قصــــه وقصيــــــــده

[غريب الدار]

[grade="00008B 0000FF 0000FF 4B0082"]


والصلاة والسلام على أشرف الأنبياء والمرسلين

نبينا محمد وعلى آله وصحبه أجمعين أما بعد :



في هذه الزاويه من منتدى القصص والروايات

سنطرح جميع القصص التي تحتوي على قصائد شعريه وذلك للحفاظ على تراث اجدادنا

والإستفاده من تجاربهم وحكاياتهم ...

في هذا الركن سنسعى جاهدين لجمع أكبر عدد ممكن من القصص المشتمله على قصائد

ليسهل للجميع الإطلاع عليها ومشاهدتها عند الحاجه ...

أتمنى من الجميع المساهمه في هذا الموضوع ....

ولكم مني أطيب تحيه ...



أخوكم
غريب الدار[/grade]

[غريب الدار]

جرت أحداث هذه القصيده في حدود عام 1230هـ أو 1240 هـ



في مره من المرات جو مجموعة من الحريم ثلالث حريم ومعهن هاك البنت بنت جميلة تبي تتزوج أخر الاسبوع
أو عقب شهر المهم جايين يتقضون لها ويأخذون لها مقاضي عرس وإلا فعلاَ بنت جميله جايبينها من البر متعافيه بالحيل يعني عمرها أقل من العشرين لكن ما شاء الله عليها جسم وصحه وفيها حياء ودلال وهماها لا صارت معهم وهي داريه عن روحها أنها بتزوج يغلب عليها الحياء, ودائماَ تطمن عينها كل ما عرضوا عليها سلعه يبون يشترونها لها حتى ولو أنه ما هوب في خاطرها تقول ايه وتسكت وتأخذها المهم يالربع جو مجموعة هالنسوان يدورون في السوق يأخذون منه الديرم والحنا والكحل واللبان ومااللبان والطيب والعود والجاوني والبخور هذي تباع في مكان الحالها ومشط خشب يشترون لها مشط الخشب عشان تكد رأسها
المهم جو يتقضون وقعدوا عند راعي ذاك الدكان يوريهم شوفي ياخاله هذا يسمونه كذا وهذا كذا , الحاصل قام يعرض عليهم وهن قاعدات الحريم واحده منا وواحده منا وهي بالطرف يورونها شوفي يابنتي هالقماش تراه زين ويفلٌه لهم راعي الدكان ويوريهم اياه ويقول شوفوا هذا وهالنوع من القماش وهذا ديرم ويكذب لإنه عندهم مثل راعين البيع والدكاكين يقولون الكذب مسامير السلع , ويدرجها حتى لوانها ماهيب شي فيقول لهم هذا توه جاي من الهند وهالديرم صبغته طقتين ويغدي البرطم ادعم والكحل ذا مشيت منه والعين تغدي تهبل ويمدح وبعض أهل الدكاكين الله يجيركم لو يمدح عجوز أعرست .
الحاصل أنه يوصف لهم ويوريهم والبنت قاعده بالطرف وهالبنت ماهيب لعب عينها من ورا البرقع وهدبها يمشي عليه الجربوع ما شاء الله وصحه ومتعافيه وإلا يوم حيرت الناس كل اللي يمرون منا مع السوق سوق الحسا تخبرون عامر وكل من مر وشاف هالبنت قام يتمرمر من عند هالدكان , وصارو ياقفون اللي معه سبحه واللي يناظر واللي يسوي نفسه يكلم واحد من ربعه ويقول وقف أعلمك تقدمو شوي وعلمه قال لا دقيقه أخاف أنسي الهرجه وصار يردد الحكي عليه كيف الحال طيب كله بس يبي يناظر وإلا ما عنده سالفه وإلا فعلاَ جمال وتلفت الانتباه حتى قعدتها ووقفتها ومشيتها غير , هبلت هالناس الحاصل صار على راعي الدكان ضول ظلوا عنده الناس وصار كل من جاء قام يتهايق , وفيه راعي دكيكين متشطر هناك في جنوبي السوق وراعي هالدكان هذا ابن حلال أجودي معه مهفه وقاعد في عاير هالدكان وماعنده بضاعه يجون عنده ربعه يسولفون عليه لكنه شاعر بليغ الحاصل شافوا اللي في الدكاكين هناك الظول من بعيد ولا يدرون وشو وكل من جاء مار مقبل سأله قال وش هالظول اللي هناك قال ابد والله ما أدري وشي أحد يعمله وأحد ما يعلمه المهم كل من سأله عن هالظول اللي هناك وشو قال ماأدري والله , وآخر شي قالوا رح ناظر تشوف انت بنفسك وهو يصك دكانه ويحط غترته وراء وجاء يمشي ويوم أقبل وشاف الظول وفعلاَ ظول ويوقف ويطالع و يوم شافها وإلا شوفتها تهبل وأخذ روحه وراح وقال هالقصيده التاليه ...





[poem=font="Simplified Arabic,4,blue,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
أسباب ما هــيظ ضــميري وهاجــــه = صبح الثلاثاء والخلايــق يدوجــــــون
مريت ظبــي يشتري لـــه حواجـــــه = عليــــــه نــــاس واقفيــن يظولـــــون
نشدت وش هالظــول قالوا تواجـــــه = وايق تشوف بــعينك اللي يشوفـــون
أن كان مالك في هوى البيض حاجه =اقضب طريقــك خل فاتن ومفتــــــون
بغيت أسير وصرت قضاي حاجــــــه = نفس تــوازيني مواثـــيم وغبــــــــون
وجــدك على مال تنــوشـه سماجـــه = ما يشتهي الفتنه فتى كود مجـــنـون
قمـــت أتهايـق لإن مـثل السراجــــه = ظبي حجاجه بأحمر المـوت مقــــــرون
يبرم عليهــم في طبوعــه غناجــــــه = يحيون من غنجــه ومر(ن) يموتـــــون
يغضــي إلا قـــذوه ريـــم الفجاجـــــه = وإن قذهم بملجلج العيـــن يغضــــون
حكيـــه قروضات تقــل في حجاجــــه = قـــوس يجــــر وقينتين يغــــنــــــون
قوســة جبينـه والوتــر في حجاجـــــه = وعيونه اللي بالمقــــادير يرمــــــون
لو أن هدب عينه شــجر في زراجــــــه = شفت الجوازي في ظلاله يقيــلــــون
مــابـــه من المــنقود كـــبر الحلاجــــه = إلا عيـــــونه لاسطــــو مايعيقــــــون
بيــن اعتدالــه لامشــي وانعواجـــــــه = غصــــن يميـــل وخيمتين يشيلـــــون
قـلب جرحـتــه تبتصـــر في علاجــــــه = ياكود من طيبك جروحـــه يطيبـــــون
وش ذا التمخطر والتعــب والدواجـــــــه = تجوز منها فالبـدو عيشهـــم هـــــون
تلبس ملابيــس البهــاء والبهـــاجـــــــه = وعن الوسخ ماتغسل إلا بصابــــــون
وتشرب من الماء بارد في زجاجـــــــه = في روشى عن واهج القيظ مصيــون
أو ما وهو يضحــك وطرب مزاجــــــــه = ياهيه وين اذنينك اللـي يسمعــــــون
حلفت لو اعطي الحساء مع خراجــــــه = على بيبـان الحضــــر ما يصكــــــون
عندي أحب من القـــرع مع دجاجــــــه = هيـم مجاهيـــــم بالاقفار يرعــــــون
واحب من لــبس العبــــي والعلاجــــــه = شاوية شقراَ بها الشـوك مدفــــــون
عن الحلـــو عد كثــــــــير هماجــــــــه = اكرع برأسي فيه من غــيـر ماعــون
ومن البــــــدو علــج يدرج نعاجــــــــه = ولا سحاقي من الـــورس مدهــــــون
كل ينــــــاظر عينـــته في زواجـــــــه = ترا البدو ماهمب للحضر يبغـــــــــون
واقفت سوات السيد عجـــل عجاجــــــه = تقول أثر حضران ورقـا يعشقـــــون
حيذور كــم يا راكبيــــــــن الحداجـــــه = عن الحضر من مكرهــم لا تصـــــادون
يالــــيت من يضون لــــيلــة زواجــــــــه = يمشي على الاصابع من حيث ياعون
فالا وعــوا بي قلت قضــــاي حاجـــــه = وقالوا من انت قلت أنا دور ماعـون
قلت المــــواجه قال مــا من مواجـــــــه = اصبر عليـــنا لين اهلنـــا يحـــدرون
والا فهمت كــــم عنيـتك من زناجــــــــه = في شرعنا قتل العشاشيق مسنـون [/poem]




يرجحون الرواة ان هالشاعر اسمه محمد بن مسلم من ابرز شعراء الحساء مات في عام 1280 هـ تقريباَ

[غريب الدار]

قصة وقصيدة عواء الذيب



هذه الحكاية مجهولة الأبطال , وذلك نظراً لمضي وقت طويل عليها أو لأن
أبطالها ليسوا من المشهورين كالأمراء والفرسان والذين يحرص على أسمائهم
قبل حكايتهم . . . يقول الراوي

كان هناك رجل بالبادية متزوج من امرأة ليست من قبيلته , بل كان من قيبله
أخرى مجاورة لقبيلته . . . ومرت عليه فترة سنه هو وزوجته يعيشان بأحسن حال . . . وقد اختلفت القبيلتان وحصل بينهما نزاع وكان زوجها طرفاً فيه . . .

وكان اخوتها من الجهة المقابلة أطرافاً بهذا النزاع واشتدت الأزمة بين طرفي النزاع مما حدا بإخوان الزوجة أن يأخذوها ليلاً من بيت زوجها نكالاً له . . . وهي لم تكن راضية بفراقها لزوجها وكذلك زوجها الذي كان يحبها حباً كبيراً أيضاً . . .

ومرت فترة طويلة بعض الشيء على فراق الزوجين والكل منهم كان يريد الآخر ولكن النزاع الحاصل حال بينهما
ضاقت الأرض بالزوج , فهو يريد زوجته ولا سبيل لوصوله إليها , ففكر بطريقة . . . أن أسل إليها إحدى عجائز القبيلة تبلغها برغبته بلقائها . . . ورسم لها خطه للقاء . . . وبالفعل ذهبت العجوز للزوجة وأبلغتها بذلك فرحبت الزوجة بالفكرة
ولما كانت الليلة الموعودة حيث كان الوعد بينهما بعد غياب القمر جاء الزوج للمكان المتفق عليه وكمن بحيث لا يراه أحد . . . ثم أخذ بالعواء كعواء الذيب ثلاث مرات متتابعة . . . عرفته الزوجة حيث كانت تعلم بالخطة سلفاً وذهبت إليه وجلسا بعد طول الفراق يشكو كل منها حاله للآخر بعد الفراق حتى إذا ما جاء الفجر افترقا وعاد كل منهما لقبيلته
مضى على هذا اللقاء فترة أشهر . . . ويقسم الله سبحانه أن تحمل المرأة من زوجها كنتيجة لذلك اللقاء . . . ويكبر بطنها فيراه أخوها ويهددها بالقتل فمن أين لها بهذا الحمل وقد فارقت وزجها منذ فترة طويلة ولم تكن حاملاً ؟؟؟
فأعلمت شقيقها بحقيقة ما حصل بينهما وبين زوجها ووصفت له المكان وأعلمته بكل ما جرى . . . فقال الأخ سأذهب أنا لزوجك وأتأكد من حقيقة ما حصل فإن لم يكن صحيحاً فليس لك عندي غير السيف
ولم تكن القبيلتان على وفاق فكيف يذهب . . . فكر الأخ واهتدى إلى طريقة . . . فلما جن الليل تنكر وذهب إلى قبيلة زوج أخته ودخل مجلسه وجلس ولم يعرفه أحد . . . ولما سكت المجلس تناول الربابة وأخذ يغني عليها





[poem=font="Simplified Arabic,4,darkblue,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يا ذيـب يللـي تالـي الليـل جريت = ثلاث عوياتـن قويات وصـلاب

ادخل على لله بعدهن ويـش سويـت = يوم الثـريا ثلجت و القمـر غـاب[/poem]

وغنى هذه الأبيات على الربابة ثم توقف ووضع الربابة مكانها وعاد إلى مكانه . . . فعرف الزوج أن هذا أخو زوجته وفهم أن زوجته حامل كعادة البدوي سرعة اللمح وشدة الذكاء . . . فتقدم وتناول الربابة وأجاب


[poem=font="Simplified Arabic,4,darkblue,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
أنا أشهـد إني من قراكم تعشيـت =وأخـذت شاة البيت من تحت الاطنـاب

على النقـا وإلا الـردى ما تهقويـت = ردوا نسبنا يـا عريبيـن الأنسـاب[/poem]



فلما فرغ الزوج من أبياته فهم الأخ أن أخته كانت روايتها صحيحة وانسحب بدون كلام . . . وفي الصباح أعادوا له زوجته

[غريب الدار]

&رثــاء زوجة غاليــــــة &





تعرفون من أول اذا بغى الواحد يتزوج ما كان يشوف المره ويطالعها أو يتحدث معها أحياناَ يتزوج ( على الله وبالله) ويخطبون له بنت فلان ويأخذها وبس هذا واحد من الشعراء الحقيقة تزوج مبطي لكن ماش ما توفق في زواجه الأول وكلن راح بستره – وراحت المره بستر وقعد يدورعلى مره ولقي البنت اللي تعجبه وإلا فعلاَ يوم أخذ هاك المرة ولا هي حرمه هاديه وحبيبه ودمثة الأخلاق ولطيفه وتراعي خاطره وتداري مشاعره ومشاعر أمه وكان يقول يوم تزوجتها كنت في بيت واحد أنا وأخوي ووالدتي وأخوي الصغير الثاني وتو أخوي اللي أكبر مني متزوج ويقول حنا في بيت واحد عائله واحده , ويقول هالمرة هاذي حبيتها حتى الوالده حبتها لإنها ذربة وظفره وتشتغل معهم وتساعدهم بالمطبخ ما هيب تقول هذا ما هوب علي وذا علي اليوم ( بلاها والله مهيب من بنات الحين كان تحلف مية يمين ما تطبه ) وتداري خاطر زوجها إذا جاء وتقهويه وتسولف معه وتشوف إن كان الرجال هاك اليوم وجهه سفر وحليل ولا عنده خلاف ما زحته وداعبته وضحكت معه وش تشتهي يا ابو فلان وش نجيب لك يا فلان (ابوووك يالرومانسيه ) وتريحه وتبعده عن الصجه واللجه وتخليه ينام الظهر مرتاح وإلا بغى يطلع تلاحظ ملابسه المهم إن هالمره من يوم أخذها وهو مرتاح معها إلين الله وسع عليه واشتغل وأخذ بيت له جنب بيت اهلها وقام يأثث البيت , المهم يقول انا مرتاح معها وتداري خاطري ولاتؤذيني بكثر الطلبات اللي أنا اجيبه فيه بركه كل ما جبت شي قالت الله يوسع عليك ويجزاك خير وعساك على غناة وكل شي تمام يقول أرد الله أن حنا عقب ما مضي تقريباَ حول سنه – المره حامل وعلى وشك إنها تضع يقول : تجمعوا ربع لي وأصدقاء وراح هو واياهم في رحله مقناص بعيدة ويقول معنا بعد واحد حنا في ضيافته واحد من الشخصيات راحوا معه كل هاللي رايحين إلى القنص مع واحد كبير مثل ما تقول من الأمراء , المهم رايحين بعيد معه ويقول رحنا وطولنا في رحلتنا هذه قعدنا فوق الشهر يقول رحنا في مكان كل اللي حولنا باديه وكل يوم لنا مكان يوم بين ظلعان ويوم في سهل ويوم رمال ويوم نتنقل , والسيارات توها في بدايتها ما كان عند الناس سيارات واجد يقول في رحلتنا هذه يوم جاء يوم من الأيام وإذا فيه واحد من خويانا في هالرحله يبي يروح للديرة قاموا وسألوه الربع اللي قاعدين يا فلان تبى تروح قال إيه لإنه موصيه الأمير يروح يجيب لهم أغراض قال زين تكفى الله لا يهينك تطق على أهلي وتعطيهم شوي هالفقع هذا قال الثاني من فضلك بعد تمر على والدتي وشف هالإقط هذا عطهم إياه . قال زين ويوصيه واحد يعطيهم شوي سمن وذاك طق على أهلي شف إن كان هم يبون شي أو يحتاجون شي عطهم فلوس وأنا لاجيت أعطيك يقول هو من ضمن اللي هم وصوا بعد – الشاعر هذا الشاعر اسمه ( جديع بن سودان العنزي ) يقول جديع قمت أنا وصيته قلت من فضلك تكفي مر على أهلي وشف أن كان يبون شي وإن ما لقيت أهلي في بيتي أنا اللي وصفته لك تلقى بيت عنه شوي في أسفل السوق هذا بيت أهلي تقلى أخواني قل لهم يسلم عليكم وأنه بخير وصحة وطيب ولاعندي خلاف ويسأل ويقول وشلون الأهل وعطني أخبارهم وعلومهم , قال : زين .
جاء المرسال ذا وبعض المرات المرسال يصير ما هوب حكيم يصير الله يهدينا وياه عجل أو غير مبالي المهم طقق عليهم كلهم واعطاهم الشي على عجله لأنه حريص على شغل الأمير اللي مروحينه له المهم طق على بيت جديع وإلا ما عنده إلا الغبار مغبر عند باب السوق عرف أنه مابه أحد راح لإهله وطق عليهم كيف الحال ؟ طيبين ؟جديع طيب ويسلم عليكم ها وش لون العلوم ؟ قال : أبد ترجع لمه ؟ قال : أيه , وتقول أمه علمه أن مرته أظنت وجابت وليد وأن الوليد هذاه عندنا بلشين به ندور من يرضعه قال : أمه وراء ما ترضعه ؟ قالت : قدر الله عليها وتوفت أثنا الوضع أنا الله قال : الله يجبر عزاكم , لمهم عرف الهرجه وأنه زوجته توفت وإن الوليد ذا بلشين به يبون يدورون له من يرضعه . رجع عليهم عاد هذا متى وصلهم يالله عقب ثلاثة أيام لان محلهم بعيد ما فيه خطوط مزفلته من أول تغاريز ورمال ومادري ويش المهم جاهم في الليل وهو يوم جاهم والاه منعفس ومغرز يجي له ثلاث أو اربع مرات ولا عاونه أحد ومتبهذل ومنغث وجو لمه في الليل يسألونه كل يمسكه مع جهه ها ويش صار على ذا ويش صار قال يالربع أبي اعلمكم أنت اهلك يسلمون عليك وأنت أهلك يقولون لك كذا وانت أمك مصخنه وذاك أخوك الصغير إنحاش عنهم له يومين يدورونه وإلا الأخبار كل اغلبها مهيب زينه قال جديع وأنا قال انت بعد زوجتك ما تت الله يغفر لها وير حمها وإلا يوم طقه بها العلم يومه يروح ما فيها الا العافيه , المهم يالربع يقول جديع ما نمت ذيك اليله الله لا يعيده لا هو ولا علمه ! ليته بس مخليه للنهار يقول هالك الليلة أن طالعت هالدله ذي تصورت قدامي المره وإن طالعت الفنجال هذا تصورتها قدامي وأن رحت يمين يسار وإلا كل ساعه أشوفها يالله غربله يالله يوم يقولي هالعلم في الليل – الحاصل يقول من جاء الصبح علموا طبعاَ الأمير وتأثروا كل الربع كل قال لي أحسن الله عزاك لكم إلى الان وأنا منعفس بين المصدق والمكذب ويقول جينا نفطر ما اسفهليت ألا حولنا جبال وظلعان يمين ويسار وكل ساعة اعدي لي في ظلع واروح في ظلع ويقول حس الأمير اللي أنا معه أني ما أجلس ولا يمسكني مكان قال جديع , قال نعم قال شف السيارة الثانية تبي تروح للماء أركب مع راعي الوايت الين تقدمك شوي ورح لهلك تأكد منهم وسلم عليهم وتطمن قال الله يجزاك خير ياطويل العمر, المهم وصل أهله عقب يومين وصلهم مسيان ويقول يوم وصلت هناك وجيت للبيت وقبلت على بيتي وافتحه وإلاه مغبر ويقول واروح لم غرفتي أنا وياها وإلا يوم كهت على ريحه الغرفه فيها ريحان وطيب وذا يقول أتذكر ريحتها يقول يوم طالعت وإلا هذي ثويباتها معلقه وغريضاتها منا والمواعين بعضها ما غسل ويقول وأنا انعفس ما عرفت اقعد بها البيت ابد أجي لأهلي وألا أمي تقول ابشر بالعوض إن شاء الله ما يكون إلا الخير والوليد ابشرك بخير يحاولون هم يطمنوني وأنا ماش يقول قعدت عندهم يومين الين تدهدهت الأمور ورجعت لمعزبي اللي أنا معه ويوم وصلتهم هاه , وشلونك ؟ قال : أن شاء الله طيبين يقول إلى هالحين إذا جو يفطرون والا يتغدون ما ارتاح بالي يقول ما ادم أني بالنهار وأنا مسفهل لكن لا جاء الليل الله يجيرك قال الحزن اشتد بيديك ( بليس الله يعيذنا منه يوسوس لك ) يقول رقيت إما على ظلع منا والا منا وقعدت فيه إلين الصبح ويوم جاء يوم حول الفجر وأنا اعدي في هذاك الرجم جبل جنبنا وأبطيت فيه يقول أثر الأمير فقدني وجاء لي هنا وأنا في رأس الجبل يقول يوم جيت للرجم هذا وإلا عنده قبر وهذا اللي حزني زيادة تذكر قبرها يوم شافه ذا القبر لانه يوم سأل عنها يوم يجيهم قالوا تراها توفت وتطلبك الحل وإن حنا قبرناها , في هالمقبره هذي شف قبرها إلا دخلت شفه ثاني قبر على يمناك يقول وفعلاَ رحت شفت القبر وشفت ترابه جديد ونصايبه جديده وعرفت أنه هذا هو يقول اقلب القبر وإلاه حصي مرصوص ما يفيدني القبر بشي رجعت يوم رجع عاد وعدا في هالجبل اللي هو فيه جاء عقب ما جاء معزبه وجاء عند الرجم وشاف القبر هذا ذكره وقال الابيات هذه :





[poem=font="Simplified Arabic,4,darkblue,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يا رجـم عديتك وعــــدابي البيــــن = والقلب في رأســك تبيـــح كنينــــه
الله لا يسقــي مفــاليــــك عــاميــن = ذكرتني راع الطبـــوع الحسينــــه
مرحوم ياللي جهزوا يـوم الاثنيـــن = العصر من فوق النـــعش شايلينــه
رصوا على منبوز الارداف سافين = رصــوا عليــه اللبــن وموحدينــــه
ياليت كفي حــدر خده عن الطيــن = والكف الآخر فـــوق صافي جبينــه
وياليت يومي قبل يــومه بيوميـــن = ليت المــــرض من بيننا قاسمينــــه
لا ياحياة الشر عقب اريش العيــن = لاواهنــي مــن شــافنــا مقتفينــــــه
شربت أنا من صافي الغبن كاسين = هـــذا معـاليــقــي وكبــدي متينــــه
يـاونتـــي ياشـين فـــرقا المحبيــن = وياعـين ياللــي من فــراقه حزينــه
يا سهر عيني والمخاليق ممسيــن = وياقلبــــي اللي مثـــل دق المكينــــه
قالوا حزين وعشرك الـيوم ثنتــين = قلت اعـذروني زين الاطبــاع ويــن
قالـوا تخيـــر بالبنـــي المزاييــــن = قلت العـــذارى غيـــرها منكرينــــه
قالوا عجوز وقلت أنا وفالكم شيـن = الخمس والعشـــرين قيـــمه سنينــــه
وجدي عليها وجد راعي بعاريــن = ممس ( ن ) خلاوي والسرق حايفينه
هن رأس ماله وشلعوهن شياطين = واصبح على الجـــره يفــرك يدينـــه
أو وجدي من لحقوه طلابة الديـن = صكــت عمــي القــايلـــه مطلبينــــه
لحقـوه عكفان الشــوارب مغليــن = وتشـا وحــــوه بكــل شلفـــاَ سنينـــه
هـذا وصلــوا عـد نبت البساتيــن = علــــى نبــــي كلنــــــا تــــابعينـــــه [/poem]



يوم قال القصيدة هذه ونزل ولاحظ الأمير قال هاه أنت راقي ذا الرجم كنك تونون وتومي بالسبحه وش عندك أكيد أنك قايل شي قال والله يا طويل العمر مثل ما تخبر الرجال اللي فاقد زوجته وهذا لابد أنه يقول واسمعه القصيدة قال ابشر بالعوض ويقول جزاه الله خير ما قصر وساعدني , وعقب ما دخلنا و اوفينا مده تزوجت لكن ماش إلى هالحين مالقيت عقبها حريم سنعات عقب هاك الاوله .
يقول عاد تزوجت لي وحدة واثر الوحده هذه لها عمه وتخيط ثياب وشارطين علي قالوا : ترى تروح لعمتها تخيط ثياب عندها وتقعد عند عمتها وتشتغل معها يقول قلت ما يخالف أن كانه الضحى وقت فراغ وذا بعد تروح توسع صدرها عند عمتها إلين اصير موجود المهم لا أجي للبيت إلا هي فيه وغداي زاهب وعشاي زاهب وكل شي قالوا ابد مالك إلا الخير يقول مره مرتين ثلاث كل ما جيت وإلا ما هي في البيت يامره وين أنتي ؟ قالت عند عمتي إنا الله يقول يوم جاء هاك اليوم ويجي قبلها الظهر ويقعد إلى العصر ما جت وهو يبي غداه يقول وإلا يوم جت طابخه وآيا عمتها غدا وجايبه معها شوي ويقول يوم طقت الباب قال هاه قالت جايه من عند عمتي قال على يسراك على يسراك ما عاد والله تدخلين البيت ( بلاك والله ما حبيتها مسيكينه ) كيف ؟ قال: ابد خلاص عودي يقول عاد ..



[poem=font="Simplified Arabic,4,darkblue,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
حذرى عن اللي لهــا عمـــة = لو تنثر العطــر بالجيبــي
دايــــم عسـى ما لها رمــــة = تهرف كما ياهرف الذيبي
ألا قلت علم ( ن) ماهي لمه = تقــول أبا انحر معازيبــي
بارودي اللـــي بهـــا زمـــه = حــلاله القــوم وتصيبـــي [/poem]

وسلامتكم

[غريب الدار]

البدو واللي بالحضر نازلينا &&& كلن عطاه الله من هبت الريح






بداح العنقري كان من امراء ثرمداء ... وكان رجل تاجر ... وكانوا يجونه البدو كل سنه يشترون منه بالدين اغراضهم وحوائجهم وكان رجل آمين وخلوق وكريم وصاحب مروه وشهامه ... وكان يديّن اللي يشترون منه الي السنه اللي بعدها يجون يشترون منه ويعطونه فلوسه الاوله ....

وحدى السنين جاه احد اخوياه يشتري منه وكانت معه بنته مزيونه .... المهم ان بداح رحب بهم واكرمهم واشتروا منه ورجعوا لديارهم بالباديه .... فقرر بداح الا ان يتزوج بنت صاحبه ...

وفعلن عقب مامشوا منه وبعد كم يوم من مشيهم .. ويوم هقا انهم وصلو ديارهم شد على فرسه ولحقهم ... ايام وليالي لاوالله الا هو واصلن عندهم .... فرح خويه بالحيل وهلا به واكرمه ... وثاني يوم قال بداح لخويه انا جايك طالب ايد بنتك هيا ... فقال ابرك الساعات وارخص لي اخذ راي البنت ... فراح الابو ونشد بنته وبداح يسمع حيث ان صوتهم كان مسموع .. وقالها يابنتي بداح العنقري جاي يطلبك حليلتن له وش تقولين ؟؟ قالت البنت : هذا حضري .. خيال تصفيح مايصلح لي ولا أصلح له .... سمع بداح كلام البنت ... فجاء الابو مستحي وماتكلم .. قاله بداح ماله داعي الحيا والزواج قسمه ونصيب .. مير انت بيض الله وجهك وارخص لي هالليله ابي انام والصبح ابي امشي لاهلي ...

المهم جاء الليل وعجز لا ينام بداح من القهر من اللي سمعه انالبنت ماتشوفه شي وانه ماهو شجاع ولا به خير .. فتمنى بس لو يجي موقف يقدر يثبت به وجوده ........

المهم يوم اصبح الصبح مع الفجر .. يوم صاح الصياح .... الغزو الغزو .... اثاري قبيلة ,,,,,,, غازين وماخذين حلالهم .. فتفازعت القوم والحقوا الفضول وبداح قاعد ايتقهوى ماتحرك ابد (( لان الضيف مايلزمه شي )) فجته البنت هيا اللي كان يبيها تناظر له باحتقار وتقول حضري خيال نظره ..... حضري خيال نظره .... تعني انه بس مظهر ومحتقرته لانه مافزع مع القوم...........

المهم وهم يلحقون الفضول واتشابك السيوف ويعجزون اهل الحلال لا يفكون حلالهم وهم يرجعون حول الضحى منكسرين وخايبين ولا ردوا شي .... وبهكاللحظات والناس والحريم كله طالعه تناظر الحال فقام بداح يوم شاف ان معازيبه انكسروا وقدام الكل والبنت تشوفه وركب فرسه وخذا رمحه وطنب يم ,,,,, يبي يرد الحلال لحاله ..... الناس استغربت والبنت اندهشت ... وهو يلحق ,,,,,, وادخل بينهم واذبح واذبح والبخيت اللي نجا .. وهو يرجع بالحلال حروة العصر لحاله ... وكانت الناس تستقبله كله .... واول ما اقبل يم الديره ومعه الحلال اركضت عليه هيا وقامت تهلهل مثل انه تعتذر منه وقابله الزواج به .... فركز رمحه عندها وقال :



[poem=font="Simplified Arabic,4,darkblue,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
الله أحـد يامـا غزيـنـا وجيـنـا = وياماركبنـا حاميـات المشاويـح
ويامـا علـى اكوارهـن اعتليـنـا = وياما ركبناهن عصيـرن مراويـح
ويامـا تعاطـت بالهنـادي يديـنـا = وياما كسبنا من حـلال المصاليـح
وراك تزهـد يريـش العيـن فينـا = تقول خيال الحضر زين تصفيح ؟؟ !!
الطيـب ماهـو بـس للضاعنيـنـا = قسّم علـى كـل الوجيـه المفاليـح
البـدو واللـي بالحضـر نازلينـا = كلن عطـاه الله مـن هبـت الريـح
يوم انجمر رمحي خذيـت السنينـا = واودعت عنك الخيل صم(ن) مدابيح
هيا عطينـا الحـق .. هيـاعطينـا = وان ماعطيتيـنـاه والله لا صـيـح
لاصيح صيحت من غدالـهجنينـا = والا خلوجـن ضيعـوه السواريـح
ياعـود ريحانـن بعـرض البطينـا = ومنين ماهب الهوا فـاح لـه ريـح
يابو نهيد(ن) تقل فنجان صينا = والا كما بيضن للمشقا ذوابيح
لاخـوخ لا رمـان لاطلع تينـا = ولا مشمش البصرة ولا هن تفافيـح [/poem]



ويقولون عقب القصيده مشى وخلاها ماتزوجها فقامت هيا من زود القهر وحطت الرمح بصدرها وماتت قهر انها عييت عليه وهو عيا عليها ...


وسلامتكم

[رهينة الشوق]

[frame="3 70"]السلام عليكم ..


مساء الخير .. والشعر والقصة ...


كان ودي اشارك بس مادري ما عندي قصة فيها شعر .. fght

وشكل القصص اللي انت حاطها .. ممتعه ...


تدري بروح اجيب كتاب ( شعراء عنيزه الشعبيين ) وفيها ابوي كاتب قصائده هناك وكل قصيدة لها قصة ..

بحاول انقلها لكم ...


مجهود رائع .. من مشرف مميز ومتميز ...


ffgtya [/frame]

[غريب الدار]

[glow="330099"]

مساء النور اختي رهينة الشوق



أتمنى أن تتحفينا بمالديك من قصص وقصائد

فإختيارك وذوقك الجميل كما عهدناه سيثري لنا موضوعنا

ننتظر عودتك ومعك من إبداعات شعراء عنيزه

نحنا بإنتظارك على أحر من الجمر

تحياتي وشكري وتقديري رهينه

ألف شكر على طلتك

لاعدمتك

[/glow]

[غريب الدار]

قصة وقصيدة الشاعر أبو زويد السنجاري




هذه قصة رواها الشاعر رضا طارف الشمري وهي من قصص الشاعر الشهير خلف أبو زويد السنجاري من قبيلة شمر ويعد من فحول الشعراء الشعبيين، ويعتبر من أحسن من يصوغ القصيدة، بالحكمة وجزالة اللفظ. وأكثر أشعاره في وصف الجيش، ومدح الشيوخ، وإذا تتبعت أشعاره تجد غزله قليلاً، ولكبر قيمة الشعر والشاعر تجدهم يتتبعون انتاجه، ويتسابقون إلى حفظ القصيدة متى ما قالها ويلاحقون الشاعر بالمجالس، لأن الشعر في ذلك الوقت هو صحافتهم وإذاعتهم، فما كان مذموماً جنبوه، وما كان مفيداً ديناً ودنيا أخذوه.

أبو زويد هذا كان يوماً من الأيام يسقي "حلاله" من خَبراء عندهم فيها ماء، ومن الصدفة أنه كان على تلك الخبراء مجموعة بنات يأخذن ماء وكان من ضمنهن فتاة اسمها "خزنة الفضيل" عليها جمال باهر، وقالن البنات هذا الشاعر الذي كل قصائده في الجيش نريد أن نحاول أن نجعله يتغزل، فعارضته المذكورة لما وهبها الله من الجمال، فابتسمت له وداعبته وقالت "يا بو زويد " قال: نعم "قالت" يقولون عنك إنك ما تقصد بالنساء فلماذا؟ ويقولون الناس أيضاً قلبه ميت، فكيف يكون هناك من يرى مثل هذا الجمال ولا تتحرك شاعريته؟ "فبهت، ولكن بساعته تحركت قريحته بالأبيات التالية:



[poem=font="Simplified Arabic,4,deeppink,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
القلب يبرم بالهواجيـس ويديـر = من جادل جتنا طوارف اطروشـه
قام الفهيم وصخر القيل تصخيـر = قرايض مـا ولفوهـا الدحوشـه
والله يالولا باقي الناس لا اشيـر = اخاف من نـاس تنثـر اقفوشـه
لااقول عجـوا بالبنـي الغناديـر = وعزي لمن له عشقه ما يحوشه
مصور منبوز الأرداف تصويـر = تصوير وشحا نايشتها اعطوشـه
لا بالقصار ولا الطوال الطناطيـر = ولا بالغلاظ ولا دقـاق نشوشـه
خده من الموت الحمر به دواوير = كن الصعيوي دورجن في نقوشه
خده عفر واصفر كما ذوبة الكير = والخشم مصقول بلمـات هوشـه
والردف شط امتيه له على ضير = امه جضور وراعية ما ينوشـه
وإلا يشـادي نابيـات الحماريـر = عقب الهبوب ونايشتها رشوشـه
وثنيوات التـرف غـر مغاتيـر = من شافها يسقم على اردا معوشه
والعين عين اللي بروس العناقير = نجل سواد عيونها مع ارموشـه [/poem]



وسلامتكم

[غريب الدار]

أول من قال هذا المثل والله العالم هو الشاعر الفحل (سرور بن عودة الاطرش)

شاعر فحل ولد عام1200هـ وتوفي عام 1280هـ تقريبا يسكن في قصر له يسمى

مشرف../ شمال وادي الرمة يبعد عن مدينة الرس 20كم تقريبا اشتهر سرور الاطرش

بجودة الشعر وبقوة البصر ويضرب فيه المثل بقوة بصره زمان مستلقيا في الصحراء

بجواره اخته (سراء)فقال هل ترين الغرانيق وقصده اختبارها فرفعت رأسها ولم ترى

شيئا فقالت اين هي من (بنات نعش).!!؟ وكانت ترى النجوم!! فضحك وعرف انها رأت

ما رأى وهي النجوم ويروى له من القصص الكثير الكثير اما قصة المثل..

(( (( الشيب مابه عيب ))))



فيقال بأن أحدى النساء تمنت أن ترى سرور لشهرته فقالت لصاحب دكان اريدك

أن تخبرني عندما يحضر اليك الشاعر سرور الاطرش فلما حضر عنده في احد

الايام أرسل التاجر اليها ولده.وقال قل لفلانه بأن حاجتها عندنا فلما اخبرها الولد

جاءت الى المحل وقد ظهرت علامات الشيب على لشاعر سرور . فلما رأته قالت

انت سرور قال نعم قالت ماظنيتك شائبا قال ( الشيب مابه عيب)..

ثم ارتجل الابيات التالية:



[poem=font="Simplified Arabic,4,firebrick,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يازين شفني لا توصي وصايا = مادام كلٌ حاضر قل ونا أقول
عذربت شيبي ياجميل الحلايا = لابد مايبداك مع كل مجـدول
يبدأ بشقرٍ مثل عصم الروايـا = عليه من شغل اليمن تل وتلول [/poem]



الى آخر الابيات التى قد لايجيزها النشر بعد ذلك اعتذرت بأنها لا تقصد تقليل

قيمة كبار السن وما أكثر مايحصل على شاكلة هذه القصة..


وسلامكتم

[كل الفخر رساوية]

قصة اعتقال راكان بن حثلين



كان الشيخ راكان بن حثلين شيخ العجمان انذاك قد أقضع مضاجع الاتراك وبلبل افكارهم ولم يهدأ لهم بال حتى قبضوا عليه وأخذوه مخفوراً الى بلادهم وسجنوه فبداية القصه هي أن لراكان مكافأه يستلمها من ابو عوده وكيل حكومة الاتراك في الاحساء ، لان العجمان يحمون منطقة الاحساء من القبايل ........هذا في الصيف .

وفي الشتاء يرحلون طلباً لربيع ، وعندما استقرو العجمان في البر ركب راكان مع ستة من رجاله وذهبوا إلى الاحساء ونزلوا عند ابن عوده ليوكلوه على استلام مكافأتهم، وكانت الحكومة التركيه طلبت من ابن عوده ان يخبرها بوصول راكان ، فلما اعلمها ذلك الجبان ارسلت له قوة أسرته فأرسلته الى استانبول وفي اثناء مسيره بمنطقة الاحساء مر ببعض البنات اللي يحطبن من بنات العجمان وال مرة وقد عرفنه فقال راكان موصياً لهن:



[poem=font="Simplified Arabic,4,purple,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
سلام عليكن كلكن ياحطاطيب = الله يساعد كلنا في نويه


بنات لام لاتجن القصاصيب = وباليسري لاتدخلن في حويه [/poem]



اما جماعته الستة فسم ارسلوه الى البحرين وقسم ارسلوه الى ايران.

فلما وصل راكان الى تركيا وضعوه في مكان بعيد عن المدينه ووضعو

عنده رجلاً يصنع له القهوة وبعض الخدم لخدمته ومن بينهم السجان

حمزة الذي طلب من راكان ان يحدثه عن رحلته عن طريق البحر وكم

استغرقت الرحله من مده فقال راكان :



[poem=font="Simplified Arabic,4,purple,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
حمزة مشينا من ديار المحبين = الله يرجعنا عليهم سلومي


مشوا بنا العسكر لدار السلاطين= في مركب جزواه ترك ورومي


عشرين ليل يمة الغرب مقفين = ماحن نشوف إلا السما والنجومي


والنوم يامشكاي مالاج في العين = والقلب ياحمزة تزايد همومي


من الخداعة واحتيال الملاعين = هيهات لو اني عرفت العلومي


هيا اركبو من عندنا فوق ثنتين = وخلوا نجايبكم مع الدو تومي


لازوعن بالوصف مثل القطاتين = تبغى الشراب ولايعنها السمومي


اليا اصبحن كنهن جريد البساتين = نحال من كثر الحفا وارثومي


تلفي على ربع عساهم عزيزين = اهل الشجاعه والكرموالعزومي


ربعي ضنا مرزوق بالعسر واللين = لطامةٍ للي عليهم يزومي


عجمان لا رد البرا للمعادين = حريبهم من همهم ماينومي


يوم الخيانة ليت هم لي قريبين = من فوق زلبات تبوج الحزومي


وليا تعلوا فوق مثل الشياهين = مركاظهم يشبع وحوش تحومي



نوب سلاطين ونوب شياطين = وكم شيخ قومٍ توهم مايقومي


يالله ياقابل سوال المصلين = يا اللي له التقدير في كل يومي


انك تثبتنا على الحق والدين = وانك تروف بحالنا يارحومي


وعسى مقابيل الليالي لنا زين = من عقب مانوسن العلومي


وصلوا على اللي وضح الزين والشين = وشيد منار الدين واعلى الرسومي[/poem]


وسلامتكم

[غريب الدار]

أول من قال هذا المثل هو الشاعر والفارس أمير البلقاء (نمر بن عدوان)
والذ تسبب في وفاة زوجته (وضحاء) عن طريق الخطأ.والقصة معروفه
لكنه خزن بعدها حزناً شديداً جسد هذا الحزن في مراثيه لتلك الزوجة
ويقال انه تزوج تسعين بنـتاً ممن تسمى وضحاء لعله يجد صفاتها
في إحداهن ..وأن كان العدد فيه بعض المبالغة إلا ان القصة
صحيحة وكان أكبر ابنائه عقاب وأصغرهم سلطان حيث
يقول نمر.....,




[poem=font="Simplified Arabic,4,gray,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
ياجديع بن قبلان يامفني الكـوم = فقد الحبيب امصيبتي ياابن قبلان
ابكيه أنا وعقاب يوم بثـر يـوم = وجار الزمان وباغت اليتم سلطان [/poem]





وبينما نمر وابنه عقاب يجلسان ....تحت.. ظل.. شجرة في ......الصحراء رأى
عقاب أثار الحزن على وجه أبيه ....فأراد أن .....يخفف عنه..... أو يداعبه
فقال ياأبي جميع النساء. اللاتي تزوجتهن .......أحسن...... وأجمل من
أمي الا تعلم أن أمي يوجد بها.. عيب..... لم يوجد..... بنسائك اللاتي
تزوجت.فقال نمر....... وماهو هذا العيب؟ ...وكأنه يستهزئ بأبنه
فقال عقاب أمي عندما تستلقي .......على الارض في الصحراء
وأنا ألعب عندما كنت..... أدحرج الحنظل (الشري) فتمر من
تحت ظهرها فقال نمر .....0(هذا بلى أبوك ياعقاب)فصارت
مثلاً..وهذه الصفة لا توجد في كل امرأة وهي من صفات
جمال المرأة وتفسير ذلك قول الشاعر (عبدالله العلي الحرير)
أحد شعراء الرس رحمه الله



[poem=font="Simplified Arabic,4,gray,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
كن عوده يوم يمشي مطرق الريحاني = بس كتف وردف والمثناة تطوي ثوبه[/poem]





اما قصيدة نمر بن عدوان في رثاء زوجته :



[poem=font="Simplified Arabic,4,gray,bold,italic" bkcolor="transparent" bkimage="" border="none,4,gray" type=2 line=0 align=center use=ex num="0,black"]
البارحه يوم الخلايق نياما = بيحت من كثر البكا كل مكنون
قمت اتوجد وانثر الماء على ما = من موق عين دمعها كان مخزون
ولي ونة من سمعها مايناما = كني صويب بين الاضلاع مطعون
والا كما ونة كسير السلاما = خلوه ربعه للمعادين مديون
في ساعة قل الرجا والمحاما = في ما يطالع يومهم عنه يقفون
والا كما ونة راعبية حماما = غاد ذكرها والقوانيص يرمون
تسمع لها بين الجرايد حطاما = من نوحها تدعي المواليف يبكون
والا خلوج سايبه للهيما = على حوار ضايع في ضحى الكون
والاحوار نشقوله شماما = وهي تطالع يوم جروه بعيون = يردون مثلهوالظوامي سياما
ترزموا معها وقاموا يحنون = والا رضيع جرعوه الفطاما
توفت امه قبل اربعينه يتمون = عليك ياشارب لكاس الحماما
صرف بتقدير من الله ماذون = جاه القضا من بعد شهر الصياما
صافي الجبين بثاني العيد مدفون = كسوه من بيض الخرق ثوب خاما
وقاموا عليه من الترايب يهلون = راحوا بها حروة صلاة الاماما
عند الدفن قاموا لها الله يدعون = برضاه والجنه وحسن الختاما
ودموع عيني فوق خدي يهلون = حطوه في قبر غطاه الهداما
في مهمة من عرب المات مسكون = ياحفرة يسقي ثراك الغماما
مزن من الرحمه عليها يصبون = جعل البختري والنفل والخزاما
ينبت على قبر به العذب مدفون = مرحوم ياللي مامشى بالملاما
جيران بيته راح مامنه يشكون = ياوسع عذري وان هجرت المناما
ورافقت من عقب العقل كل مجنون = اخذت انا واياه سبعة اعواما
مع مثلهن في كيف مالها لون = والله كنه ياعرب صرف عاما
ياعونة الله صرف الايام وشلون = واكبر همومي من بزور يتاما
وان شفتهم قدام وجهي يصيحون = وان قلت لا تبكون قالوا علاما
نبكي ويبكي مثلنا كل محزون = لا قلت وش تبكون ؟قالوا يتامت
قلت اليتيم اياي وانتم تسجون = قمت اتشكا عند ربع اعداما
وجوني على فرقا خليلي يعزون = قالوا تزوج وانس لامه بلاما
ترى العذارى عن بعضهم يسلون = قلت انها لي وفقت بالولاما
ولو جمعتم نصفهن مايسدون = ما ظنتي تلقون مثله حراما
ايضا ولا فيهن على السر مامون = واخاف انا من غاديات الذماما
اللي على ضيم الدهر ما يتاقون = او خبلة ما عقلها بالتماما
تضحك وهي تلدغ على الكبد بالهون = توذي عيالي بالنهر والكلاما
وانا تجرعني من المر بصحون = والله لولا هالصغار اليتاما
وخايف عليهم من الدجه يضيعون = لقول كل البيض عقبه حراما
واصبر كما يصبر على الحبس مسجون = عليه مني كل يوم سلاما
عليه مني كل يوم سلاما = عدة حجيج البيت واللي يطوفون
وصلوا على سيد جميع الاناما = على النبي ياللي حضرتوا تصلون[/poem]


وسلامتكم

[رهينة الشوق]

غريب ....


للاسف .. 25-* ما لقيت الكتاب .. بس بدور عليه .. الخميس والجمعة ...


بعدين ..

ايه يا عمي كذا نقدر نقرأ المواضيع وهي منسقة ومرتبه .. fdrh




تحية .. لجهودك الجبارة ... vbgg