منتديات الرس اكس بي  

العودة   منتديات الرس اكس بي > منتديات الرس اكس بي > الرياضة و السوالف و التواصل

الملاحظات

الرياضة و السوالف و التواصل لكل ما يخص الرياضة، و لتبادل الأحاديث المتنوعة و الترفيه.

إضافة رد
 
أدوات الموضوع انواع عرض الموضوع
قديم 30-11-2011, 09:02 PM   #1
منفى الكلمات
مشرف
 
الصورة الرمزية منفى الكلمات
 
تاريخ التسجيل: Feb 2008
المشاركات: 8,095
معدل تقييم المستوى: 0
منفى الكلمات will become famous soon enoughمنفى الكلمات will become famous soon enough
Talking ھـيـلــۂ وٱلآطڿــﻣ وڍرؤيــڜ ..♠

.





سلآلآمون عليكم



تسييف حآلكم



بمآآ انيي مبطيين عن المنتدى بكبرره وقسسم السوآآلف خصوصآ قلت منييب جأي ألا بموضوعن يسوآآ وان شآآء الله تتآبعونه لأني بنززله أجزآآء وإذاا لقييت تفااعل ان شآآء الله منييب متأخر بتنزيل الأجزآآء البآقية

-

-

-

هيلة....
واحلامها المستحيلة والاحلام المستحيله - قصة فتاة حليله
------
هيله فتاة سعوديه عمرها الآن 28 سنه .. جميله ومثقفه تحمل مؤهل جامعي ..

قالت يماااااي لاتكون ذي سيارته

وفعلا كانت سيارته

لكن مثلها مثل غيرها توسدت شهادتها وقعدت تنتظر الفارس المتلطم..

عاشت طفولتها ومراهقتها في بيت ابوها
<***** اجل في بيت الدونات

وابوها معطيها الثقه الكامله والحريّه في كل امورها مع حرصه على الثوابت المهمه

تزور صديقاتها ويزورونها ويتعازمون في المقاهي والمطاعم

وتدخل النت بدون اي رقابه من احد ..تلبس اللبس اللي مقتنعه فيه

وماخيبت هيله ظن ابوها فيها وكانت محل ثقته لانه قدر يتوصل للمعادله الصعبه في تربيتها

الا وهي انه يكسب حبها له وخوفها عليه

حبها له.. انها تسوي كل ما يرضيه

وخوفها عليه من اي زعل او نكد وخاصه لو كانت هي السبب فيه..

يا ملحي وانا سوشيولوجي..


عندما بلغت سن ال18 سنه اصبحت كأي بنت بدأت تتكون لها احلام وطموحات في زوج المستقبل

كانت تحلم بزوج :

_اهم شرط وهو انه يكون وسيم وأنيق وطويل

_ لايقل عمره عن 28 ولا يزيد عن 34 سنه

_مرح ويحب المزح والفرشه

_ حنون وطيب ورومانسي

_كريم ومايهمه القرش

_ يقدر رأي المرأه ومشاعرها واهتماماتها

_حالته الماديه يكون مقتدر ..واقل شي يكون على درجة

(ماعليه + )وهذي معناها : ماعليه قل فلوس

لان فيه درجة (ماعليه) وهذي معناها : ماعليه ديون

ودرجة (ماعليه - ) ومعناها : ماعليه شرهه خخخخخخ


وكانت هيله تنتقد اي صديقه او قريبه تتزوج لمجرد الزواج والخوف من العنوسه

وكانت حكمتها الدائمه

" اقعد في البيت بروحي ازين من زوج أوب طموحي"

تقدم لها العديد من الشباب وكانت ترفضهم لعدم توافر ذا الشروط او بعضها

وعندما دخلت ربيعها ال23
..( مدري وشلون دخلت ربيعها واصلا ما عندنا الا ثلاث فصول صيف وشتا وغبار)


عرضت عليهم الخطابه خالد ...شاب من فئة (ماعليه+++) يعني ولد نعمه من اللي يفطر على عسل طبيعي
لكن ما يشترونه له لا ..تجي نحلته وتوقع على براطمه و تبوبز وتعسّل له هههههههههه



واطخم ..وجهه مدور وخدوده من لمعنتها كنها تفاح سكري وارد الشربتلي ..

وشفايفه منتفخه وحمرا كنها شفايف اسكتلنديه ما تشرب تتن
<*****من زين الوصف

وعيونه كنها عيون سميره توفيق

وسكسوكته تقولون مضبطها مدرس رياضيات بالمنقله والفرجار


و كان شعره يقهر البنات قبل الشباب لدرجة انه يسمي جواد العلي ابو عراده

وطوله 185 سم ولبسه كشخه يحلفون ان انه يستخدم الثوب لمره وحده همّن يذبّه
<*****سماط مطعم مثلوثه مهوب ثوب

وكل جمعه يودي لجمعية البر عدد 14 ثوب وشماغين وغترتين و3طواقي ..

لكن العقال الشهاده لله يحتفظ به ..

وصارت ثيابه من صالح موظفين جمعية البر اللي في فرع حارتهم

اللي صاروا يكشخون فيها... ويوزعون ثيابهم المقطنه على الفقراء والمساكين..

واذا جتهم تبرعات ثياب او اي ملابس عاديه يقولون غثونا ذا القراوى بخلاقينهم

ابوهااعجبته مواصفاته..لكن هيله قالت لابوها :

اخاف تفكيره ما يتناسب مع تفكيري او انه ما يقدر آراء المرأه وشخصيتها المستقله او يكون مغرور

قال ابوها ذا الامور صعب نعرفها ..بتعرفينها لين تزوجتيه

في نظام الخطبه عندنا ما لنا الا يظهر لنا وللناس وبس

وبالنسبه لشكله واسلوبه لين جا طلّي عليه من شباك والا من السطح وهو في سيارته

وتمقلي فيه اذا دخل للبيت ..واذا دخل المجلس قربي اسمعي صوته وطريقة كلامه

قالت ان شاء الله بس ترا مااوعدك اوافق ..

ممكن يكون زين وغني ويكون أوب طموحي بعد


قال ابوها يصير خير..

يوم جا كانت سيارته من زينها وفخامتها انا يا كاتب القصه وهو انا مدري وش نوعها

ويوم شافتها قالت يا سلااااااااام يمّه موافقه .. موافقه يمّه ..يمّه موافقه ..موافقه يمّه

واصلا امها ما كانت جنبها ..

وذهبت كل الشروط والمواصفات ادراج الرياح ..بس من شافت السياره

وينزل الولد هو وابوه وهي تراقبه من الشباك

يوم دخل مع الباب <*****<اجل بيطلع ضربه ركنيّه

وشافت طخامته وطوله وحمرة خدوده وريحة عطوراته اللي وصلتها في شبكاها

صرخت هيله ووقالت :

يــــــــــــبــه موااااااااافقه ..

رفع الولد راسه فوق بيشوف وش ذا الصوت لكن ابوها سحبه للمجلس

وهو يشير بالسبابه والابهام على رقبته ..

وهي حركة تدل على التهديد والوعيد بمعنى:

طااايب طااايب اصبري ان ما زنطتس يا تزليلة الحيا

البنت اصيبت بحالة خققان ما مرت بحياتها واصبحت غير مصدقه انهابتتزوج ذا الاطخم

وبتركب ذا السياره..لاوتركبها قدام بعد ..

ودخل عند ابوها في المجلس ..وقام ابوه وقال الديباجه المعروفه ..

والولد ساكت وقاعد ومرتزّ وكته مغصوب وبس يناظر مجلسهم واثاثهم باحتقار

وكنهم مقلطينه في حوش بقر رغم انه حلو و مكلفهم مساكين 15 الف ريال

وسأله ابوها عن مؤهله قال : بكالوريوس ادارة اعمال ..

( عيال النعمه دايم يختارون تخصص ادارة الاعمال لانه ضامنين الاعمال)



وقال وين تشتغل..

ضحك خالد ضحكة ازدراء مخلوتطن بكبرياء..

وهي ان يرفع راسه قليلا فوق ويضحك ضحكات متقطعه كذا .هه هه هه هه

بمعني ما تاكل لك شوي شسمه ..انا اشتغل عند احد

وقال طال عمرك عندي بزنس شركات ومحلات ومستثمر في الاسهم والعقار.

قال ابوها حياكم الله وبنرد عليكم ان شاء الله قال بس خلنا نشوف راي البنت وعطونا فرصه شوي

الولد ابتسم ابتسامة الواثق وهو يقول في نفسه<*****وش دراك انه يقول في نفسه؟

وهو يقول في نفسه :يا ابن الحلال بنتك بغت تطب علي سلقاطي من السطح..



سأل ابوها عنه في شركته وكل الموظفين مدحوه خايفين يفصلهم

سأل عنه امام مسجدهم..قال الامام:

الله يجزاك خير في ذا المناطق الراقيه محدن يعرف احد

انا يا إمام المسجد مااعرف اسم المذن..اقول لله اقم الصلاة يا هذا جزاك الله خير..

تبيني اعرف من يصلي ومن مايصلي..

وافق ابوها عليه..وهي اصلا ضاعت علومها من يوم شافت سيارته

كلمه ابوها وقال حياكم الله وافقنا والله يكتب اللي فيه الخير

لكن ودنا انك تشوفها ..(والله الاب الفرنسي وين نلقى مثله فيه)

قال ايه اكيد ابي اشوفها ..

يوم جا وقت الشوفه دخلت البنت للمجلس ونصته(يعني اتجهت له علشان بعض الناس ما يقولون اهرج زي الناس)

ونصته بتسلم عليه ..ومن زود الخقّه اتجهت لخده بتبوسه وابوها قام يختبص من صدمته في بنته

و مسيكين يتنحنح ويكح احححححم احححححم احححححم كح كح كح لين تمشخت حباله الصوتيه
ه علشان يبيها تركد وتنثبر وتقعد ..يوم بغى يفطس من الكحه انتبهت وركدت وقعدت ..

من يومها وابوها صوته صار كنّه قحطه..

الولد وافق عليها لانه شافها رايحتن معه سمبوسة البسوس خخخخخخخخ

وقال بس عز الطلب ابي وحده كذا..


وتم الزواج..وبدأت حياتها مع الزوج الغني الوسيم..






وفي ليلة الزواج كانت وكأي عروس متكلفه في مكياجها وفستانها ودها انها تلفت انظار الحضور

لكنها في زفّتها كل انظار البنات والحريم كانت متجهه لزوجها..وماجابوا خبرها

..وصاروا البنات يتهامسون ..عن اعجابهم في العريس وعن حظ ذا الهيله الشينه الل خذته

مع انها ما ينقصها جمال ولا جسم ولا اناقه لكن بعض البنات ديدنهم دايم الغيره من اي عروس

وحده من البنات الشينات العوانس قالت بصوت مرتفع شوي:

وش ذا الاطخم ما لقى الا ذي ياخذها ..صدز انه نصيب..!!!

مع ان ذا العانس من الشين اللي فيها ..تعتبر من اسباب عنوسة بنات البلد

لان من تقدم لها كره بنات السعوديه كلهم والا اضرب عن الزواج

والا جاب واسطه وتزوج اجنبيه ..

والا راح للعراق بحجة انه يقضي نحبه في جهاد الامريكان

خيرن له من قضاء نحبه في جهاد ام القمل والصيبان


وانتهت مراسم الزواج باحباط شديد اصيبت به هيله ..ولكنها استجمعت قواها وقالت

اهم شي ان ذاالزوج اللي انهبلوا عليه أوب لهم هذا زوجي ولي انا بلحالي..


وتم الزواج..

وسافر خالد وهيله لقضاء شهر العسل في سويسرا..

ورغم ان هيله ما كانت من اسره فقيره..لكن ما عمرهاسافرت برا السعوديه الا لمجمّع السيف قصدي للبحرين

واجازتهم يقضونها بين الثمامه والطائف والدمام والجسر المعلّق في ظاحية لبن


ومن المعروف ان المرأه تفرح ان الزوج يحب يسافر فيها بهدف امتاعها وانه يخليها تشوف اماكن حلوه

مع عدم التقليل من حياتها قبل الزواج <***** يرحم امك لاعمرك تنظّر

اللي حصل لهيله انها حست ان خالد يبي يبين لها انه فوق مستواها

وانها قرويه وما شافت خير..وان وجهها وجه غبار مهوب وجه خضره وطبيعه

واسلوبه هذا افقدها المتعه بالاماكن السياحيه وبشهر العسل كله..



وبدأت حالة الفرح والفخر بهذا الزوج تتغير شوي شوي

بعد انقضاء شهر العسل..

بدا خالد يمل من هيله مهوب بسبب انها اوب جميله ههههههههه

لا لانه تعود على انواع البنات

وكثرة تهافت البنات قليلات الحيا في البلد وخارج البلد عليه

وكان ما يستمر مع بنت اكثر من اسبوع يبدلهم مثل ثيابه اللي يوديهم لجمعية البر

يوم تزوج مر عليه شهر العسل كنّه دهر من الملل رغم ان هيله ما قصرت معه في

احتياجته كزوج وكرجل وككل شي هههههههههه

وصار يتجاهلها وما يؤدي حقوقها الزوجيه عليه..
لدرجة ان البنيّه مسيكينه حفظت عدد شعر قفا راسه ..

وصارت تشوف علباه اكثر من وجهه

وحفظت السبيلينق حق شركات الفنايل والبجامات اللي يلبسها

من كثر ما تقرا علامتها اللي في قفا فنيلته..


وهذا كله لانه مسكينه يعطيها ظهره على السرير وينام


وبدأت تظهر عيوب خالد..

ومنها عدم اهتمامه برايها ودائما يحسسها انه حلو وكل البنات خاقين معه وتحمد ربها انه تزوجها

ومنها اهتمامه الشديد والمبالغ فيه بنفسه ولبسه اكثر من زوجته

وان فلوسه مسخرها فقط لكشخته وسياراته وسفراته..

واذا جت تبي تطلب فلوس تبي تروح تتقضى .. يقعد يمنّن ويطلع ذا الخمسميه عليها مر

اما روحة السوق ففي بداية الزواج راح معها وهبل فيها..يمشي كنه طاووس

وهي تمشي وتسكرت وراه كنها شغاله جايبها من المطار(تسكرت يعني تمشي وراه بسرعه وهي مطأطأة الدمجه)

وذاالبنات الدبش خاقين معه وما يدرون انه ما يسوى التاليه من الغنم..

وصارت تفضل انها تروح للسوق مع السواق اكثر من انها تروح معه


واضافه الى هذا..ما كان خالد من النوع اللي مايحب المزح والضحك او الحكي مع زوجته

وحكمته في ذلك (لاتعطي الحرمه وجه)..وان الحرمه ما عندها الا الدجه

واذا تواجد في البيت يقعد في الملحق مع شلته..ولين راحوا بعد12 دخل معها جوا

وذا قعد معها شوي في الصاله تجي متحمسه بتقول له سالفه او مزحه او نكته او وش صار معها اليوم..

يناظرها نظره كلها حقران ويقول انا لله ياكثر حكيك اوص ترا راسي مصدّع ومالي خلقك

ولين زاد حكيها صمخها بالريموت ورجح للملحق ..




بدأت هيله تكره حياتها معه لانه ما حسسها باهميتها كزوجه ولا بانوثتها ولا بقيمتها

وجماله اللي انهبلت عليه اصبح مصدر تعاستها ..

وتتمنى انها تزوجت واحد عادي لكن يقدرها ويراعي مشاعرها ويحن عليها

وبعد ما اشتكت حالها على احدى خواتها قالت لها واجهيه والعني جدفه..كانت اختها عربجيه بارك الله فيها..

ياانه يتعدل والا بيت ابوي يبزاتس

وتمت المواجهه وقالت

انت لا تقعد معي ولا تحكي معي ولا تنام معي

(لاتفهمون غلط قصدها انه ينام قبلها وهي واعيه فيتزاول لها امورن تخوّفها<*****ايه هين )

ليه تزوجتني؟

يا انك تتعدل والا خلني اروح لاهلي

قال انا تزوجتك علشان امي وابوي يبون يشوفون عيالي

قالت : انت عطيتني فرصه اجيب عيال

واصلا انت كفو للعيال..

قال اقول على تراب بس ..وبعدين تراك انهبلتي يوم شفتيني ..كانك ناسيه ذكرتك يوم الشوفه

قالت.. الله يقطعه من يوم.

زينك وفلوسك وش ذا السعاده اللي جابتها لي؟

وش زادت في شخصيتك واسلوبك؟ غير الغرور والاستهتار بالاخرين؟



قال:اقول وبلا بربره وعلى تراب وش تبين مني الحين؟

قالت : ابيك تتعدل والا تطلقني

قال: اصلا بدون ما تقولين ..انا ماكنت بقدر استحملك اكثر من كذا

بصراحه حامت كبدي منك .. ومن خطبوك لي وانا قايل لهم ما اقدر اعيش مع قرويه

قالت تكفى يا المتحضر ..وش الحضاره اللي تعرفها؟

السفر واللبس والسيارات والمطاعم ؟

هذي حضارتك؟

حضارتك هي لك وخلني على قراوتي وطلقني

وطلقها بكل برود بعد زواج استمر 6 شهور..

ورجعت لبيت اهلها












واستمرت مطلقه في بيت ابوها سنتين..ورفضت كل لي تقدموا لها

واكثرهم مواصفات زينه ومن اللي تفضلها

لكنهم يبونها زوجه ثانيه بحكم انها مطلقه...


السنتين اللي عاشتها كمطلقه عانت فيها الكثير من نظرة المجتمع لها كمطلقه

والتركيز على تحركاتها وحركاتها وسكناتها

رغم ان تصرفاتها افضل من الكثير من البنات اللي ما تزوجوا

خلال هذه الفتره وبعد تجربتها السيئه وصدمتها في خالد

تعقدت من اي زوج تكون ابرز مميزاته وسامته وفلوسه..

وتغيرت حكمتها

من ( اقعد في البيت بروحي احسن من زواج أوب طموحي)

الى

( المهم الدين والزين غسال يدين)

و ( شين يحبني ولا زين يذلني)

و(الهنا والسعاده اوب في الزين والماده)






ويوم وصلت لسن ال25 اتصلت عليها احدى الخطابات وقالت:

عندي لك زوج ما عمره اعرس ..



قالت وش مواصفاته ؟

قالت . شاب عمره 37 سنه ما تزوج قبل كذا

موظف على بند الاجور في وزارة الصحه.. راتبه 3000 وساكن مع اهله

فالت : الفلوس اوب كل شي اهم شي طيبته وحنانه ..

ومشكلة السكن مع اهله ان شاء الله اقنعه نستقل عنهم<*****قامت ترقع عيوبه

طيب طيب وشكله ؟؟ترا مابي زوج اطخم؟

قالت الخطابه: قولي قسم؟

الله اكير يا ذا الطخمان اللي ماسكين سرا عند بابكم

الحين انتي مطلقه احمدي ربك يجيك واحد بكر... وضحكت الخطابه بلحالها على ذبّتها ..

وهيله ودها تكب عليها بريق الشاهي

قالت طيب وشلون شكله؟


قالت:

هو مهوب شين ..صح خشمه ماخذن ثلاث ارباع وجهه والربع الاخير لشنبه

وصح انك تشوفين مخّه مع مناخره ..

وصح انه قصير و معصقل كن عصقوله المشعر سيخ شاورما توّه مخلّص

وصح ان عليه ظروس المقاول اللي بيقدر بيرمم لو ظرسين منها بيعطونه جائزة نوفل ..

تسوي مثقفه ذا الخطابه ههههههههه..




قالت: خلاص يا خاله ييزي ترا حامت تسبدي

قالت الخطابه:

لكن الشهاده لله انه حبيّب وعلى نياته واهله اجواد ويصلي وراعي فزعه ونخوه وشقردي




قالت هيله :

مهوب مشكله انا راضيه فيه

طيب وتفكيره واسلوبه وتعامله؟

قالت الخطابه:

ما تزوجته قبلك علشان ادري عنه ..

حارّه ذا العجوز

اللي اعرفه انه ما يشرب تتن ويصلي ..وما استثمر في الاسهم..يعني عقله معه



قالت هيله:طيب وش اسمه؟

قالت : اسمه درويش هيله فقعتها ضحكه ..

وقالت يا قلبييييييييييه وش ذا الحاله.. شين ودريش بعد...

انا موافقه عليه ما عاد ابي زوج زين.. خليه يتقدم لابوي..



وفي موعد الخطبه جا درويش ومعه ابوه وكالعاده قعدت هيله تطل من شباك غرفتها

وتقول لاختها :يوووه وش فيه درويش تأخر؟؟
قالت اختها : فيه بنت تنتظر واحد اسمه درويش ههههههههههه

وفجأه امتلا سما حارتهم بالدخان قالت هيله:

بسم الله وش ذا الدخان الله يستر لا يكون جيراننا احترق عندهم شي..

لا الدخان جاي من تحت لفوق..يمكن انه البلديه ترش فليت<*****يا قدمك يا هيله

لا والله.. واحد سيارته تدخن كتمنا الله يقطعه..

وتتفاجأ بشخصين ينزلون من السياره الهايلكس المدخن<*****مرتديلا مهوب هايلكس

ويتجهون لباب بيتهم


ويدخل درويش هو وابوه وكان درويش متكلف ومشخص بثوب زعفراني اللون و شماع بصمه صفرن لاقيها في الهايلكس يوم يشتريه ابوه عام 1401 هـ

وجزمه رصاصيه على شراب بنّي ..

وكان عليه شنب يروّع مع ان نصه ما بان لانه داخل في مناخره

البنت استاحشت منه بس رجعت بذاكرتها لخالد وغروره وحقرانه لها

قالت هذا اذا كان حنون..بامكاني اتكتكه واغير اللوك حقه..

وهي لو توديه لطبيب مايكل جاكسون يبطي عظم ما يعدّل لو منخر واحد من مناخره
نزلت وراحت تسمّع كلامه في المجلس..

وسمعت الحوار التالي بينه وابوه وبين ابوها:



ابو درويش:

يا طويل العمر حنا جايين ويشرفنا نخطب بنتك لولدي درويش

ابوها: بصوته المبحوح القحطاوي

الله يحييكم..من دلكم علينا؟

ابو درويش : الطيبين معروفين ما يبي لهم من يعرّفهم

التفت ابوها على درويش وسأله:

وش تشتغل يا درويش؟

قال:

اشتغل مراسل في وزارة الصحه على بند الاجور

ابوها :طيب ليه تأخرت في الزواج؟على ما سمعت ان عمرك37؟

قال الزواج يبي دراهم..وين تبيني اتزوج منه من مانيب قايل..

ويقبصه ابوه لين قال احححححح وقام يفرك القبصه


قال ابوها:

طيب انت تدري ان البنت مطلقّه؟

قال درويش.. ايه ادري وانا لي فتره ادور لي بنتن مطلقه ومستعمله استعمال حشمه

ويقبصه ابوه مرتن ثانيه..قال لابوه..يبه خلني احتسي ورك تقبّص..انا اللي بعرس والا انت؟

ابوها وهو حايمتن تسبده ليه تبي مطلقه؟

قال درويش: ارخص يا خالي..

ياخلي السياره لين شريتها وهي ماشيتن 15 الف يطيح عليك فيها دراهمن مهيب لعب والا لا؟

قال ابوها: الا..

قال درويش : بس خلاص يا خالي ..




.

To Be Continue



.

أرجوا من المشرفين عدم نقل الموضوع

__________________
Just the fact that some geniuses were laughed at does not imply that all who are laughed at are geniuses. They laughed at Columbus, they laughed at Fulton, they laughed at the Wright brothers. But they also laughed at Bozo the Clown.
(Carl Sagan)
منفى الكلمات غير متواجد حالياً   رد مع اقتباس
قديم 30-11-2011, 10:38 PM   #2
حبه سكر ناعمه
عضو بارز
 
الصورة الرمزية حبه سكر ناعمه
 
تاريخ التسجيل: Sep 2010
الدولة: حيث ما كنت أنا
المشاركات: 666
معدل تقييم المستوى: 0
حبه سكر ناعمه is on a distinguished road
افتراضي

صدق من طول الغيبات جاب الغنايم
وأنت ماشاء الله عليك جدآ رائع
يعطيك العافيه ولا تتأخر بالبارت
الثاني تراك شوقتنا لهيله ودرويش
صدق إن المال مو كل شيء
ويسعدني إن أكون أول من
تشرف بالرد على صفحتك
تحياتي لك ويعطيك العافيه
__________________
حبه سكر ناعمه غير متواجد حالياً   رد مع اقتباس
قديم 04-12-2011, 07:11 PM   #3
منفى الكلمات
مشرف
 
الصورة الرمزية منفى الكلمات
 
تاريخ التسجيل: Feb 2008
المشاركات: 8,095
معدل تقييم المستوى: 0
منفى الكلمات will become famous soon enoughمنفى الكلمات will become famous soon enough
Talking البـــآآآرت الثآآني والأخيير

الجزء الثاني
مثل بنتك اجل قيمتها الحين مثل يوم انها بكر..

اكيد بيطيح فيها دراهمن واجد..المستعمله مهيب مثل اللي بقراطيسها

هيله وهي تسمع ذا الاسلوب خنقتها العبره ..وحست انها لومينا 2006

ابوها وقف و درويش يحكي ما عاد تحمل يسمعه

خلاص بنسئل عنكم ويصير خير..يعني اقظبوا الباب


راح لها وقال هاه سمعتيه؟ تبين ذا المخنز؟

قالت ايه يبه..انا موافقه عليه

هو واضح انه طيب وعلى نياته وانا بشكّل فيه واغير فيه على مزاجي

ابوها تفجأ بردها وقال:

لا تخلين تجربتك مع خالد تأثر على قرارك و تدفنين عمرك مع ذا المروِح؟

قالت انا موافقه وبتحمل نتيجة قراري

قال : بكيفك حياتك وانتي حره مع اني مدري وشلون بتحمله يقول لي خالي تخلخلت وردانه..


سبحان الله ..بعض البنات لين بغت تعرس لو يتقدم لها الحسن كيتا صار وش زينه في عيونها

طلع درويش وابوه وتو ابوها مودعهم ومسكر الباب

دقايق ويرن الجرس ويفتحه ابو هيله

لين اللي عند الباب ما غيره درويش

قال ابوها هاه وش عندك؟

قال ابد يا خالي مابه الا سلامتك ما عندك اشتراك؟

ابوها قال وش اشتراكه ؟اشتراك شوتايم ؟؟ كان ابوها من متابعي البريمرليق

قال لا وش تايمه انا ما اعرف ذاالحتسي المارج ..

ابي اشتراك لبطارية السياره عندك يا خالي؟

قال ابوها وهو مولّمن التفله : لا ما عندي

قال درويش تعال يا خالي الله لا يهينك دف معنا

وصفق ابو هيله الباب في وجهه..



بعد يومين

اتصل ابوها عليه وقال تعال البنت موافقه

قال زيييين بس انا لي شرط؟

قال ابوها.. وتشرّط انت وشنبك..؟

منتب بسيط يا دلبييرو

ها وش شرطك ؟

قال بشوفها

قال طيب تعال بكره شفها

وجا درويش وهو قاعد يشرب شاهي حااار توه مصبوبن له

شوي وتدخل هيله في قمة اناقتها

ومن الخقّه شرب البياله كلها وهي حاره تلعّط وتنتفخ لهاته هههههههههه

وتطير عيونه فيها ويقول يلعن ام الزين



البنت استحت ورجعت ..

يوم راحت مقفيّه طلعت عيونه زود و قال يقطع ام ال ...........


ابوها مابقى شي ما حذفه به بعلبة المناديل وبالبيز وماباقي الا الدلّه علشان ينبهه انه موجود وانه لازم يحسّن الفاظه

ويصايح ويقول درويييييش وجع وجع وجعن يوجعك

استح على وجهك ترا انا ابوها ما قعدت فيذا ابيع مساويك..

قال سامحني يا خالي عمري ماشفت تسذا ترا انا ازين اخواني وخواتي

قال ابوها :

اللي انت ازين من خواتك ..لو اني مزوجك الشغّاله السيرلانكيه خقيت معها

قال درويش : وش تقول يا خالي؟

قال ابد اقول الزين زين يادرويش عسى ما ينظلونك خواتك في زينك


وتزوجت هيله درويش..










وش صار في ليلة الزواج ؟

وش لون تعايشت مع درويش ؟

وهل استمرت معه والا تطلقت..؟



في الحلقه القادمه ان الله اراد..




بعد الشوفه الشرعيه بيومين..اتصل درويش على ابو هيله وقال:

مسيك بالخير يا خالي..

قال ابو هيله هاه يا درويش وش عند؟

ابيك تولّم(تجهز) القهوه و الشاهي بسير عليكم باتسر عقب صلاة العصر وقل لهيله تزين

ذاك الحلى اللي زينته يوم الشوفه اللي هقوتي انها كنافه بيضا

( ذا القروي اي حلى يسميه كنافه .. هو قصده التشيز كيك)

قال ابوها وش اللي بتجي عقب صلاة العصر رايح لمعارض النسيم انت!

أقول ماودك تجيب هدومك تصوبنها لك هيله؟

قال درويش بصوت خافت :

هاه !! والله مهيب شينه

لا ياخالي ماودي اكلف عليها لاحقتن على الغسيل

قال ابوها :

مهوب تسنّك مطيّح الميانه واجد وانت ما بعد تملكت

اجل لين تزوجت عسى ما تقعد في شدزي ..

كرها درويش ضحكه وقال : قسم انك مهستر ياخالي

خاله طنقر وسكر الخط بوجهه..







في اليوم التالي راح ابو هيله يصلي العصر ويوم رجع تفاجأ بدرويش ينتظره عند الباب

قال ابو هيله : وجع وشذا المطفوق






هلا درويش ..

خذ يا مفتاح بيتنا وقص لي عليه واحد.. والا تدري خذه و مهوب لازم يكون معي مفتاح..افتح لي انت

جا درويش بياخذ المفتاح منه ويسحبه منه ابو هيله ويقول ويقول:

ياخوي كلشن تصدقه انت..

ودخل درويش المجلس وقعد يتفرج وتمقل في الكنب والستاير
و قال : يا زين ستايركم يا خالي وينكم مفصلينها فيه في حراج ابن قاسم والا ابن دايل؟

قال ابوها : لا مفصلينها في سوق الحمام..

ويموت درويش ضحك

خاله يحسبه يضحك على ذبته

لكن دريش قال: تصدق ياخالي مايشوف الا القلب..

على كثر مارحت لسوق الحمام مع ولد عمي مبارك ماشفت احد يخيط ستاير فيذاك

قال خاله والا مصدق ان في سوق الحمام محلات ديكور ؟؟؟

قال المهم بس يا خالي خل عنا الحتسي كم تبي فيها؟

قال ابوه وشهي الستاير؟

كرها الدرويش ضحكه وقال: الله يقطع بليسك ياخاك متى بتعقل انت

وش ستايره انااقصد كم تبي في هيله؟

قال ابوها جعلك الوجع حسبتك تقصد الستاير ..

يا ولدي متى بتعرف تحكي ؟

وش اللي كم ابي فيها..جعل فمك يدقْ بحصاة

يا ولدي انا نشتري رجال ..رجال يحافظ على بنتنا ويكرمها ويقدرها ويخاف الله فيها

قال درويش: ايه يعني كم ؟

ابوها : لا حول ولا قوة الا بالله.. وش الله بلاني بذا الثور

انت كم ناوي تدفع مهر..ما نبي نضغط عليك بشي يأثر على حياتكم

قال درويش: انا يا خالي جمعت 17 الف وتسلفت 3000 من ولد عمي

رجالن ماعليه راتبه 4800 غير اللي يجيه من تجارته في الشروخه

يعني معي 20 الف بعطيكم اياها مهر..والغرفه علينا متكفلن بها ابوي

ما نبيها تجي الا بخلاقينها وقراشيعها..

قال ابوها : وش قراشيعه قرشعوك في كرتون ..

ماخذها من مبسط انت وشنبك

خلاص موافق اهم شي تنتبه لبنتي وتخاف الله فيها

قال درويش انا اخاف الله قبل اعرفكم .. الدبشه يحسب خاله يطاقّه

خاله وهو موب قادر يحكي من الضحك

قال يادرويش ياولدي انا مانيب اطاقك انا اعلمك ان

الفلوس ماتهمني اهم شي التعامل الطيب

اقول المهم.. خلاص قظينا..عندك شي والا تراني مشغول

قال دريش اصبر ياخالي وش مطيرك

ترا مانبي عروس وطقطقه

قال ابوهيله:

تكفي ياللي وجهك ينفع للزفه

قال درييش هاه !

قال ابو هيله : ولا حنّا نبي عروس وحفلات

قال درويش :

متى تبي اجيب قيمتها واتملك

ابو هيله وهو ماسكن عقاله .اقول ا درويش ترا ماعاد فيني صبر على دباشتك

خلاص قم اذلف و يوم الجمعه شف لك شيخ وتعال انت وابوك واللي تبي من جماعتك





يوم جا يوم الجمعه جا درويش وابوه وخاله..ومعهم الشيخ ..


بعد ما القى عليهم الشيخ خطبه قصيره..



سأل اين الزوج؟

قبل يقول درويش انا..

ابوه وعمه وولد عمه كلهم صاروا يأشرون على درويش ويقولون هذا هو هذا هو

وكنهم بشيرون له باصابع الاتهام مهوب بييعلمون الشيخ انه هو العريس..

عائله تشتهر بالطفاقه الله يهديهم


قال الشيخ: يكفي جزاكم الله خير لاحاجة لي بمعرفة الزوج

بقدر حرصي ان لا تصاب عيناي بأذي ..

فضحك الجميع على ذبة الشيخ

ماعدا درويش اللي قال آمين... يحسب الشيخ يدعي له..


الشيخ وهو يبتسم اعطني اثباتك ي ا اخ درويش؟

ناظر الشيخ صورة درويش في بطاقة احواله

وقال: هل رأت الزوجه هذه الصوره؟

قال درويش لا

قال الشيخ : حسننا فعلت يابني والا لحدث لها ما لا تحمد عقباه

قال درويش : سم يا شيخ

قال الشيخ: لا شيئ

وسأل الشيخ درويش كم الصداق؟

قال درويش : هماني معلمك اني بعطيك 350 ريال

قال الشيخ والطنقره باديه على محياه:

انا اقصد المهر كم ستدفع مهرا للبنت؟

قال درويش: 20 الف ريال منها 17 الف جامعها و3 الاف متسلفها من ولد عمي مبارك

رجالن ماعليه راتبه 4800 غير اللي يجيه من تجارته في الشروخه

والغرفه علينا جاايبها لي ابوي عانيه

ضحك الشيخ حتى اغرورقت لحيته بالدموع

قال الشيخ وهو مهوب قادر يتوقف عن الضحك ويوجه الكلام لابو هيله

هل لكم شروط ؟

خطم درويش وقال : ابد مالي شروط

فذب الشيخ الدفتر وقال الشيخ ياخي اصمت ..

والا احضر لك شيخا غيري.. السؤال لم يوجه لك جزاك الله خير

قال ابو هيله: ما لناشروط غير انه يخاف الله فيها..ولو حصلت لها وظيفه ما يمنعها

قال الشيخ : موافق على الشرط؟

مارد دريش

قال الشيخ تكلم يا اخي موافق على الشرط؟

قال دروش ما عرفنا لكم يا ذا المشايخ كل يوم فتوى..ان حتسيت طنقرت وقلت اصمت

وان سكت قلت تكلم؟؟

قال الشيخ ضاحكا لن انطنقر تفضل

قال درويش: موافق على وظيفتها وعلى كل شي

قال الشيخ :اريد اخذ موافقة البنت؟

دخل الشيخ وسأل هيله : هل تقبلين بالزواج من درويش؟

قالت: نعم يا شيخ

قال الشيخ : هل انتي متأكده؟

قالت نعم يا شيخ

الشيخ قارصه قلبه ما اقتنع ان فيه بن بتوافق على ذا الدرويش

الا كانها مغصوبه والا مهبوله

وتم عقد النكاح ..وقام الجميع لتهنئة درويش.. وقام ابو درويش يبتسي





قال الشيخ: من خلال مئات عقود النكاح التي قمت بها

اعتدت على ان ابو العروس هو من يبكي على فراق ابنته

لكن ان يبكي ابو العريس على زواج ابنه فلاول مره تحدث..

ويزداد الامر غرابه عندما يكون العريس مثل الاخ درويش جزاه الله خير

وضحك الجميع مره اخرى على ذبة الشيخ..

ماعدا درويش الذي قال واياك ان شاء الله في جنات النعيم..




وصارت هيله زوجة درويش

و اول ما وصل دروش بيتهم اتصل على بيت اهل هيله

ورد عليه اخوها فهد ودار الحوار التالي:





درويش :الو السلااامو عليكوم

فهد وعليكم السلام

درويش : الله يعافيك ناد عيالي اكلمهم

فهد : وش عيالك ..؟ انت غلطان ياخوي وصك السماعه بوجهه


يبدو درويش ما اعرس الا علشان ينادي زوجته عيالي مثل ولد عمه مبارك




راح لاخته قال كلمتهم ابي احاتسي عيالي وسكروا

قالت اخته بصوت خافت لا تكلمها قسم ان تحلف ماتدخل عليها

قال هاه

قالت اقول يمكن مستحيه.. انا بكلمها



بعدها اتصلت اخت درويش وكلمت هيله..واتفقت معها على ترتيبات الزواج

واللي اتفقوا انه يكون زواج بسيط ..في بيت اهل هيله وبحضور المقربين جدا من العائلتين

الزواج كان في الشتا

وجا دريش لابس ثوب لونه مهوب بني ولا بيج لونه لون سيلْ ..وكوت اسود

وبشت بني وشماغ شتوي وجزمه سودا بخيوط صفرا .. سعود كريري مهوب عريس


مسكين مجتهد في اناقته وما كل مجتهدن بمصيب ..

اجل احد في ليلة زواجه يلبس مجل المواكب للملابس الرجاليه

وبعد ما جلس شوي في مجلس الرجال دخل في الصاله علشانهم مجهزين له كوشه وكيكه

ويبونه يصور مع زوجته

يوم شاف هيله في فستان الزفاف وفي قمة اناقتها ..طارت بوهته وقعد يطل في وجهها

والبنت مستحيه وفيها ضحك على ارتباك.


جت اختها الصغيره تقدم له عصير وياخذ الكاس ويده ترتعش ويطشم العصير على بشته

ويفصخه ..وهو يقول اصلا انا ماكلني الحر


هيله تعمدت اختيار الكيكه هذي

أختارتها هيله لسبب سيكولوجي

وهو رفع الروح المعنويه لدرويش علشان لذا يشوف القرد يعرف ان فيه في الكون من هو

اشين منه ورغم شينك قبلت فيك

بعد ما شال درويش البشت وقعد وتمقّل في وجه هيله لين حفظه صمْ ..


قالوا له تفضل اقطع الكيكه..

قال : اصبروا خلوني اوخر ذا الورد اللي مالها سنع



ويقعد يبربس ويشيل الورد ويبه في الصحن اللي جنبه يوسخ كمه ويحوس الدنيا

ويرفع كمومه فوق ويبدا يقطع الكيكه ويحوس ام الكيكه

ويقعد ياكل منها اكل حتى القرد بغى ياكله بس خذوه منه وياكل ويلط من ذا العصير

وكنه واحد قاط في الكيكه وبيحلل قطته..وهي واقفه جنبه ودها تغطس وجهه في الكيكه

يوم اكل نص الكيكه.. قال لاخوها:

انعم الله عليكم ..شف الدرب بغسل يدي

وكنه ماكلن مرقوق مهوب كيكة زواجه..وهيله في ذاالوقت تبكي وتضحك ومتفشله..

بعد ما غسل دخلوا الرجال يتعشون ودرويش اخذ زوجته وطلعوا لبيت الزوجيه

كان درويش متسلف سيارة ولد عمه راعي الشروخه ..كانت كامري موديل96

وتركب هيله صهوة ولد عم درويش وهي تتذكر سيارة خالد اللي بتنتهي قصتي ما عرفت اسمها..

اما درويش فذب البشت ورا ودق سلف وانطلق بعروسه الى بيت الزوجيه..

كان عليهم شكل لا ادري ماذا يبي ..لا يمت بصله لانهم معاريس رايحين لعش الزوجيه

كامري 96 وهي راكبه معه قدام بعبايتها على راسها وهو مضبط الشماغ على تشخيصة

سليمان العيسى صار كنهم رايحين يداومون هي موجهه تربويه وهو في كاتب ضبط في كتابة العدل الثانيه

درويش ما عنده اي خبره في الحكي مع الجنس الناعم

اصلا حتى خواته يتجنبون يحكون معه لانه دفش ممكن يخور بكلمه تفشل

وخاصه بعد موقفه مع احدى خواته ..كان عندها مشكله مع ابوهم انه ما يعطيها فلوس

وان البنات احتياجاتهم كثير وودها تكون مثل خوياتها

قالت بكلم درويش يمكن يقنع ابوي

راحت و قالت له :

ودي احكي معك في شي خاص وابيك تفهمني؟؟

قال : عسى منتيب بس مخنبقتن مع احد ..وتبين ما اعلم ابوي

قالت لااااااااااااااااااااا بسم الله علي

قال : اييييييييييه تبين تعرسين يا اللي ما تستحين

قالت لاااااااااااااااااااااااا ااااا اصبر اعلمك

قال: ايييه اجل الله لا يبلانا تبين اوديتس للفيصليه؟؟

ماخذ فكره عن الفيصليه انها ووكر دعاره

قالت لاااا مابي اروح لها ..ومابي احكي معك في شي بسم الله منك ومن مخك

قال اقول انقلعي يا قليلة الحيا والله لاعلم ابوي انتس خربتي

وهو اصلا ما يدري وش تبي

واصلا خواته بعد مالهم علاقه بالجنس الناعم خخخخخخخخخخخخ


علشان كذا يوم ركبت معه زوجته ما لقى اي شي يحكي فيه

وطول الطريق يقول:

يالله ان تحيي هيله..يا هلا ومرحبا

وهي تقول الله يحييك..

وشوي ويقول يالله ان تحيي هييييييله يا هلا ومرحبا

وتقول الله يحييك


وشوي ويقول يالله ان تحيي هييييييله يا هلا ومرحبا


وتقول الله يحييك

وشوي ويقول الله يحييك يا هيله يا هلا ومسهلا ..ينقال له جدد في كلامه الرومانسي


وتقول الله يحييك..وتقول في نفسها ..شكل الرجال بيبطي كذا ..

ومن زين اسمي يسمعنيه كل شوي



المهم الرجال اتجه من بيت اهل هيله في شرق الرياض تجاه الغرب

قالت هيله بصوت خافت كله حياء :


درويش ترا ما فيه فنادق مع ذا الجهه

قال هاه؟؟وش فنادقه وش نزيّن فيها؟

الحين مصلحن جناح في بيتنا تطامر فيه الخيل

وابوي متزهل وجايبن لي الغرفه (غث اللي خلفوها على ابوه وغرفته)

ونروح نرقد في فندق..؟

سكتت هيله ..

واستمر على طريقه وتعدى كل المخارج اللي في شرق الرياض


اتجه باتجاه الغرب ..هيله خافت لايكون ساكنفي منفوحه او خنشليله

واستمرت خايفه لين تعدوا حرا ج بن قاسم


قالت ايه السويدي والبديعه مو مشكله..ويلف يسار قالت ايه الشفا بعد مهوب شين

ويتعدى الشفا قالت هيله .. لايكون بيتهم استراحه في الحزم؟؟

ويتعدى الحزم ويمشي لين وصل حي الفواز اخر حي قبل ديراب


ويدخل فيها للبيت كان فاضي اهله ما جوا من الزواج

ويطلع هو واياها للجناح حقهم...وهيله متحمسه تشوف ذا الغرفه اللي غثهم عليها

ويوم دخل وتشوف غرفه لونها ابيض لمّاع وستاير لونها ازرق واخضر وموكيت اخضر ..

شافتها هيله وحست انها في عام 1409



قالت في نفسنها فيه محلات تبيع غرف كذا وستاير كذا لين الحين




قالت هيله درويش : ممكن تطلع ببدل ملابسي؟؟

قال وشو له اطلع انتي حلالي بلالي

قالت ايه ادري بس ممكن تطلع؟؟





وطلع وبدلت ملابسها ولبسة له القميص الاحمر الطويل اللي مهوب مشخلع مره

بس مطلع بعض من المفاتن..


وفتحت الباب ودخل درويش من الخقه قامت ظروسه تطقطق

وهو يقول: وششش ذذذذ ا الززززيييين يا هههههيلللله طططخخخخ

هيله ميييته ضحك وتقول وش طخخخخ ؟

قال طططخخخممما انتتتي



وجا بيفصخ ثوبه وهو اصلا مابعد فصخ شماغه وعقاله وكوته

ويفصخهم كلهم ويقعد بفنيلة دروش وصروال الدفه طويل ..ليتهم طقم بعد

وصار كنه لبس شايب بيذبح ضحية جدانه مهوب عريس في ليلة العمر

وتوه بينقض عليها مثل الثور..وتنحاش عنه وتقول:


اصبر درويش ودي اسولف معك ونتفق على بعض الامور

قال امري تدللي لو تبيني اطب مع ذا الشباك ما عييت

قالت اول شي مااعرست عليك علشان ابيك تطب..

وثاني شي لو طبيت مت وصرت ارمله في ليلة زواجي

وثالث شي الشباك فيه حديد وشلون بتطب هههههههههههههه

قالت لا ابي اتكلم معك في حياتنا ومستقبلنا..

قال ايه بنحتسي ونسولف ..بس مهوب الحين..السوالف ماتجيب عيال

هيله وهي كاتمه ضحكتها قالت قبل العيال وقبل مستقبلنا انا لي طلب واحد عندك

قال موافق

قلت طيب عرفت وشهو؟

قال موافق آمرييني بس..




مسيكين يا درويش لبست له قميص نوم طويل وضاعت علومه

قالت: انت انسان طيب وحبوب ومحترم وبريئ وتخاف الله

وهي امور اللي خلتني اوافق عليك..

لكن علشان تمشي حياتنا مع بعض ابي منك تخليني اعلمك بعض الامور اللي انت ما كنت تهتم فيها

وانا اوعدك اكون لك احسن زوجه

كل هذا الكلام ودرويش قاعد بفنيلته وصرواله و يدودل رجوله ويطلع القطن من سرّه

قال انا موافق مع اني مدري وش بتسوين فيني ..هاه خلاص الحتسي قظى؟

قالت وش قصدك؟

قال يا الملعونه عارفتن قصدي..



كانت كلمة قصدي اخر كلمه سمعتها هيله ليلة زواجها

لانها اغمي عليها وما صحت الا الصبح وهي تعاني من صداع والام في الرجلين والبطن

والظهر والرقبه ومن خدوش في رجولها نتيجه للشطوب الحاده اللي في رجول درويش

حتى اسنانها تعورها مدري ليه

بعد ما اصلحت ما يمكن اصلاحه من اخفاء اثار تلك الليله

نزلت لاهله وسلمت عليهم..كانوا عائله صح كلهم شيون بس طيبين جدا

وصارت هيله بينهم ملكة جمال ..




يوم جا العصر جا درويش وقال لهيله ..عندي لتس مفاجأه يحبها قلبتس بروح بتس الحين للشرقيه

وما عطاا حتى فرصه تخمن وشهي المفاجأه

قالت وهي تاخذه على قد عقله: مفاجأه حلوه

لكن انا عندي لك مفاجأه احلى

قال وشهي قالت مانيب قايلتها الحين مخبيتها في الدالوب اصبر لما نطلع لجناحنا اوريكياها

بعدين فكرت شوي وقالت في نفسها ..هاه.. ان طلعت انا واياه لغرفتنا مهوب ازين لي والله ان ما عاد اقوى افتح الدالوب

درويش انتظرني هنا لا بجيبها لك خلك هنا لا تجي

قال طيب..

راحت ورجعت قالت غمض عيونك

قال: امحق مفاجأه بتلعبين معي غميمه ..كان خليتينا نلعباها في غرفتنا ..

مهوب بسيط الرومانسي



قالت : درويش غمض..وغمض قالت فتّح يوم فتح وتوريه المفاجأه

قال وبس هذي مفاجأتك؟ كروت حقت ملاهي ..

هيله خنقتها العبره ..

قالت لا هذي بطاقات صعود الطائره حجز لي ابوي انا وانت نروح جده ومكه

قال في ذمّتك؟

تصدقين اني ما تزد ركبت الطياره ..مع ان ربعي يحايلوني دايم اسافر معهم فيها بس ما حبيتها مدري ليه

قالت هيله في نفسها.. ايه هين ياصديق عيال صالح كامل


قال درويش اقول بس وش طيارته خلينا نروح بالسياره..الطيارات مشكلتها مشكله

السياره لين صار حادث ممكن تنكسر يدتس والا رجلتس

ولو صار الحادث شين وتقطعتي ومتي بيلقون من جسمتس شي يقبرونه

لكن الطياره لين طاحت والا نفجرت قسم ان مايبقى من جسمتس لو عظيمن واحد

هيله وهي مرتاعه من كلامه قالت بسسسس خلاااص

بسم الله علي الرحمن الرحيم فاااال الله ولا فالك ..

وش ذا يا درويش حرام عليك تفاول علي في صباحية عرسي

قال درويش لا اتفاول ولا ات بلنتي ..

وضحك درويش على مصالته وقعدت هيله تبتسي...

قال درويش لا تبتسين انكت عليتس .. خلاص عاد يا هيلتي..

خلينا بس نروح على الكامري حق ولد عمي ..وش زينه توه مصلحن فرامله ومغيرن الاستبنه

قالت هيله بصوت يبكي بدلع وغنج ..لا حبيبي خلينا نروح في الطياره علشاني؟؟

درويش سمع كلمة حبيبي من الخقه بغى يخمها

قالت درويش استح ترانا تحت في المجلس

قال ايه صح نسيت..اللي تبين اسويه لو تبيني اروح لجده في قنبله رحت..



رحلتهم كانت في الليل ويركبها في الهايلكس ويطلعون من حي الفواز الساعه 8

وما وصلوا للمطار الا 10 لبعد المسافه وزحمة الطريق

وهم بينهم وبين المطار 4 كيلو ..

قال درويش :

لو انتس مخليتنا نروح بالكامري كان ما باقي على مكه الا 7 ساعات

قالت يا درويش يا حبيبي عروس وبتمسك فيني خط 10 ساعات

درويش سمع كلمة حبيبي ويخق و يفلت الدركسون ويخمها

وينحرف الهايلكس عن الخط وينزل مع التراب ويقعدون يختبصون

وفي آخر لحظه سيطر على السياره ووقفها

يوم التفت على هيله لقاها متشقلبه ..رجولها على مرتفعه على ظهر المرتبه وراسها تحت وتبتسي

يوم شافها درويش بذاالوضع ..قال اقول وش رايتس نرقد فيذا ونسافر الصبح؟؟

قالت وهي تبتسي وتشاهق ..دروييييييييش رجعني لاهلي مابي لا جده ولا مكه

ويقعدها ويتأسف منها يوم ارتاحت شوي من الروعه وهدت قالت

خلاص امش خلنا نلحق على الرحله


يوم وصلو المطار صارت هيله تمشي كن فيها كساح مما جرى لها من درويش وشفاحته

كان ابوها مجهز لهم كل شي بس يروحون للبوابه ..وصلوا للبوابه وكان الركاب بدوا يدخلون


قال درويش لهيله..واااااوك يا كبر باب الطياره كبراه مهوب تسنه اللي نشوفه في التلفزيون

قالت هيله: هذي بوابة المغادره توك ما وصلت للطياره..

ويوم دخل للطياره حجزهم على السياحيه وهووراح وقعد في مقاعد الدرجه الاولى

وهيله متفشله وتناديه ..

قال تعالي انتي وتروح له تخاف صوتها يطلع..قالت تعال مقاعدنا هناك..هذا للي حجزهم درجه اولى

قال قولي والله؟ تصدقين اني شفت الستار احسب هذا قسم العوائل واللي ورا للعزاب

ويدرعم وراها ويروحون لمقاعدهم.. هيله قعدت جنب الشباك .. ويوم ركبوا الركاب وقفلوا الباب

شوي ويقول درويش: يا صديق يا محمد .. ينادي احد المضيفين ..وكنه ينادي عامل في فوّال القرموشي

جاه المضيف قال سم وش تبي؟

قال درويش ابد وانااخوك بس كم بقى ونوصل؟

قال المضيف ياخوي انت توك في الرياض الطياره واقفه ما بعد تحركت ..

يوم تحركت الطياره وسمع دعاء السفر وقالوا اربطوا الاحزمه وطفوا اللمبات يوم بدا درويش يرتجف

واسنانه تقرقع لين ولعوا اللمبات اول ما ولعوها وفك الحزام

وينادي المضيفه مثل ما ينادي ممرضات مستشفى الشميسي: سستر سستر ..

جت المضيفه قال لها ..شوفي لي الدرب بروح اطير الشراب..

المضيفه شافته يرتجف ويقول شراب راحت جابت له الشراريب والبطانيه

حقت الرحلات الدويله حسبته ماكله البرد

المهم قامت هيله وعلمته مكان الحمام واعطته احرامه علشانهم بيمرون الميقات..ودخل الحمام

طبعا خبص الدنيا في حمام الطياره وكتبوا عليه استخدم الحمام الاخر

ويتوضأ ويلبس احرامه ويطلع بكشّته محيوسه كن طابن فيها قطو

وصلوا جده وصار ابوها حاجز لهم سياره من احد الشركات في المطار

وبعد حاجز لهم في فندق هناك واخذوها وراحوا مكه

وطبعا هيله هي اللي تدله على الطريق لانها تروح كثير مع اهلها من جده لمكه

واعتمروا ورجعوا جده..وراحوا للفندق ..

وبعد ماناموا وارتاحوا من بكره



قالت هيله درويش :انت وعدتني تخليني اغير الاشياء اللي ماتعجبني

فيك وانا لوفيه شي موعاجبك فيني علمني

قال دريش اماعاد فيتس شي ما اعجبني انا لولا الخوف من الله كان قلت انتس من الحور العين

هيله تشققت على المدح وعلى كلامه اللي طالع من قلبه بصدق لانه بقلبه على لسانه

قالت ياحبي لك يادريش بس خلك مكانك ..

طيب اول شي انت مملوح بس تحتاج اعادة ترتيب اوراق وجهك

تهذيب شنبك , حلاقة شعرك , تغيير انواع ملابسك ..وهذا بنبدا فيه من اليوم

قال انا موافق على اي شي بس تعالي خل نرقد شوي

قالت وش نرقد تونا صاحين بنطلع نتمشى ونبدا خطة التغيير


طلعوا وراحوا لسوق فيه حلاق دخل دريش ودخلت معه كان حلاق مصري منسم

اول ماقعد دريش على الكرسي شاف الحلاق شنبه وكثافته قال :

انت عاوز شنبك شعر والا دئن(دقن)

قالت هيله خففه كثير وحدده ولاتحط سكسوكه(تعقدت من اهل السكاسيك)

واعمل له تنظيف وجه كامله واحلق شعره بشكل مرتب وانا بآخذ لفه وارجع اشوف اللوك الجديد

قال المصري : حاضر حترقعي مش حتشوفي الاستاز درويش حتشوفي هاني سلامه

يلعن بلبسه مصري يا تسذبه..

وراحت هيله تتمشى في السوق ..





قال المصري لدرويش قبل ما احلق لك ايه رأيك اغسل شنبك بشامبو وبلسم وكمان

شعرك قال درويش سو اللي تبي ..

وهو يغسل شعره قال المصري :

مالو شعرك لونو غريب كداه وناشف والريحه بتاعتو زي ريحة الاطباق.؟

انت ياباش مهندس بتغسبل شعرك بفيري ؟

درويش سافهه لانه متنح وتفكيره متى بيرجعون للفندق ويرقدون


غسل شعره وحلقه حط له سوالف خفيفه وحدد شنبه ورتبه وعمل له تنظيف ليزر وبخار

وجميع انواع الصنفره وكريمات التنزيف اللي في المحل نصها راح في خشمه والباقي في وجهه
وم رجعت هيله



شافت درويش بعد تغيير اللوك قالت الله الله وش ذا الزين تصدق ماعرفتك

وهي بكّاشه عارفته وهي في السوق

قال حتى انا ماعرفتني وتطاقيت مع المصري قلت له يا ساحر يامجرم ليه تسخطني لبناني

قالت يخسي اللبناني عندك

وقعدوا في جده اسبوع ورغم ان جده شايفتها هيله الف مره

لكن كان يتمشى بها وهو مبسوط وكنه موديها لجزر هاواي

واصلا هي اللي موديته و اصلا اول مره يشوف جده

بس كانت هيله مبسوطه كثييير وتقول يكفي انه يشوفني اجمل بنت و اوب يزعلني

ويسوي كل اللي ابيه..

راحت به لمطاعم وكم كوفي شوب و فشلها لين طاح وجهها



اول مطعم راحوا له كان لبناني قبل يدخلون قالت هيله اسمع يا درويش :

اذا دخلنا نروح نجلس على طاوله ولا تقعد تقول محمد محمد

اصبر هو بيجيك واذا خلصنا اكل بيجيب لك الفاتوره نحط فيها المبلغ ونمشي اوكي ؟

قال طيب

طلت له عصير كيوي


والمقبلات المعروفه كبه وحمص وورق عنب


وطلبت له حريره

و الطبق الرئيسي صياديه


وجمبري مشوي..


( وكن ذا المشفوح محتاج زود جمبري )


اول ما شاف العصير وشربه قال والله عصيير ذا الجرجير وش زينه

قالت هيله هذا عصير كيييييوي

قال درويش هاااااااااااااااه الله يخزيهم على ذا الاسم ويقعد يضحك

وماسكت الا يوم شافها معصبه..

قالت: تعرف وشو الكيوي؟

فاكهه اسمها كذا .. وخلاص تراني طاح وجهي عند الناس



يوم شاف الكبه قال ورا فلافلهم تسنها قنابل الله يكفينا الشر

يوم جاب الجرسوين الحريره..ناداه وقال الله لايهينك ماعندكم خبز حار؟

قال تكرم عينك ولو..موجود خبز حار

قالت هيله وش تبي فيه؟

قال بغط على ذا المرقه

يوم جابوا الجمبري والصياديه قال وش ذا جراد؟

ورا رزهم محترق تسذا؟

قالت درويش كل وبيعجبك


وتوه رافعن كمومه قالت درويش لا تاكل بيدك شف وش اسوي ووسوي مثلي

المهم انها علمته كيف ياكل في مطعم..

صح انه شرب العصير بدون مزّاز و في جغمه وحده كنه شراب كحه

و صح ان نص الصياديه في شدزه ..

وصح انه يرفع حبة الجمبري ويفكفكها كنها يصلح رادو


لكن اهم شي طلع من المطعم يعرف شي اسمه شوكه


يوم طلعوا قال يازين ذا الجراد بنجي نفطر عليه باتسر..



وبعد كم عشوه في مطاعم مختلفه تعلم نظام المطاعم وصار يحبها

وفي يوم راحوا للبحر قبل الغروب وقربت هيله جنب الشاطئ

وصارت ترمي بحصيات صغيره في المويه على شان تسوي دوائر,,, مهيب بسيطه الروماسيه

شافها درويش وجا بيقلدها وجاب حصاة كبر راسه ودبج بها على المويه لين طششت على ملابس هيله



عصّبت هيله وقالت : ليه سويت كذا؟

قال بسوي مثلتس وبسمع الصدى؟

يحسبه ذابن الحصاة في تزليب(بئر)



وفي لحظات الغروب قالت هيله :

درويش.. شفت منظر الغروب على البحر يجنن ؟؟ ..


..وش يعني لك يا حبيبي؟

قال يعني لي انه بيذن المغرب الحين ..يالله مشينا نرقد..


هيله خنقتها العبره..

وقالت انا المهبوله اللي مصدقه عمري ان ذا الدبشه بيصير ومانسي

وبعدين فيه احد ينام المغرب؟

قال ما راح نوصل الفندق الا بعد صلاة العشاء واذا جا العشاء يالله يمدينا نرقد


والله من الشفاحه يا درويش





ورجعوا للرياض وبدأت حياتها الجديده في بيت عائله مختلفه بعاداتها وتقاليدها عن عائلتها

عائله بسيطه جدا في كل شي لكن واجهت هيله صعوبه في التعايش معهم

بسبب تعودها على اسلوب حياة معين في نومها وصحوتها

فمثلا تكون هيله نايمه الصبح الساعه 9 وتجي خالتها تطق غرفتها تقول

تعالي تقهوي معي عندي ام غازي جارتنا

وانها ما تمشي في بيتهم الا بشرشفها علشان اخوان

وكذلك ماتقدر تعزم صديقاتها لان ظروف بيت اهل درويش ماتساعد

لكنها حاولت تستغل السنه الاولى في محاولات تغيير درويش شكلا ومضمونا

واخذت من ابوها مبلغ يساعدها في تنفيذ خطة التغيير والتجديد(القناة الاولى مهوب زوج)

فأول شي طلبت منه يرمي خلاقينه كلها وراح مع اخوها وودله على خياطين علشان يفصل

ثياب كشخه وخلاه يشتري شمغ وغتر وجزم على ذوقك يا فهد

وراحت هي واشترت له ملابس نوم

واللي منها فنيله كت وشورت قصير يوم لبسها وشاف نفسه مات ضحك وقال

الله يقطعتس يا هيله احس اني داشر

وصارت هيله تداوي شطوب رجليه وما خفت الا بعد ماقعدت 21 يوم

كنت تخمرها بكوكتيل فازلين وفلاش حق جلي البلاط

وتغسلها بمويه حاره وملح وصابون تايد مبيض

وبدات ملامح التحسن تظهر على شكله ومظهره

وما اكتفت هيله بهذا لا اخذته لطبيب اسنان علشان يصلح اسنانه



قبل يفتح درويش فمه قال الدكتور :

انا ممكن انظفها وابيصها شويه واعالج المتسوس منها

لكن اني اعدلها واعمل لها تقويم أهو دا اللي مش ممكن ابدا



وعالج اسنانه وبيضها ولمعها ...وبعد مجهود كبير من هيله استمر سنه

في محاوله لتغيير درويش ..صار دريش شخص آخر شكلا بعد مجهود كبير

وصارت هيله ماتخليه يطلع الا هي اللي مجهزه ملابسه ومتأكده من مظهره

اما مضمونا فمازال على طفاقته واسلوبه ورجته

هيله بدت تتعود عليه وتتقبله خاصه انه طول السنه ما غلط عليها

ويحبها ومازال يشوفها من الحور العين هههههههههه

ودايم معها ومن الساعه 9 وهو في الغرفه عندها ..شكله يحسب الدعوى دوام

وكان يوديها لاي مكان تبيه حتى الفيصليه اللي اكتشف انه مهوب وكر دعاره

صح يوديها بالهايلكس وصح ان يدها اليمنى طلع فيها عضله صغيره من كثر ماترفع وتنزل القزاز العادي

وصح ان امه وخواته يلزقون معهم احيانا وتركب امه قدام وهي ورا

وتنقهر وتقول هايلكس قرنبع وورا بعد

لكن كانت الى حد ما مرتاحه نفسيا مع درويش

رغم انها تواجه صعوبات في التأقلم مع بساطة تعليمه واسلوبه ودفاشته

لكن ظلت المشكله الاكبر هي السكن مع اهله

وعلشان راتب درويش بسيط صار من الصعوبه الاستقلال عن اهله

وبعد مرور سنه ونص صارت ام درويش تزن عليها تبيها تحمل

و بدت هيله تتضايق من ذا الزن لانها ما تبي تحمل لين تتاكد من استمرار حياتها مع درويش

لانها متضايقه من العيشه مع اهله و كثير تنام عند اهلها

درويش ضاق صدره من تغير هيله و صار يحاول فيها تستحمل شوي لين الله يفرجها

وترجع وتقعد كم يوم وتطفش وترجع لبيت اهلها





لاحظ ابوها ذا الشي وسألها وعلمته بالاسباب قال :

يابنتي اللي ساعدك تغيرين شنبه بيسهل امر استقلالكم

(قاهره ذا الشنب)

واذا انتي مرتاحه معه وماشفتي منه الا كل خير انا بساعدكم وبسكنكم في شقه في العماره

اللي نأجرها صح صغيره بس احسن من وضعكم

وبأجركم الشقه بإيجار رمزي ب 8000 في السنه

علشان ما اجرح مشاعر درويش اني مسكنه انا ..

مع اني من شفت شنبه وانا متأكد ان ماعنده مشاعر..

( بقي ان تعرفون ان سبب حقد ابوها على شنب درويش لانه ماكان يطلع له شنب)
وافق درويش وسكنوا في الشقه واستقلوا عن اهله

وانبسطت هيله واقتنعت انها تحمل من درويش ..وبعد شهرين من الانتقال لشقتهم حملت هيله

يوم علمته انها حامل فرح كثير..بعدين قعد يفكر وكن فرحته خفّت شوي

وقال :

الحين لازم الحمل يكون 9 شهور؟ ولين ولدتي لازم تقعدين عند اهلتس 70 يوم مثل خواتي؟

قالت الحمل ايه 9 شهور لكن النفاس اللي اعرفه انه 40 يوم


(كانوا ازواج خواته يتركونهم 70 يوم عند اهلهم يبون الفكه من خششهم)


قال يقطع ام الحاله وشلون بصبر ؟؟

ما عاد اعرف ارقد بدونتس.. ليتتس ماحملتي

سفهته هيله لانها عارفتن شفاحته ودباشته..



وفي فترة الحمل تغير شكل هيله كبر خشمها واسمرت وزاد وزنها

وصار درويش يتطنز عليها

يقول الله يا الدنيا عقب ماكنت اقول انتس من "الحور العين "

الحين لين شفت خشمتس وكرشتتس قلت " الله يعين"

قالت الكرشه تراها ولدك والخشم بعد الحمل يرجع لشكله وكذلك اللون

وبعدين ماشفت خشمك قبل تحكي ؟




جت ليلة ولادتها ووقالت لاخوها يوديها بسيارتها لانها ما تثق في سيارة درويش

وتقول أوب رايحه فيها.. اللي طفت يوم الخطبه وش بيضمني لو اروح فيها يوم الولاده

ما تكون ولادتي في سطحه؟؟

وراحت معها امها...


وهي في غرفة الولاده كانت تصيح وخايفه قامت امها تهديها وتعلمها ان كل الحريم يجربون

تعب الولاده ومع ذلك يحملون اكثر من مره و يولدون

قالت هيله انا ماخفت من الولاده

انا اصيح خايفه من اللي يجيني من ذا الثور بعد ما اطلع من النفاس

امها كشت عليها وقالت جعلت مانيب قايله وانا ظنيتس خايفه من الولاده


كانت هيله خايفه مولودها يطلع على درويش لانها حلمت انها جابت ولد له شنب ..

ولدت هيله وجابت توأم ولد وبنت

يوم جابوهم لها كان شكل الولد اجمل من ماتوقعت هيله

كان خشمه اصغر مناخر من ابوه وعيونه عاديه وابيض

وله شعر كثيف وماطلع له شنب اظن ان تفسير حلمها ان الشنب هو البنت ( تكفى يا اها بس ابن سيرين)

اما البنت فطلعت تشبه امها..

وفرح فيهم درويش وابوها وامها


وقال درويش : البنت سميها اللي تبين وانا بسمي الولد مبارك على ولد عمي اللي سلفني 3

آلاف رجالن حبيب وماعليه راتبه 4800 غير اللي يجيه من تجارته في الشروخه

قال ابوها ياجعلك الشرخ اللي يقبع في شنبك انت وولد عمك مبارك وزير البنتاجون

قال درويش : اجل وش اسميه ياخالي؟

اسم ابوي عوّاض شين

اجل بسميه عليك ياخالي عبدالله

طاح وجه خاله وحضن درويش وقال على كثر ماعصبت عليك

الا انك ماحقدت علي والله ماشفت اطيب منك قلب انت وشنبك

وسماه عبدالله

وسمت هيله البنت شاهيناز

وضحك درويش على الاسم وقال : اجل بدلعها شاهي تلقيمه ..

هيله قعدت تسكت البنت لانها تبكي من ذبّة ابوها


وكانت هيله فرحانه فيهم وصارت تقضي اغلب وقتها مع عبودي

ومع بنتها شاهي تلقيمه

حتى النوم معه بدت تنشغل عنه لانه صار ينتظرها وينام قبلها

وهي مشغوله بتوأمها او بالتلفزيون او النت او تكلم امها

ومع انشغالها عن درويش حتى حماسها في الاهتمام بلبس درويش ومظهره بدا يتلاشى

ولانه معتمد عليها في الاهتمام بمظهره وشكله ولبسه


بدا شنب درويش يرجع الى قواعده

وبدت شطوبه تشق طريقها الى قدميه

ورجع ينام في فنيلة دروش وصروال الدفه


وبدأ هو يتذمر من تغيرها عليه واهمالها له..

وبدأت هيله تتذمر من عدم اهتمامه..

لكنهم سرعان ما يرجعون يعاتبون بعض ويتصالحون.. وترجع هيله تهتم فيه وفي شكله ولبسه

ويرجعون يختلفون وتهمله هيله ويهمل نفسه ويتضايق منها ويتصالحون مره ثانيه

وهكذا..استمر مركب حياتهم الزوجيه يواجه الصعوبات

لانه يجمع بينهم الموده والرحمه والاطفال

هو يحبها جدا .. وهي تحب طيبته وتأقلمت مع بساطته ههههههههههه

ومرتاحه من تعامله معها


النهاية
__________________
Just the fact that some geniuses were laughed at does not imply that all who are laughed at are geniuses. They laughed at Columbus, they laughed at Fulton, they laughed at the Wright brothers. But they also laughed at Bozo the Clown.
(Carl Sagan)
منفى الكلمات غير متواجد حالياً   رد مع اقتباس
قديم 04-12-2011, 07:29 PM   #4
حبه سكر ناعمه
عضو بارز
 
الصورة الرمزية حبه سكر ناعمه
 
تاريخ التسجيل: Sep 2010
الدولة: حيث ما كنت أنا
المشاركات: 666
معدل تقييم المستوى: 0
حبه سكر ناعمه is on a distinguished road
افتراضي

أفا عليك نظري عشره على عشره
ويعطيك العافيه مقدمآ ونبدأ مشوار
القراءه بسم الله
__________________
حبه سكر ناعمه غير متواجد حالياً   رد مع اقتباس
قديم 04-12-2011, 08:04 PM   #5
حبه سكر ناعمه
عضو بارز
 
الصورة الرمزية حبه سكر ناعمه
 
تاريخ التسجيل: Sep 2010
الدولة: حيث ما كنت أنا
المشاركات: 666
معدل تقييم المستوى: 0
حبه سكر ناعمه is on a distinguished road
افتراضي

الله يقلع بليسه وربي ضحكت
من صمصومة قلبي
وحرام عليك تقول البارت طويل
تخليني استانس ومادريت إلاوانا
أقول النهايه
لكن بصراحه كاتب روووعه
ويعطيك الف عافيه وعافيه
وكل مره تأخر بالظهور عشان
تتحفنا بجديدك المميز وترانا بانتظاره
لاتقول آخر شيء
تحياتي لك ولقلمك المبدع
__________________
حبه سكر ناعمه غير متواجد حالياً   رد مع اقتباس
قديم 04-12-2011, 08:44 PM   #6
منفى الكلمات
مشرف
 
الصورة الرمزية منفى الكلمات
 
تاريخ التسجيل: Feb 2008
المشاركات: 8,095
معدل تقييم المستوى: 0
منفى الكلمات will become famous soon enoughمنفى الكلمات will become famous soon enough
افتراضي

حبه سكر
هههههههههالا بالله طوويل
وشرفني مرورك وانتظري جديدي وان شاء الله يكوون قرييب
__________________
Just the fact that some geniuses were laughed at does not imply that all who are laughed at are geniuses. They laughed at Columbus, they laughed at Fulton, they laughed at the Wright brothers. But they also laughed at Bozo the Clown.
(Carl Sagan)
منفى الكلمات غير متواجد حالياً   رد مع اقتباس
قديم 05-12-2011, 06:24 PM   #7
أبوسليمان
مشرف منتدى الأعضاء الجدد و التواصل
 
الصورة الرمزية أبوسليمان
 
تاريخ التسجيل: May 2010
الدولة: الرس
المشاركات: 28,404
معدل تقييم المستوى: 0
أبوسليمان is on a distinguished road
Talking الله يـسسسسسعـدكـ

هههههههههههههه

الـصـرآآحـه مـوضـوع فـي قـمـة الـرووعـه

سـلـمـت يـدآآآك يـ الـغـآآلـي

ونـنـتـظـر جـديـدكـ
__________________
سبحان الله وبحمده ... سبحان الله العظيم
أبوسليمان غير متواجد حالياً   رد مع اقتباس
قديم 05-12-2011, 07:17 PM   #8
الجوهرة
عضو فذ
 
الصورة الرمزية الجوهرة
 
تاريخ التسجيل: Jul 2008
الدولة: في بيتــــــــــــــــنا
المشاركات: 7,833
معدل تقييم المستوى: 0
الجوهرة has a spectacular aura aboutالجوهرة has a spectacular aura aboutالجوهرة has a spectacular aura about
افتراضي

مااقول الا ياحظتس الاقشر ياهيله

لي عودة لتكملة القصه ووش صار لهم
الجوهرة غير متواجد حالياً   رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 03:50 PM


Powered by vBulletin® Copyright ©2000 - 2019, Jelsoft Enterprises Ltd. TranZ By Almuhajir