عـودة للخلف   منتديات الرس اكس بي > منتديات الرس اكس بي > المنتدى العام والمواضيع المتنوعة
التسجيل الأسئلة الشائعة التقويم تعليم الأقسام كمقروءة


المنتدى العام والمواضيع المتنوعة الموضوعات العامة والمناقشات والحوارات الهادفة، والتي لا علاقة لها بأقسام المنتدى الأخرى.

موضوع مغلق
 
LinkBack أدوات الموضوع طريقة العرض
قديم(ـة) 21-06-2002, 02:28 PM   #1
عضو
 
تاريخ التسجيل: Jun 2002
البلد: القصيم
المشاركات: 12
قوة التقييم: 0
راعي البقشه is on a distinguished road
قصة يوم كان عمري اربع اسنين

يمكن كان عمري اربع سنين ( يعني بعمر هايدي في عدنان ولينا ) اول ماشفت جريمة قتل قدامي ايه شفتها وشاركت بنقل اسلحتها وعتادها !!
القصــــــــــه
في صباح يوم ملبـّد بشمس وغيوم دخاخين حسحة الكراعين .. يوم من ايام بياع الخبل عباته - لأن القاتل كان بايعها - ولابس الـ underwear ( عبارة عن صروال لحد الركبه وفنيله علاقيه ) واتمخطري يازينه يؤ !! كان لابس كذا وحنا في شهر اغسطس !! - تصدقون - موضروري تصدقون لأني اصلا اتسذب خخخخخخخخخخخ واحد / صفر

المهم كان الاسطه مستأصد انه يفق كشرته وهو يأسطط ضحاياه وكان يذبح ويسلخ بكل حماس ( وهذا بنى في نفسي ان اللي قاعد يسويه شي كويس وممتع وانه عملية شرعية )
قبل الجريمه صار فيه خرشة العاده !! كان الاب يهمس برفق وبصوت رقيق مررررره يسوقه النسيم لسابع جار وين السكاكين ؟؟ وين المسنّ ؟؟ انا قايلكم كم مرة ياتسلاب تجهزون كل شي حتى ماتعوقوننا ( تراو مايعانينا ابد )
بدت الحلول الفوريه لحل المعضلة - من قبل الابناء الدلوخه
الاول : يبه معي هذي تنفع (خنجر)
الابو : الله يخلف على اميمتن جابتك يهالصتيمه الظاهر تحسبها هوشة عرابجة بعد الطلعه !! قم انزلع عن وجهي لأذكيك بها
الثاني : يبه عندي فكره !! وش رايك ابارزالضحايا واثخنها شوي حتى ينهد حيلها ثم تستسلم ونذبحها بدون مقاومه

الابو : سكت شوي عجز يحتسي من القهر ثم قال : يازينك ساكت ياروح امك !! اجل تبارزها ايه هذا اللي استفدناه من محمود ياسين خلاكم رخوم وجودكم على البهايم !!
وانفجرررررر الابو لابارك الله في هالعيال !! واللي مافيهم خير طالعين على خوالهم
الام : وشو !! حدك عاد !! وش بلاك انت كل ماطق عود عود قلت امكم وخوالكم الاوالله طالعين عليك انت واهلك
الابو : يخسون ويعقبون يوم انا كبرهم وانا اذبح البعيرين جميع مير مامن شافك .......... لاحول الله قبسوا
الثالث : ياناس وسعوا صدوركم واذكروا الله هالحين باروح اجيب سكين عندنا بالاستراحه من طرارتها تذبح بالمقلوب << اخينا راح وعلى ذيك الطلعه واتصل بعد ثلاثة ايام وقال ان السكين بسيارة واحد من الربع راح الشرقيه ولحقته باجيبها وللحين ماصدته [ ياسذبووه ]
تدبرت السكين والمسنّ من الجده لأنها لاقيتهم ومدخلتهم بغرفتها << كل شي يقابلها تضفعه لغرفتها لو هو رضاعات البزران - الله يمتع بها انشالله -
بقية الذريه ماقاموا يساعدون الابالملعونه واختها ( موب تسني بديت العن مثل دعلج مقيوله الطنازة مدّ باليد ) - ماعلينا -
ولأنهم كانوا مغصوبين كان الاول يجيب الضحيه وهي تمشي مليون وطايرتن عويناتهامن الروعه
ثم يمحط بها ويسدحها ويحط راسها على كرتون و الفذر يذكيها كخخخخخخخخ
الثاني كان منسدح على بساط البلاستيك ومعه قلم رصاص
ويوزع لحم الضحايا ( اليد وجنبته لخالتي مويضي - والرجل لجارتنا ام عزيز - والاذن للهندي حق المحطه - لأنه آذانا بصقاهته من كثر مايسبح بخزان البنزين - .... الخ ) وكان بالوقت المستقطع يحط مساحة القلم بين عيونه وهو منسدح ويتحيول واذا ملّ يقعد بنظف آذانه بسمة القلم
الثالث قال ابقعد عند صحون اللحم لايجيهن نمل وذبابين
وماصفت الاعلى الاب وجذع يناقز شبرا امرا حتى لايرشق عليه دم
قبل الذبح تجي الام وتتلو البيان اياه ( الله يجعل اجرها وثوابها لوالديني ووالد والديني ووالد والد والديني ولخالة جدتي رقم 15 ولبنت عمها عمشاء وام جيرانهم بتلاء .......<< كنها تعدد اسماء خريجي كلية عسكرية

للموضوع بقيه بسبب المساحه المسموح بها
__________________
تم حذف كافة تواقيع الأعضاء من قبل إدارة الرس اكس بي ونامل منكم مراجعة قوانين المنتدى قبل إعادة بناء توقيعك وشكراً
راعي البقشه غير متصل  

 
قديم(ـة) 21-06-2002, 02:34 PM   #2
عضو
 
تاريخ التسجيل: Jun 2002
البلد: القصيم
المشاركات: 12
قوة التقييم: 0
راعي البقشه is on a distinguished road
Question



ليش نرسل لجيراننا لحم وهم يرسلون لنا مثله !! لدرجة انه ممكن يصير فيه غلط وكل واحد يرجع للثاني نفس لحمته !!

ماعلينا .. نكمل السالفه
كنت احس ان الاب يتلذذ وهو يقطع جسم الضحيه ( حتت - حتت ) .. واااااااو كانت السكين تتزحلق وهو ينزع الجلد عن اللحم بإنسيابيه ( لأن السكين مسنونه على حجر ) شي مهبول من جد .. كنت ابحلق فيه وبيني وبين نفسي كنت اتمنى اكون مكانه ( يمكن كان عندي بوادراجراميه )

وهو يذبح كان يشرح شلون منول كانوا يزعبون الماء من القليب ( اموت واعرف وش دخل هذي بالذبح ) !! انا كنت موب لم سواليفه لأني كنت امارس الشبهره في وجه الضحيه قبل لاتموت .. مدري ليه حسيت انه اللي يسوي كذا قوي مرررررره وان الضحيه تحترمه جدا قبل لاتموت
وانا اتفرج عليهم .. و في غمرة تفرجي المنفرج بالفرجار عليهم بدت يدي تحكني باسوي مثلهم واطعن الخواريف
بعد ماخلصوا جيت لمهم قلت ودي ( اطعن الخروف مثلكم ) قالي ابوي : اها بس روحي قولي لهم ينهجون بالحميسه قلت : حسنن ياابي ويوم جت الحميسه قلت لابوي يبه تشوف الحمامه هذيك !! قال ايه قلت ودي اطعن خروايف مثلكم !! قال اقول انثبري تراك اشغلتينا قلت : طيب
اخواني عقب ماملوا بطونهم حميسه تخدروا وتسدحوا .. وبدو يعلقون علي قال ايش قال بتذبح خواريف !! خخخخخخخخخخخخ ياحليلها مصدقه عمرها !! روحي العبي هناك ياماما !! روحي دوري بسه واطعنيها !!
بسّـه ياسهلها !! سكين وبسه وينتهي كل شي !! وامارس اعظم امنياتي .. انغرست الفكره في دميجتي !! وبدت عم تقبر تقبر وتتمرجح في حديقة الدخل المحدود بعقلي !! بسسسه !!
رحت اركض لكل من جاء عندنا يوم العيد وقلت لهم : ابوي طعن خروايف كثاااار وانا باطعن بسه مثله !!
كانوا يضحكون وقاموا يعلموني شلون احط السكين على رقبة البسه وكيف اذبحها ووش اسوي !! - كانوا يقولونها على سبيل العياره والمزح - !! وانا كنت اسجل بدفتر ذهني كل شي يقولونه استعدادا للتنفيذ

كنت اشوف فنجاين القهوة وهي متلطلطه روج احمر من خشش الحريم .. وكان هذا يذكرني بلون الدم الاحمر القاني واللي كان بمثابة مدري وشو في نفسي

يتبع
__________________
تم حذف كافة تواقيع الأعضاء من قبل إدارة الرس اكس بي ونامل منكم مراجعة قوانين المنتدى قبل إعادة بناء توقيعك وشكراً
راعي البقشه غير متصل  
قديم(ـة) 21-06-2002, 02:47 PM   #3
عضو
 
تاريخ التسجيل: Jun 2002
البلد: القصيم
المشاركات: 12
قوة التقييم: 0
راعي البقشه is on a distinguished road
مسكت البزارين كلهم وقلت لهم اني باذبح بسه وباعلقها واقطع شعرها ( يعني اسلخها ) خالي كان عمره 12سنه - وكان سفير ابليس عالأرض - قالي ليالي وش رايك اجيب لك بستين صغار وتعطيني 20 من عيديتك !! على طول وافقت !!
قالي تعالي نامي عندنا .. عشان الصبح ناخذ من البساسه حقاتنا ( عندهم قبايل بساسه ) ولما اصبحنا .. يووووه كانت البسه الكبيره عند عيالها تغمض عين وتفتح الثانيه علشان تحرسهم وعجزنا نقرب لهم
لما شفناها كذا رحنا وجبنا لها لحمه وقطيناها بعيد وراحت بساقة اللحمة ونست عيالها

استفردنا بالبسيسات لقيناهم مبسوطين ويلعبون
سحبناهم مع ذيلهم عالأرض لحد بيتنا
يوم وصلنا نشبت بحلق خالي الاتساعدني وتمسكهم معاي زي ماكانوا العيال يساعدون ابوي
مسك البسيسات لي .. جبت سكين خضرة مشرشره .. واحطها على رقبة البسه الضعيفه .. لكنها كانت تجزّ ولاتذبح !! فجأة تذكرت ان السكينه اللي ذبحوا بها الخواريف ملساء وعلطول قلبت السكين حاولت اذكيها بس مافي فايده البسه تنونو وتتحرك !! قام خالي وحط رجله على راس البسه وقالي شوفي البعرصي اللي بالغماء شفت واثرمابوه شي يوم نزلت راسي واثر البسه ميته والظاهر انه مصع رقبتها !!

قالي خلاص ماتت !! قلت له : لا لا اكيد انها نامت !! اجل وين الدم ؟؟ الخراويف هذولاك طلع منهم دم !! قالي اصلاالبساسه مايطلع منهم دم .. بحكم صغر سني صدقت !!
جبنا البسه الثانيه .. ولما جينا نجهز عليها والاهذا صوت شي يجي مسرع واثرها زنوبه مرسلتها امي وطررررررخ بظهر خالي ومير تدخل علينا - حنا كنا في المطبخ - وانطلقت علينا امي ياللي ماتخافون ربكم شلون تذبحونهن ..
امهن البسه الكبيره السوداء تبي تجيكم بالليل وتغولكم
( هنا مربط فرس السالفه كلها ) !! وشالت السليمه مننا والثانيه حطتها في كرتون وقالت روحوا ارموها بعيد يله
حنا اخذنا المتوفاة .. وقالي خالي اصبري خلي ننقذها ومير اجيب عدة الدكتور اللعببه حقتي نبدأ تكشف عليها ونسوي لها تنفس صناعي .. يوم يأسنا قالي خالي خلي نصلي عليها وندفنها .. وفعلا صلينا ودفناها في البرحه اللي قدام بيتنا !!
رجعنا البيت ولعبنا عادي .. ونسينا السالفه .. لما جاء الليل ونمت .. مادريت الااحد يصحيني
لما قمت واثرها بسسسسه كبيره كبيره لها سبعة روس وجسمها جسم غول الغرفه كلها امتلت بساسه سوداء الجماجم انتشرت بكل مكان في الغرفه مسكتني البسه هذي وربطتني مع فمي وعيوني وشالتني مدري السالفه حلم والاعلم كنت اسمعها تقول الحين بننزل بك للأرض ونغولك زي ماذبحتي ولدنا
كنت اصرخ اصرخ لكن صرختي كانت مكتومه كنت أبكي واقووووووووووول

امي .. امي

تعاااااااااااالي



صلحي لي حليب وبوثيني قبل لاانام

لاتنسون تهجدون البزر كانه ازعجكم هاردلك كمان
ياجماعة الخير كل هالخنبقه - اللي نصفها صدق ونصفها توليف - علشان اقولكم لاعمركم توحشون البزران والله بنتي لي كم يوم ماانام منها لأنها عيت لاتنام قبل كم ليله وقلت نامي لايجيك البعـّـا وبهذلتني بدت ماتنام وبس يزاول لها خايفه ياكلها البعـّا

وكمان باقولكم لاعمركم تجارون الطفل وتتهاونون معه بأي شي .. لأن سالفة البسة صدقيه وحاصلة لي
__________________
تم حذف كافة تواقيع الأعضاء من قبل إدارة الرس اكس بي ونامل منكم مراجعة قوانين المنتدى قبل إعادة بناء توقيعك وشكراً
راعي البقشه غير متصل  
موضوع مغلق


يتصفح الموضوع حالياً: 1 (0 من الأعضاء و 1 من الزوار)
 
أدوات الموضوع
طريقة العرض

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق
Trackbacks are متاح
Pingbacks are متاح
Refbacks are متاح



الساعة الآن +3: 10:40 PM.


Powered by vBulletin® Version 3.8.7
Copyright ©2000 - 2017, vBulletin Solutions, Inc.
SEO by vBSEO 3.6.0 ©2011, Crawlability, Inc.
هذا المنتدى يستخدم منتجات بلص

1 2 3 4 5 6 7 8 9 10 11 12 13 14 15 16 17 18 19