LinkBack أدوات الموضوع انواع عرض الموضوع
قديم 18-08-2006, 10:46 PM   رقم المشاركة : 1
معلومات العضو
 

إحصائية العضو








افتراضي ...بـــــــــــــــاقي فــــــــــــــــرح......<<< روايه سعوديه ....

السلام عليكم ورحمة الله وبركاته...

هانا اقدم بين ايديكم...


.....بــــــــاقي فـــــــرح....

قصه راااائعه بقلم المبدعه




((اميـــــرة الاحســـــاس))



















التوقيع

|● ياحلم وين المشكله لو تحققت ~ }
آخر تعديل % دنيـا الـولـه % يوم 18-08-2006 في 10:57 PM.
قديم 18-08-2006, 10:49 PM   رقم المشاركة : 2
معلومات العضو
 

إحصائية العضو








افتراضي

۩۞۩๑ باقـــــــــي فــــــــــــــــــــرح ๑۩۞۩๑


"...لو نسيت العمر مانسى دمعتك...صرخة ذابت من عيونك ..دمووووع"


ذات مساء ..تراقص جوالي معلناً ان احداً يطلب محادثتي.. انها هيفاء بنت العم الحبيبة ..وبعد السلام والسؤال عن الاحوال ..احسست بصوتها تخنقه عبرات ودمعات.. فسالتها ماخطبكِ يافتاة.. وياليتني لم افعل!!


اغمضت عيناي ..امنع دمعي الذي سرعان ماتجمع في مقلتي...ارتعشت يداي..لااكاد اصدق.. وهمست بضعف..!!
خلود:.... اطلّقـــــــــت !!!
هيفاء: للاسف ياخلود ..عمتي هدى تطلقت ....
قاطعتها: وليــــــــــــــــــــه؟؟
هيفاء: مدري..تووه وصلني الخبر ..بدون اي تفاصيل..
حسيت بالم وقهر..
صدمني الخبر..ياالهي ..الهمني الصبر
حدقت في الفراغ من حولي..وانا اسال نفسي وهي تسألني
وليه وش السبب!!

جلست على سريري ..احبس عبراتي ..التي ضاق بها صدري..
هدى 26 سنة ..عروس .. مامر ثلاثة شهور على زواجها الاسطوري..كانت عنوان السعادة..ماانسى ليلة زواجها وهي تضغط على يدي وتقول:"خلود..اقرصيني..لااصير احلّم..من كثر مااتمنى هاللحظة اللي تجمعني بخالد"...شفت الفرح يغرد حول ازهارها المتفتحة .. حبته وضحت بكل شئ بس عشان تتزوجه..معقول عقب هذا كله…تحمل لقب ..[[مطلقة]]..

ليه ياخااااااااااالد طلقتها..والله لو لفيت الارض كلها ماتحصل زيها…
حطيت يديني على وجهي ودفنت راسي على وسادتي ..واطلقت لعبراتي ودمعاتي العنان..






^
^
^
^
^
^
بعد مرور سته شهور على طلاق هدى

رميت الرواية اللي بيدي..يوه باااااايخة ومملة..هالحين من صدقها هيفاء عاجبتها ..فكرتها مررة مستهلكة.....هيفاء هذي بنفس عمري..افكارنا متقااااااااربة ..طبعا الا بهالرواية ..اهتماماتنا ..اشياء كثيرة تجمعنا... كلنا هالسنة اخر سنة ونتخرج ...الله متى يجي هذا اليوم؟؟
نقزت من سريري..فكيت شعري..انساب على ظهري بسرعة ..تاملته ..والله ودي اصبغه..اقصه؟؟ ..لاحرام.. عاش معي كل عمري..وشهد كل لحظاتي بحلوها ومرها..لفيته ورفعته بشباصة..
فتحت علبة المكياج..وااااااااو ...مهووووسة باي شئ اسمه تجميل..
من زمااان وانا نفسي اضبط الكحل السموكي..فتحت اثمي واناارسم الكحل..لماخلصت ..تأملت نفسي…صدق والله حلوووووووووو…رفعت الماسكرا كاخر لمسة ..الا طارت من يدي..لما رن جوالي ..حطيت يدي على صدري وانا اسمّي ..

اووه هذي عمتي هدى …
هدى: الوووووووووو…
خلود: يا هلا بالغالية..والله سبقتني كنت بدق عليك
هدى: يووه ياخلود ..ماطلع عذر جديد ..كل مرة ادق عليك تستقبليني بهالعبارة ..عالعموم وش الاخبار؟؟
خلود: ياويلك من ربي يالظالمة..دايما انا اللي ادق عليك..بس اني..مشغولة هاليومين
هدى: وش هالشغل ياحافظ…لايكونون عينوك رئيسة تحرير على غفلة…
خلود: صدق بااااااايخة ..وراي الف شغلة..
قاطعتني : ايوووووه هاذي خلودوه…
خلود: خلصيني وش تبين…
هدى: ابدا ..سلامتك ..ابي تنزلين اعلان بجريدتكم ..مطلوب زوج لمطلقة...

سكت..مدري وش ارد ..ياربيه ..سالفة الطلاق على لسانها خمس وعشرين ساعة..
كل ماطق عود..قالت ..مطلقة
خلود: ممنووووووووع هالاعلانات ..بجريدتنا خخخخخخ
هدى: اصلا لو في جريدتكم خير ..كان ماعنستي للحين ههههههههههههه

ضحكنا وسولفنا ..لكن كلامها لازال يرن في اذني ..مو كلامها عن العنوسة لا ادري بها تمزح ..لا طريقة كلامها عن نفسها ..وانها اصبحت غير مرغوبة بمجرد ماتطلقت....

رفعت الماسكارا..بكمل ..اخر لمسات الفن السموكي..
طخ طخ طخ..
يووه من هذا اللي يطق الباب..حشى بينكسر..
خلود: مييييييييييييييييييين؟؟
نواف: حضرة صاحب السمو الامير ..نواف بن سعود..حفظه الله تعالى
فتحت الباب ووانا ابتسم..نواف اخوي له معزة خااااصة
خلود: اشهد انك اميرنا وتاج رووسنا ..نعم؟؟
نواف: اختي خلود ..حبيبة قلبي ..و
خلود: هااات من الاخير وش تبي ؟؟
نواف: ملزمة ماتبين مقدمة... اكيد؟؟ اوفرها حق اليوم الاسود..
خلود: الله لايقوله لااسود ولاغيره... وش تبي خلصني..
وانا قاعدة اهز الماسكرا بيدي...
نواف : يالله بقول وامري لله..هذا سلمك الله عندي بحث ..مطلوب مني بعد بكرى وانا ماسويت شئ ..ممكن مساعدتك يااختي الحبيبة..
خلود: اها ..قصدك ممكن تكتبينه وتطبعينه واذا خلصتي على مكتبي تحطينه!!!
نواف وبابتسامة رجاااااااااء: تكفين خلود...

نواف 18 سنة..ثالث ثانوي ..الولد الوحيد بيننا ..الدراسة شرق وهو غرب ..وكالعادة كل بحوثه ..اصبحت من مهماتي التي لاتقبل النقااااش

*****************

الخميس
الساعة وحدة الظهر
نجـــــود ..20 سنة

*****************


فتحت عيوني ...ورجعت اغمضها...ااااااه ...مديت يديني بكسل و الغثيثة خلود فوق راسي تلج......
نجود: خلودوه اطلعي برااا….خليني انااااااام...
خلود:انتي ماتشبعين نووم ..يالله قومي...تدرين الساعة كم؟؟
نجود: ان شاء الله مليون,,,انقلعي..ياربي الواحد لاويك اند يشبع نوم ولا غيره... حراام عليك امس مانمت الا الفجر…
سمعت خلود تتحلطم وهي تشيل علبة مكياجها اللي اخذتها امس من غرفتها ونسيت ارجعها ...طبعا اي شئ تفقده خلود ..على طول يكون بغرفتي !!

حسبي الله عليك خلودوه طيرتي النووووم عني

مدام النوم طاااار من عيني خلوني انتهز هالفرصة واكلمكم عن خلود 23سنة..
اختي الكبيرة والام الحنونة لهالبيت ..ايه لاتستغربون من شوي اهاوشها والحين امدحها لانها بجد اخت رحووم تضحي بكل شئ عشان خواطرنا ...بس حركاتها تغثني احياناً

ياااربيه..وش هالازعاااج وش هاللجه ,,,اكيد امه محمد صاحيه كلها ومابقى الا انا وهاتي على هالتهزئ من امي وابووووي خليني اقوم احسن لي..يووه ماصليت الظهر استغفر الله ......

دخلت الحمام ..توضيت ..بعدها صليت ونزلت تحت وزي ماتوقعت اختي مشاعل الخبلة .. 14سنة.. فاكه هالحلق وتضحك ...يالله صباح خير
والا العنز الثانية بشورة .. 8 سنوات
بشاير: نجود..صح النوووم..من زمااان خلصنا فاطرين.....
رديت من طرف خشمي: لاااااه …بشري امك.....!!
مشاعل وثمها مليان : كركركركركركراقول بشاير لقطي وجهك ههههههههههههه
بشاير تمد هالبوز: زين زين يالدبا.. تشوفين اذا ماقلت لامي
نجود: يمه خوفتيني تكفين… فارقي...عن وجهي

تلفت بالصالة مالقيت امي ولاخلود ,,هذولا وينهم
نجود: مشاعل وين خلود ...الحمارة قومتني وراحت؟؟
مشاعل: وش دراني ..؟؟ ..((وهي ترمي حبة زيتون بحلقها )) اساليني وين الفطور اعلمك ههههه؟؟
نجود: ..هذا اللي فالحة به ..بلع وبس .. ترى والله بتنفقعين ..
مشاعل: حد طلب رايك ؟؟ شحمي انا اللي شايلته مو انتي!!

ناظرتها ..وقمت رايحة المطبخ بشرب ماء ....قابلتني خلود لابسة وعلى سنقة عشرة والعطر يفووووووح منها......
نجود:الله الله ...عاوين ان شااااااء الله خلود هانم؟؟
خلود وبابتسامة:بطلع …عندي مشوار...عندك مانع؟؟
نجود:لا والله ومشاوير بهالقايلة ؟؟خير وين بتروحين؟؟
خلود وهي طالعة:معزومه على الغداء ؟؟ تحبين ترافقيني؟؟
وبعدين ضحكت وقالت: بنروح الاستراحة ....
استغربت: من بيروح ؟؟
لكن خلود ماردت شكلها ماسمعتني

غريبة استراحة يوم الخميس الظهر ؟؟ بالعادة نروح لها مع عماني وعماتي وجدتي بالليل ليه غيروا هالمرة..وانا ليش مهتمة اصلا ًماني رايحة..........

******************

بدرية ام نواف.. 45 سنة
2.00 ظهراً

******************


نزلت وانا اسكّر ازارير بلوزتي..ماعرف البس وانا معصبة ...يووووه حيل معصبني سعود .. عمره ماراح يعرف ...وشلون يتعامل مع مراهق زي نواف؟؟... كل شئ يقطه عليّ ..انتي اللي خربتي الولد بالدلال الزايد..وهو مايشوف نفسه مع بناته وشلون مدلعهم على الاخر....
شايل الدنيا ومو مقعدها.. ليش ..نواف نااايم بالاستراحة مع ربعه!!
طيب بتحبسه بالبيت..!! هذا مراهق بيروح ويجي حاله حال غيره...

بدرية: خلود يمه يالله خلي خواتج يجهزون ..ابوج بينزل هالحين فكونا من حنته..تراه حيل معصب..
خلود: حنا جاهزين ...بس مدري عن نجود توها مصبحة عمتنا..
ياربييه من هالنجود مو مجنني غيرها وابوها
بدرية: نجودوه ,,يالله عاد خلصينا قومي البسي... بنمشي الحين
نجود بدلع: امشوا وانا قافلة الباب؟؟
بدرية:..انتي ماتستحين على وجهج؟؟…عبالج تكلمين بشاير؟؟
نجود بحرج: يمه ..تراني مالي خلق توني صاحية ؟؟ خلوني اروووق شوي
بدرية: تروووقين؟؟ عشتوا .... قومي روقي بالاستراحة اللي بيرووق يقوم بدري عيوني .. شوفي خلود قايمة من الساعة عشر..و
قبل لااكمل كلامي.... سمعت ابو نواف يقول وهونازل: خمس دقايق اللي مو راكب والله لامشي واخليه…
بدرية: بنتك توها مارووقت .. يالله قومي بسرعة البسي وخلصينا!!
نجود: يمه مااااابي اروووح........
بدرية: ومن بيجلس معاج ..حنا مابنرد الا تالي الليل؟؟
ابونواف بكل هدوء والابتسامة على وجهه: نجود ياعيوني ترانا متاخرين ..قومي البسي بسرعة...
نجود: يبه والله عندي بحوث وواجبااااااات ومالي خلق..
انا عصبت خلالالالالالالالاص ..هذي ماتفهم !!..نقول تيس تقول احلبوه…
بدرية: اقولج قومي الحين البسي بنطلع ترانا متاخرين حيل ..
نجود: يمااااااااه والله مااقدر اروووح بحوووو.......
قاطعتها : لا.. محد بيجلس ويااج ..
نجود بضيق: ياربيييه والله حاله..بياكلني البس يعني؟؟
خلود: خلاص يمه انا اجلس معاها..
التفت لخلود: لاتفتحين علينا باب مسدود كلكن قومن وامشن .. امكن لولوة بتسأل عنكن وبنات عمكن وعماتكن وبعدين عندج بكرى الجمعة يكفيج تسوين كل اشغالج....
ابو نواف: يالله بروح اطلع السيارة ,,, لاتتاخرين علينا يانجودي
بشايروهي تتعلق برقبته: يالله بابا خلينا نروح ونخليهم يولون…
مشاعل وهي تلف شيلتها: ههههههه انتي لوعلى كيفك ماشمينا الهواء

واخيرا راحت نجود تلبس وخلود راحت المطبخ تجيب ترامس القهوة والشاي والحلى اللي هي مسويته والفطاير بس الغداء يسويه الطباخ بالاستراحة…
طلعت خلود وهي شايلة الاغراض بتعطيها سيتي الخادمة توصلها للسيارة ..ابتسمت لي..ااااااااه
خلود ...هذي مو بنتي وبس هذي اختي وصديقتي وكل دنيتي..
خلود هي اول وردة تفتحت بحياتي .... الله يوفقها ويرزقها ابن الحلال اللي يسعدها
لاتستغربون لهجتي ..انا من الشرقية ..
اااوه .. هذا ابو نواف يدق هررن ...ابروح اركب قبل لايحتشرعلي عاااد...

******************

الاسترااااااااااااااااحة
مشاعل
2.00 ظهراً

*****************


ووواااووو.. شئ بيعئد ...الجو غيم وبراااد وناااااااااسه تجنن الاستراحة بالنهار احسن من الليل..
.. شلت شيلتي وجدعت عبايتي على سيتي عشان تحطها بالسيارة.. واتلفت ابشوف من وصل من عماتي وعماني...يوووه هاذها امي لولوة وعصاها طالعة من الخيمة..رحت لها وحبيت راسها..
مشاعل: قوووة يمه ..وشلونك
امي لولوة: غزال يابنيتي ..وشلونكم ..وشلون ابوك وامك وخواتك؟؟
مشاعل: احسن ..نسيتي نواف ..نساك الموت يايمه
امي لولوة: هههههههه لا الموت موب ناسيني يابنيتي..مير يالله حسن الخاتمة..الا نواف هو الاول ..بس عساه جاي معكم ..معاد ينشاف من عطاه ابوك هالسيارة..
مشاعل:بعذره ..انتم سلموني سيارة مانتب شايفيني ولا بالاحلام...خخخخخخ
امي لولوة: الله لايقوله ..قاضين من اعمارنا يوم نخليك تسوقين!! هالحين وانتي تمشين ماسلمنا من حوادثك..يابنيتي
نجود: صدقتي يايمه...
عصبت مرررة..اويلالاه من يشيل هالعصا ويخبطه على راسها ..من زينها عاااد ..فرحااانة بهالجسم ..هالحمارة..ابتسمت بخبث
مشاعل: اه ..ودي بس يوم واحد اسوق..وبس حادث واحد اسويه ..وعقبها نفتح بابنا للعزاء..
خلود: بس خلاص انتن ماتستحن ..


انفتح باب السيارات ودخلت سيارة عيال عمتي شيخة ..الله واخيرا وصلت هنوفوه اابروح استقبلها ..خلوني اكلمكم عن.. امي لولوة وانا بالطريق..

ترملت امي لولوة من روميو<<عفوا جدي محمد(( مني ييرس اقووو)) مدري متى مات جدي لاني ماانولدت هذاك اليوم..
طبعا جابت ثلاث عيال وثلاث بنات<<العدل حلووو حتى بالخلفة
ثنتين متزوجات والاخيرة مطلقة <<طبعا مو كلهم بيدشون اجواء قصتنا..

عمتي الكبيرة شيخة مدري كم عمرها تراني ماولدتها ههههههههههههه
متزوجة من سليمان ال...<<مو لازم تعرفون هههههههههههه
وعندها ثلاث عيال وبنتين ..طارق ..مادري كم عمره يمكن 28 شوفوا بالاعمار لاتسالون عساي اعرف عمري..
وين وصلنا ايه طروووق هذا متزوج وحده اسمها عزيزة وعندهم بنت غلا..عمرها 3سنوات
واللي اصغر منه اسمه ..سلمان <<..اظن عمره 25 سنة
يدرس بجامعة الملك سعود ..هندسة..سمعتهم يقولون هذا اخر كورس له
وبعده منيرة << اتوقع عمرها 20 سنة التوام الروحي لنجود نفس الصفات..تدرس باولى جامعة تاريخ...
بعدها احمد<<عمره 18 سنة بالثانوي قليل نشوفه هالولد دايم مع عيال عمه مو معترف فينا ...
واخر العنقود الهنوف << توامي الروحي ههههههه تدرس بالمتوسط وبعمري

وووي تعالي انتي ....هنوفوه ترى موب احسن لك..اول سلمي يالخبلة
الهنوف: هلا والله وشاخباركم
مشاعل: مو بخير دامنا شفنا هالخشة !! عسى جبتي اللي وصيتك..
الهنوف: ههههههههههههههه بعد عينك هالخشة...هذا اللي هامك ياأكبر مصلحجية بالريااااض..خوذيها كسرت كتفي...

عطتني كيس مليان مجلات موصيتها اذا خلصتها تعطيني اياهم..احب اقرا المجلات حتى لو من العصر البرونزي..بعدها طلعنا للمسبح..

جلسنا نسولف .. ورتني الهنوف مقطع بلوتوث يمووت من الضحك ...غلا.. تنود نايمة وهي جالسة لا وتلحس عسكريم..ياحبيلها تجنننن هالبنت...
دخلت اريج بنت عمتي فاطمة .. 14 سنة والعضو الثالث في عصابتنا ..
اريج: هلو افري بدي..... تعبت ادوركن ليش متخبيات هنا؟ وش عندكن اعترفن؟؟
الهنوف وهي تغبي الجوال ..تمثل ان عندنا مصيبة: وعليكم السلام ورحمة الله وبركاته…اتمنى مرة اسمعك تسلمين زي العالم و الناس...
اريج: الا قولي غيرانة...مو حاصل لك سبيكنق انجلش..
الهنوف..وهي ترفع يدينها: الحمد الله والشكر..
مشاعل وانا اتطنز:الا اقول اريج.. عسى ماشر,, وراكم تاخرتوا بالعادة انتم اول من يفتح باب الاستراحة!!
اريج: تدرين ..الاسهم ..يبغى لها متابعة اول باول..يعني بلمحة بصر يرتفع المؤشر وينزل
الهنوف: هههههههههههههههاي ...والله احلام ابليس بالجنة…

اخذتنا السوالف عن المدرسة والامتحانات ومواقفنا ووو كاي جلسة بنات في المتوسط ..وش تتوقعون نتكلم فيه هههههههههههههههه



















التوقيع

|● ياحلم وين المشكله لو تحققت ~ }
قديم 18-08-2006, 10:56 PM   رقم المشاركة : 3
معلومات العضو
 

إحصائية العضو








افتراضي

***********

هيفاء
الساعة 2:15 ظهرا

**********

يووه اتوقع الضغط وصل 500 اليوم ..من فجر الله جاهزة بس كل اهل البيت مبردين اختي سارة 18سنة ... ماصحت الا يوم اذن الظهر ..وعاد الاخ فارس 25سنة ..ماصحى الا يوم ركبنا بالسيارة ..قام وصلى الظهر ..وركب
فارس ونفسه على راس خشمه: ابفهم ياخت هيفاء بتطير الاستراحة يعني؟؟
هيفاء: لاوالله ..لو الطلعة مع ربعك كان ماشفنا الا غبارك!!
فارس: لا مو صحيح ..حتى ربعي بيجون للاستراحة ..وكمل بنغمة غريبة ..والا نسيتِ..ان سلمان بيجي !!
طنشته وقلت: عااااااااد والله مو مشكلتي ..قطعتونا انت والعنز سارة اللي مارضت تقوم الا…..
قاطعتني سارة وهي مالها خلق:ياربيييييه وش دخلني انا هالحين..ابسوق بكم السيارة ..فكينا تكفين!!
قلت اقلدها: "فكينا تكفين" ..ياليتني قلت لعمي فيصل يمرني..كان ارتحت منكم
امي: خلاص ياهيفاء ...تلاقين الناس توهم ماوصلوااا...
هيفاء: لا ..المرة الجاية ..بتشوفون اذا مالقيتوني استقبلكم...
سارة: تسوين خير وتفكينا ...

اول ما وصلنا الاستراحة ، نقز اخوي زياد 16 سنة من السيارة ..منحاش قبل لااقوله يشيل الاغراض معي ..هين اوريك يالتيس..

الظاهر العالم كلهم واصلين ماشاء الله
سلمت على امي لولوة وعماتي شيخة وفاطمة وهدى
وخالتي بدرية...
هيفاء: خالتي بدرية وين خلود والبنات؟؟
بدرية: والله مدري من شوي كانن هني يمكن راحن المسبح...
هيفاء: ماامدا .. زين بروح اناديهن...
هدى: هيفاء عيوني مدي يديك ..ابقوم رجولي نايمة...
هيفاء:هههههههههه سمي عليهن لايفزن....
مديت يديني لعمتي هدى وهي تعرج شوي وطلعنا
هيفاء: هدى ..فيه احد من الشباب؟؟
هدى: لا مااتوقع وش بيجيبهم عند الحريم
هيفاء : انا ادري!!! اخاف اطلع واكشر باحد
هدى: طيب جيبي معك غطاء ..اقول هيفاء... فهد جاء معكم؟
هيفاء: لا والله نايم امس جاء من الشرقية و سهر مع ربعه وما رجع الا الفجر عاد نام ويقول انه بيجي الاستراحة المغرب
هدى: مدري طارق وعزيزة بيجوون والا لا
هيفاء: بسلامتهم لايجوون بس يرسلون غلا.......امووووت بهالغلا ياناااااااس
هدى: اكيد بتموتين فيها مو سلمان عمها...
اكتفيت بقرصة حااااارة..على ذراعها خلتني اسمع صرختها ..ياربي ملزمين يخربون مزاجي حسبي الله عليهم …اول فارس وهالحين هدى..
هدى: اااااااااي والله لاعلم سلمان .. الله يعين ولد اختي على هالدفاااااااااااشة..
هيفاء: لا والله…وهي بتحصل له هالدفاشة..

وصلنا المسبح والا اخواتنا في الله رافعات تنانيرهن ومطلعات هالعصاقيل ويطافشن بالماء....
هدى: خــــــــــــــــــير؟؟ وش هالخيانة مجتمعينهن هنا وساكتين...
مشاعل: بسم الله علينا الناس تسلم اول.. عمتي هدى بعدين تتشره...
هدى: والله ؟؟ ايه لكن الحق اجي اسلم عليكن ...انتن عماتي وانا الصغيرة...
الهنووف:بل بل …وش صاير خالتي كل هذا مشتاقة لبوستي...طيب تعالي
اريج وعيونها تلمع بخبث: لا والله موب خالتي المشتاقة لبوستك ناس ثانيين..يموتون عليها ...
سارة: ههههههههه انتن الى الحين على سالفتكن.. زياد كبر على خرابيطكن..يامراهقات
الهنوف معصبة: لا والله ميتين على اخوك الحمد لله والشكر
مشاعل بتزيد النار حطب: انتي حصلي نظرة من ولد عمي زياد عشان تتكلمين اصلاً......
الهنوف وبحركة سريعة دفت مشاعل على الموية
بس مشاعل تمسكت بسارة باللحظة الاخيرة : يماااااااااااااااااااااه ياحماااااااااااااااااااااارة اوريك ...
قامت تلحق الهنوف والباقين يصرخون ويصفروون…



ضحكت على هالمراهقات وتذكرت ايام وايااااام كنا باعمارهن…
تذكرت عمتي هدىوخلود وتعلقينا وضحكنا…يازينها من اياااااااااام راحت ومابقى لنا الاذكراهااااااااااااا…

الا على فكرة انا جاية اسال عن خلود وينها ؟؟
هيفاء : مشاعل ستوب بليز؟؟
ومشاعل تركض مو لمي بتمسك الهنوف عشان ترميها بالموية
هيفاء: بنات ماشفتوا خلووووووووود بليز ردووا؟؟
ناظرتني اختي سارة: مهيب مع الحريم؟؟
وكملت ..."كاني لمحتها اول مادخلنا بالمطبخ تشيل وتحط..."
هيفاء : ياقلبي هي والله مدري وشلون بتصير جمعاتنا بدون هالخلود.. اشهد انها نورالعايلة كلهاااااااااااا
هدى بجد: لاوالله وحنا وش صرنا؟؟
انحرجت من عمتي هدى لاني متعودة مابيني وبينها اي حواجز..هذا الاول قبل زواجها لكن الحين كل شئ في هدى تغير.........

قلت ابرر الموقف: لا عمتى انتي الخير والبركة وخلود طالعة عليك اصلا
ادري من نظرتها ان كلامي ماعجبها ..ماعلينا.. سحبت يدها وقلت خلينا نطلع ..طلعت …وصدمتني منيرة بنت عمتي شيخة ….
صرخت منيرة: اااااااااي ..عمى ماتشوفين؟؟
نجود: تصدقين انك بااايخة...عااااااااد
هيفاء : من زماااااااان توك تكتشفين يانجود ...
منيرة بغنج: حد طلب رايك ؟؟
هيفاء: فقط معلومة تقرقع بقلبي ..هذا بدال ماتعتذرين تمشين وتصدمين بخلق الله ..وتدعين عليهم بعد؟؟
منيرة: اوه سوري برنسيسة هيفاء المرة الجاية بنشوف الموكب الخاص بك…
يامصلها واخوها..سبحان اللي خلقهم..شكل نجود بنت خالي سعود..تنفع تصير اختهم..متاكدة انهم يحملون نفس الجينات الوراثية ..
هيفاء: بنات ..شفتوا خلووود؟؟

ضحكت نجود: قصدك القهوجية خلود,,,,.ايه بالمطبخ تصف صواني الحلى والفناجيل والترامس ولا تقولين صبابة ههههههههه..لاتخافين اذا خلصت بتنادينا..
قهرني كلامها .. قلت: ليتكم تجون ربعها ؟؟ ..
وطلعت رايحة للمطبخ ...خلود ..ياعلك بعدهم..والله ماغيرك بهالكوووون يفهمني

**************

المطبخ
خلود
2:45 ظهرا

***************


طرخ..طرخ..فتحت كل ادراج المطبخ..ماحصلت شئ..وين راحن!!
ياربييه مالقيت الفناجيل..::سيتي روحي اسالي امي قولي لها وين الفناجيل
سيتي: ماكو سي ..كله كلاص
خلود بصرااخ : وانتي من راسك تجيبين الكلام ..يالله قومي فارقي اساليها..
دخلت علي هيفاء بهاللحظة وهي تقول : ريلالالالالالالالاكس..وش صااااااااااااير!!
خلود: هلا والله بالطش والرش والبيض اللي ماتفقش ..صدق من قال.. ماالك الا هيفاء...جابك الله
هيفاء: خير وش تبين ؟؟....تبين عوون والا فرعون!!
خلود: فرعون يتزوجك ويطير بك عن هالكون..
هيفاء: يمه يمه وليش عااااااااد؟؟
خلود: بس عشاني احبك واموووت فيك....
هيفاء: والله مدري هذا حب لي والا لشئ ثاني ياخلودوه
بايخة هالهيفاء..لازم تجيب الطاري.. قلت:تصدقين انك ثقيلة دم..قومي دوري الفناجيل تاخرنا بالقهوة وامي لولوة لها ساعة تلج تبي قهوة....

هيفاء:هههههههه عاد امي لولوة لو يحللون لها موب لاقين دم …بيلقون ستاربكس بكبروه بدمها خخخخخخخخ ...تعالي انتي تبين الفناجيل امي موديتهن عند الرجال ذاك االاسبوع يوم عزيمة عمي فيصل........
خلود : عااد ومن يجيبهن من الرجال لاتقولين بشاير..والله لو تموتين ماتحركت تخاف تخف لها كيلو...هالدباااا
هيفاء بمكر: خسارة والله كان اقول لفهد بس ماجاء فهودي معنا..وابتسمت..
حسيت بحرارة تفوووووووح مني .... مسكت الفوطة اللي بيدي وفريتها على وجهها :طيب قولي لفارس والا زياد......
هيفاء: خير ان شاء الله اخواني يشتغلون عندك؟؟ وين اخووك ؟؟
خلود: عسى نواااف هع هع هع..انسي ان لك ولد عم اسمه نواف!!
دخلت علينا عمتي هدى وتقول: وش فيه نظر عيني نوااف؟؟
هيفاء : مافيه شئ بس نبي احد يجيب الفناجيل من الرجال....
هدى: قولوا للشغالات ..وش حاجتهن....
خلود: لو ارسل سيتي للرجال... كان تسفرني امي معها لاندونيسيا ..موتها ولا شغالة تقابل الرجال وشغالات عماني وعماتي مااموون عليهن...
هيفاء:تصدقين فكرة حلوة لو تسفرك تاخذين لك اندونيسي و.......
قاطعتها: انطمي.. انتي اعرسي اوول وبعدين تفرغي لنا.......
ناظرتنا عمتي هدى وقالت:اووف يابنات اخوي..والله لاحقات على الغثا ..وطلعت وهي تقول: ابدق على فيصل تبون شئ ثاني عشان يجيبهن مرة وحدة..
تناظرت اناو هيفاء ونزلت عيوني ..مانيب عارفة وشلون نتعامل معها..كل كلمة تفسرها على كيفها..الله يصبر قلبك ياعمتي

نقزت على عصا امي لولوة <<بس للامانة ضربه خفيفة

امي لولوة: يامن العرس اللي يضفكن قولن امين..لنا ساعة واصلين الاستراحة وروسنا توجعنا ولاوحدة منكن به هبة ريح تقهوينا ..
خلود: يمة والله كل شئ جاهز بس مابوه فناجيل وعمتي هدى..
قاطعتني: اخسي واقطعي... المطبخ مليان الا قولي قاعدة تسولفين انتي وهاليابسة هويف..
انفجرت اضحك هههههههههههههههه
هيفاء: بعد انا وصلني حقي يمة؟
امي لولوة: وليش على راسك ريشة منتيب اغلى من خلودي هذاني لبيتها ((ضربتها)) بهالعصا...
ههههههههههههههههههههه حركت ايديني بمعني موتي حررة...
مدت بوزها هيفاء وطلعت وهي تقول: اجل خلي هالخلود تنفعك..وتقهويك
استحيت يوم حضنتني امي لولوة وهي تقول عسى ربي مايخليني من هالخلود

***************

قسم الرجال
فيصل ..30 سنة
2.55 ظهرا

***************


هذا جوالي يرن اكيد مشاري..ياخزيااااه نسيت ادق عليه..
فيصل: هلا هدى ..مسرع اشتقتي لي
هدى: وااثق ياعمي..اسمع فيصل
فيصل:اااهاه موب لله هالاتصال وش تبين
هدى: جب لنا الفناجيل ..ماعندنا شئ
قاطعتها: لاوالله اصغر عيالكم ..من كل هالخلق مالقيتي غيري
هدى معصبة: ليش بتموت لاجبتها...بعدين عشان ااخر مرة يوم عزيمتك..

ابخلص هالحوار معها بسرعة ...هدى انقلبت 180 درجة عقب طلاقها و محملتني كل المسؤلية.. بس لان خالد كان في يوم من الايام ...صديقي!!

قلت :زين زين ..امري تدللي كم هدى عندي
ماكملت كلامي تدرون ليش؟؟ لانها ببساطة صبخت بالتلفون بوجههي
يالله.. ان الله مع الصابرين ويقولون ((اعرس يافيصل؟؟ مهبوووول انا؟؟))

شلت هالفناجيل وتلفت مالقيت الا فارس قدامي يقرا الجريدة…رفع راسه واشر لي..
فارس: فيصل..تعال لايفوتك .. هالمقال لباقي فرح…انت بس اقراه وانا اضمن لك بكرى بتقول لامي لولوة تخطب لك..
فيصل: فكنا تكفنا ياشيخ ..قال باقي فرح قال..عساها هالمراهقة ..اللي ماوراها غير الخرط الفاضي..مصوره العالم مايحتاااااااج..كله حب ورومانسية..وورد وعطر ..مابعد صرقعتها الدنيا زين ..
فارس: وانت وش حارق رزك..مع احترامي لرايك ....الا صراحة كتاباتها قوووية وتضرب بالصميم..بجد موهوبة..وقلم مبدع..تصدق نفسي ادري من تخاطب بهالقصايد والنثر..ياحظه

قلت له:تراك عااد اذيتنا... ماصارت..اربع وعشرين ساعة..قالت باقي فرح وسوت..
..اقول قم وخل عنك باقي زعل.. وخرابيط المراهقات..قم وصّل هالفناجيل للحريم .. منيرة ..مشتهية قهوة ومالقت فنجال وبعدين حلفت انها ماتشرب الا من فنجال لامس يدين فارس عشان يصير للقهوة كيف ؟؟ قوم وصلهن للحريم ..
قاطعني ..وهو منهمك يقرا: اقول يسلم عليك خالي....
انا صدقت قلت : الله يسلمك.... اي خوالك عمر؟؟
فارس: هههههههههه لا موب عمر يعني اسكت ولايكثر هرجك وجعلها ماتقهوت ابد
فيصل: قم عااد الحريم لاجات ومسويات مظاهرات ماعندهن فناجيل...
جدع فارس جريدة الرياض وقام: الشكوى لله ..بلوى انك تصير عمي
ضحكت وقلت: وتااج راسك؟
شالهن وطلع ..دخل علينا طارق شايل غلا ...
فيصل: هلالالالالالالا والله بغلا حياتي
طارق: وانا احسب الترحيب لي
فيصل: اقول اخذ بروحك مقلب؟؟ ذابحن باستراحة الشباب امس واليوم....والله يستر مايطب الغلا علي بكرى وتجي تسلم على امك لولوة وانت بالاصل عاني عشاني
طارق: هههههههههههههههه خال ببلاش

سلم طارق على الرجال واخذت غلا هالبنت تجنن..قعدت ابووس بهالخدود وهي تفتش جيبي اللي قدام <<<الظاهر عرق التفتيش يجري بالمراه منذ الصغر
احيانا لما اشوف غلا ..واشوف طارق وشلون فرحاان بها وهاقنا قالت غلا وسوت غلا ..افكر يعني طارق اصغر مني ومتزوج قبلي وعنده غلا وووو
لكن اقطع التفكير بسرعة لاتذكرت ان غلا جت عن طريق هالزواج ووجع هالراس
بلالالاش يكفي غلا نشوفها مرة بالاسبوع
وانا مبحر بهالهواجيس الا سلمان ولد اختي شيخة.. هالخبل ناط بحجري
سلمان: خالي فيصل وين رحت..لايكون تحب ؟؟ لولولوولوليش اروح ابشر امي لولوة
وش بلاهم عيال خواني وخواتي…كاني قاعد بكبودهم..انا خابر البنات يقعدن مهوب الشباب..يالله هذا اخر الزماااااااااااان…

فيصل: بشروني بموتك الليلة قل امين..قم عني
الشباب :هههههههههههههههههههههههههه
سليمان: بسم الله على وليدي
فيصل: هذا ولد ياسليمان ..هذا شيطان
سلمان مسوي نفسه زعلان: ....اجل انت وش تصير؟؟
طارق: الا فهد وينه ماجاء من الشرقية؟؟ ونواف؟؟
فيصل: الا جاي بس يشخر لا شبع نووم تفرغ لنا ونواف كالعادة طالع مع شلته اللي اخوك احمد عضو طيب منها .......
طارق: ايه احمد طالع معهم ..الله يستر عليهم هالشباب
قاطعم زياد: الا والله ياسعدهم انتم بس اقنعوا ابووي يشري لي سيارة ..مانتيب شايفين رقعة وجهي
الا على دخلة ابوفهد: عشان كذا يالهيس مانيب شاري لك سيارة الين تركد وتعقل
سلمان: هههههههههههه على نفسها جنت براقش..زياد صادوه
ابوياسر ((زوج اختي فاطمة)): والله انها مشكلة هالسيارة يجيك البزر مافاض من الارض ويبي سيارة ولاقلت شئ قال وش حيت ولد فلان وعلان كلهم كبري ويسوقون
ياسر((10سنوات)): الا انا عااد يبه..
ابوياسر: انت الاول ..مانتب شايف السيارة لما تدق العشرين
فارس: اااح وليش ياعمي ؟ هذا الغلط انك تحرمهم ويجي غيرك ويعطيهم

احتد النقاااش حول السيارات وغلا ابلشتني تبي تروح للحريم ومالقيت الا هالاثول عمها سلمان…
فيصل: سلمانووه ..قم ود غلا للحريم اوجعها راسها من لجتكم
سلمان: عااد من هالهدوء عند الحريم ..اسمع صجتهن وانا هنا ..بالله لايفوتك صرااخ المهابيل الهنوف واريج ومشاعل ..هذولي لو تروح للصين تسمع صراخهن وضحكهن
زياد من جاء طاري الهنوف وانا احس عيونه قامت تشر..فحبيت العب باعصابه
فيصل: اقول زياد..غلا ماتشبه عمتها الهنوف؟؟ احسها نسخة منها…
زياد يزخني بهالنظرات وساكت
كملت: الا وش رايك توديها عن سلمان..مسكين يوجعه راسه من لجه هالبنات؟؟
زياد ينقز: ابشر... تعالي غلا
فيصل: وانا اشهد انها غلا
سلمان بيخرب على زياد: خير خير استريح يالطيب انا اللي بوديها...

*******************

قسم الحريم
بعد صلاة المغرب
هدى

*******************


تتردد بخاطري..مشاعر عجزت ادفنها بالنسيان
حب وغدر..فراق وقهر..وطعون بالوجدان
رفعت عيوني للسماء ..ياليل مااااااااطولك على السهران

سته شهور..وعجزت انساك ياخالد!!
وكيف انساك وانت بقلبي ساااااااااااكن..

طلعنا بالثيل ..وجلسنا نتقهوى وحريم اخواني وخواتي
ضحك وسواليف ..وقال لي فلان وسوا لي ابو فلان…

نسوا اني بينهن اليوم جريحة مشاعر...
نسوا اني ابتسم لهم .. وهمي بقلبي غاير..
نسوا انهم اغتالوا فرحتي...
..قبل لاتنولد..عديمين الضماير..

هذا انا ....هــدى
احس اني صرت الضلال من بعد الهدى

ااااااااااه..كلمتني عزيزة مرت طارق..وهي ماسكة البيالة..
عزيزة: اقول هدى ..تبين شاهي والا زنجبيل؟؟
ابتسمت: شاهي الله يسلمكِ...
عزيزة:عااد شاهي من يديني غير شكل..ليت من يرسل كاس لطارق!!
ااااه كل شئ يذكرني باني كنت في يوم احمل لقب عروس و بغمضة عين صرت مطلقة..
هيفاء: هدى ..ماذقتي فطاير خلود؟؟ تجنن تراني رفعت لكِ ..من هجم عليها جوج وماجوج قلت الحقوا اعماركم واخذت لكِ ولعزيزة ولي
عزيزة: تسلمين ياربي ياهيفاء ..الا ماشفتوا غلا؟؟ياخوفي تصير بالمسبح
منيرة: لا توني شايفتها مع بشاير عند المراجيح....
خلود نطت علي: عندي فكرة.... وش رايكن نرووح نلعب بالمراجيح..نفسي العب
هيفاء: ليش مشتاقة للفلقات؟؟لا ياعمري انا لعبت بمافيه الكفاية..

احس بضيقة ياناااس ولو ضحكت وسولفت
احس الكل مبسووط من قلبه الا انتِ..اااه ياهدى
ليت النسيان ينشرى ..والله لاشريه بدمي وروحي وانسى بيوم اني كنت لك حليله..

"يسعد مساك .. يا حبيبي
حالي طيب
كل شي مثل اللي كان
المدامع .. والمواجع ..
والأمان اللي اختفى لحظة غيابك
والليالي اللي مضت .. مثل الليالي اللي مضت
الهم عازف .. والدمع نازف ..
والعمر في غيبتك حاير وخايف
حتى جراحك وسط قلبي مثل ماهي
وفي شفاهي باقيٍ نفس الكلام اللي بقى .. آخر لقاء
مثل منتَ يا حبيب الروح شايف
كل شي مثل اللي كان "

ماوعيت الا بخلود تجرني من ايدي وتسحبني وراها:هيه خلودوه؟؟...وقفي وين رايحة؟؟
خلود عاقلة ثقيلة ...بس احياناً عليها تقليعات مهيب صاحية...
خلود: ابخطفك .. وين بنروح يعني...؟؟...هيفاء وعزيزة مارضوا يجوون وانا نفسي العب من زماااان ...بالمراجيح .. قلت مالي الا عمتي الحبيبة تجي تلعب معي ..يالله
صرخت بها: والله انك بزرانقلعي ..
وجريت يدي من يدها بقوة وقلت بصوت عالي : لو سمحتي احترميني قدام الناس مو تجريني وراك كاني بقرة.. نسيتي اني عمتك واكبر منك...والا عشاني الحين صرت مطلقة......" و فجاه انفجرت اصيح غصب عني......"

***************

نهاية الحلقة الاولى

بها تعرفنا على ابطال.." باقي فرح" ..وباقي الاعضاء سيظهرون عبر الاحداث
هانحن..ابتدينا ..اول الخطوات ..نحو دراما تبكينا وتضحكنا في ان معاً...
راجية من كل من مر من هنا..ان يلقي رحاله ..باعثا لي نبض احساسه
وليعلم ان كل حرف منه ..هو محل تقدير واجلال مني

انتظر ردودكم zxsa



















التوقيع

|● ياحلم وين المشكله لو تحققت ~ }
قديم 18-08-2006, 11:34 PM   رقم المشاركة : 4
معلومات العضو
جنون الكبرياء
عضو غير مشارك
 

إحصائية العضو







افتراضي

قصه روعه انا اعجبني بنات المتوسط<<<<<<تراهن ما يبعدن عن بشي


ابغى اسأل انتي اللي كاتبه القصه


ننتظر التكملهههههه



















التوقيع

شعۈر رآئع / إن تڪۈن فـآهم ڪِل شيء عندمآ ( يستغبـۈنڪ )
ۈآلشعـۈر آلآرۈع / إنڪ " تستغبي " ۈهـِم يصدقۈنڪ !

قديم 19-08-2006, 03:37 AM   رقم المشاركة : 5
معلومات العضو
 

إحصائية العضو








افتراضي

مشكووووووووووره ياقلبي ..............



لا والله مو انا كاتبه القصه ..... واسم الكاتبه انا كاتبته .....((اميـــــرة الاحســـــاس))


يسلمووو حبيبتي .. مرورك اسعدني .

وابغى اشوف ردود اكثر علشااان أتأكد فيه اقبال على القصه ولالا ...



















التوقيع

|● ياحلم وين المشكله لو تحققت ~ }
قديم 19-08-2006, 02:26 PM   رقم المشاركة : 6
معلومات العضو
غريب الدار
عضو مجلس إدارة سابق
 
الصورة الرمزية غريب الدار
 
 

إحصائية العضو








افتراضي

[glow="CC0099"]قصه رائعه

واسلوب جميل

من الكاتبه أميرة الاحساس

الف شكر اختي رجه بس رزه

وننتظر التكمله

تحياتي وتقديري[/glow]

قديم 20-08-2006, 09:01 AM   رقم المشاركة : 7
معلومات العضو
 

إحصائية العضو








افتراضي

الله يعطيك العافيه اخوي غريب ....................................



















التوقيع

|● ياحلم وين المشكله لو تحققت ~ }
قديم 20-08-2006, 11:10 AM   رقم المشاركة : 8
معلومات العضو
 

إحصائية العضو








افتراضي

هااااذي شخصيااات القصه ........


الجدة لولوة عندها بالترتيب

الولد الاول:علي (ابوفهد)<<<زوجته حصة
اولاده فهد 27 سنة
فارس 25 سنة
هيفاء 23سنة
سارة 18سنة
زياد 16 سنة

****************************

الولد الثاني: سعود (ابو نواف) زوجته بدرية
خلود 23سنة
نجود 20 سنة
نواف 18 سنة
مشاعل 14 سنة
بشاير 8 سنوات

***************************

البنت الثالثة:شيخة ( ام طارق) زوجها سليمان
طارق 27 سنة زوجته عزيزة 24 سنة وبنته غلا 3 سنوات
سلمان 25 سنة
منيرة 20 سنة
احمد 18 سنة
الهنوف 14 سنة

*******************************

البنت الرابعة : فاطمة ( ام ياسر) زوجها سعد
اريج: 14 سنة
ياسر 10 سنوات

*******************************

الولد الخامس : فيصل<<<يعني يصير عم هيفاء وخلود والبنات
ههههههههههههههههه يانهيق القمر يعني ماراح يتزوج خلود
عمره 30 سنة لم يتزوج

*****************************
البنت السادسة والاخيرة
هدى 26 سنة مطلقة ...

***************************


والجزء الثاني رااااح انزله هلحين ...



















التوقيع

|● ياحلم وين المشكله لو تحققت ~ }
قديم 20-08-2006, 11:22 AM   رقم المشاركة : 9
معلومات العضو
 

إحصائية العضو








افتراضي

๑۩۞۩๑ الحلقـــــــــــة الثـــــانيـــــــــة๑۩۞۩๑



صرخت بخلود: والله انك بزرانقلعي ..وجريت يدي من يدها بقوة وقلت بصوت عالي : لو سمحتي احترميني قدام الناس مو تجريني كاني بقرة وراك.. نسيتي اني عمتك واكبر منك...والا عشاني الحين مطلقة...... و فجاه انفجرت اصيح غصب عني

************

خيمة الشعر
نجووووووود

*************

اااخ يابطني والله بموووووووت من الضحك
نجود: بس بس حراام عليكم ..مووتوني ضحك...
منيرة: عادي ترى المقبرة قريبه..
ضربتها على كتفها
نجود: جعلك قبلي قولي امين
منيرة: نجود تعالي انتي ..ماكلمتي امك عن طلعتنا الاربعاء الجاي..
انا تصنعت البلاهة والبرود
نجود: اي طلعة ..عن وشو تتكلمين؟
منيرة: لا والله
سارة: ايييه يالخاينات.. خطط وتكتيك من ورانا؟؟ زين علمونا والا بنخرب عليكن
منيرة: اسرار... انتي ماحد يزل لسانه قدامك...
مشاعل: لا والله ..يزل لسانك تزل رجولنا وياااك هههههههههههههه وين رايحات؟؟

قهرتني مشاعل وقلت: مشاعل عاد انتي اخر وحدة تسالين؟؟
مشاعل: وليش ؟ مو على كيفك تروحين بروحك؟؟
قهرتني صدق ودي الفها طراااق..

نجود: اصلا طلعتنا ممنوع اصطحاب الاطفال؟؟ فاهمين يامعشر المتوسط؟؟
مشاعل وقفت وبغت تطيح على الهنوف: يمه يمه بغيت اطيح,,,
نجود:هيه ..هنوف لحقي عمرك...مشاعل بتواسيك هالحين بالارض...
منيرة وهي تحضن الهنوف: شعوولي ..عااد حراام عليك ..والله ماقضيت من اختي الوحيدة...
مشاعل: تشوفين يانجيد والله ماتروحين الا رجلي على رجولك..
نجود:ههههههههههههههههاي ... لاوالله من خفك بعد تصيرين على رجولي..بجدعك على شارع الحوامل عشان تمشين وتخفين واذا خلص مشوارنا رجعت عليك بس اخاف تصيرين ولدتي هههههههههههههه

مشاعل احمر وجهها و طالعتني بنظرة تهديد..على بالها مجروحة..ومصدقة روحها انها حساسة وطلعت وقامت الهنوف ولحقتها
.....اما اريج فلاهية تقلب بجوالها ماهي معانا ابدا
سارة: نجود حراااام عليك فشلتيها قدامنا؟؟

نجود: تستاهل هالدوباااا ...خليها تعرف حدودها مرة ثانية ...منيرة قومي خلينا نمشي ..الا متى بنرووح؟؟
منيرة: يعني صدق بتروحين؟؟
نجود: تبين الصراحة مافتحت الموضوع مع امي ..بس ابوي مضمون
منيرة: ماهو البلا من امك ..صراحة خالتي بدرية مرررة شديدة
نجود: اااخ ..لاتشكيلي ابكي لك مو شديدة وبس تصدقين اليوم ماكان لي خلق اجي وبغيت اجلس بالبيت ..الا امي تركب راسها ..تجين يعني تجين
منيرة بفرح: الله يعافيها على هالشدة وانتي ووجهك وش يقعدك يالحمارة؟؟
ناظرتها وحنا نطلع للثيل...وبرد عليها الا طاحت عيوني على
مشاعل والهنوف وهن جالسات على الكراسي اللي عند المسبح .. وشكلها الخبلة مشاعل تصيح والطبيبة الهنوف تهديها..زين خليها تولي عشان المرة الجاية تعرف تتكلم زين وتحترم اللي اكبر منها...

********************

خيمة الرجال
فارس
11.45 ليلاً

*******************

ابوي: فارس ..يالله دق على اهلك خلهم يتجهزون بنمشي ...ماعاد الا خير؟؟
عمي سعود..ويبتسم بمكر: وراك ماتسهر ..لاحق على الخير
طبعا ضحكوا الرجال ..وهم يعلقون على بعض..

اخذت جوالي ودقيت على هيفاء
فارس:الو ..السلام عليكم
هيفاء : هلا فارس
فارس: يالله قولي للقطيع اللي عندك..يكفي هذر..وتجهزوا بنمشي
هيفاء: والله ماتيس غير وجهك ...يا
قاطعتها:بس بس قولي لهم يركبون والا رحنا وخليناكن..
اسمع صوت وصجة ولجه وضحك
يالله هالحريم ..ماتخلص سواليفهن
هيفاء: اقول فارس..فهد ماجاء امي لولوة تسال عنه
فارس: الا توه جاي وبيمر يسلم عليها بس انتن اخلصن وخلي هاللي يلجن عندك يتجهزن
هيفاء: لو تدري من اللي يلج كان جيت تركض؟؟
فهمت انها تقصد منيرة هالماصلة: لا والله اخاف انكسر..يالله مع السلامة

التفت على فهد وقلت..:فهود مطلوب بالاسم؟؟ العجوز طالبتك
فيصل: ترى بلخك طراااق ..اذا سمعتك تقول لامي عجوز
فارس: اووه سوري ..شيخة الصبايا بدها اياك
فهد يبتسم:وانا اشهد انها شيختهن
دخل عمي سليمان بالسالفة: اجل ام طارق((شيخة)) وش تصير؟؟
ابونواف: الله يهديك..اصلا امي الاصل ومرتك المرق هههههههههههه
ضحكوا الشباب والشيبان بعد
امي لولوة القلب الحنون من اللي مايشوفها ومايحبها

******************

الاستراحة ,,,المراجيح
خلود
12 ليلاً

******************


مصدومة باللي قدامي..!! مستحيل تكون عمتي هدى ..
لا ..لا ارجوووووووك ...بس يكفي ...

انا ادري ان عمتي هدى تعبانة نفسيا عقب طلاقها اللي مامر عليه ست شهور لكن
عمري ما شفتها تنهااارقدامي وبهالشكل..كانت دايما تكابر علينا وتخفي دموعها بس هالمرة مدري وش صاار لها...

سحبت يدها من يدي وصرخت بوجهي...بعدين انفجرت تصيح ..طاحت على ركبتها وهي تغطي وجهها وكانها مو مصدقة اللي قاعد يصير..حتى انا مو مصدقة ..صياحها يقطع القلب....
كانت لامة كفوفها وحاطتها على ثمها وكانها تمنع صرخاتها ان تطلع بهالفضاء الوسيع..
خميتها ونزلت دموعي وانا اشوف اغلى عماتي وصديقاتي تتالم وانا عاجزة عن التخفيف عنها ..شفت العجز والضعف بعيونها...
شفت الحزن والغدر مرسوم بمشاعرها
شفت القهر والالم اللي تكابر عليه ..انفضح بوجهها وصياحها
خلود: لالا يابعد قلبي..لالا ياهدى ترى دموعك غالية عليّ
تعوذي بالله من الشيطان


"لو نسيت العمر ماانسى دمعتك...صرخة ذابت من عيونك دمووع
ترتعش مرتاااعة في وجنتك ....وانتفض قلبي لها بين الضلوع
ازعجت صمت الليالي عبرتك...بالخفا ثــورة وبالظاهر خشوووع
تسكب الدمعة وتظمي نظرتك...مشهد النظرة وهي تظمي يروع"



خميتها على صدري.. وتمسكت بي كانها لقت حضن يأويها ..كانها تايهه بدروب الزمن ولقت وجه مالوف لها ..قالت بضعف وهي تشاهق:خلود انا تعبااانة ..بموووت من الضيقة ياخلووود..ارحموني تكفووووون...

ياربيه ..لاحول ولاقوة الا بالله
خلود: تعوذي من الشيطان..ترى ماصار شئ يخليك بهالهّم ياعمتي..كل العالم تتطلق ماوقفت الدنيا ..و
ندمت على هالكلام لان صياحها زااد وجسمها قام يرتعش بشكل غريب..
انا خفت عليها..احترت وش اسوي ..حنا بعيدين عن المجلس والحريم... حنا صوب المراجيح واقرب شئ قسم الرجال..جت على بالي فكرة
ابنادي عمي فيصل ..هواكثرواحد يفهمها....

قمت اركض ناسية اني بدون غطاء وان الشباب كلهم موجودين بس حالة هدى ضيعتني ياناااااااس
مدري وشلون وصلت الباب اللي يفصل بين قسم الرجال والحريم
وانا كل همي اني اشوف عمي فيصل والا ياسر عشان يناديه
طرااخ .. واصدم بذاك البياض وارجع على ورى ..وانا مادري وين انا فيه
رفعت راسي ومن كثرماتمنيت عمي فيصل..تخيلته قدامي

خلود بصراخ: عمي فيصل الحق عليّ ..تكفى تعال بسرررعة..عمتي هدى ص..

بس ماتت الكلمات على شفاهي...

للحظة وقف الزمان ...وتبدل المكاااااااااااااااان

...اللي قدامي مو عمي فيصل..

هذا



هذا




هذا


فهـــــــــــــــــــــد ولد عمي
فهد: وش فيها عمتي هدى..
صدمتني المفاجاة..معقول هذا فهد
يالله ..من ست سنين ماشفته..
هذا فهد اللي قدامي ..يوه ماتغيرمرررة .. بس زادت وسامته وعوارضه معطيته هيبة...ياحظك ياخلوووووود فيه...

معقول هذا فهد..لايمكن من كثر ماتمنى اشوفه صرت اتوهم
هذا فهد؟؟ معقول يانااس والا انا احلم؟؟

هذا اللي طويت الماضي بعبير لحظاته...
هذا اللي رسمت المستقبل باطار ذكراه...
لا مو معقول فهد هو اللي قدامي ويكلمني..
.قلت بقلبي
ليتك ياهدى صايحة من زمااان....

فهد بنفاد صبر: خلود ..تكفين تكلمي وينها عمتي هدى وش بها..
..مدري ياناس ليش كل شئ في جسمي انشل من لساني الى رجولي..صار قلبي ينبض يقول فهد.. فهد.. فهد ياويلي على اللي عمره ماجرب الحب...والحرماااااااااااااااااان...

يعني عرف اني خلووود..يعني بعده يتذكر ملامحي...اكيد مانساني... ياحظي ياحظي..معقول فهد الى الان .... يملك كل هالتاثير علي مشاعري
مااكذب عليكم ..حسيت اني اطير اطير فوووق فووووق<<ادري بتقولون موب وقته بس هذا قلبي الغبي..قلبي العاشق المحروم..

"سألني من
أحب أكثر
ومن في صوته
أتأثر؟
ومن هو .. فارس احلامي ؟
ولمين اتعذب واسهر؟
بغيت اجاوب عيونه
واقول بكل صراحة
وحب
اني فيه .. "مفتونة"
وانه ساكن اهدابي
وأول وآخر احبابي
صرخ بي
قال: لي .. قولي
كفاية لعب باعصابي
سرحت
وقلت له.. تصّور
اهو اسمه مثل اسمك
ورسمه يشبه لرسمك
وله نفس ابتساماتك
ونظرة عينه مثلاتك
لأني كلما طالعتك
اهيم
بليل نظراتك
وتقريبا مثل طولك!
وصوته
فيه من صوتك!
يداعب مسمعي
وارحل
في دنيا مالها آخر
ويستعمل نفس عطرك!
والمسباح والساعة!
وسئلته
في خجل ظاهر
عرفت الحين؟
وصار يتلعثم المسكين
وقال لي:
للأسف لحظة
تخيلت اني المقصود
بس اليوم
بالصدفة
غيرت العطر
وحطيت
بداله اليوم
دهن العود؟!!"


بقلم المرحومة: صدى الحرمان الله يرحمها

رجعت لارض الواقع..وين انا فيه ..ايه صح هذا فهد يكلمني ..لحقي عليّ ياروووحي بمووووت من الفرحة ... لامحالة...

فهد: تكفين ياخلوووود ..هدى صار لها شئ
سمعت الرجاوي بصوته .. غرت من عمتي هدى
تمنيته يسال عني..حتى لو اكون تعبانه بس تمنيت انه على باله يطريني...
خلود: عمي فيصل وينه... اخيرا قلت
فهد: هدى بها شئ؟؟ تكلمي يابنت النااس؟؟

خلود تلفت وانتبهت اني اكلمه بدون غطاء<<قولوا الحمد لله على السلامة بدا عقلي يشتغل ههههههههههههههههه
لفيت ورى الباب بسرعة وانا ارتجف من رهبه شوفته: عمتي هدى منهارة تصيح وانا ابي عمي فيصل يشوفها...

فهد:ليش ,,,, وينها ياخلوود؟؟
خلود: عند المراجيح هناك..
ماسمعت رد ..مدري رااح وخلاني والا رااح ينادي عمي فيصل والا راح لعمتي
انا مدري عن شئ
كل اللي ادريه ان النوم ..مو زايرني الليلة من الفرحة
ااااه ..مجنونة؟؟ شوي علي كلمة مجنونة؟؟
فهد ..من طلعت على الدنيا وهو ...........



















التوقيع

|● ياحلم وين المشكله لو تحققت ~ }
قديم 20-08-2006, 11:24 AM   رقم المشاركة : 10
معلومات العضو
 

إحصائية العضو








افتراضي

******************

يوم الجمعة
نـــــواف
الريااض...الثمامة

*****************


الجو صراحة رهيب...غيوم وبرااااد...وهالطلعة رااااااااايقة مررررررة
مدري لو يغيب البر من الوجود وش تصير حياتي ههههههههههههههه

ثامر:نواف وصمخ ..مد لي الحطبة ابواسي النار؟؟
نواف: تراكم اعميتونا بهالدخان
الكل: ههههههههههههههه لا يالبنية عسى ماسال الكحل...
نواف: انقلعوا عااد يعني يانصير بنت ...ياننعمي..عمي يعميكم
سالم: الا اقول ماقلتي لنا نوف وش نوع صبغتك هالشهر؟؟

انا ادري انهم يتطنزون على شقار شعري اللي مدري منين جاني ..ليته صار بمشاعلوه والا بشورة ..ولا صار بي ..ايييه تذكرت ايام مضت ..يوم عيال عمي فهد وفارس وطارق وسلمان ينكتون علي ويقولون ...."نواف ترى الولد مايحط براسه حناء"

نواف: ياشين الغيرة يالشهبااان ؟؟
ثامر: اما غيرة كثر منها ..عسى على هالشهاب قل على طولك على وسامتك اما شهابك لا والله ........تقل احد حايسن شوشتك بتراب.....
احمد ولد عمتي شيخة: على الاقل ..فيه شي يخليك تغار منه المشكلة شيفتك الله يصبرنا على مقابلها.........

انفجروا الشباب بالتعليق والسواليف ..وحنا هاذي حالتنا تطنز وتعليق بس عارفين بعض ولانشيل بقلوبنا على احد..قام سالم وزبط لنا ذاك الحليب بالفلفل الحاااااار واستانسنا و لكن حانت ساعة الفراااااااااق....ياناس الله ياخذ الدراسة غثيثة...هم ونكد مابعده نكد...الله يعين... ورانا خط للرياض وبعدين بقابل ابوي وباخذ لي كلمتين معتبرات..الا قل محاضرتين اما صارت طراقين بعد... كالعادة

اااااااااااااااااه

مدري ابوي متى بيفهم اني ولد ...ماني زي هالبنات اللي ببيته
المشكلة انه يبرره على انه خوووف وانا مااشوفها الا انعدام ثقة..........
بتشوف يايبه بنفسك انك غلطان وبتندم بعدين......

نواف:ااااااااااي ياااثوول...((ثامروه هالحمار ...فرني بقارورة الماء ))
ثامر: هيه يالنشمي ... قم ساعدنا ضف المكان موب تتركه مزبله...
نواف: وش قالو لك بنت ؟؟ انقلع زييين ...قال ضف قال؟؟
سالم: لا ياشيخ موب بنت بس عيب علينا نترك المكان كذا.......خلينا كلنا نتساعد مايبي لها شئ..
نواف: شف انت واياه ...ترى النفس هنا ((واشرت على طرف خشمي))..فانثبروا وعضوا لكم على شحمة احسن لكم.......
مشيت وخليتهم وجدعت السليب باق بسيارة احمد لاني جاي معه ...وركبت وكاني اسمع ثويمر يقول
ثامر : والله ياهو اخذ مقلب بروحه هالنواف ...ويرفع صوته: االكشتة الجاية ممنوع اصطحاب العجازين....

غمضت عيوني وانا افكر بابووووي ........ الله يعيني عليه
بيفتح لي محاضرة عن الدراسة والمستقبل وووو .........

احمد وهو يربط الحزاام: عسى ماشر نواف؟؟تعبان؟؟
نواف: تعباااااااااااااان وبس؟؟ ... قلتها بكل هم والم
احمد باهتمام: وش تشكي؟؟ نمر المستشفى؟؟
نواف: اشكي خالك اللي ماهو مقتنع اني صرت رجال...بيحبسني زي بناته وو
قاطعني: يانواف لاتلوم ابوك؟ انت اول ولد وطبيعي يخاف عليك ...انا لو ماقبلي طارق وسلمان كان صرت اشد منك ...بس الان ابوي طنش وتعود...
نواف: طيب والحل يااحمد؟؟انا تعبت تعبت مع ابووي ماودي ازعله ولا اقدر اني اسوي اللي يطلبه من ....... مستحيل اترك البر والشباب والطلعات
ابتسم احمد بعفوية وقال: وسع صدررررررررررك ياشيخ ... تهون ان شاء الله بس انت شد حيلك هالسنة وجب النسبة اللي تفرح خالي وابشر بالخير

اووووووه يهالدراسة اللي كل شوي تطلع لنا ...المشكلة انها ثالث ثانوي ..رغم اهمالي وتطنيشي واني مااذاكر الا ليلة الاختبار .... الا ولله الحمد اجيب امتياز ..بس ابوي مايرضى ..

تنهدت وانا اذكر هواااش ابوووي وتعصيبه ..احيانا يمد يده علي ..معتبرني بزر ...ونصايح امي انت ولدي الوحيد ..انا اطالع الله ثم اطالعك...غمضت عيوني بالم ..تكفووووووووووون لاتحملوني مالااطيق... انبعث صوت الشيخ احمد العجمي من المسجل...بكل روحانية وطمانينة
نواف: احمد تكفى طلع الشريط؟
احمد : اعوذ بالله ...لاتصير شيطان وتضايق من القران؟
نواف: افا ...ماهقيتها منك ......لابس .. اخاف يجيك النوم وبعدين نروح شوربة.....
احمد : هههههههههههههههههههههههههههههه لا ان شاء الله بتصير كبسة لاتخاف

*****************

الجمعة...
فهد
وعلى طريق الشرقية

*******************


مااصدق اللي شفته البارحة
عمتي هدى ..منهارة تصيح وتتوجع..
طيب و ليش وش صاير؟؟؟
ليه ماترضى بواقعها الان ,,,,هي خلاص تطلقت ..من زمااان وبعدين ماعاشت مع خالد عمر يسوى.. كلها ثلاث شهور ..يعني ليه كل هالالم والتعب والدمووع ..يبه زيين اللي مايبينا مانبيه ..

بس تعال ..معقول هذيك اللي امس شفتها هي خلود بنت عمي سعود؟؟
الله يالدنيــــــــــــــا...كم لي ماشفتها؟؟
اذكرها كانت بالثانووي اخر مرة شفتها ... وعقبها سافرت الشرقية وانقطعت اخبارها...صحيح دايم هيفاء قالت خلود وسوت خلود...بس مدري ماحسها تغيرت كثير..هي هي خلوود بس طالت شوي...واحلووت بعد..


قطع افكاري جوالي اللي يلج..
فهد: خــــــــــير..مامداني ماشي منكم....
هيفاء: بسم الله علي ؟؟الناس تسلم واذا انك مستغني على الاجر قل الوووو موب خير
هههههههههههههههههههههه انا ضحكت من كل قلبي
فهد: اسفين ..السلام عليكم ورحمة الله وبركاته..
هيفاء: ايووه هذا الكلام اللي يجمد على الشارب ..وعليكم السلام ورحمة الله وبركاته..
فهد : ههههههههههههه اي شارب ؟ خير ؟ وش تبين خلصينا؟؟
هيفاء: اسمع انك وشاربك ..امي معصبة عليك..انت بعيد... ماتقدر ترجع؟؟
فهد باستنكار: ارجع ؟؟....خير ان شاء الله ؟؟
هيفاء: اكيد خير...لاتصير ناسي انك ناسي اغراض خالتي ام نواف اللي معطيتك اياهن امي وقالت لك توصلهن لاهلها بالخبر؟؟

يوووووووووه ......والله نسيت اغراض خالتي بدرية
ياااااااااااااااااربيه وش هالنسيان الفضيع ..شكلك شيبت يافهيد وانت مااعرست هههههههه ..طيب والحل الحين قطعت مية كيلوو ومستحيل ارجع...ياخزيااااه من ام نواف...هذا وانا مخطط اناسبهم ههههههههه من اولها نسيان ..طيب يصبرن للمرة الجاية

فهد: والله ماكان على بالي ..اعتذر لي من امي وقولي الاسبوع الجاي ان شاء الله
هيفاء: هكذا وبكل بساطة وتقلد صوتي ((اعتذريلي من امي و..
صرخت بها: حرااام عليك ياهيفاء ..وراي دووام وباقي لي ثلاثمية كيلو..بيطيرن الاغراض ؟؟
هيفاء: طيب..انقلع.. مع السلامة
طبعا مالحقت اقول مع السلامة وتصبحين على خير وبشتاق لكم لانها وبكل بساطة اغلقت الهاتف في وجهي

قعدت اتامل الجوال وقلت : موب لو اصكك وافتك من بلاويك احسن لي...
وقرنت القول بالفعل وفريته على الكرسي اللي جنبي ..

وصلت شقتي حدود الساعة 11 بالليل..دخلتها ..باااااااردة وحوسة وفوضى..ياربيه متى بتزوج .. وادخل والاقي عروستي تستقبلني بابتسامتها ..وبكل دفء..تقبلني..و
انتبهت لواقعي المر ..
اي ابتسامة واي خرابيط ..خلني اروح اجيب لي عشاء وامر ملابسي من المغسلة !!
ماقلت لكم ..ودي اعرس اليوم قبل بكرى...خصوصا ان امر البعثة لبريطانيا صدر..
يعني لازم احط النقط على الحروووف ..يارب تسهل امري ياكريم..ابكلم اهلي الاسبوع الجاااي خلاص صبرت لين مل الصبرمني ..وقال يافهد تراك عنست طقيت 27سنة ماعرست!!


غمضت عيوني ...وانا احلم بها ..بجانبي ..اغوص في اعماق عينيها
وترقبني ..وبابتسامتها الخجلى ..تسحرني

**********************


نهاية الحلقة الثانية



















التوقيع

|● ياحلم وين المشكله لو تحققت ~ }

الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع



الساعة الآن 06:50 PM





SEO by vBSEO 3.6.0 PL2 ©2011, Crawlability, Inc.

1 2 3 4 5 6 7 8