بيت النخل (قصة مراهق)

[al dolar]

السلام عليكم ..

عندي سالوفه صعينونه .. طراه اني فاظي في الدوام ..
مره وانا طالع للبر في الشتاء مع الشباب وكانت هاذيك الليله قمرا يعني يوم 14 او 15 ..بس بحكم الدوام اكثر الشباب سرو "مشو" مابقا الا انا وخويي عبدالله جالسين عند النار .. وانا اسولف مع خويي الا الحظ خوينا سرحان وهو يطالع القمر .. سكت وقلتله عسا ماشر يابو عابد وش فيك .. قالي وهو ضايقـ(ـن) صدره هموم الدنيا ومشاغلها .. قلتله .. ياعبدالله وش عندك قلي وش اللي بخاطرك .. (الصراحه حسيت انه يبي يفضفض باللي بقلبة) ..
قالي يابو داحم بقولك سالفتي بس خلها بيني وبينك .. قلتله افا عليك سرك في بير وفي الرسxp(بس بيني وبين نفسي).. وبدا يحكي قصته ... الصراحة القصه حلوه واعجبتني وحاب اقولها لكم زي ماقالها لي وبلسانه .. بس بجيبها على شكل دفعات .. تعالو للقصه ..

بداية اللقاء ..

يقول خوينا .. من كان عمري 11 سنه وانا احب اروح لنخل "مزرعه" جدي صالح عشان نجتمع انا وعيال عمي ... وانت عارف مانروح للنخل "للمزرعه" الا اوقات الصيفيه بعد ماتسكر المدارس ..
وكنت في هاذيك الايام كنت اكبر واحد في العيال واقشرهم وانت تعرف كنا صغار وتلقانا نلعب مع البنات .. يعني صغار وش بيجي منهم .... وكان بنت عمي معهم ..بس لحد الان مابعد قرقع "تحرك" قليب ..

وكان جدي له بيتين في النخل "المزرعه" .. وحده لبوي وعياله والثاني لعمي وعياله .. وبين البيتين مسافه ..

هذاك اليوم بعد صلاة العصر قررو البزران انهم يلعبون "واحد طش" وانت عارف في النخل تكثر الاماكن نتوزا "نتخباء" فيها .. اللي ورا النخلة واللي في حوش الغنم واللي يروح للمطبخ واللي فوق الحمام واللي يجلس عند امه .. المهم تتعدد الموزات والعبـ(ـو) واحدا ..


وبدات ألعب وانا اول وبحكم قشارتي"مشاكس" تلقاني متوزي تحت الموتر ومره فوق السطح ومره فوق النخلة اللي فيها الحالة "المكان الرئيسي للعبة" واول مايخلص اللي عليه الدور العد مايدري الا انا طابـ(ـن) على راسة واكون اول واحد يوصل ..

وكان هذاك اليوم كان الدور على واحد من البشقه "البزران" وانا اللي انقز ورا جدار الحوش الا اني اصادف ان بنت عمي هذي جالسه فيه .. ناضرتني وهي تقول اصصص لاتطلع صوت وانا اللي اجلس معها .. حتي اني اذكر جدايلها ..
وانت عارف العبه هاذي لازم تغتنم الفرصه عشان تلحق وتفوز .. وانا قاعد اطل كنت اعلق على البزران .. يعني مسمي كل بزر بعياره "لقب" اللي مسميه ابو سروال وابو خشم وابو ريحه والقرد .. وقول ابو ريحه متوزي في وسط الحمام والقرد متعلق في النخلة وابو خشم جالس مع الغنم وكل ماقلت ذبة "تعليق" قعدت البنت تضحك ..
وانا جازلي الموضوع وكل شوي اطل واعلق على البزران والبنت ميته ضحك .. وقولها اسكتي تراك بتفضحنا .. بس البنت مستمره بالضحك .. قمت انا وسكت شوي الين تخلص ضحك .. واول ماخلصت ناظرتني وهي مبتسمه وقالت دمك خفيف ..
وفي هذي الحظه بالذات حسيت بشي يقرقع في قليبي وخاصه ان عيونها كن فيها الضحكه .. ونسيت راسي طالع برا .. مادريت الا اسمع طش طش انت وياه ....


رجال بس توني صغير ..


سكت شوي .. وانا التفت عليه والقاه منزل راسة ويطالع النار وهو يهوجس ثم ابتسم وهو منزل راسة وقال ..

تصدق اني ما اذكر شي من عقب هذاك اليوم .. حتى مرت الايام بسرعه وانتهت الاجازه ورحنا لبيوتنا ..

وبعد 4 شهور وتجي عطلة الربيع .. وكنت انتظرها بشكل ماتتخيل حتى مجهز شوية رسوم ولابس الطاقيه الصفرا وجايب صورتي يومني صغير ...
ونجهز انفسنا ونركب عفشنا في الددسن وانا وخواني في الصندوق حتى كل واحد حافظ محله ..

ونوصل للنخل "المزرعه" وكان عمي واصل قبلنا والقا اخونها الصغار يلعبون .. وسائلت واحد منهم .. وين فلانه ..قالي في البيت .. وانا اروح امشي ومعي رسومات في مخباتي ابوريها وانا مبسوط ..وقاعد افكر وش بتكون ردة فعلها ..
ووصل البيت واطق الباب وتطلعلي مرت عمي .. سلمت وانا مابعد رفعت راسي وجيت بدخل .. الا هي ماسكتني مع علباي "مؤخرة الرقبة" وتردني ..
رفعت راسي الا هي متغطيه .. المشكلة اني اذكرها هي وحبة الخال اللي في خشمها ..سئلتني من انت .. قلت انا عبدالله وجيت بدخل ثاني مره الا هي ساحبتني ..
قالت ماشاء الله والله كبرت ياعبدالله وصرت رجال .. وانا اللي اعدل الطاقيه وادخل يدي في مخباتي وانا ابتسم ..قلت ايه وجيت بدخل بس للمره الثالثه سحبتني ..
وقالتلي وش عندك ..وانا ارفع راسي مبتسم وقول وين فلانه ..
قالت هوو "راجع قاموس القصمان".. ياعيباه البنت كبرت خلاص ماتلعب مع الاولاد ..وانت ياعبدالله المفروض ماتلعب مع البنيات انت صرت كبير يالله رح اجلس مع الرجاجيل يابعد ابوي ...وانا اطل من تحت ولقيت بنت عمي تطلطل علي وانا اشرلها وقولها يالله مشينا ... انتبهت مرت عمي واللي هي تعطيني ذاك البوقس .. قالت وش فيك ماتفهم وش انا اقول ..يالله روح اجلس عند الرجاجيل ..
وروح ويديني في مخباتي وانا ماني فاهم وش الموضوع ..
سمعت كلامها ورحت اجلس مع الرجاجيل ..بس في خاطري اني اوريها الرسوم ..
بس كلام مرت عمي ترن في راسي .. وقول في خاطري انا صرت رجال ومابي ألعب معهم.. وانا عمري مابعد جا 12 سنة ..
وتمر الايام وانا جالس مع الرجاجيل الا اشوفها من بعيد تلعب مع العيال بين النخل.. وانا شفقـ(ـن) ابي العب معهم ..
وابوي وعمي ملكعين .. انتبهلي ابوي و يقولي رح ألعب معهم وانا ماصدقت وقمت واقف..
بس عمي صرخ في وجهي وقالي اجلس... وابوي يقوله وش فيك خله يروح ..يالله ياعبدالله رح ألعب وانا ابوك ..وانا اقوم بس عمي طالعني بعين وهو معصب وقال اجججججلس .. وانا اجلس ..
بس ابوي يقولي طيب خذ الشاهي ووده لبيت عمك .. وانا اقوم بشيل الشاهي.. (في قلبي الروحة) .. الا عمي يصرخ يقولي اججججلس لحش رجليك .. وابوي يضحك وعمي معصب وانا جسمي ضايع بين ضاحك ومعصب ...وقلبي ضايع بين اللي يلعب بين نخلتـ(ـن) وشجرة ...


بخطبلك بنت عمك ..


مرت الايام وتوفى جدي الله يرحمة وبيعت النخل "المزرعه" وصرنا يالله نجتمع في المناسبات .. بس لحد الان وانا مانسيت هذاك اليوم ولا حبة الخال اللي في خشم مرت عمي ..


كملت الثانويه وتخرجت بتقدير ممتاز .. وقدمت على الجامعه وقبلت فيها ...
وروح لمي ابشرها انهم قبلوني .. قالت الله يبشرك بالخير وشوف حرمتك وعيالك .. لقيتها فرصه .. وفتحت الموضوع مع امي وهي تضحك .. قالت ابشر ابخطبهالك اول ماتتخرج .. وانا اقولها اخطبيها لي الحين .. قالت ابشر ..بس انت خلك في الدراسة ..
.
وفي هذي اللحظة التفت لي عبدالله وهو معصب وقال ..

تدري تحسفت يوم علمت امي ..

قلتله ليش وش صار ..قال ..

تصدق كل مارحت وجيت ولا بغت امي شي مني قالت يالله سوو هذا واخطبك بنت عمك .. تحزبني بزر وتاخذني على قد عقلي .. بس بيني وبينك (وهو مبتسم) انها نفعت معي ..

مرت سنتين الا اسمع ان البنت خطبها ولد خالتي الضابط المتخرج انا وياه من الثانويه هو بتقدير جيد وانا بممتاز ..
واللي مضيق صدري ان امي هي اللي مختارتها لولد خالتي بس مادريت الا بعدين ..
وروح لمي وانا مسرع وقولها يمه مو مواعدتني انك تخطبيلي بنت عمي .. يالله روحي الحين وخطبيها ..
قالت ماعليك باخطبلك وحده احسن منها .. يامه البنت بتروح .. قالت انت اصبر لاقيتلك بنت احسن منها ..
يمه انتي مو فاهمه شي انا ابي بنت عمي .. قالت يالحليلك والله وكبرته ياعبدالله .. يامه انا اكلمك ردي علي ..
يوووووه منك ياولدي البنت ماتصلح لك وقامت من عندي وراحت ..

بس انا سكت وقعت افكر وشفت مافي يدي حيلة قلت في نفسي وانا ارددها ..ايه البنت ماتصلح لي ..بس قلبي يقول العكس ..

مرت سنتين ثانية وانا حاط حرتي في الدراسة .. وكل اللي صار لي نسيته ومحيته من ذاكرتي .. وانقطعت اخبارهم .. المهم البنت راحت والله يوفقهم ..
بس المشكله يوم خلصت الجامعه وخذيت الوثيقه وانا مبسوط رايح اركض للبيت ..
وانا داخل البيت الا القى ولد خالتي طالع في وجهي.. جاي يسلم على امي اللي هي خالتة .. وانا من اللخمة "الصدمة" سلمت عليه وقوله وشلونك عساك طيب وشلون خالتي عساها طيبه .. مايمديني اكمل سلامي الا بنت عمي جايه ولابسه عبايتها ..حسيت بشي بداخلي .. بس سلمت عليها وقلتلها وشلونك وش اخبارك واخبار عمي الا ولد صغير جاي يمشي وتعلق في عبايتها .. انا وبحركه لا اراديه شلت الولد وحبيته .. وقلت ماشاء الله وش سميتوه .. قال ابوه عبدالله ..
وانا انزل الولد ما ادري ذبيته او خنقته وما ادري وش قلت بعدها وروح على طول لغرفتي وقعد فيها ثلاث ايام بدون مايدرون اهلي اني استلمت الوثيقه ولا لا ....
ثم التفت على وقال ... خلاص كلـ(ـن) اخذ نصيبه ولا وشـ ....!!!

الا انا جاي من بعيد ومعي جيك مويه صغير واعدل في الثوب وقوله .. يرجال وسع صدرك هذي اسهم البلاد بايعه ب740 ولا ضاق صدري ... ولا يومك معاد شفتــه

اعزائي القراء اتمنى ان السالوفه اعجبتكم

[غريب الدار]

[glow="3300CC"]ياخي والله حرام عليك bhhcl,k

ابوالشباب جالس يشكي لك ويفضفض همومه 27-*

وتجي انت مطفي النور ((هذي اسهم البلاد بايعه ب740 ولا ضاق صدري)) >> حتى انا بايع المكيرش بـ122 ffcfc

بس والله الصراحه قصته تقطع القلب

وتدري ليش تقطع القلب

لأنه تشبه قصتي ....!!!!

مسكين ابوعابد

والله يعوضه بوحده احسن منها >>لكن القلب مايتعوض bhhcl,k

قله يقولك غريب الدار

اذا شفت مصيبة غيرك هانت مصيبتك ...... [/glow]






[glow="330066"]ماأدري كيف اشكرك اخي الدولار على هذه القصه الرائعه

فكم تعجبني ((وتروق لي)) مثل هذه القصص

فألف شكر لك اخي الغالي

واتمنى انك (( كل ابودايم تصير فاضي))

علشان تتحفنا بمثل هذه الرائعه

انتظر جديدك على احر من الجمر

لاعدمتك[/glow]






[glow="330066"]اخوك
غريب الدار[/glow]

[الصمت العظيم]

يعطيك العافية على القصة الصغيرووونة هههههههههههههه

أشكرك






تحياتي @@ الصمت العظيم @@