مـذكـرات لـيلــة و فــاتــي !!!!!

[ســــاري]

إخواني و اخواتي يشرفني مشاركتكم للمرة الثــانية بقصـة غريبة وعجيبة ..

ومن غـرائبهـا عنـوانهـا إذ كيف لانسان أن يكتب مذكرات ليلة وفاته !!!

لا اطيل بالمقدمة و اترككم تبحرون بخيـالكم بين ثنايا وسطور هذه القصــة ..

والتي سأقسمها لثلاتة اجـزاء >>>>>>>>>>>>>>>>>>>>>>><<<<<<<<<<<<<<<<<<<

مذكرات ليلة وفاتي (( قـصـه مؤثــرهـ ))

الجزء الأول

القصة لا نعلم كاتبها أو كاتبتها، لكن جزا الله خيراً من جادت بِهِ قريحته بها،

وعلى الرغم من أنها طويلة لكنها تستحق القراءة فعلاً.

.

.

.

كانت ليلة باردة ما يعكّر هدوءها إلاّ ريحة المطهّر اللي يميز المستشفيات،

بالرغم من أني ما كنت أحس بأي ألم إلاّ أنني كنت أتقلب على سريري

خايفة من بكره… ما أدري ليش؟!!!.

ابتسمت وأنا أتذكر زوجي، كان يقول:

- لا تخافين يا العنود الطب تطور، وأَبلف بك العالم لين تشفين، لا تخافين أنا معك.

ابتسمت وأنا أتذكر كلامه والخوف اللي بنظراته وهو يحاول يطمني.

أمي يا حبيلك يا يمّه… طول الليل كانت تصلي وكل ما فتحت عيوني سمعت صوت همساتها تدعي لي، وتتضرع لله. يا حبيلك يا يمّه ويا حبيلي لعيونك اللي مَورْمه من البكاء

بالرغم من أنّي ما أشوفها وهي تبكي.

أشياء كثيرة تغيرت هالأيام، زوّاري كلهم تغيروا، ما عاد يجيني أحد من سني،

لا ما عاد أشوف إلاّ كبار العايلة اللي يتصفون بالدين والعقل. شيء غريب!!

ما أدري وش سببه؟! حتى الأحاديث اللي تطرح في غرفتي كلها عن قوة الإيمان والصبر.

وما عاد أحد يذكر لي الأمل في الشفاء، ولا أخبار العايلة!!

بنت عمي ولدت ما دريت إلاّ بالصدفة، سمعت وحدة تبارك لأمها في زيارتي.. وش صاير؟!!!!! والله شكيت أنهم يعرفون عني شيء أنا ما أعرفه!

يعني يمكن الطبيب قال في حالتي شيء؟!!!.

بس طردت وساوسي بحجة إن الطب تطور، والطبيب شكله مطّمّن علي،

وزوجي يقول إني بَشفى إن شاء الله أكيد.

قطع صوت أمي حبل أفكاري، وهي تناديني:

- العنود قومي وأنا أمك صلّي.

ابتسمت وأنا أتذكر كيف أمي تغيرت.

أمي أوّل من كثر حبها لي في البرد إذا أذّن الفجر تهمس في أذني إني أصلي،

وكانها ودها إني ما أسمعها، وإذا ما قمت تعيمت عني وسكتت وابعدت،

وهي تدعي إن الله يهديني. غريبة من بداية مرضي وهي حريصة على صلاتي،

تقومني بصوت حزين مستسلم، ابتسمت وقلت لها:

- أنا قايمة يمّه.

تنهدت وقالت:

- الله يشفيك يا بنيتي.

قلت:

- يمّه… ليش أنتِ حزينة؟! ترى أنا طيبة، والله ما فيني إلاّ العافية بالذات اليوم.

وطلعت أمي وأنا أكلمها وتركتني. استغربت، وسكت، وقمت أصلي.

يوم سلّمت وقبل لا أقوم عن سجادتي إلاّ باب الغرفة يدق الفجر!!! من جاي هالوقت؟!!!

شفت أخوي الكبير محمد يطل من الباب. ابتسامته تنوّر وجهه الملتحي،

بس ابتسامته كلها حزن. قال:

- كيف حالك يا الغالية اليوم؟!.

وسلّم على أمي وانحنى يسلم على يدها،

قلت: - الحمد لله بخير اليوم أنا طيبه، وأظنهم اليوم بيطلعوني. عندي إحساس.

الغريب بالرغم من إني كنت أبي أفرحه إلاّ أنه التفت عني وراح للشباك،

وفتحه ووقف عنده شوي وهو يتنفس بعمق ويذكر الله. وكأنه يحاول يطرد الشيطان،

بعدين قال بدون ما يرفع عينه من الأرض:

- ودّي أغيّر اتجاه سريرك يا العنود.

وقبل لا أرد حرّك السرير وخلاّه من جهة القبلة… ابتسمت،

قلت: - لييش؟!!!!!!!!.

قال وهو ما رفع عينه من الأرض وبصوت مرتعش:

- أفضل علشان إذا دعيتي الله تكونين مواجهة للقبلة.

قلت وأنا أضحك : - محمد أخاف ذي بدعة، انتبه.

ولا رد علي، حط مصحف جنب سريري وخرج وتركني، ولحقته أمي،

وأنا ابتسمت وأنا أتذكر المناقشات الحادة اللي كانت تدور بينا في أمور الدين.

كان دايم ينصحني ويوعظني، وأنا بالرغم من إني أحترمه إلاّ أني كنت أناقشه في أي فكرة يقولها، وأقول اللي في خاطري، وهو كان متقبّل للمناقشة ويرد برحابة صدر.

رجعت لسريري وتمددت عليه، فعلاً هالمكان أحسن من الأول، هنا أقدر أشوف الحديقة اللي برّا، وأشوف العصافير تغرد في الصبح. تذكرت شباك غرفة بنتي سارة، أكيد العصافير متجمعة عنده ألحين. يا ما أزعجتني أصوات تغريدها، وفتحت الشباك علشان أفرّقها، لا تقوم حبيبتي سارة وترتاع. يوه… وينك يا سارة؟! بكرة بتنامين في حضني إن شاء الله، وأبعوضك عن الأيام اللي قضيتها بعيدة عنّك في المستشفى، بكرة أبشم ريحتك يا عمري.

دخلت أمي، قلت:

- يمّه سارة تراها الأيام الأخيرة تجيها كوابيس، عساك وصيتي نورة عليها لا تفارقها لو دقيقة في الليل لين أجي.

قالت أمي:

- ما عليكِ أنتِ، سارة مرتاحة، فكري بنفسك بس.

تمددت على سريري وأنا أطالع الساعة على الحائط، الدكتور بيجي الساعة 10 وأبقوله إني أبطلع خلاص، ماله داعي أربك أهلي وزوجي أكثر من كذا، خاصة أخوي ماجد قرّب عرسه. وسحبت مجلة أزياء، وفتحت على صفحه الموديل اللي اخترته لزواج أخوي ماجد، واتخيلت شكلي وأنا لابسته، يوووه أبقهر كثير من البنات اللي ينافسوني في العايلة، أبكسر عينهم

وقعدت أفكر… كيف أقنع الخياطة علشان توافق تخيطه بسرعة؟! وغفيت.

وقمت على صوت أخوي محمد يقرأ قرآن عند راسي، وفتحت عيوني، وابتسمت له، قلت:

- محمد ما بعد رحت البيت؟!!! يوه وعملك؟!!!!.

مارد علي وكمّل قراية لين ختم السورة، وهذا أبو سارة زوجي الحبيب اللي مسك يدي، وقال وهو يبتسم بحنان:

- هاه العنود… عساكِ ما حسيتي بشيء؟!

استغربت من سؤاله! قلت:

- لا أنا يا خالد طيبة، ما فيني إلاّ العافية، وودي أطلع الصراحة.

قال: الله يشفيكِ.

وابتعد عني بسرعة لا أشوف دموعه، وفي هاللحظة سمعنا دقات على الباب، ودخلت الممرضة لتعلن وصول الطبيب. وفي هاللحظة زوجي نقز من مكانه كأنّه مقروص، وخرج بسرعة مثل الواحد اللي يبي يهرب، أما أنا فرحت قلت للممرضة بحماس:

- خلّيه يدخل أنا جاهزة.

ودخل الطبيب، طبيبي يشبه أخوي محمد كثير، مسلم ملتزم ملتحي ومحترم، ما أذكر مرّة إنه رفع عينه في عيني إلاّ للضرورة، وأنا أستحي منه مرّة، بس أثق فيه وأعتبره زي أخوي، قال:

- هاه كيف حالك يا العنود؟!

- الحمد لله يا دكتور، أنا اليوم أفضل يوم لي من بداية مرضي، وأبي أطلع خلاص، اشتقت لبيتي.

أخوي في هاللحظة طلع بسرعة وأمي لحقته وتركوني لحالي مع الطبيب والممرضة، الظاهر كانوا يتوقعون انفجار لغم. قال الطبيب بوجه جامد ما فيه من الإحساس ذرّه، وكأنه مو هو اللي يتكلم إلاّ كأنه يحكي بلغه هو نفسه ما يعرفها، قال:

- العنود أنا بكتبلك خروج.

ونوّر وجهي بابتسامة وأنا أدس يديني تحت الغطوة لا يشوفها الطبيب، وكمّل كلامه بوجه جامد:

- العنود أنتِ وحدة مؤمنة وأكيد عارفة إن الموت حق.

وسكت.

تسارعت أنفاسي وأنا أقول:

- إيه… كمّل يا دكتور.

>>>>>>>>>>>>>><<<<<<<<<<<<

ماذا تراه يقول الطبيب للمسكينة العنود ؟ ؟

تايعوا المقسم الثـاني ( لا هنتوا )

محبكم / ســــاري ،،،،

[% دنيـا الـولـه %]

مشكوووور


ننتظر الجزء الثاااني .....................

[قمـ الرياض ــر]

~*¤ô§ô¤*~ ساري ~*¤ô§ô¤*~

ياهلا فيك مجدداً

لا تطول علينا

ننتظر ^_^

دمت بخير

قمـ الرياض ـر

[المنسم]

مشكور اخوي ساري


وننتظر الجزء الثاني


بس لاتطول


اخوك المنسم^_^

[رهينة الشوق]

ساري ............


الحين انت ليه ما تحط الجزء الثاني ..........


وينك ؟؟؟؟

[غريب الدار]

رااااااائعه

يعطيك العافيه ساري

ننتظر التكمله

تحياتي

[ســــاري]

بدايــة اعتذر للجميع اشد الاعتذار على هذا التاخير بالردود و انزال الجزء الثاني ..

والله كنت ناوي انزل الجزء الثاني بعد يومين و الجزء الثالث كذلك بعد يومين بس ظروف حالت دون ذلك ..

ولذلك سوف اعطيكم الجزء الثاني و الثالث مرة و حده و العذر و السموحه على التقصير ..

اخوي الكربم : رجة بس رزه .. الشكر لك لمرورك الكريم و ابشر بالجزئين ..

مشرفتنا الكريمه : قمـ الرياض ــر .. يشرفني تشريفكم الكريم و أسف للتأخير .

اخوي الكربم : المنسم .. العفو اخوي واشكر لك مرورك المبهج ..

مشرفنا الكريم : غريب الدار .. والله اني خجلان منكم و منفشل بس وش اسوي كنت انتظر ابلتي الفاضلة تقولي كمل .. شرف لي مروركم الكريم ..

ابلتـي الفاضلة : رهينة الشوق .. شكلي طولت اكثر من اللازم بس كنت انتظر الاذن بالتكميل ..

مروركم ابلتي الكريمة اسعدني و سرني كثيرا ..

اخوكم و محبكم / ســـــاري ,,,,

[رهينة الشوق]

غريب الدار .. والله اني خجلان منكم و منفشل بس وش اسوي كنت انتظر ابلتي الفاضلة تقولي كمل .. شرف لي مروركم الكريم ..

0
0
0
حـــرام عليكــ ... ابلتك الفاضله ما عندها ما عند جــدي ماتدري انك متوقف عشان كذا ولا كان من اول ما قرأت القصة قالت حط الجزء الثاني ..


------------

اعتذر للجميع .. بما فيها نفســـي لاني انتظرت مثلي مثلكم ..


---------

[الطموح]

قصة مشوقة جدا جدا

إلى الجزء الثاني

شكرا ساري

[نبع الوفا]

قصه رائعه شكرا لك