عـودة للخلف   منتديات الرس اكس بي > منتديات الرس اكس بي > المنتدى العام والمواضيع المتنوعة
التسجيل الأسئلة الشائعة التقويم تعليم الأقسام كمقروءة


المنتدى العام والمواضيع المتنوعة الموضوعات العامة والمناقشات والحوارات الهادفة، والتي لا علاقة لها بأقسام المنتدى الأخرى.

إضافة رد
 
LinkBack أدوات الموضوع طريقة العرض
قديم(ـة) 03-08-2013, 06:57 AM   #1
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough
Thumbs up صور إفطار جماعة مسجد صلة بن أشيم لرمضان 1434 هـ

حفل إفطار مسجد صلة بن أشيم وترامس الشاي اللي زحلطن

تغطية فطور مسجدنا صلة بن أشيم....وظهور السعلو

افطار جماعة مسجد صلة بن أشيم

افطار مسجد صلة بن أشيم بحي القادسية ..صور

بسم الله الرحمن الرحيم والحمد لله رب العالمين ...
الروبط أعلاه لإفطارات سابقة لجماعة المسجد..
مسجدنا الجميل ومسجد حارتنا الجميلة كعادته السنوية كل أبودايم أقام هذا العام الإفطار الجماعي لجماعة الحي للعام الخامس بس مهوب على التوالي ..عام 1433 الظاهر ما أحد أفطر به جماعيا ... الواحد ماوده يقول انه كانت سنة حزينة علينا .. هوشات ومضاربات الله لايعيده .. ماتقولون ان صخر الفلاح فلق صالح الخليفة وقام أبوصالح الخليفة من القهر ومسك صخر وعلقه بمنارة المسجد بعد صلاة الظهر وكان أبوسليمان أنت يا أبو صخر بالدوام ..ويوم جا الساعة 1 ونصف وإلا ياحول صخر معلق فوق ويصيح وسعابيله تنقط على الأرض ...ومير أبوسليمان العمدة يفتن ويعصب
عاد أبوسليمان إذا عصب عادي يهدا بعده على طول ..خدعتكم تحسبونن أبقول مايوقف بوجهه أحد
نزل صخر من المنارة واتجه للشرطة ويوم وصلهم قالوا الشرطة ناقلتن للمبنى الجديد قال لهم إيه بس للحين ما خلص مبناكم الجديد وهذاكم هنا ..؟؟
قالوا له الموضوع هذا متى يبي ينزل ؟
قال بإفطار عام 1434 هـ
قالوا له يعني برمضان عام 1434 ؟
قال نعم
قالوا له أجل بهكالوقت نكون ناقلين .. أقنعوه ورجع البيت وصخر ياحول طول الطريق مغير يصيح .. ياوليدي خلاص أنا أباخذ بثارك منهم .. وبس يصيح .. ياوليدي أبحط لسياراتهم سم بس إسكت خلاص تراك لجيتن وبعز هالحر .. وماش مازال صخر يرغي رغيان آخر شي أبوسليمان مر بقالة القادسية وشرى له فشفاش حق بطاطس وعصير وقال ان ما خليتهم يندمون ما أكون أبو سليمان ...عاد أبوسليمان مسك أبو صالح عقب صلاة العصر والجماعة هدوهم وصارت لجة الله لايوريكم ...عقبه صار أبوسليمان يجي للمسجد للصلاة وهو متلطم عشان ما أحد يعرفه ..السالفة طويلة ماقلته لكم كله
والواحد ماوده يقول شي يخاف الجماعة يزعلون وتخبرون يعني
المهم مالكم بالطويلة نخش على إفطارنا المبارك ...
قبل نخش لابد ماتاخذون نبذة عن حارتنا ...النبذة تلقونه بأحد تقارير السنوات الماضية مشتمل على معلومات عن موقع الحارة وحدودها ومعلومات إقتصادية وجغرافية وأهم الصادرات والواردات وغيره كثير
مالكم بالطويلة ... هالسنة وحسب تقييم الخبراء يعتبر الإفطار ناجحا لعدة أسباب
أولا عدم حضور أبوهاني الفريدي ... أمزح طبعا العكس تماما ... نقول أسباب نجاح إفطار هالعام يتلخص بما يلي
أولا التنظيم الدقيق والطحين الجيد
ثانيا الإلتزام والتنفيذ
رابعا الشغف ... لاتقولون الشغف وش سنعه سمعته بدعاية
سابعا القلوب الطيبة المتحابة والجيرة الحسنة الحمد لله ...والله اني أبفقد هالحارة إذا نقلت منه ... يقولون هذي سنة الحياة ... لكن وش أسوي .. وراي عمارة ..وتخبرون اللي يعمر يفلس ..وناوي أستاجر استراحة من أمهات 8 تالاف وحوله
ويعني كان تبي تعاونونن على العمار مالكم إلا الأجر واللي مستحي أو يبي يكون أجره أكبر يطلع شريحة بدون اسم ويرسل رسالة على جوالي عشان أكز له رقم الحساب .. وياليت ما أحد يحول أقل من 10 آلاف ريال .. ترانا محناب نشحذ
ماعلينا عجزت أبدأ اللهم عافنا
بسم الله نبدأ
هذا العام افتقد لوجود أبوهاني الفريدي حبيب الكل وصاحب الابتسامة الجميلة....ولكن العذر له فقد كان لديهم ظرف صحي يستدعي سفره ذالك اليوم .. تحية وتقديري لك يا أخي الكبير فلك مني كل تقدير وإن شاء الله رمضان القادم تتقدم الجمع والجميع بصحة وعافية

وفي الليلة الظلماء يفتقد البدر...صورة لأبي هاني ومعه أبا سليمان يداعبه في إفطار سابق
أيضا لسنوات ونحن نفتقد لأبوناصر عبدالله الزيادي لوجوده في مكة المكرمة كعادته السنوية جزاه الله خير
ولاننسى الجار العزيز أبوناصر المطيري فهو هذا العام لم يحضر من الكويت الشقيقة ..تمنيت وجوده عشان ناكل بلاليط
ونخي ورهش ... يمكن البعض يحسب هذي أسامي فراعنة .. لا ترى البلاليط هذي المكرونة ..والنخي والرهش مثل الطحنية عندنا .. طبعا عند أهل الكويت الكرام هالتسميات
هذا العام أيضا تميز بتشريف ثلاثة من الجيران الجدد فأهلا سهلا بهم
هذا الموجز وإليكم الإفطار بالتفصيل
__________________

آخر من قام بالتعديل هزيم الرعد; بتاريخ 04-08-2013 الساعة 12:54 AM.
هزيم الرعد غير متصل   الرد باقتباس

 
قديم(ـة) 03-08-2013, 07:27 AM   #2
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough
لايخفى على ذي لب بأن التعليق سيكون تحت الصور وليس فوقها .. إلا هم وراهم سموه لب ؟



العمدة دائما هو السباق للعمل والإيثار .. من العصر باكرا يقوم بتجهيز المكان حتى ما إن يحضر الجميع إلا وقد أصبح جاهزا مجهزا ما مثلهو



غسل المكان أولا ومن ثم .. الخطوة التالية .. والإفطار طبعا في مضمار حديقة حارتنا ..هذه الحديقة التي أضافت للحارة الكثير من الزخم والحركة فصار فيها حركة ونشاط بعد خمول .. ولكل شي سلبيات



أبوسليمان وصخر ..وشوفوا صخر باين عليه انه كان العام يتدودل من المنارة ..ومعهم لعامل الله يعافيهم يقومون بالمهمة كما يجب وأكثر



وحضر أبوخليفة ليتابع عن قرب مجريات الاستعدادات مطلقا ضحكة مدوية وبعدها قال والله يانتم مكلوفين ...



يداعي تدعكان وتدعكان كل هذه الصحون



مادرينا إلا يوم وقف راعي كرسيدا فوقها سلة ورابط به سلم وحاط على المراية عنقود عنب بلاستيك والتمثال بنت البكار ونزل وقال انتوا بتعملوا إيه
قلنا له فيه افطار جماعي لجماعة المسجد ونجهز للمكان ..
قال مش من المرقلة اني ما أساعدكومش ... قلنا حياك الله وافطر معنا تراها ساعتن مباركة قال أمال أنا حساعدكو عشان سواد عيونكو ؟ عشان الفطار ولبس طاقيته ونزل يساعد



وقام يشيل شيلات ...يقول
ياركبن من عندنا فوق ثنتين .... وحدتن استبنتها تحت ووحدتن استبنتها بالشنطة ... احقوا وشو ؟
احقوا = احجوا ...
قلنا له ترى مهوب وقته ... شتغل وأنت ساكت



وتستمر التجهيزات على قدم وساق



سليمان القعيد يمشي متقدما للمساعدة بارك الله فيه .. حي الله سلوم



وفجأة حضر أبو محمد الحوشاني وقال لي عساك هالسنة تبي تصور زين ؟ ترى العام مصور حذياننا أكثر مننا حنا ... عاد أنا أبدا ما تفشلت ولا انقطع وجهي .. أصلا عادي
__________________
هزيم الرعد غير متصل   الرد باقتباس
قديم(ـة) 03-08-2013, 07:48 AM   #3
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

عزام وهو بالمناسبة حفيد العمدة ..حضر ولسان حاله يقول
ومانحن إلا قوم ..عندما تقام المناسباتو نفزعوا
عز الله انك شاعر يالذيب وصح لسانك


من اليمين أبوصالح الخليفة الذي قد تهاوش مع العمدة ..والعقيد عبدالله المطيري أبويزيد مدير شرطة النبهانية والجار الجديد أبوعبدالرحمن المطيري ياهلابه ..ويظهر بالخلف الشيخ أبوسليمان القعيد


صورة تغني عن التعليق ... تكاتف وعمل دؤوب وجو أخوي بمحبة وإخاء << هماه تغني عن التعليق ؟


صورة إبني وصورة واحد خلفه يشبه له ...أكيد يشبه له ..واحد مايقرب له طبيعي يشبه له


يبي يأذن وأنتم الله يجزاكم خير تجهزون ..تسمعون بالعمل لجماعي


أبو أسامة الخليفة ومعه الأشبال حفظهم الله


سليمان الفلاح ولد العمدة ..وهذا الشخص ماشاء الله عليه دوامه على كيفه ..مرة يروح يداوم بالرياض مرة بالرس .. على حسب التصنيفة
الصراحة ما قصر أبوفلاح عافاه ربي


أحمد القبلان


طلعت عليهم الشمس الصبح وهم يرتبون


طبعا العمدة موزع المهام على الجميع أحد يجيب قهوة أحد شاي أحد فطاير أحد سمبوسة وهكذا ..وهو هنا هو ومحمد يدققون على الطلبات
أحس ان محمد يقول شف هذا قايلين له جب سمبوسة لحم وجايب دجاج السنة الجاية لاتقولون له يجي
__________________

آخر من قام بالتعديل هزيم الرعد; بتاريخ 04-08-2013 الساعة 06:12 AM.
هزيم الرعد غير متصل   الرد باقتباس
قديم(ـة) 03-08-2013, 05:23 PM   #4
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

أسامة الخليفة وبسام الخليفة وقد أحضورا معهم ما خف وزنه ولذ طعمه يامال العافية


يبدو لي انه مر العصر التالي وحنا نجهز ..


ويبدو في الصورة الجار الجديد أبونمر المطيري فحي هلابه


وهنا في منتصف الصورة يظهر أيضا الجار الجديد بدر البدراني


وشاركتنا عدة جاليات من 33 دولة


أما هذه الشعيرية بالبيض البلدي فهي من بيت أبوعبدالله الشبانات .. لذيذة ماشاء الله .. أنا مستحي ما أكلت منه إلا 9 صحون وإلا كان ودي آكل أكثر يامال العافية والله ...وودي أقول لأبوعبدالله ترى عادي لو تكزون لنا منه لكم يوم


الحبيب متعب فلاح العبدالله الفلاح مرحبا بك ياولد جيراننا ..ويظهر خلفه أخوه عبدالله يتابع أخبار فريقه المفضل ..وفريقه هو أبوجلمبو البوليفي


صورة احترافية جميلة قبيل الغروب لفيصل وعبدالله القبلان ...


على وشك الإفطار اللهم أدم علينا نعمك ظاهرة وباطنة


الغالي عبدالمجيد الخالد البطي ونظرة تأمل جهة غروب الشمس بمعية خالد الحوشاني
__________________

آخر من قام بالتعديل هزيم الرعد; بتاريخ 04-08-2013 الساعة 06:17 AM.
هزيم الرعد غير متصل   الرد باقتباس
قديم(ـة) 03-08-2013, 05:38 PM   #5
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

عبدالرحمن الخليفة نجل أبوريان رئيس البلدية ..وأحس انه يتوعدن بهالصورة


وهنا لحظات وصول الغالي أبو وليد البطي .. الأستاذ خالد البطي صاحب مكتب القادسية للعقار ..


تعبت من رفع الصور وهو للحين ما أذن


هانت ...الجماعة جلسوا استعدادا للفطور


أذن والجماعة بدأو الفطور .. أما أنا فأخذت تمرة وجلست أكمل التصوير مسوي روحي ماهمن ولا شي ..


ياحظك ياصديق أنتا فيه فطور وأنا ما فيه فطور .. لازم أنتا بعدين معلوم صور صور تشك تشك


العربية الظاهرة بالصورة عليها سحب آخر أيام رمضان .. فل كامل


بالعافية ياعيال حارتنا الحليلين ...تقبل الله منا ومنكم الطاعات


ويظهر يسار الصورة الغالي مهند الخالد البطي ومحمد الفلاح ولد العمدة والعقيل وسليمان القعيد
__________________

آخر من قام بالتعديل هزيم الرعد; بتاريخ 04-08-2013 الساعة 12:37 AM.
هزيم الرعد غير متصل   الرد باقتباس
قديم(ـة) 03-08-2013, 05:57 PM   #6
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

من اليمين مهند البطي وياسر العقيل ويوسف القبلان وعبدالعزيز العقيل


عبددالعزيز العقيل والشيخ أبوسليمان القعيد وأبوعبدالعزيز العقيل


الأشبال حفظهم الله


بالعافية


يبدو أن سليمان الفلاح لاحظ علي اني جالس أصور وأتلمض ..غمس لي تمرة بالقشطة وعطان إياه .. يامال العافية


جارنا الهوسة ..وأبوأسامة الخليفة وخالد القبلان ..جارنا الهوسة لو رايح ومفطر بفندق أتلانتس بدبي كان مع التذاكر والإقامة أرخص له ... طالبين منه 20 قشطة و 50 زبادي ... تسيف تجيبهن الله يصلحك .. يبي لط تدين ددسن


خالد القبلان وأبوعبدالله الشبانات وأبووليد البطي


جارنا بدر البدراني من جديد وبصورة الظاهر يسمونه بورتوريه


جارنا أبوعبدالرحمن المطيري
__________________

آخر من قام بالتعديل هزيم الرعد; بتاريخ 04-08-2013 الساعة 12:39 AM.
هزيم الرعد غير متصل   الرد باقتباس
قديم(ـة) 03-08-2013, 06:15 PM   #7
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

أبوخليفة الملاح بعد أن أطلق عليهم الضحكات العصر راح تنكر ولبس شماغ وفسخ النظارات وجا يفطر ...


رئيس البلدية المتقاعد المهندس سليمان الخليفة وبجانبه رئيس قسم الأراضي ببلدية الرس الأستاذ علي القبلان والعقيد أبويزيد
واللي جنب أبويزيد ما أدري منهو ما بان بس واضح انه ماشاء الله شبع ... من الجلسة


أحتري واحد منكم يعطين سمبوسة أو تاوة أو بيتزا ما أحد عبرن ...ألمح لكم وأقول كم هو التصوير متعب .. تقولون متعب وإلا سلمان ..أكرهكوا


من اليمين الغاليان وليد خالد البطي ويسارا يزيد شقيقه ..ووليد ولله الحمد هذا العام صام رمضان في الرس قادما من كندا ..وبعد رمضان سيعود إلى كندا كان الله في عونه


حياكم الله ياصديق ... يوم قلت له حياكم الله قال
حنا بني بنغال لاصار جنجال
نارد حياض الموت مافيه مشكل
قلت صح لسانك يابن زدلان


أبوخليفة ..وصورة شخصية مع أحد الوافدين


يامرحبا ترحيبة كنها السيل ... متحدرن من وادي الفرعيني


العمدة مع أشبال الحارة


صورة لشباب الحارة .. جميلة بحق هي حارتنا .. بس خسارة ييخسرونن بعدين
__________________
هزيم الرعد غير متصل   الرد باقتباس
قديم(ـة) 03-08-2013, 11:46 PM   #8
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

وبعد صلاة المغرب عدنا من أجل أكل ماتبقى من خيرات ربي .. فجزى الله كل من شمرت عن ساعديها وعملت لنا مما لذ وطاب وأطال الله في أعمارهن وجزاهن الجنة


ماشاء الله .. شوربة ..وصينية مكرونة .. مرقوق .. مدري قرصان ..والله البلشة بالله هذا مرقوق أو قرصان بحلت ؟
والأهم شعيرية أبوعبدالله الشبانات جعله بالجنة ووالديه


العمدة ينتسب لنا مما لذ وطاب عافاه ربي ماقصر ...ولاحظوا بالخلف وسام مستلم الشباب هلس يقول ترى كاميرتنا أحسن من كاميرة هزيم الرعد وأنه تصور بدون بطارية وممكن تعبيه بنزين بدال شحن الكهرب وهرج واجد ما يدخل المخ


بالعافية يا حارتنا العزيزة


ياحارتنا العزيزة بالعافية


شباب الحارة


صورة جماعية


هنا ضحك الجميع


المصور وسام صورناه


مايعودها ياشيخ سامحه سامحه
__________________
هزيم الرعد غير متصل   الرد باقتباس
قديم(ـة) 04-08-2013, 12:11 AM   #9
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

مشاري الشبانات " ميشو " وبدر الملاح " بيدو "


مرة كان موتري بالصناعية وأبي أحد يودين ..وأوقف عند الشباب حقين حارتنا وكلي ثقة انهم كلهم يينقزون يوصلونن .. قلت سلام ياشباب ياحلوين قالوا هلا أبو رعد .. قلت موتري بالصناعية واحد يودين .. بكل ثقة .. أشوف تغيرت نظراتهم ..اللي يناظر ساعته ويقول أوووه تأخرت أبروح عندي شغل ..والله يقول موتري بالصناعية يخلص باتسر ..مع انه واقف جنبه .. واللي يغير السالفة ينشد عن نتيجة مباراة ريال مدريد والضلفعة
لمين نط ذيبان .. عبدالرحمن فلاح الفلاح ياحبي لوه وقال أنا أودي يابوصالح ..كفو يالذيب ماقصرت ..وأما الباقين فأنا بكرهكو


فرحة فرحة


حي الله الضيوف ...نحن الضيوف وأنتم أهل المنزلي


أبوصالح ناوي " يرطق " واحد .. بس منهو ما أدري


ساعة نبي نسوي هالحركة ولا ضبطت ..أجل لو نبي نفتتح بالرس أولومبياد وش ننسوي ؟

* تنبيه ... الصور التالية عجيبة وغريبة ولا نعم سبب ماحصل لشباب الحارة وهناك بعض الأقوال تقول بأن الفيمتو كان مغشوش ...ولازالت التحقيقات جارية ...
* تنبيه آخر .. لاننصح بمشاهدة الصور التالية لمن هم أقل من 18 ومن لديهم مشاكل بالقلب أو ضغط أو سكر أو أملاح أو عليهم قرض من البنك أو معهم سيارة تأحير منتهية بالتمليك أو يعمرون لما تحتويه من مدري وشو


يالله انك تركدهم يالله


يالله انك تصلحهم يالله


مطامر ..وتم حجب أحد المخلوقات لما تستدعيه المصلحة العامة


وش هالفرحة ..؟؟ هو نجح المنتخب ؟؟
__________________
هزيم الرعد غير متصل   الرد باقتباس
قديم(ـة) 04-08-2013, 12:36 AM   #10
عضو أثري
 
تاريخ التسجيل: May 2002
البلد: غير معروف
المشاركات: 12,708
قوة التقييم: 30
هزيم الرعد is a jewel in the roughهزيم الرعد is a jewel in the roughهزيم الرعد is a jewel in the rough

الشباب مفطرين بزحل عند ربعهم وتوهم طابين علينا ماشاء الله


هههههههههههه يخسي عبسي ... ماشاء الله


بالملاهي


بالملاهي برضو


ابتسامة دائمة


ما أدري ليش تذكرت القذافي يوم شفت وسام بهالشكل... من أنتم ؟؟


فريق ريال القادسية


ونختم بهالصورة اللي ما أدري وش تبي
.
.
.
.
وهنا ينتهي هالتقرير البسيط إن شاء الله حاز على رضاكم وإن ماحاز عاد الشكوى لله ..
وهناك صور أخرى من تصوير سليمان الفلاح ووسام سيتم إضافتها لاحقا بس عشان الجماعة ملزمين بسرعة إنزال الموضوع نزلناه
وأعتذر إن كان ورد هناك خطأ ببعض الأسماء .. أو عدم معرفة كل الأسماء
شكرا لتشريفكم هالتقرير وإن شاء الله نعيده أعوما وأعواما
وتقبل الله منا ومنكم صالح الأعمال
مع تحياتي
هزيم الرعد .. العاصمة الألمانية دبلن
__________________

آخر من قام بالتعديل هزيم الرعد; بتاريخ 04-08-2013 الساعة 12:56 AM.
هزيم الرعد غير متصل   الرد باقتباس
إضافة رد


يتصفح الموضوع حالياً: 1 (0 من الأعضاء و 1 من الزوار)
 
أدوات الموضوع
طريقة العرض

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق
Trackbacks are متاح
Pingbacks are متاح
Refbacks are متاح



الساعة الآن +3: 05:51 PM.


Powered by vBulletin® Version 3.8.7
Copyright ©2000 - 2017, vBulletin Solutions, Inc.
SEO by vBSEO 3.6.0 ©2011, Crawlability, Inc.
هذا المنتدى يستخدم منتجات بلص

1 2 3 4 5 6 7 8 9 10 11 12 13 14 15 16 17 18 19