مستشفى الرس العام الى أين000؟!

[الأصيل]

بسم الله
حي الله الجميع
(المعارضة تزيد من الإنتاجية وتعديل الخطأ)
المكان /إسعاف مستشفى الرس العام
الوقت /الساعة السابعة بعد مغرب يوم الجمعة الموافق 29/10/1428
أخذ الرجل ابنته الى الإسعاف عليها حرارة وتعبانة ويدور لها حل لعل الله يلطف بها
وعندما دخل الإسعاف مسك سرى أمام الإستقبال نظرا لكثرة المرضى
موظف الإستقبال شبه أمي(لا يجيد الكتابة) ونفسه على راس خشمهويناقر المراجعين
المهم الرجال أخذ وصفته بعد جهدجهيد وشينة نفس ورفعت ضغط
ذهب الى غرفة الدكتور والذي كان يأخذ الحرارة لبعض المرضى وذلك لعدم وجود ممرضات في قسم الرجال(يمكن معطينهن إجازة اليوم الجمعة) اسعاف ولا فيه ممرضات وشلون تجي... الله يستر يعني لو يجي حادث كان مالقوا أحد يسنعهم
المهم الرجال مل من الوقفة ومن اللي يخطمون على دوره ودحم مع الرجاجيل وأخذ حقه بيده..؟!
كشف الدكتور وكالعادة مضاد وفيفادول
ايه الله يعين أخذ الوصفة وسحب بنيته مع ايديته وعلى الصيدلية.....
ومع السيب والى العالم فوق بعضها متجمعين حول الصيدلية الله يستر لا تصير مضاربة؟
الحمد لله ... ستر ربك ...وشيء أهون من شيء... وكلن يصلح سيارته.
أثاري الصيدلي غير موجود والناس ينتظرونه ....؟؟؟؟؟؟؟؟!!!!!!!!!!

أيها المسؤولون عن المستشفى
الى متى الإهمال..؟
أترك التعليق لكم

[أميرة فقيرة]

ومازلنا نتابع المسلسل المأساؤي لمستشفى الرس العاااام

[فوفو حبوبو]

لا والل يقهر زود نص الدكاترة والله العظيم ما يعرفون عربي يعني ما نقدر نتفاهم معهم زين

[الأصيل]

أميرة فقيرة
فوفو حبوبو
شكرا لمروركم ولتعليقكم
للرفع

[مجرد احســاس]

مستشفى الرس العام ماعندك احد ؟؟؟؟!!!!!!!!!!!!!!!

الاستقبال شخص واحد يعني بالله تحطون شخص واحد بالاستقبال وانتم في محافظه لو انتم في قريه مشيناها بالله عليكم من يبدي ومن يخلي

طبعاً نرجع ونقول ماعندك احد...!!!!!!!!!!!!!!!!!!

الممرضات كالعاده ماعندهن اللي يعقلهن ويخليهن يحترمن النظام والمرضى الوحده سوالف مع اللي جنبها واذا جيتها عشان تكشف قامت وهجت والا نزرتك تقول انا مشغول مع مريض ...؟؟؟

انا عن نفسي كنت امس الجمعه الساعه 6 المغرب بالاسعاف انواع الزحمه والدكتوره ماندري وين رايح الظاهر راح يشرب له فنجال قهوه
تقل ماوراه مرضى صافين طابور...انا اول مادخلت الاستقبال بما انه زحمه وقدامي 4 اشخاص انتظرت لين يجي دوري والحمد لله اخذت الورقه ودخلت وبعدين على طول بالسيب ( الممر) حاطين اجهزة الكشف الحراره والضغط ==>مستشفى عام ورئيسي والظاهر وحديث البناء الظاهر ماله الا سنتين وحاطين الكشف بالممر ..؟؟؟ليه مافيه غرفة للكشف الله اعلم..!!! المهم كشفنا ورحت للدكتوره
وحنا جتني رفعة الضغط لقيت 9 حريم قبلي قلت بصبر يمكن نص ساعه وهن مخلصات يوم جلست واسلم على اللي جنبي قلت متى دورك
قلت الحين بعدين قالت لي الله يعينك استني ساعتين عشان يجي دورك قلت ليه قالت لي البنت انا من 4 العصر موجوده وتوه يجي دوري
؟؟؟!!! انا يوم دريت ان السالفه كذا قلت اتوكل على الله واروح للطايع ( البركه) اصرف علاجي بـ25 ريال وخلصت السالفه ...

بس الحق ينقال مستشفى الرس مااااااااعندك احد ..!!!!!!!!!!!!!!!

وياليت لو تصلحون استفتاء تشوفون من يمدحه من يسبه ؟؟؟اتوقع المدح يوصل 2% فقط...آآسفين على الاطاله..

[تحيى العدالة]

ليست أول مرة الصيدلي يخرج لفترات طويلة فنقول للمسؤلين هناك مهازل عند الصيدليين لا نجدهم وننتظرهم حتى نتعب

[من أجل الرس]

ولله مشكلة مستشفى لرس هذا يعني موتك موتك الله لا يعوق بشر وبس وين المسؤلين وين الرجال للي تاقف وين ولله مهزله

[الحالم]

وين التجار وين رجال الاعمال عن انشاء مستشفى اهلي ؟؟؟؟؟؟؟

الرس ماله حل الا مستشفى اهلي كبير
الله يرحم الحال يا بلد النفط

مشكور مسيووووو

[أبوصالح الدعيجي]

عزيزي

لماذا عندما لم تجد الصيدلي لم تذهب الى المدير المناوب وتبلغه

أو تقدم شكوى على نفس الموظف؟

[طرزان القشيع]

لا حياة لمن تنادي

[المطلوب]

هالحين وش تبي تستفيد من هالكلام .. الي كتبته ..

هالأعضاء يبون يسنعون المستشفى مع احترامي الشديد لهم ..

والله ما غير سب و على الفاضي ..


و راء ما قلت هالكلام لمدير المستشفى .. بعدين فيه عالم قدامك تقول .. ورى ما تذمروا مثلك !!!!!!!!!!!


او انت بالنيابة

[سيف الرعد]

الزحام
وقلة الاطباء تؤدي الى ردائة الخدمة المقدمة للمرضى
عذر جميل


اما عدم وجود ممرضات
وعدم وجود صيدلي بالصيدلية فتلك مصيبة
الله يعين اهل الرس على مستشفاهم