوووب صاحي .
مضت الايام ... ولا زال عاشق عاقل ... يوم صار مره بالشتاء ... جاي من الجامعه ونايم ومقفل الجوال ... قمت الساعه 9 ونص بالليل << كان كذا نظامي ذيك الأيام ض1
شغلت الجوال ويجين رسايل موجود من رقم غريب ... وتجي رساله .. ارجوا الاتصال .. اخوك عبدالعزيز الدبيان
صحصحت وصليت ^^ ولبست ونزلت ^^ .. لقيت أخوي قالي المهاجر داق علي وآخذ رقمك !!
اتصلت بعزوز قال وينك قلت بالبيت .. قال حنا بالمكان الفلاني تعال بسرعه .. ربع ساعه وبنقلط العشاء !!
شغلت ورحت .. من اللي كانوا فيه أبو عيون << يقولون أول مره يطلع وحلف مايطلع عقبه ^^ ، وملح الجريف وسحبان وسيف الرعد وكان بكرى بيمشي للسودان ^^ ( سيف الرعد سبق وقابلته مره قبله بمناسبه بقلعة جدعيه .. أيام أبو ليان .. لكن ناسي متى بالضبط ) وكان فيه عزوز والمهاجر والطموح وأبو عذاري ... تعشينا تيس مندي << كان حق على عزوز مركبينه اياه المهاجر وسيف الرعد ^^
بعد العشاء مشو الشيبان ... بقينا انا والمهاجر وعزوز والطموح .. كان كل الهرج معي .. و عن المنتدى .. وش ملاحظاتك ؟؟ .. وبصراحه كنت أسفل بكذا مشرف وعضو وإن فيه أعضاء يعيثون بالمنتدى فساد ^^ ، وغيرها من المواضيع التي يمنع عرضها هنا ^^

طلعت من عندهم يوم وصلت البيت وتجين رسايل على الجوال من المهاجر وعزوز ( تشرفنا بالجلوس معك !!) << وش عندهم !!

بعده تحمست ونزلت كذا تقرير ... يوم جاء ببداية شهر ذو الحجه وتجين رساله من المهاجر بالخاص .. فيه ترشيحات لمشرفين جدد .. وأنت اختر التربيه والتعليم والا الأفراح والمناسبات ( كان قسم الأفراح والمناسبات جديد ومشرفه أبو صالح الدعيجي )
رديت عليه ما أقدر الأيام الجايه .. عندي ضغط اختبارات بالجامعه ..
يوم صار مره وحنا نسولف أنا وعيال الجيران بعد الصلاة المشرف / أبو ذكرى اللي هو mgroo7 والبرنس .. ويدق علي المهاجر .. قال المشرفين بيحطون مره وحده ولا نبي منك شغل على فضاوتك تبي التربيه والتعليم والا الافراح .. قلت أجل حطون مشرف على الأفراح .

ومثلي مثل أي مشرف جديد ... دخلت المنتدى من بكرى إلاي مشرف .. وعلطول قوووة تنبيش ^^ ... لفه سريعه بالمشرفين والشكاوي وسلة المحذوفات ... ( دايم أي مشرف جديد نفقد مشاركاته 3 أيام إلا أسبوع ... تحصله يدور بهالأقسام الثلاثه )
بعد ما لفيت لفه سريعه فتحت على أيقونة البحث الخاصه بالمنتدى ... وخصصت عملية البحث بالأقسام الثلاثه ... وبحثت عن بعض الكلمات مثل : ابو ليان !! ، العشق الخالد ، أبو نش ... وغيرها
صراحه ... طلعت لي مشاركه ما توقعته !!
لا أظن أنه من المناسب أن أذكرها .. ^^ ..

ومثل ما أنتم عارفين حماس المشرف الجديد ... ودك تقدم شئ للمنتدى ... تشاورنا أنا وقايد الريم بالمسن .. وقررنا نحط هدايا العيد .. وجبنا راعي وصلحناهن ونزلنا موضوع وكان موضوع مميز .. في ذيك الفتره جان لقب مؤقت ( عاشق المستكه ^^)

اشتغلنا بالقسم أنا وأبو صالح الدعيجي ... حطينا قوانين للقسم واتفقنا على بعض الحاجات .. لكي يظهر القسم بشكل مميز

كان فيه مواضيع بالقسم ( التهنئه بوصول عدد معين من المشاركات ) قررنا أنه ما تبقى بالقسم .. ونبهنا الأعضاء .. أذكر قايد الريم نزل بنفس اللحظه بقسم سوالف ( نرحب بمواضيع الألفيات ^^ ) مدري وش يقصد وخصوصاً بذاك التوقيت ؟؟ يدور حرش !!

أذكر أول تغطية زواج لي بقسم الأفراح .. 14 - 12 - 1428 هـ ، مرت الأيام يوم جاء بآخر شهر 1 - 1429هـ ، وينزل سيف الرعد موضوع بمنتدى المشرفين ، أننا قررنا نظم مهرجان الربيع 29 ، ورفعنا لإمارة المنطقة وجت الموافقه ، وخاطبنا رعاة وقرروا الدعم ... إلخ
رديت رد ترفيع .. وإني معكم باللي تبون ، وأنا متواجد خلال إجازة الربيع .. لكن الفترة اللي قبل والتحضيرات ما أقدر لظروف الاختبارات .

جت الإجازة وقبل يبدأ المهرجان بيوم مريتهم بالقشيع ... كان فيه اجتماع خفيف .. جلسنا إلى الليل ... ومن بكرى العصر بدأ المهرجان لمدة 5 أو 6 أيام ... كان شغل شغل .. من بعد صلاة العصر علطول مهرجان أطفال وألعاب وهدايا بالمسرح .. والمغرب فعاليات خفيفه مع بدوش بالمخيم .. وبعد العشاء قصايد وشعراء ... ثم العشاء وأروح لدولفين .. في بطولة بلياردوا تبع المهرجان وأصور ... والساعه 12 أو 1 أروح للبيت وانزل التغطيات والفجر انام وإذا قمت للمخيم
كان معي بالتغطيات .. صادق الوعد والقادم بقوه ..
صادق الوعد مر يومين من المهرجان ما تعرفت عليه معرفه صح .. يجي داعس ويصور وروح ينزل الصور ويرجع ويصور ويرجع ينزل الصور ماشاء الله عليه
القادم بقوه كان بيني وبينه معرفه أيام متوسطة عثمان .. وبعد المتوسط أقابله كذا مره ... وكان يبادر بالسلام ^^ ، اما بالمخيم حصلته متغير علي .. لكن عرفنا بعض :)
كسبت بذاك المهرجان صداقات جديده وكثيرين .. لا يتسع المجال لذكرهم ... منهم واحد شافن قال هلا بصديقي أيام الثانوي .. كنت أعرفه ومشيته .. وبين وبينه معرفه بسيطه قبل .. لكن مانيب صديقه .. صديقه أخوي نيتروجين .
سلم ومطخن ^^ .. قلت تراي أنا اخوه .. المهم بذاك اليوم قال ان عندي معرف قديم بالرس اكس بي ومضيع الرقم السري أبيك ترجعه وافتح البلوتوث وخذ هالصوره صلح توقيع وحطه بمعرفي << من أوله !! قلت وشو معرفك قال ( عاشق الرتامه )

خلص المهرجان .. بعده بيومين .. دخلت المنتدى وأشوف موضوع بالعام لعزوز الدبيان ترفيع بي ... كان مواضيع المدح قليله جداً أو معدومه .. بصراحه كان للموضوع أثر كبير .
حطوا حفل ختامي وتكريم للمتعاونين بإنجاح المهرجان .. باستراحة الدكه .. وكرمونا على شرف رئيس البلديه .. أذكر الموهوب جاء وجايب معه هديه لي .. الله يجزاه خير ^^

بعد المهرجان بأسبوعين تقريباً دق علي سيف الرعد عصر أربعاء أو خميس .. قال فيه مناسبه بالهمجه والمنتدى مدعوا لها تخاوين .. قلت قدام .. قال تعال أجل وقف سيارتك عند بيتي ونطلع سواء ... رحت وركبت معه .. مشينا شوي قال خل بشوف أحمد الشارخ كانه بيخاوينا .. دق عليه قال جايكم << هذا اللي يصلح لي كلش قدام ^^
قالي سيف الرعد تعرفه قلت لا .. قال معرفه فتى المطيه .. قلت ما أعرفه .. جاء ونزلت وسلمت عليه ^^ ولزمت عليه يركب قدام .. قال سيف الرعد اقووول عجل علينا امش اركب اتركه مسوي محترمه ..
رحنا للهمجه .. كان فيه افتتاح ملعب تبع وزارة الشئون الاجتماعيه .. وصلنا ولا نشوف إلى الترحيب .. هلا ياهلا .. مرحبا بالإعلاميين ^^

فتى المطيه (( اللي هو mr.xp )) طول ذيك الفتره ما تكلم معي .. أحسه ثقل أو مدري وش وضعه بالضبط ...
بالملعب فسرت كمومي ورفعت الثوب ورقيت بمكان مرتفع عند الأكباس وصورة الملعب .. وأنا فوق إلا مستر يصورن أنا .. (( الصوره لاتزال موجوده عنده ))

حضرنا افتتاح الملعب وصورنا وكان فيه مدير الشئون الاجتماعيه جاي من بريده ...
ثم رحنا لقصر الأفراح .. كان فيه مسابقات ثم حفل خطابي وتكريم للمشاركين ومن ضمنهم حنا .. وبعد قلطنا للعشاء .. جلست بصحن على الطرف .. قالوا قم .. ويسحبن واحد منهم .. للمفطح الكبير الرئيسي .. وكان فيه شايب يميني ثم مستر والبقيه .. مستر كان يفسر كمومه .. وينسف شماغه .. قلت بسس هذا والله اللي بيلعب بالصحن لعب !! << صدق إن الواحد ما تعرفه صح إلا مع مرور الأيام :) .
الشايب الله يذكره بالخير ويطول بعمره .. الظاهر أنه ما تعشى ذاك اليوم .. ماغير يقطع لنا لحم أنا ومستر ويعطينا بارد وماء .. وجابوا لنا طاسة حليب الخلفات أول ما جلسنا على العشاء ^^

رجعنا .. ونزلت التغطيه بالعام ... وكانت ردة الفعل قويه جداً أذكر المشاهدات وصل لرقم مرتفع .. والردود كانت حلووه خصوصاً من أهل الهمجه الكرام .

بعد ذيك الأيام قالت لي اختي برسلك رابط موضوع بسوالف شفه ... جت الرساله عنوانه ( ياكشخه ) دخلت الموضوع إلاه مشاهير قابلتهم بحياتك ... حصلت عضو من أهل الهمجه أصله ^^ .. راد قابلت الشيخ الفلاني والمنشد الفلاني واللاعب الفلاني والمشرف عاشق المجاهيم وكان متواضع << أنا تذكرت العضو يوم قريته رده لأني مقابله قبله بـ 3 أيام .. بمحل وشكرن على التغطيه .
بصراحه بصراحه يا شباب ... عقب ماقريت الرد شفت نفسي .. وبديت ما أرد على أرقام غريبه ... ولا أسلم على أحد ... ولا أعطي أحد وجه .. .. بس عقب شفت ما احد عطان وجه .. جيت ورحت اجدع وجهي عليهم .. امزح امزح ^^

جاء عقبه تغطية حملة حياة بلاسموم ... كان فعاليات صح .. ومميزه ... سويت له تغطيه برفقة القادم بقوه ، ماكانت متعبه بقوه .. كان أبو حسان قايم بالدور الأكبر .

بذيك الفترة سويت عزومه للمنتدى ، عزمت المشرفين وبعض الأعضاء كانت الجلسه حلوه بالحيل بالحيل ... فيها فضايح وضحك وفرفشه ^^
أذكر من الحضور الوالد وخالد الحناكي والمهاجر وسيف الرعد والهواوي وقايد الريم وعطر الليل ومجروح والبرنس وصادق الوعد وعاشق الرتامه والطموح وعزوز لدبيان وابو عذاري وملح الجريف والموهوب وربع ابو ليان : ابو نوره والمتكتك ، وبعد أذكر جاء عاشق الأسمر ، وأذكر القادم بقوه أرسلي أنا بالمستشفى أعتذر عن الحضور ^^ ... إلخ

حلوه حلوه ذيك الجمعه ... ليش ؟؟ لان أكثر الحضور أول مره يتقابلون سواء .. وفيه مشرفين أول مره يجون .. وصار فيه فضايح وكل واحد يعرف بنفسه وكشف معرفات خفيه وهلم جراء

بذيك الفتره أقامت دار الرس للتراث والفنون عرضه .. صوروا الطق والرقص .. ودقوا علي قالوا معنا الصور نبيك تنزلهن .. قلت هاتوهن .. رجعت من الجامعه الظهر ومريت الرجال بمكتبه وأخذت الصور ونزلت الصور والموضوع ( كان أول موضوع لهم )
وتغديت ونمت .. يوم قمت من النوم إلا وش تشوووف يا أبو نش .. اتصالات .. ورسايل بالجوال : الله يهديك وخف ربك ووو ^^ ، وناس مبطي عنهم داقين علي لين قالوا بس ..
دخلت المنتدى واحصل رساله من قايد الريم يقول أول شئ وراه ماعلمتن اخاويك خخخ ثاني شئ شف الردود والله ما خلوا فيك ولا فيهم شئ ^^
دخلت الموضوع إلاي ما أشوف إلا مماعط الشوش ... تركتهم وطلعت وعقبه بيومين حذف الموضوع بطلبي :( ، بعد إلحاح من ناس احترمهم ولا أقدر أردهم .

كانت ذيك الفتره أغلب مواضيع العام عن حكم الطق والرقص والسامري .. وهواش والعام لا يطاق .. بل تطور الوضع لخارج المنتدى بين ناس عليهم الشرهه

ثم بعدها جت تغطيات متواليه مثل ملتقى موهبه الاول ( أنا والقادم بقوه ) ، وتغطيات مناسبات عامه وخاصه واعلانات تجاريه .. .. وصار الشغل بالتغطيات أكثر .. بذيك الأيام دخلت المنتدى لقيتهم حاطينن مراقب .. وجتن رساله من عزوز يبلغن بهالشئ .

السنه ذيك سنة قوة تغطيات ... بشكل دوري أصور وأنزل تغطيات .. لكافة المناسبات

بكل مناسبه مضت .. أتعرف على ناس جدد .. بصراحه هذا أكثر شئ يحببك بالتغطيات والتواجد بين الناس

أذكر مره وانا بالجامعه يوم سبت .. دق علي عزوز يقول أهالي الرس بيزورون أهالي رياض الخبراء ونبي أحد يصور .. ماعطيته الاكيد (محاضراتي إلى 6 ذاك اليوم ) .. دق عقب قال بروح انا اغطي ومعي واحد إن قدرت أنت علمن ..
أعتذر دكتور المحاضره الأخيره .. وطلعت بدري .. قلت لعزوز خلاص أجيكم .. قال الوعد بعد صلاة العصر علطول بمنى المحافظه
رحت وجاء عزوز ومعه واحد فرفور ^^ << كان ثاني مره اقابله .. قابلته قبل بتغطيه افتتاح مستوصف الروضه ولا هرجنا مع بعض
دخلنا وكان فيه أهالي الرس والمحافظ .. وطولوا ما مشوا كان الموضوع اللي يتكلمون ويتناقشون فيه سالفة 35% مرضى نفسيين *_^
رحنا لرياض الخبراء سواء .. على باصين .. اللي كان بجنبي اللي أقولكم جاي مع عزوز .. اللي هو ( كلي نظر ) لبييييه ^^
مادار بيننا أي حديث يذكر ....
المره الثالثه صار معنا بتغطيه أحتفالات عيد الفطر ( انا وأياه ومستر ) هذي يوم أخش معه .. لكن لازالت الرسميه ..
تجيكم السالفه وشلون شبكته .. بعد قليل ^^

جت إجازة الصيف .. كنت اشتغل باجازة الصيف وظيفه مؤقته بالبلدية .. وأتدرب بالبان الخبراء تبع الجامعه .. مره وانا بالطريق الصباح رايح للخبراء .. جان اتصال من سيف الرعد .. يقول سياحي الرس 29 بنصير راعي إلكتروني له وشارطين يكون من ضمن الفريق أنت والقادم بقوه (( وقبله بيوم مكلمن خالد الحناكي بهالموضوع ))
اتفقنا على الأشياء الأساسيه ووافقت - طبعاً الرعايه الالكترونيه ما جت إلا بعد تعب طويل بذاك المهرجان كغيره من المناسبات - .... إذا ما كان الرس اكس بي راعي إلكتروني ما كنت أحرص على التغطيات أبداً ... وإن حصل نزلت تغطيه متواضعه ... اما إذا كان الرس اكس بي راعي إلكتروني أحرص على التغطيه أشد الحرص .. وهذا الصح .. مثل ماهم قدروك قدرهم .. وخلك قد ثقتهم .

لن ادخل في تفاصيل ذاك المهرجان .. لكن بشكل عام كان مدته 20 يوم من 5 شعبان حتى 25 شعبان يعني شغلنا فيه 25 يوم .. بدينا التصوير من الاستعدادات حتى ما بعد المهرجان
كان متعب جداً جداً جداً .. وأنا كنت أقوم الفجر دوام بألبان الخبراء ( أول 10 أيام من المهرجان ) ولا نطلع من المهرجان إلا الساعه 1 وانام متأخر جداً ..
كانت اللجنه الاعلاميه : انا وسيف الرعد والقادم بقوه وصادق الوعد ومستر اكس بي وشبل الاكس بي ... وعاونا في بعض التغطيات عضو متلطم .

أذكر مره دق علي العصر قايد الريم .. قال قسم سوالف مقفل .. قلت وشلون مقفل ؟؟ قال كل المواضيع مقفله ما احد يقدر يشارك ولا ينزل مواضيع صاير ديكور .
يقول دق علي عضو متلطم ما باقي إلا يصيح خخخ << ذاك الوقت عضو متلطم ساكن بسوالف .. وكان هو العضو الأشهر ^^ .

المهم العصر كنت مشغول بتغطيه بمكان ثاني .. رحت المغرب للمهرجان وأحصل عضو متلطم ومعه ولد خالته .. جايين وجايب معه تورته مكتوب عليه الرس اكس بي .. اللجنه الإعلاميه
يوم رحت شف صوره بس والا مقطعه ومآكوله ^_^ ..

وجاي عضو متلطم وماسك سيف الرعد وقايله مايصير القسم يقفل ومن هالكلام ^^ << لعبه صح ابن اللذين ^^
جاء سيف الرعد ودق بلحظته على عبدالعزيز الدبيان وقال افتح القسم وفتحه !!..
أذكر نزلت موضوع يومها بسوالف ( عضو متلطم وزير خارجيه سوالف متنوعه )
عضو متلطم .. وزير خارجية منتدى سوالف متنوعة :)

خلص المهرجان ... وجاء رمضان ...
بأول رمضان قررت أشري كاميرا احترافيه ... وكان فيه ناس ينصحونن ما أشري يقول التغطيات ما يحتاجن احترافيه !! مهوب لازم أقول منهو ^^

والله أحط ببالي وحده من ثنتين .. نيكون دي 80 أو كانون 40 دي << وقتهن
وجزمت على النيكون ... وكان صادق الوعد شاريه قبلي بأسبوع ..
والله يوم صار بيوم من الأيام يوم أذن المغرب وأفطر سريع سريع .. ويجي مستر ويوقف سيارته عن البيت ونمشي قبل إقامة صلاة المغرب << أقول هذا علشان أبيكم تعرفون إننا ما أكلنا شئ ^^
ونمشي للرياض .. بالطريق حلى خفيف وقهوه من أم مستر :) .. هو ما ذاق شئ طبعاً .. صلينا المغرب والعشاء بالعتش .. وللحارثي بالبطحاء .. وأشري الكاميرا والفلاش والحامل .. ومرينا محل .. ثم رحنا لهادريز .. دخلنا للعشاء الساعه 12 .. طلبنا .. مستر اكل ( البطاطس ) << يدوخ بالبطاطس .. وقال شبعت
<< يلعن شكلك تعش وراك صيام بكرى .. ومافيه سحور .. قال لا كثرت
رجعنا ووصلنا الرس وهو يذن الفجر ... أذكر بين الآذان والإقامه صورة صوره خبآآل بالكاميرا << توه طاف ..

أول تغطيه فيها كانت تغطيه الفطور الجماعي الأول برمضان " مهوب ذاك الزود هاك الفطور " ( أذكر مشاهداته 11 ألف ) بعد أسبوع قالي مستر تخاوين بروح أشري نيكون دي 80 << كان قبل رمضان شاري كاميرا جديده نص احترافيه

الظاهر الموضوع صار عن الكاميرات ... نغيّر


بالفطور أول مره أشوف أبو جود وهولستن .. أبو جود ماعرفته بالأول .. بس كان جالس حولنا انا وهزيم الرعد .. وهو اللي يصب القهوه ... أقدر أقول انه طوال الفطور ما نطق إلا بتقهو تقهو ^^
الهلي كنت داري أنه بيجي .. وقمت أصور والناس توه باديه تفطر .. قال أبو ساره الحناكي يابن الحلال افطر خل عنك التصوير .. جيت أنا وسويت نفسي ذهين قلت : ما أفطر إلا ببيره هولستن .. مواعدن يجيبه بحتريه << ابي الهلي يرفع راسه عن السفره لكن طلع ذكي

بعد صلاة المغرب جاء الهلي وشبكته ^^ .. ثم ناديت هزيم وجلسنا سواء << كانوا متواعدين بالمنتدى .. محجرين لغريب الدار بسالفة قطاعة الورق هي تقطع السيديات والا لا ؟؟
مغرب ذاك اليوم كان فيه الشيخ الدويش وكان كل الحديث عن المنتدى ..
مثل ما قلت لكم سابقاً .. ما كان فيه حيويه بالفطور الأول .

وبسبب الردود على موضوع الفطور .. كلن يقول راحت علي ..وبنعوض ونجي للثاني
الفطور الجماعي الثاني كان غيييير .. كان حضور مميز جداً .. وفيه سواليف وتعارف ومسابقات وجوائز وفله ووناسه
كان أبو جود والهلي جالسين بطرف السفره .. لكن أحسن من أول .. أبو جود يجدع هرج علينا .. زاويتهم زاوية جوع .. ماعندهم أكل
.. صلى بنا عاشق الرتامه التروايح ( احسن صلاة تراويح صليته )
كان فيه مسابقه بالمنتدى وتم السحب على جوائزها بذاك الفطور ..
مسكن أبو جود وقالي فرصه سعيده وخلن نشوفك .. يبي لنا جمعات وطلعات .. ومتى تسير علي .. ما كنت أمون عليه .. وأصلاً ثاني مره أقابله وأخذت رقمه وأخذ رقمي .

خلال ذيك الفتره كنا نجلس بعض الأيام بالليل باستراحة النترو << بس ماكان النترو يجي ...
من اللي كانوا يجون ... المهاجر وغريب الدار اذا صار موجود .. وعضو متلطم ومستر اكس بي وكلي نظر والقادم وصادق الوعد والبس الأسود وعاشق الرتامه

جاء العيد .. استمريت أغطي وبإزدياد ... تغطية العيد كانت مميزه وارجع لها كثير .. ووزعنا هدايا العيد ذيك السنه ... وكنت اصور التوزيع .. اللي يوزعون شباب اخوان مجروح وعضو متلطم ..
أول واحد طلع وعطيناه كان أبو جود << اللي قابلته بالفطورين اللي قبل ^^ ( الصوره ما أتوقع يسمح تنزل هنا )

أيام ما بعد العيد كان يسير علي عيال بالملحق .. أذكر مره كان عندي عضو متلطم .. جاي يآخذ أفلام من عندي
ومن بكرى طلعت بروح أصلي العشاء بمحطة الأندلس ... يوم وقفت عند إشارة سلتي بلازا .. إلا هذا شروكي متلطم ومظلل ما تشوف شئ .. طنبت له << أسلم .. ثم تقدمت عنه قلت مدري يمكن معه أهله !! السياره مضلله
ويجي ويتقدم جنبي ويفتح دريشه الراكب ( اللي من جهتي ) يقول وش عنده العاقل المحترم هوع .. كان الراكب كلي نظر (F) سحبت على عبود وطقيته سواليف مع أبو نظر .. قلت لعبود تعالوا بعد الصلاة الوعد الملحق قال خلاااص اوكي ..
صليت وانا رايح للبيت دقيت على عبود قلت وينكم ؟؟ قال هذا انا رايح انزل موسى واجيك ... قلت يا لووح يوم اقول سير مهوب علشانك أنت ووجهك .. علشانه هو .. أقول تعال أنت واياه .. وراه هو عنده شئ ؟؟ قال لا بس انه عيا يقول مستحي << ياقلب الزينين

المهم جو ذاك اليوم وتكينا إلى آخر الليل ... ومن بكرى وبعده وبعده وبعده .. إلخ .. صار يجين كلي نظر يومياً .. وسحبنا على عبود

جاء عيد الأضحى ..قالوا العيال نبي نجتمع أيام العيد .. أذكر سيف الرعد أقترح نطق خيمه ونطلع له آيام العيد
بالأخير اتفقنا اننا نكشت ثالث العيد لقطن ..
مدري وش جاب أبو جود على بالي ... دقيت عليه .. وقلت له بنطلع تخاوينا قال قدااام .. قلت أجل بعد صلاة الفجر بيمرك المهاجر ويدق عليه الليله نسق معه .. قال تبون شئ قلت سلامك .
الشيبان مشو لقطن الفجر : المهاجر وابو جود وصرير وهزيم .. وصادق بجيب التيس ويجي .. والباقين تقهوينا الفجر ومشينا ..
أول ما نزلنا هناك .. سلمت على أبو جود .. قال هاه وين الأغراض خل نبدأ بالفطور .. قلت مدري العزب حقات صادق .. قال يآخي وشلون هماه يوم أسئلك تبون شئ تقول لا !!
<< بصراحه بصراحه .. قلت بيني وبين نفسي وش هالبثر !!
ذبحنا الذبيحه .. وافطرنا وطالت الكشته إلى الليل ... من الكشتات الرايقه جداً والتي لا تنسى ..

بعده بفتره طلعنا كشتة ثانيه لسواج وكير يوم خميس ... وكانت أزين من اللي قبله ..
يوم السبت يوم وصلت البيت جاي من الجامعه وتجي رسالة وسائط (F) من أبو جود واحد صوته مجنووون يغني بي خخ ( يطول ليلي يا عاشق بلياك .. إلخ ) إهداء إلى حبيب قلبي عاشق المجاهيم
دقيت عليه منهو يا ولد ؟؟ قال ماعليك ... لزمت قال اذا شفتك علمتك .. قلت اجل تعال تقهو المغرب ..
جاء وكان عندي كلي نظر ومتلطم < < كالعاده يعني ... بس هالمره سامحين لعبود يجي خخ
تقهوى وعيا يعلمن ... يوم مشو العيال ويقولي ... وقال لا تعلم أحد .. << طلع مستحي منهم

واستمرت جلساتنا المغرب بالبيت .. وبعض الأحيان نتعشى بالاستراحه أو هالمطاعم ( بدأت التغذيه ) وللأمانه .. بدأت أحسن أيام شلة المنتدى (خارج المنتدى ) .. مع أبو جود

طلعنا بعد كذا للوادي .. أيام الربيع بالوادي .. رحت ومعي عشقي تيماوي .. كان فيه هناك ابن الحزم وابو عيون وسيف الرعد وهزيم وسحاب الشمال والديموو وابو حسان والمهاجر وصادق ووو إلخ
نجم ذيك الليله سحاب الشمال .

بعده بدأ المشوار مع شعيب أبو شمال .. ( اللي هو شعيب الماليه )
ذاك الشعيب شهد طلعات بالهبل واجتماعات على مدار عام كامل ... غالبا من المغرب نجتمع ..
ذقنا فيه أطلق الطبخات ^^ .. متنا برد فيه .. ومتنا حر فيه ... تهاوشنا فيه .. وتبادلنا مشاعر الحب فيه خخ
جلسنا فيه أحلى الاوقات بأطلق أجواء وجلسنا فيه .. بلحظات عجاج !!
تعرفنا فيه على بعض ... كثيير شباب تقابلوا لأول مره بهاك الشعيب .. لو بعدهم بتعب

شعيب أبو شمال أحدث نقله في الصداقات الخارجيه لأعضاء المنتدى .

بنفس الشعيب بـ شهر 11 قبل العام ، أذكر قلت للعيال : ياشباب أنا جتن وظيفتين واستخرت وقررت أروح لوظيفه بحايل ، أذكر أبو جود قال على كيفك تروح وتخلينا !! خخ ياحبي له << بس لايدري عزام (F)

في الأيام اللي تكلمت عنها فوق ... كنت مطلع على كل شئ بالمنتدى وما يفوتن مواضيع ولا مشاركات .. اما بعد الوظيفه ... تغير كل شئ
لو تسألون عن مشرفين المنتدى ماعرفتهم ... أو عن طلعات أو مواضيع أو أي شئ ..
الدجاج أخذن عقلي


~~ تنبيشات منوووعه ~~


هذي واجهة المنتدى منتصف 2002 عدد الأعضاء 928 عضو


هذي واعضاء المنتدى 1181
الأقسام كانت قليله مثل ما هو ظاهر امامك وتحت /

والمتواجدين بنفس اللحظه بالمنتدى ( 2 ) شخص << بنقاليه !!


هذي بـ 2003 .. وشوفوا آخر رد بين أرجاء الوطن .. الأثري ( هزيم الرعد )


هذي والأعضاء 2418
ويظهر يمين الأعضاء الأكثر نشاط .. الله يذكرهم بالخير ..


الاعضاء 3506
ومع الأكثر نشاط قدوووم قوي لغريب الدار وسيف الرعد


الإعلانات كانت كتابيه !!
تظهر أيقونة المحادثه الكتابيه
هذي بعد صيف 1426 أيام مهرجان القشيع على ما أظن
ونشوف فيه موضوع عن الانتخابات البلديه


هذي واجهة المنتدى أيام الإرهاب




هذي بعد بداية منتدى سوالف


هذي بأحسن أيام المنتدى وخصوصاً سوالف متنوعه والأدبي ...
شوفوا الاكثر نشاط .. بسمه ألم .. وصدى الحرمان والذهبي والبقيه الموجودين حالياً
ومع المواضيع الأكثر مشاركه ... ديوانية الحلوات ^_*
واقصى اليسار آخر المشاركات / صقر عنيزه وعذاري << مدري هي حيه والا لا ، ومايختلف عليها2 .. وأبو ليان ^_^



المؤسس كان متعلق بالمنتدى ... شوفوا الروقان




بعد ساعه من زواجه





هذي العام .. أبو نظر كان مسوي طير بر


ملامح قبل لاتصير مشرفه ... كانت معارضه للمنتدى .. وفيه ردود لها بالهبل من نوعية هالرد
هذي اللي جاهزه ^^


هذي قريبه
بـ 7 - 12 - 1431 .. أول خيمه طقوها الشباب بالمضارب


****
كتبت ما كتبت على عجاله ظهر وعصر أمس ... باختصار شديد جداً جدا ... إضافة إلى النسيان أو لا داعي للذكر .. أو الخطوط الحمراء حالت دون كتابته
أعتذر إن كنت أخطأت على أحد - أكيد بغير قصد مني ^^ - أو إذا ذكرت عن أحد شئ لا يود ذكره ، وعلى الأخطاء وعدم تنسيق الموضوع
إن أصبت فمن الله .. وإن أخطأت فمن نفسي والشيطان

أعلم أن الموضوع قد لا يروق للكثيرين ... ولكن بلاشك فيه جزئيات تروق لهم !!
خذ مايعجبك ودع الباقي ..

أشكر كل من قرأ الموضوع ... إن كان هناك أحد قرأه كامل !!
سؤال الموضوع : كم مره وردت الكلمات والعبارات التاليه : ( كان - ذيك الأيام - أذكر )

وقد يكون للتنبيش بقيه ...


















التوقيع

آخر تعديل عاشق المجاهيم يوم 09-03-2011 في 01:06 PM.
رد مع اقتباس
قديم 09-03-2011, 12:22 PM   رقم المشاركة : 2
معلومات العضو
ابو جود
مشرف منتدى التربية والتعليم
عضو مجلس الإدارة
 
الصورة الرمزية ابو جود
 
 

إحصائية العضو







Talking لي عودة عشان أنبش تنبيشاتك :)

.

هلاوالله بـ عاشق المجاهيم وتنبيشاته

شريط طويل وقديم من الذكريات مع الإكسبيين ومنتداهم أجزم بل وأتيقن أنه لازال في جعبتك الكثير والكثير لتنبشه
ولكن كما قلت الخطوط الحمراء دايم تاقف بوجهك مواقف جميلة عايشت بعضها وقرأت بعضها ورويت لي بقيتها
قرأت ذكرياتك كاملةً وتيقنت أنك كانت بك شقاوة وشيطنه لكنها مع مرورالوقت زال منها الكثير وبقي القليل لمن يستحقونها
معرف أبوليان وإن لم أتابعه إلا قليلاً إلا أنه كان نقطة سوداء سرعان ماغسلتها بـ عاشق المجاهيم
إسم كبير ورقم صعب أجزم أنه لم يمر على منتدى الإكس بي مثله بـ أراءه وإطروحاته وتغطياته وشقاوته وعناده وكل شي فيه يلعن شكله حلو رغم غيابه في فترة من الفترات عن المنتدى . إلا أنه عندما يعود ينسينا ماقد مضى لله درك من رجل عمل بـ إخلاص وتفاني لهذا المنتدى منذ عام 2006 وإلى الأن


^^
لبيه يـ أبوفروه زرقاء :) || توي أكتشف ليه الطلعه كانت رايقه ذاك اليوم


مدري وش جاب أبو جود على بالي ... دقيت عليه .. وقلت له بنطلع تخاوينا قال قدااام ..
قلت أجل بعد صلاة الفجر بيمرك المهاجر ويدق عليك الليله نسق معه .. قال تبون شئ قلت سلامك .



من الكشتات الرايقه جداً والتي لا تنسى


بالفعل من أجمل الكشتات التي لازالت في الذاكرة
حكايتي علاقتي مع عاشق المجاهيم جميلة بكل تفاصيلها . وحتى مايحدث الأن أنا متلذذ به
بإختصار { رب أخ لك لم تلده أمك } وتراه لله مهب عشان البيض اللي تجيب للشغاله كككك


يوم السبت يوم وصلت البيت جاي من الجامعه وتجي رسالة وسائط (F) من أبو جود
واحد صورت مجنووون يغني بي خخ ( يطول ليلي يا عاشق بلياك .. إلخ ) إهداء إلى حبيب قلبي عاشق المجاهيم
دقيت عليه منهو يا ولد ؟؟ قال ماعليك ... لزمت قال اذا شفت علمتك .. قلت اجل تعال تقهو المغرب ..
جاء وكان عندي كلي نظر ومتلطم < < كالعاده يعني ... بس هالمره سامحين لعبود يجي خخ
تقهوى وعيا يعلمن ... يوم مشو العيال ويقولي ... وقال لا تعلم أحد .. << طلع مستحي منهم



مازال في قلبي بقايا أمنيةٍ
أن نلتقي يوماً ويجمعنا .. الربيع
أن تنتهي أحزاننا
أن يجمع القدر يومناً .. شملنا

برايفت : كنت أردد هذه الأبيات كثيراً ولكني نسيتها مع مرور الوقت
وأدركت أن الماء بجنبي ولكني لم أنظر إليه إلا متأخراَ
فعوضني بـ 30 يوماً ماعانيته طيلة سنوات ..!!
.
.




ماشاء الله ألف مبروووك يـ أبولينا
بس عساك ماأبطيت على العروس ككككك
ودي أدري وشلون قضيت هالساعه




والله أنت المضمر والرويان وهدالك مدمثه وواحد هت دوق وصلحه كككككك
يالبيييييه يـ أبو خنبقه والله زمان




ككككككك
الله وأكبر عليك أنتِ اللي يشوفك هالحين مايقول إن سلة المحذوفات تشتكي منك
أثرك حاطتن حرتس بالأعضاء . بعذرك والله ياكانوا متقعدين لك المشرفين من أول
لايكثر أقول ككككك




إيه عامر يـ مضارب الإكسبيين عمار

.
.
إستمتعت بقرائتها وتمنيت أن أجد الكثير مما يستحق أن يوثق ولكني في النهاية
إستمتعت بـ أطول موضوع مر علي بالمنتدى منذ سنوات

مهندس / عبدالعزيز
شكراً لك
.


















التوقيع




Twitter
abojoodxp@
InstagraM
ABOJOODXP


آخر تعديل ابو جود يوم 10-03-2011 في 02:35 AM.
رد مع اقتباس
قديم 09-03-2011, 01:41 PM   رقم المشاركة : 3
معلومات العضو
][البرنس][
عضو ذهبي
 
الصورة الرمزية ][البرنس][
 
 

إحصائية العضو








Talking اجل ابوفروه زرقاء هع

باين ان الموضوع تحفه ورايق

برجع له اذا روقت وصحصحت

مقدما من اللحين شكراً يا قلبهم على أطلق موضوع بالمنتدى ^_^

لبى يا لبى

لي باك

رد مع اقتباس
قديم 09-03-2011, 01:43 PM   رقم المشاركة : 4
معلومات العضو
كلي نظر
عضو فذ
 
الصورة الرمزية كلي نظر
 
 

إحصائية العضو







افتراضي

لي نكسسسسه يابوووو

..

رد مع اقتباس
قديم 09-03-2011, 02:17 PM   رقم المشاركة : 5
معلومات العضو
الامل
عضو فذ
 
الصورة الرمزية الامل
 
 

إحصائية العضو








افتراضي

وش ذآ القرق مآشآء الله ^^

>> لي عوده للتعليق .



















التوقيع

{رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا} سورة الفرقان - آية 74

[FLASH="http://www.alrassxp.com/uploaded12/6543/01299369905.swf"]width=659 height=191 t=0[/FLASH]

يسألني الضمير ،، مآذآ قدمتِ للأروآح من حولك !
رد مع اقتباس
قديم 09-03-2011, 02:48 PM   رقم المشاركة : 6
معلومات العضو
نبض المشاعر
مشرفة سابقة
 
الصورة الرمزية نبض المشاعر
 
 

إحصائية العضو








افتراضي

ياويليه اذن العصر وانا مانمت
كله بسبة موضوعك ياعاشق << تقل محلوفن عليه تقراااه
من الحماس بديته هناك وكملته هنا خخخخخخخ
اذا قمت نكست لكم
برب قيلولة !!



















التوقيع

أهلّي بـ الموآجع كل مآ أنسآقت من [ الأقدآر ]
و أقـول يحلّها الليْ حطهآ لـ آلقلب / مكتوبة .!
.

.
رد مع اقتباس
قديم 09-03-2011, 02:55 PM   رقم المشاركة : 7
معلومات العضو
أروى ،
عضو ذهبي
 
الصورة الرمزية أروى ،
 
 

إحصائية العضو







افتراضي

وعليكم السلام ورحمه الله وبركاته


ماشاالله موضوع طويل و رآآئع جدآآآآ ,,أوما الاستآيل يوم أنه قديم


خخخخ ملامح اهم شي تمحشون




لك كل الشكــر عاشق المجاهيم ..



















التوقيع

وماتوفيقي إلا بالله

رد مع اقتباس
قديم 09-03-2011, 02:59 PM   رقم المشاركة : 8
معلومات العضو
 
الصورة الرمزية عآزف الآوتآر
 
 

إحصائية العضو








افتراضي

خخخخ مآآشاء الله علييك يآآعاشق احسه انو منقووول
< لي بآآكـ


















التوقيع

لست اللذي يرجوآ الوصآل أذآ تغنو بّ الصدود
ولست اللذي يبكي ع خل مضى حتى يعود ...

رد مع اقتباس
قديم 09-03-2011, 03:03 PM   رقم المشاركة : 9
معلومات العضو
القــادم بقوة ؟
مشرف منتدى التصميم والصور
 
الصورة الرمزية القــادم بقوة ؟
 
 

إحصائية العضو








افتراضي

وش خليت يا بونش

موضووووع مجنوووووون
موضووووووع الموسم



لي عوده بتنبيشات اخرى



















التوقيع

[FLASH=http://www.alrassxp.com/uploaded12/6543/01299365265.swf]width=669 height=202[/FLASH]
وألي يريد مقطع الصوت كاملاً يضغط هنا ..


رد مع اقتباس
قديم 09-03-2011, 03:06 PM   رقم المشاركة : 10
معلومات العضو
الامل
عضو فذ
 
الصورة الرمزية الامل
 
 

إحصائية العضو








Talking وعليكم السلام ورحمة الله وبركاته


جاوبته : أدخل الساحات
قبل كنت أحسب مافيه بالنت الا شيئين

الساحات و منتديات عائله الـ ***

---

أثاريك أنت أبو ليان !!

يآخي أذكر ذيك الأيام والهوشات وأذكر سالفة الهجره لذآك المنتدى
>> مآ رحت معهم ، مآجآز لي


أول مشاركه أذكره بسوالف متنوعه موضوع ( ناقش اللي بعدك بسؤال )
يخي اذكرك دخلت بقوه
وكنت انا عند بسمه ذاك اليوم ، وأقولها والله ان عاشق المجاهيم قديم بالمنتدى ويعرف الاعضاء زين
تقولي يمكن من النوع اللي يمون ، قلت لا والله قديم >> اعصابك طيب

بس والله صدمه ، أنت أبو ليان !
> مآ أستوعبت للحين


الإشراف على المواضيع والمشاركات ذاك الوقت كان يدار بشكل جيد




يآحلالي


---


تنبيشات غير شكل ، قضيت وقتاً ممتعاً فيها ^^
>> وللتنبيش متعه


أجل تقول انت ابو ليان >>> للحين مآدخلت مزآجه

يآخي كنت حآط الرمزيه صوره بنت ، صح !

> > كانوا يقولون هذي بنته


< جالسه احاول اتذكر بعض التفاصيل ، بس راسي مصدع وصار فيه التباس بين ابو ليان وابو نوره



من الحماس بديته هناك وكملته هنا خخخخخخخ
اييه ، الله يذكر أيآم العز بالخير


تشكرآت ^^


















التوقيع

{رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا} سورة الفرقان - آية 74

[FLASH="http://www.alrassxp.com/uploaded12/6543/01299369905.swf"]width=659 height=191 t=0[/FLASH]

يسألني الضمير ،، مآذآ قدمتِ للأروآح من حولك !
رد مع اقتباس


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع



الساعة الآن 05:50 AM





SEO by vBSEO 3.6.0 PL2 ©2011, Crawlability, Inc.

1 2 3 4 5 6 7 8